Yumi Kisim Helpim Bilong Daunim Pret

OLSEM WANEM? Yu ting em isi long mekim wok bilong Jehova?— Bikpela Tisa i no bin tok olsem, nogat. Long nait paslain long ol i kilim i dai Jisas, em i tokim ol aposel bilong em olsem: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu.”—Jon 15:18.

Pita i bin tok hambak olsem em i no inap lusim Jisas, tasol Jisas i tok long dispela nait yet Pita bai tok tripela taim olsem em i no save long Jisas. Na tru tru Pita i bin mekim olsem! (Matyu 26:31-35, 69-75) Olsem wanem dispela samting inap kamap?— Em i kamap, long wanem, Pita i pret, na ol arapela aposel tu i pret.

Yu save bilong wanem ol aposel i pret?— Ol i no bin mekim wanpela bikpela samting tru. Taim yumi save long dispela samting, dispela inap helpim yumi long mekim wok bilong Jehova maski ol man i mekim wanem tok o pasin long yumi. Tasol pastaim yumi mas skelim gen ol samting i bin kamap long laspela nait Jisas i stap wantaim ol aposel bilong em.

Pastaim, ol i mekim bung bilong Pasova. Em wanpela kaikai lain bilong God i save mekim long olgeta yia bilong tingim taim God i bin kisim bek ol long wok kalabus long Isip. Bihain long dispela, Jisas i kamapim narapela bikpela kaikai. Yumi bai stori long en long wanpela sapta i kamap bihain, na stori gut long olsem wanem dispela kaikai i helpim yumi long tingim Jisas. Bihain long dispela kaikai na bihain long Jisas i mekim sampela tok bilong strongim ol aposel, em i kisim ol i go long gaden Getsemani. Dispela i wanpela hap ol i save go planti taim long en.

Jisas i lusim ol disaipel na i go longwe liklik bilong beten. Em i tokim tu Pita, Jems, na Jon long ol i mas beten. Tasol ol i slip. Tripela taim Jisas yet i go na beten, na tripela taim em i kam bek na lukim olsem Pita na ol arapela i slip i stap! (Matyu 26:36-47) Yu save bilong wanem ol i mas beten i stap na no ken slip?— Yumi ken stori long dispela samting.

Paslain liklik long apinun, Judas Iskariot i stap long bung bilong Pasova wantaim Jisas na ol arapela aposel. Ating yu inap tingim olsem Judas i bin kamap stilman. Nau em i kamap man bilong kamapim Jisas long ol birua. Em i save long dispela hap long gaden Getsemani we Jisas i save bung wantaim ol aposel bilong em. Olsem na Judas i bringim ol soldia i go long dispela hap bilong holim Jisas. Taim ol i go kamap, Jisas i askim ol: “Yupela i painim husat?”

Ol soldia i bekim tok olsem: “Jisas.” Jisas i no pret, olsem na em i tok: “Em mi tasol.” Ol soldia i kirap nogut long Jisas i gat strongpela bel na ol i surik i go bek na pundaun long graun. Jisas i tok: ‘Sapos yupela i painim mi, orait larim ol aposel bilong mi i go.’—Jon 18:1-9.

Taim ol soldia i holim Jisas na pasim han bilong em, ol aposel i pret na ol i ranawe. Tasol Pita na Jon ol i laik save long ol samting bai kamap, olsem na tupela i bihainim ol. Ol i bringim Jisas i go long haus bilong hetpris Kaiafas. Hetpris i save long Jon, olsem na man i bosim dua bilong banis i larim em na Pita i go insait long banis bilong hetpris.

Ol pris i kam bung long haus bilong Kaiafas bilong mekim kot. Ol i laik bai ol man i mas kilim i dai Jisas. Olsem na ol i bringim ol man i kam bilong sutim ol tok giaman long em. Ol man i paitim Jisas na solapim em. Pita i stap klostu taim ol dispela samting i wok long kamap.

