HAP 4

Rot Bilong Bosim Gut Mani

“Kisim gutpela tingting pastaim na bai wok . . . i go het.”—Sindaun 20:18

Yumi olgeta i nidim mani long lukautim famili long ol samting ol i nidim. (Sindaun 30:8) “Mani . . . i save helpim yumi long taim nogut.” (Saveman 7:12) Ol marit inap pilim hatwok long toktok long mani, tasol no ken larim mani i kamapim hevi insait long marit. (Efesus 4:32) Ol poroman marit i mas trastim narapela narapela na toktok wantaim long hau ol bai yusim mani.

1 TINGTING GUT PASTAIM

BAIBEL I TOK: “Sapos wanpela bilong yupela i laik wokim wanpela taua, orait husat bilong yupela bai i no sindaun pastaim na skelim gut pe bilong dispela samting, na bai em i ken save olsem em i gat ol samting inap long pinisim dispela wok o nogat?” (Luk 14:28) Yutupela i mas toktok wantaim long hau yutupela bai yusim mani. (Amos 3:3) Toktok long ol samting yupela i mas baim na hamas mani yupela inap yusim. (Sindaun 31:16) Maski yupela i gat mani, dispela i no makim olsem yupela i mas baim olgeta samting, nogat. Abrusim pasin bilong kisim dinau. Baim ol samting inap long skel bilong mani yupela i holim.—Sindaun 21:5; 22:7.

SAMTING YU KEN MEKIM:

Sapos yupela i holim ekstra mani long pinis bilong mun, orait toktok wantaim long hau yupela bai yusim dispela mani
Sapos yupela i sot long mani, orait makim stret ol samting yupela i no ken baim. Olsem: Yupela yet i ken redim kaikai long haus, na no ken go westim mani long baim kaikai long haus kaikai

Tupela marit i tingting long ol samting we ol i mas tromoi bikpela mani long en

2 HOLIM STRETPELA TINGTING

BAIBEL I TOK: “Lukautim olgeta samting long stretpela pasin long ai bilong Jehova, na long ai bilong ol man tu.” (2 Korin 8:21) Tokim stret poroman marit long hamas pe yu kisim long wok mani na hamas mani yu yusim.

Oltaim yu mas toktok wantaim poroman marit taim yu laik mekim bikpela disisen long hau yu laik yusim mani. (Sindaun 13:10) Taim yutupela i toktok wantaim, dispela bai strongim pasin wanbel insait long marit. Taim yu kisim pe long wok mani, no ken tingim dispela olsem mani bilong yu yet, nogat, tingim dispela olsem mani bilong famili.—1 Timoti 5:8.

Tupela marit wantaim i skelim lista taim ol i baim ol samting long stua

SAMTING YU KEN MEKIM:

Wanbel long hamas mani yu o poroman marit i ken yusim, na i no gat wok long kisim tingting bilong poroman marit
Toktok wantaim poroman marit long mani, na no ken wet inap long hevi i kamap