Hau Bai Mi Kamap Pren Bilong God?

Wanpela hevi i painim Jeremy na nau em i luksave olsem pasin bilong i stap pren bilong God em bikpela samting. Em i tok: “Taim mi gat 12-pela krismas papa i lusim mipela. Wanpela nait mi slip long bet na mi beten long Jehova, mi askim em long papa i mas kam bek.”

Long dispela taim bilong hevi, Jeremy i kirap ritim Baibel bilong em. Taim em i ritim, em i lukim tok bilong Buk Song 10:14, na em i pilim tru dispela tok. Dispela ves i tok long Jehova olsem: “Ol man i kisim hevi i save go long yu bilong kisim helpim; yu save helpim pikinini i no gat papa.” Jeremy i tok: “Mi pilim olsem Jehova i toktok long mi na em i tokim mi olsem em bai helpim mi; em i Papa bilong mi. Em gutpela papa tru.”

MASKI yu gat wankain hevi olsem Jeremy o nogat, Baibel i tok olsem Jehova i laik bai yu stap pren bilong em. Baibel i tok: “Yupela i mas i go klostu long God, na em bai kam klostu long yupela.” (Jems 4:8) Wanem mining bilong dispela tok? Tru, yu no inap lukim God—na em i no wankrismas bilong yu—tasol Jehova God i invaitim yu long stap pren bilong em!

Bilong i stap pren bilong God, yu mas mekim sampela samting. Yumi ken tok piksa olsem: Sapos yu gat wanpela plaua, em yet i no inap gro, yu yet i mas mekim sampela samting. Olsem, yu mas givim wara long en long olgeta taim, na putim long wanpela hap we em inap kamap gut. Na em wankain tasol long pasin pren bilong yu wantaim God. Tasol hau bai yu mekim pasin pren bilong yu wantaim God i kamap strong?

Stadi Em Bikpela Samting

Bilong i stap pren bilong wanpela, i gat tupela samting yu mas mekim—yu mas putim yau na toktok. Dispela i wankain tu long pasin pren wantaim God. Pasin bilong ritim na stadi long Baibel i olsem yumi putim yau long God i toktok long yumi.—Buk Song 1:2, 3.

Ating stadi i no feiveret samting yu laik mekim. Planti yangpela i laik watsim TV, pilai gem, na raun wantaim ol pren. Tasol sapos yu laik i stap pren bilong God i gat sampela samting yu mas mekim. Yu mas putim yau long em long rot bilong stadi long Baibel.

Pasin bilong stadi long Baibel, em i no wanpela wok. So no ken wari, yu inap lain long enjoim—maski sapos em i no pasin bilong yu. Fes samting yu mas makim taim bilong stadi. Wanpela gel, nem bilong em Lais, i tok: “Mi gat sediul, fes samting long olgeta moning mi save ritim wanpela sapta bilong Baibel. Maria i gat 15 krismas i bihainim narapela rot. Em i tok: “Long olgeta nait paslain long mi slip, mi save ritim wanpela hap bilong Baibel.”

Bilong statim program bilong yu long stadi, lukim boks nem bilong en, “ritim na skelim gut Baibel.” Na raitim wanem taim long de yu laik lusim 30 minit samting long stadi long Baibel.

․․․․․

Pasin bilong wokim sediul em kirap tasol long stadi program bilong yu. Taim yu kirap long ritim Baibel, bai yu luksave olsem em i no isi long ritim Baibel. Ating bai yu wanbel long tok bilong Jezreel, em i gat 11-pela krismas, em i tok: “Sampela hap bilong Baibel i hatwok long kliagut long en na i no interesting. Sapos yu pilim olsem, no ken givap. Oltaim tingim olsem, taim yu stadi long Baibel, em taim bilong yu putim yau long pren bilong yu, Jehova God. Sapos yu gat dispela tingting, bai yu amamas long mekim stadi bilong yu long Baibel!