Wanpela yangpela wokmeri, em i bosim dua bilong banis na i larim Pita na Jon i kam insait, em i lukim Pita na i tok: “Yu tu yu bin i stap wantaim Jisas”! Tasol Pita i tok em i no save liklik long Jisas. Bihain liklik, narapela yangpela meri i luksave long Pita na em i tokim ol man i sanap i stap olsem: “Dispela man i bin i stap wantaim Jisas.” Pita i tok gen olsem em i no save long Jisas. Bihain gen, sampela man i lukim Pita na ol i tokim em: “Tru tumas, yu man bilong lain bilong ol.” Long namba tri taim Pita i tok: “Tru antap, mi no save long dispela man”! Pita i mekim tok tru antap olsem em i tok tru, na Jisas i tanim na i lukluk long em.—Matyu 26:57-75; Luk 22:54-62; Jon 18:15-27.

Yu save bilong wanem Pita i bin giaman?— Yes, em i pret. Tasol bilong wanem em i pret? Em i no bin mekim wanem bilong strongim bel bilong em? Tingim: Jisas i bin mekim wanem bilong kisim strong?— Em i bin beten long God, na God i bin helpim em long sanap strong. Na tingim, inap tripela taim Jisas i bin tokim Pita long beten na was i stap. Tasol wanem samting i bin kamap?—

Long dispela tripela taim, Pita i bin slip. Em i no beten, na em i no was i stap. Olsem na em i no bin redi i stap taim ol i holim Jisas. Bihain long hap bilong harim kot, taim ol i paitim Jisas na stretim rot bilong kilim em i dai, Pita i pret. Tasol sampela aua paslain long dispela, Jisas i bin tokim ol aposel long wet long wanem samting bai kamap?— Jisas i bin tokim ol olsem ol manmeri bilong dispela graun i birua long em, na ol bai birua long ol disaipel tu.

Orait nau yumi ken tingim samting inap kamap long yumi em i wankain long samting i bin kamap long Pita. Tingim olsem yu stap long klasrum taim ol arapela i sutim tok long ol lain i no save salutim fleg o ol i no save tingim Krismas. Olsem wanem sapos wanpela i askim yu olsem: “I tru olsem yu no save salutim fleg?” O ol arapela i tok: “Mipela i harim olsem yu no save tingim Krismas!” Olsem wanem? Bai yu pret long tok tru long ol?— Bai yu gat laik long giaman, olsem Pita i bin mekim?—

Bihain, Pita i sori tru long em i bin tok olsem em i no save long Jisas. Taim em i luksave long samting em i bin mekim, em i go ausait na krai. Yes, em i bin tanim bel na kirap gen long bihainim Jisas. (Luk 22:32) Orait tingim: Wanem samting inap helpim yumi na yumi no pret olgeta na mekim kain tok olsem Pita i bin mekim?— Tingim, Pita i no bin beten na was i stap. Olsem na yu ting yumi mas mekim wanem bilong stap disaipel bilong Bikpela Tisa?—

Yumi mas beten askim Jehova long helpim yumi. Taim Jisas i beten, yu save God i bin mekim wanem bilong helpim em?— God i bin salim wanpela ensel bilong strongim em. (Luk 22:43) Yu ting ol ensel bilong God inap helpim yumi?— Baibel i tok: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” (Song 34:7) Tasol bilong kisim helpim long God, yumi mas beten na mekim sampela samting moa. Yu save long wanem ol samting moa yumi mas mekim?— Jisas i tokim ol disaipel bilong em long was i stap na no ken slip. Yu ting wanem samting inap helpim yumi long mekim olsem?—

Yumi mas putim gut yau long ol tok i kamap long ol miting Kristen na tingim gut ol tok yumi ritim long Baibel. Tasol yumi gat wok tu long beten oltaim long Jehova na askim em long helpim yumi long mekim wok bilong em. Sapos yumi mekim olsem, yumi bai kisim helpim bilong daunim pret. Na yumi bai amamas taim yumi gat rot bilong tokim ol arapela long Bikpela Tisa na Papa bilong em.