God i Tingim Pikinini Bilong Em

JISAS i krai taim pren bilong em Lasarus i dai. Yu ting Jehova i bel hevi taim Jisas i karim pen na i dai?— Baibel i tok God inap “bel hevi” long ol samting i kamap.—Song 78:​40, 41; Jon 11:35.

Olsem wanem? Yu inap tingim pen Jehova i bin pilim taim em i lukim gutpela Pikinini bilong em i dai?— Jisas i save olsem God i no inap lusim tingting long em. Olsem na long laspela tok em i mekim paslain long em i dai, em i tok: “Papa, mi putim [laip] bilong mi long han bilong yu.”​—Luk 23:46.

Jisas i save olsem em bai kirap bek, God i no inap larim em i stap long “ples bilong ol man i dai pinis.” Taim Jisas i kirap bek pinis, aposel Pita i kamapim gen tok i stap long Baibel i stori long Jisas, em i tok: “God bai i no larim em i stap long ples bilong ol man i dai pinis, na God bai i no larim em i sting long matmat.” (Aposel 2:​31; Song 16:10) Bodi bilong Jisas i no bin stap longpela taim long matmat na bai em i sting o smel.

Taim Jisas i stap long graun, em i bin tokim ol disaipel bilong em olsem em bai i no stap longpela taim long matmat. Em i tokim ol olsem ol bai ‘kilim em i dai na long de namba 3 em bai kirap bek.’ (Luk 9:​22) Olsem na ol disaipel i no ken kirap nogut taim Jisas i kirap bek. Tasol olsem wanem? Ol i bin kirap nogut?— Yumi painimaut dispela.

Long 3 klok samting long Fraide apinun Bikpela Tisa i dai long diwai pos. Josep, em i wanpela maniman na memba bilong kaunsil, na em tu i bilip long Jisas tasol em i no kamapim dispela long ples klia. Taim em i harim olsem Jisas i dai pinis, em i go long Pailat, em gavena bilong Rom. Em i askim Pailat sapos em inap kisim bodi bilong Jisas long pos na planim em. Bihain, Josep i karim bodi bilong Jisas i go long wanpela gaden i gat matmat long en.

Em i putim bodi long matmat, na bihain ol i pusim wanpela bikpela ston i go pasim dua bilong matmat. Olsem na matmat i pas. Nau em namba 3 de, em Sande. San i no kamap yet, olsem na ples i tudak. Ol man i sanap was i stap long matmat. Ol hetpris i bin salim ol long mekim dispela wok. Yu save bilong wanem ol i mekim olsem?—

Ol pris tu i bin harim Jisas i tok olsem em bai kirap bek. Olsem na ol i tokim ol soldia long was long matmat, ol i laik pasim rot bilong ol disaipel long stilim bodi bilong Jisas na tok olsem em i kirap bek pinis. Nau wantu, graun i guria. Ples i tudak, tasol wanpela lait i kamap. Em ensel bilong Jehova! Ol soldia i pret nogut tru na ol i no inap surik liklik. Ensel i go long matmat na rausim ston. Matmat i stap nating!

Yes, em olsem aposel Pita i tok long bihain: “Dispela man Jisas, God i kirapim em pinis long matmat.” (Aposel 2:​32) God i kirapim bek Jisas na givim em wankain bodi olsem em i bin gat paslain long em i kam long graun. Em i kirap bek long bodi spirit olsem ol ensel. (1 Pita 3:​18) Olsem na bilong ol man i ken lukim Jisas, em i mas kisim bodi olsem bilong ol man. Em i bin mekim olsem o nogat?— Yumi lukim.

Nau san i wok long kam antap. Ol soldia i go pinis. Maria bilong Makdala na ol arapela meri em ol i disaipel bilong Jisas, ol i go long matmat. Ol i toktok namel long ol yet olsem: ‘Husat bai helpim yumi long rausim dispela bikpela ston?’ (Mak 16:3) Tasol taim ol i go kamap long matmat, ston i raus pinis. Na matmat i stap nating! Bodi bilong Jisas i no stap moa! Kwiktaim, Maria bilong Makdala i ran i go long painim sampela aposel bilong Jisas.