Beten i Bikpela Samting

Beten em rot yu inap toktok wantaim God. Tingim olsem em wanpela gutpela presen! Yu inap toktok wantaim Jehova God long kain kain taim. Oltaim em i save redi long putim yau long yu. Na moa yet, em i laik harim tingting bilong yu. Olsem na Baibel i tok: “Long olgeta samting, kamapim ol askim bilong yupela long God, mekim long rot bilong ol beten, na long ol prea we yupela i beten strong, na long ol beten bilong tok tenkyu long God.”—Filipai 4:6.

Olsem skripsa i kamapim, i gat planti samting yu toktok wantaim Jehova long en. Yu ken toktok wantaim em long ol wari bilong yu na ol hevi bilong yu. Na tu, yu ken tok tenkyu long em long ol samting em i givim yu. Taim ol pren bilong yu i mekim wanpela samting long yu, yu save tok tenkyu long ol, a? Olsem tasol yu ken tok tenkyu long Jehova bikos em i mekim planti samting moa long yu winim ol pren bilong yu.—Buk Song 106:1.

Daunbilo, yu ken raitim ol samting yu tenkyu long Jehova long en.

․․․․․

Ating sampela taim yu tingting planti na wari long sampela samting. Buk Song 55:22 i tok: “Olgeta hevi yu karim, yu mas putim long han bilong Jehova, na em bai strongim yu. Em i no inap larim stretpela man i pundaun.”

Long ol dispela lain, raitim sampela samting bilong yu yet em yu laik beten long en.

․․․․․

Sampela Samting i Kamap Long Yu Yet

I gat narapela samting long pasin pren bilong yu wantaim God em yu mas tingim. Man bilong raitim Buk Song, Devit, em i tok: “Yupela i mas traim na lukim na bai yupela i save olsem Jehova i gutpela.” (Buk Song 34:8) Taim Devit i raitim Buk Song 34, i gat wanpela hevi i painim em na em i pret nogut tru. Em i wok long ranawe bikos King Sol i laik kilim em i dai. Olsem na em i ranawe i go hait long hap bilong ol birua bilong em, ol Filistia. Na ol i laik kilim em i dai, so Devit i ekt olsem em i longlong na bai em i ken ranawe.—1 Samuel 21:10-15.

Devit i givim biknem long Jehova i helpim em long ranawe. Na em i no givim biknem long em yet. Long dispela song yumi kamapim tok bilong en, Devit i tok: “Mi prea long Jehova na em i harim prea bilong mi. Em i rausim olgeta pret bilong mi, na mi no pret moa.” (Buk Song 34:4) Devit i lukim hau Jehova i helpim em long taim bilong hevi, olsem na em i tokim ol narapela long “traim na lukim na bai yupela i save olsem Jehova i gutpela.”a

Yu inap tingim wanpela samting i painim yu na i soim olsem Jehova i tingim yu? Sapos olsem, raitim daunbilo. Klu: I no olsem yu mas stori long wanpela bikpela samting i bin painim yu. Traim long tingim ol gutpela samting i save painim yu long wan wan de. Ating sampela yu no tingim olsem em i bikpela samting.

․․․․․

Ating papamama bilong yu i skulim yu long Baibel. Sapos olsem, dispela em wanpela blesing. Tasol yu yet i mas mekim sampela samting bilong kamap pren bilong God. Sapos yu no mekim olsem yet, yu ken yusim ol tok i stap long dispela sapta bilong helpim yu long mekim olsem. Jehova bai blesim ol samting yu mekim. Baibel i tok: “Wok yet long askim, na yupela bai kisim; wok yet long painim, na yupela bai lukim.”—Matyu 7:7.

[Futnot]

BIKPELA SKRIPSA

“Ol man i hangre long kisim save long God, ol i ken amamas.”—Matyu 5:3.

TRAIM DISPELA

Yu ken ritim 4-pela pes bilong Baibel long wan wan de, na yu bai pinisim Baibel olgeta insait long wanpela yia.

