Husat Inap Mekim Gut Bel Bilong Yumi?

OLSEM WANEM? Sampela taim yu save bel hevi na pilim olsem yu stap wanpis?— Yu save tingting olsem i gat man i laikim yu o nogat?— Sampela pikinini i save pilim olsem. Tasol God i tok promis olsem: “Mi no inap tru lusim tingting long yupela.” (Aisaia 49:15) Em gutpela samting tru bilong tingting long en, a?— Yes, God Jehova i laikim tru yumi!

Wanpela man bilong raitim Baibel i tok: “Maski papa na mama i givim baksait long mi, Bikpela bai i lukautim mi.” (Song 27:10) Yumi save long dispela tok na em inap mekim gut tru bel bilong yumi, a?— Yes, Jehova i tokim yumi olsem: “Yupela i no ken pret, long wanem, . . . mi stap wantaim yupela. . . . Bai mi helpim yupela.”—Aisaia 41:10.

Tasol sampela taim Jehova i save larim Satan i kamapim hevi long yumi, na tu, em i save larim Satan long traim ol wokman bilong Em. Wanpela taim Satan i bin putim bikpela hevi tru long Jisas, olsem na Jisas i singaut long Jehova: “God bilong mi, God bilong mi, bilong wanem yu lusim mi?” (Matyu 27:46) Maski Jisas i karim pen na hevi, em i save olsem Jehova i laikim em. (Jon 10:17) Tasol Jisas i save tu olsem God i larim Satan i traim ol wokman bilong Em na givim pen na hevi long ol. Long narapela sapta bai yumi stori long as na God i larim Satan i mekim ol dispela samting.

Taim yumi stap liklik pikinini, yumi save pret sampela taim, a? Olsem: Yu bin lus wanpela taim?— Yu bin pret?— Planti pikinini bai pret. Wanpela taim Bikpela Tisa i stori long wanpela samting i lus. Tasol dispela samting i lus em i no wanpela pikinini, nogat. Em i wanpela sipsip.

Long sampela samting, yu olsem wanpela sipsip. Bilong wanem yumi tok olsem? Ol sipsip i no bikpela o strong tumas. Na i mas i gat man bilong was long ol na lukautim ol. Man bilong mekim dispela wok em wasman bilong sipsip.

Jisas i stori long wanpela wasman bilong sipsip i gat 100 sipsip. Tasol wanpela sipsip i lus. Ating em i laik lukim samting i stap long hapsait bilong maunten. Tasol i no longtaim na dispela sipsip i stap longwe tru long ol arapela. Yu inap pilim tingting bilong dispela sipsip taim em i lukluk raun na lukim olsem em i stap wanpis?—

Wasman bilong sipsip bai mekim wanem taim em i luksave olsem wanpela sipsip i lus? Yu ting em bai tok em asua bilong dispela sipsip, olsem na em bai no wari tumas long en? O em bai lusim 99 sipsip bilong em long wanpela gutpela hap na go painim dispela wanpela sipsip? Yu ting i gutpela long mekim bikpela hatwok bilong helpim dispela wanpela sipsip?— Olsem wanem? Sapos yu yet i dispela sipsip i lus, yu laik bai wasman bilong sipsip i kam painim yu?—

Wasman bilong sipsip i laikim tumas olgeta sipsip bilong em, na em i laikim tu dispela sipsip i lus. Olsem na em i go painim dispela sipsip. Tingim bikpela amamas bilong dispela sipsip taim em i lukim wasman i kam! Na Jisas i tok wasman bilong sipsip i amamas tru long em i painim pinis sipsip bilong em. Amamas bilong em long dispela sipsip i lus i winim amamas bilong em long 99 sipsip i no bin lus. Orait, husat i olsem dispela wasman long stori bilong Jisas? Husat i save tingim tru yumi olsem dispela wasman i tingim sipsip bilong em?— Jisas i tok Papa bilong em long heven i save tingim yumi. Na Papa bilong em, em Jehova.

God Jehova em i Bikpela Wasman bilong lain bilong em. Em i laikim olgeta man i mekim wok bilong em, na em i laikim tu ol yangpela olsem yu. Em i no laik bai wanpela bilong yumi i kisim pen o bagarap. Em i gutpela tru long save olsem God i tingim tru yumi!—Matyu 18:12-14.

Olsem wanem? Yu bilip tru long God Jehova?— Yu tingim em olsem wanpela man i stap tru?— Tru, yumi no inap lukim Jehova, long wanem, em i Spirit. Em i gat bodi yumi no inap lukim. Tasol em i stap tru, na em inap lukim yumi. Em i save long wanem taim yumi mas kisim helpim. Na yumi inap toktok long em long rot bilong beten, wankain olsem yumi save toktok wantaim arapela man long graun. Jehova i laik bai yumi mekim olsem.

Olsem na sapos yu bel hevi o pilim olsem yu stap wanpis, yu mas mekim wanem?— Toktok long Jehova. Go klostu long em, na em bai helpim yu na mekim gut bel bilong yu. Tingim olsem Jehova i laikim yu maski yu pilim olsem yu stap wanpis. Yumi ken kisim Baibel bilong yumi. Long Buk Song 23, kirap long ves 1, Baibel i tok: “Bikpela em i wasman bilong mi. Olsem na mi no inap sot long wanpela samting. Em i mekim mi i slip long gutpela gras. Na em i bringim mi i go long ol liklik wara na mi dring na mi malolo.”

Lukim tok man bilong raitim song i kamapim long ves 4: “Maski mi wokabaut long ples nogut na bikpela tudak, mi no ken pret long samting nogut, long wanem, yu stap wantaim mi. Mi lukim yu i holim stik ol wasman bilong sipsip i save holim, olsem na bel bilong mi i stap isi.” Ol man God bilong ol em Jehova, ol i pilim olsem. Ol i stap belgut taim hevi i painim ol. Olsem wanem? Yu save pilim olsem?—

Olsem gutpela wasman i save lukautim gut ol sipsip bilong em, Jehova tu i save lukautim gut lain bilong em. Em i soim ol long stretpela rot long bihainim, na ol i amamas long bihainim em. Maski i gat planti hevi long hap ol i stap long en, ol i no ken pret. Wasman i save yusim stik bilong em long lukautim ol sipsip na bai ol narapela animal i no ken bagarapim ol. Baibel i stori long olsem wanem yangpela wasman, Devit, i bin lukautim ol sipsip bilong em na laion na bea i no bin bagarapim ol. (1 Samuel 17:34-36) Na lain bilong God i save olsem Jehova bai lukautim ol tu. Ol i no pret, long wanem, God i stap wantaim ol.

Jehova i laikim tumas ol sipsip bilong em, na em i save lukautim ol gut. Baibel i tok: ‘Olsem wasman bilong sipsip, em bai soim rot long ol sipsip bilong em. Em bai putim ol pikinini sipsip long bros bilong em.’—Aisaia 40:11.

Olsem wanem? Yu amamas long save olsem Jehova i gat kain pasin olsem?— Yu laik stap olsem sipsip bilong em?— Ol sipsip i save harim maus bilong wasman bilong ol. Ol i save stap klostu long em. Olsem wanem? Yu save harim tok bilong Jehova?— Yu save stap klostu long em?— Sapos yu mekim olsem, orait yu no ken pret. Jehova bai stap wantaim yu.