Ol arapela meri i stap long matmat. Ol i tingting olsem: ‘Bodi bilong Jisas i stap we?’ Wantu tasol tupela man i kamap, klos bilong ol i gat bikpela lait long en. Em ol ensel! Ol i tokim ol meri olsem: ‘Bilong wanem yupela i painim Jisas long hia? Em i kirap bek pinis. Go kwiktaim na tokim ol disaipel bilong em.’ Yu ken piksaim long tingting ol dispela meri i ran spit tru i go! Taim ol i go, ol i bungim wanpela man long rot. Yu save em i husat?—

Dispela man em Jisas, em i bin kisim bodi olsem bilong man! Em tu i tokim ol meri: ‘Go na tokim ol disaipel bilong mi.’ Ol meri i amamas nogut tru. Ol i go painim ol disaipel na tokim ol olsem: ‘Jisas i stap laip! Mipela i lukim em!’ Maria i tokim pinis Pita na Jon olsem matmat i stap nating. Nau ol i go long matmat, olsem yu ken lukim long piksa. Ol i lukluk long ol laplap ol i bin pasim Jisas long en, tasol ol i paul. Ol i laik bilip olsem Jisas i stap laip gen, tasol dispela samting i gutpela tumas na i hatwok long ol i ting olsem em i bin kamap tru tru.

Long dispela Sande yet, Jisas i kamap long tupela disaipel em ol i wokabaut long rot i go long ples Emeus. Jisas i wokabaut na toktok wantaim ol, tasol ol i no luksave long em, long wanem, em i no gat wankain bodi olsem em i bin gat long bipo. Taim Jisas i kaikai wantaim ol na i beten, long dispela taim ol i luksave long em. Ol disaipel i amamas nogut tru na ol i ran hariap planti kilomita i go bek long Jerusalem! Ating bihain liklik long dispela, Jisas i kamap long Pita bilong soim olsem Em i stap laip.

Bihain, long nait bilong dispela Sande yet, planti disaipel i bung i stap long wanpela rum. Ol dua i pas. Wantu tasol Jisas i stap namel long ol! Nau ol i save olsem tru tru Bikpela Tisa i stap laip gen. Tingim bikpela amamas bilong ol!​—Matyu 28:​1-​15; Luk 24:​1-​49; Jon 19:38–​20:21.

Insait long 40 de Jisas i kisim narapela narapela bodi bilong soim ol disaipel olsem em i stap laip. Bihain long dispela em i lusim graun na i go bek long Papa bilong em long heven. (Aposel 1:​9-​11) I no longtaim na ol disaipel i kirap tokim olgeta man olsem God i bin kirapim bek Jisas long matmat. Maski ol pris i paitim ol na kilim i dai sampela, ol disaipel i wok yet long autim tok. Ol i save olsem sapos ol i dai, God bai tingim ol olsem em i bin tingim Pikinini bilong em.

Ol disaipel bilong Jisas long pastaim ol i narapela kain tru long planti man long nau! Long sampela kantri, ol manmeri i save tingim ol rabit bilong Ista na kala kala kiau bilong Ista long dispela taim bilong yia Jisas i bin kirap bek long en. Tasol Baibel i no stori liklik long ol rabit na kiau bilong Ista. Em i stori long pasin bilong mekim wok bilong God.

Yumi inap bihainim pasin bilong ol disaipel bilong Jisas na tokim ol man olsem God i bin mekim gutpela samting tru taim em i kirapim bek Pikinini bilong em. Yumi no ken pret, maski ol man i tok ol bai kilim yumi i dai. Sapos yumi dai, Jehova bai tingim yumi na kirapim bek yumi olsem em i bin mekim long Jisas.

Yumi amamas long save olsem God i tingim ol man i mekim wok bilong em na em bai kirapim bek ol, a?— Taim yumi save long ol dispela samting, dispela i mas kirapim yumi long kisim save long olsem wanem yumi inap mekim God i amamas. Olsem wanem? Yu bin save olsem yumi inap mekim God i amamas?— Yumi ken stori long dispela long sapta i kamap bihain long dispela.