I Stret Long Yumi Tok Hambak o Nogat?

WANEM mining bilong dispela tok hambak? Yu save?— Bai mi stori long dispela: Wanpela taim yu bin traim long mekim wanpela samting yu no save gut long mekim? Ating yu bin traim long kikim soka bal. O ating yu bin traim long ronim baiskol. Olsem wanem? Wanpela mangi i bin lap long yu na tok, “Mi ken winim yu long mekim dispela”?— Orait, dispela mangi i tok hambak.

Yu save pilim olsem wanem taim ol arapela i mekim olsem? Yu amamas long dispela pasin?— Orait, yu ting ol arapela i pilim olsem wanem sapos yu tok hambak long yu yet?— Yu ting em gutpela pasin long tokim narapela olsem, “Mi winim yu”?— Yu ting Jehova i laikim ol man i mekim dispela pasin?—

Bikpela Tisa i save long sampela man em ol i ting ol i winim ol arapela. Ol i save tok hambak long ol yet, na ting ol arapela i olsem samting nating. Olsem na wanpela taim Jisas i kamapim wanpela stori long ol bilong soim olsem i no stret long ol i hambak long ol yet. Orait nau yumi ken harim dispela stori.

Em i stori bilong wanpela Farisi na wanpela man bilong kisim takis. Ol Farisi ol i tisa bilong lotu em planti taim ol i save mekim pasin i olsem ol i stretpela man moa, winim ol arapela. Dispela Farisi long stori bilong Jisas em i go bilong beten long tempel bilong God long Jerusalem.

Jisas i tok wanpela man bilong kisim takis em tu i go long tempel bilong beten. Planti man i no save laikim ol man bilong kisim takis. Ol i ting ol man bilong kisim takis i laik giamanim ol. Na tru tumas, planti man bilong kisim takis i bin giaman sampela taim.

Long tempel, Farisi i kirap beten olsem long God: ‘God, mi no olsem ol arapela man, olsem na mi tenkyu long yu. Mi no save stil o mekim pasin nogut. Mi no olsem dispela man bilong kisim takis. Mi stretpela man. Long olgeta wik mi save makim tupela de long mi tambu long kaikai na bai mi gat bikpela haptaim moa bilong tingting long yu. Na olgeta samting mi kisim mi save tilim long 10-pela hap na wanpela hap mi givim long yu.’ Dispela Farisi i ting em i gutpela moa, winim ol arapela, a?— Na em i tokim God tu long dispela samting.

Tasol man bilong kisim takis em i no olsem. Em i no lukluk i go antap long heven taim em i beten, nogat. Em i daunim het na i sanap longwe liklik. Em i sori long ol rong bilong em, na em i paitim bros bilong em. Em i no traim long tokim God long em i gutpela man, tasol em i beten olsem: “God, mi man bilong mekim sin. Yu ken marimari long mi.”

Yu ting God i amamas long husat? Em i amamas long dispela Farisi i tok em i gutpela man? O yu ting God i amamas long man bilong kisim takis em i sori long ol rong bilong em?—

Jisas i tok God i amamas long man bilong kisim takis. Bilong wanem? Jisas i tok: ‘Long wanem, God bai daunim olgeta man i mekim pasin i olsem ol i winim ol arapela. Tasol man i daunim em yet, God bai litimapim em.’​—Luk 18:​9-​14.

Jisas i laik skulim yumi long wanem samting?— Em i laik skulim yumi olsem i no stret long ting yumi gutpela moa long ol arapela. Ating long maus yumi no inap tok olsem, tasol pasin yumi mekim inap soim olsem yumi gat dispela kain tingting. Olsem wanem? Yu bin mekim kain pasin olsem?— Tingim aposel Pita.

Taim Jisas i tokim ol aposel bilong em olsem olgeta bai lusim em taim ol birua i holim em, Pita i hambak na tok: ‘Maski sapos olgeta narapela i lusim yu, mi bai i no inap lusim yu’! Tasol tok bilong Pita i no stret. Em i strong tumas long bilip long em yet. Em i lusim Jisas. Tasol bihain em i kirap gen long bihainim Jisas, olsem bihain yumi bai lainim long Sapta 30 bilong dispela buk.​—Matyu 26:​31-​33.

