“Ol i Stap Olsem Tasol”

PASIN bilong givim baksait long ol tok lukaut inap kamapim bikpela hevi.

Long Darwin, Australia, ol man i wok long redim ol samting bilong Krismas long 1974, taim ol alam i krai bilong toksave olsem bikpela win na ren i laik kam. Tasol inap 30 yia pinis bikpela win na ren i no bin bagarapim Darwin. Ating long dispela taim tu bagarap i no inap kamap, a? Planti manmeri i no ting bagarap bai kamap, tasol nau ol strongpela win i kirap rausim rup na banis bilong ol haus ol manmeri i hait i stap insait long en. Long de bihain, taun i bagarap pinis.

Long Kolambia long Novemba 1985, wanpela volkeno i pairap. Ais i tanim i kamap wara na i kamapim bikpela graun malumalum i karamapim winim 20,000 manmeri bilong taun Armero. Olsem wanem? Ol man i bin kisim tok lukaut long samting i laik kamap? Maunten i bin guria inap sampela mun. Tasol ol manmeri bilong Armero i lain pinis long stap klostu long volkeno, olsem na planti ol i no wari long dispela samting. Ol bikman i kisim tok lukaut long klostu nau bagarap bai kamap, tasol ol i no mekim planti toksave long dispela samting long ol manmeri. Ol tok i kamap long redio bilong mekim gut bel bilong ol man na bai ol i no ken wari. Ol i yusim saun sistem bilong sios bilong tokim ol man long stap isi. Long apinun, maunten i pairap bikpela inap tupela taim. Olsem wanem? Sapos yu bin stap long dispela hap, bai yu lusim ol kago bilong yu na ranawe? Wan wan man tasol i bin traim long mekim olsem taim rot i op yet long ranawe.

Planti taim ol saveman bilong skelim graun inap tokaut long wanem hap stret guria bai kamap long en. Tasol planti taim ol i no inap tokaut long wanem taim dispela samting bai kamap. Long 1999, long olgeta hap bilong graun inap 20,000 manmeri i bin dai long ol guria. Planti bilong ol dispela man i bin dai, ol i ting dispela samting i no inap painim ol.

Yu Mekim Wanem Taim God Yet i Givim Tok Lukaut?

Bipo yet Baibel i bin stori long ol samting bai makim taim bilong las de. Taim Baibel i tok long dispela taim, em i kirapim yumi long tingim “taim bilong Noa.” “Taim bikpela tait i no kamap yet,” ol manmeri i bisi long mekim ol samting bilong wan wan de, tasol ating ol i wari tu long pasin bilong pait na bagarapim man i bin stap long dispela taim. Long rot bilong wokman bilong em Noa, God i givim tok lukaut long ol, tasol “ol i stap olsem tasol i go inap long taim bikpela tait i kamap na i pinisim olgeta dispela manmeri.” (Matyu 24:​37-39) Sapos yu bin stap long dispela taim, bai yu putim gut yau long dispela tok lukaut? Yu save mekim olsem long nau?

Tingim sapos yu bin stap long Sodom, klostu long raunwara Detsi, long taim bilong Lot, em pikinini bilong brata bilong Abraham. Dispela hap i olsem wanpela paradais. Taun Sodom i gat planti bisnis samting. Ol man i no wari long ol samting. Long taim bilong Lot, “ol i wok long kaikai na dring i stap na ol i baim na salim ol samting na ol i planim ol gaden na ol i wokim ol haus.” Na tu, ol man bilong dispela hap i mekim pasin pamuk nogut tru. Yu ting yu bai harim tok lukaut taim Lot i tokaut long pasin nogut bilong ol man? Yu bai putim yau taim em i tokim yu olsem God i tingting pinis long bagarapim taun Sodom? O bai yu ting em i tok nating tasol, olsem tupela man i laik maritim ol pikinini meri bilong Lot i bin mekim? O bai yu kirap lusim dispela hap, tasol bihain tanim na lukluk i go bek olsem meri bilong Lot i bin mekim? Maski ol arapela i no bin bilip long dispela tok lukaut, long de Lot i lusim Sodom “paia wantaim ston salfa i pundaun long skai olsem ren, na i bagarapim olgeta manmeri.”​—⁠Luk 17:​28, 29.

Planti man long taim bilong yumi i stap olsem tasol. Tasol ol dispela stori i stap long Tok Bilong God bilong givim tok lukaut long yumi na bilong kirapim yumi long WAS I STAP!

[Blok/Piksa long pes 22]

Tru Tru Bikpela Tait i Bin Kamap?

Planti saveman i tok Nogat. Tasol Baibel i tok Yes.

Jisas Krais yet i bin toktok long dispela samting, na em i stap laip taim Bikpela Tait i kamap, em i stap long heven na lukluk i stap.

[Blok/Piksa long pes 23]

Tru Tru Sodom na Gomora i Bagarap?

Ol samting bilong bipo ol saveman i bin painim i kamapim klia olsem dispela samting i bin kamap.

Ol buk ol saveman i bin raitim i stori long dispela.

Jisas Krais i bin tok long dispela samting, na 14 narapela narapela buk bilong Baibel i stori long en.