YU SAVE LONG DISPELA . . . ?

Yu ritim dispela buk na yu bihainim ol tok bilong Baibel i stap long en, na dispela i soim olsem Jehova i tingim yu.—Jon 6:44.

EKSEN PLEN!

Bilong pesenel Baibel stadi bilong mi i helpim mi, mi bai ․․․․․

Bilong mi ken beten long olgeta taim, mi bai ․․․․․

Samting mi laik askim papamama bilong mi long en long dispela topik em ․․․․․

YU TING WANEM?

● Hau bai yu inap enjoim pesenel stadi bilong yu long Baibel?

● Wai na Jehova i laik harim beten bilong ol sinman?

● Hau bai yu mekim beten bilong yu i kamap gutpela moa?

[Bikpela Tok]

Taim mi liklik, mi save ripitim ol seim toktok long beten bilong mi. Nau mi traim long tingim ol gutpela samting na ol hevi bilong wan wan de. Dispela i mekim na mi no ripitim ol wankain tok long ol beten bilong mi.”​—Eve

[Blok/Piksa]

Ritim na Skelim Gut Baibel

1. Makim wanpela stori bilong Baibel yu laik ritim. Beten long kisim savetingting na bai yu kliagut long dispela stori yu ritim.

2. Ritim gut dispela stori. No ken hariap. Taim yu rit, piksaim long tingting ol samting i kamap. Yu ken mekim olsem: Traim long lukim ol samting i kamap, harim toktok ol man i mekim, smelim ol samting, testim ol kaikai, na kain samting olsem. Long dispela rot yu bai pilim dispela stori!

3. Tingim stori yu ritim. Givim ol dispela askim long yu yet:

● Wai na Jehova i putim dispela stori long Baibel?

● Wanem ol man i stap olsem gutpela eksampel long bihainim, na wanem ol man em pasin bilong ol i stap olsem tok lukaut?

● Wanem ol skul mi inap kisim long dispela stori?

● Dispela stori i skulim mi olsem wanem long Jehova, na pasin bilong em long mekim ol samting?

4. Mekim sotpela beten long Jehova. Tokim em long samting yu lainim long dispela stori, na hau yu bai bihainim long laip bilong yu. Oltaim tok tenkyu long em long gutpela presen em i givim long yu—em Tok bilong em, em Baibel Holi!

[Piksa]

“Tok bilong yu i olsem lam i stiaim lek bilong mi, na i olsem lait bilong soim rot long mi.”—Buk Song 119:105.

[Blok/Piksa]

Makim Ol Samting i Mas i Stap Nambawan

Yu bisi na yu no gat taim long beten? No gat taim bilong mekim Baibel stadi bilong yu? Orait tingim, wanem samting i mas i stap nambawan samting long yu.

Traim dispela eksperimen: Kisim wanpela baket na putim sampela bikpela ston insait long en. Na pulapim baket long wesan i go olgeta antap long maus bilong en. Nau yu gat baket i pulap long ston na wesan.

Nau rausim ston na wesan long baket. Nau senisim: Putim wesan i go insait pastaim, na bihain putim ston i go insait long baket. Ating yu lukim i no gat spes, a? Em bikos yu putim wesan pastaim na i kisim olgeta spes.

Yu lainim wanem samting? Baibel i tok: “Skelim gut wanem ol samting i bikpela samting moa.” (Filipai 1:10) Sapos yu putim ol liklik samting, olsem amamas, i stap nambawan samting, bai yu no gat taim long mekim ol bikpela samting—olsem ol samting bilong lotu. Tasol sapos yu bihainim dispela tok bilong Baibel, bai yu lukim olsem yu gat taim bilong mekim ol wok bilong Kingdom, na yu gat taim bilong amamas tu. So em dipen long wanem samting yu putim insait long baket fes!

[Piksa]

Olsem plaua, yu yet i mas mekim sampela samting bilong mekim pasin pren bilong yu wantaim God i kamap strong