Yumi ken stori long sampela samting olsem i save kamap long nau. Ating long skul ol i mekim sampela askim long yu na wanklas bilong yu. Olsem wanem sapos yu inap bekim kwik ol askim, tasol wanklas bilong yu i no inap mekim olsem? Tru, yu bai amamas long yu save long bekim bilong ol askim. Tasol yu ting em gutpela pasin long skelim yu yet wantaim wanklas i save bekim ol askim isi isi?— Yu ting i stret long daunim narapela na long dispela rot yu mekim yu yet i luk olsem yu smat moa?—

Farisi i bin mekim olsem. Em i hambak na tok olsem em i gutpela man, winim dispela man bilong kisim takis. Tasol Bikpela Tisa i tok Farisi i no mekim stretpela pasin. Tru, wanpela man inap save gut moa long mekim sampela samting, winim narapela. Tasol dispela i no makim olsem em i gutpela man moa, nogat.

Olsem na sapos yumi gat bikpela save, winim narapela, yu ting dispela em i as na yumi ken tok hambak?— Tingim dispela. Olsem wanem? Yumi yet i bin wokim kru bilong yumi?— Nogat, God i bin givim kru long yumi wan wan. Na planti samting yumi save long en, narapela i bin lainim yumi long en. Ating yumi bin ritim sampela samting long wanpela buk. O ating wanpela i bin tokim yumi long en. Na maski sapos yumi yet i kisim save long sampela samting, yumi bin mekim long wanem rot?— Yes, long rot bilong yusim dispela kru God i bin givim long yumi.

Taim wanpela man i traim bes bilong em long mekim wanpela samting, em gutpela pasin long mekim tok i strongim em. Tokim em olsem yu laikim samting em i mekim. Ating yu ken helpim em long mekim gut moa dispela samting. Yu laik bai ol man i mekim olsem long yu tu, a?—

Sampela man i gat bikpela strong moa long ol arapela. Olsem wanem sapos yu gat bikpela strong, winim brata o susa bilong yu? Yu ting em gutpela long yu tok hambak long dispela?— Nogat. Kaikai yumi kisim i helpim yumi long kamap strong. Na God i save givim lait bilong san na ren na olgeta narapela samting bilong mekim kaikai i kamap, a?— Olsem na yumi mas tenkyu long God sapos yumi kamap strong.​—Aposel 14:​16, 17.

I no gat wanpela bilong yumi i save amamas long harim wanpela man i tok hambak long em yet, a?— Yumi mas tingim tok bilong Jisas: ‘Olgeta pasin yu laik bai ol arapela manmeri i mekim long yu, ol dispela pasin tasol yu mas mekim long ol.’ Sapos yumi mekim olsem, bai yumi no inap bihainim pasin bilong dispela Farisi i bin tok hambak long em yet long stori bilong Bikpela Tisa.​—Luk 6:​31.

Wanpela taim wanpela man i kolim Jisas olsem gutpela. Yu ting Bikpela Tisa i tok, ‘Yes, mi gutpela’?— Nogat, em i no mekim olsem. Em i tok: “God wanpela tasol em i gutpela.” (Mak 10:18) Maski Bikpela Tisa i gutpela olgeta, em i no tok hambak long em yet, nogat. Em i givim olgeta biknem long Papa bilong em, Jehova.

Olsem na yu ting i gat wanpela man em yumi ken apim nem bilong em, olsem mekim ol gutpela tok long em?— Yes, i gat. Yumi ken mekim ol gutpela tok long Man Bilong Wokim yumi, em God Jehova. Taim yumi lukim naispela sanset o sampela gutpela samting tru God i bin wokim, yumi ken tokim narapela, ‘Gutpela God bilong yumi, Jehova, em i bin wokim dispela samting!’ Oltaim yumi mas redi long toktok long ol bikpela wok Jehova i bin mekim pinis na long wok em bai mekim long bihain.