I Stret Mi Dediketim Laip Bilong Mi Long God Na Kisim Baptais?

1. Ating yu tingting long mekim wanem taim yu stadi gut long dispela buk?

YU BIN lainim planti tok i tru bilong Baibel taim yu stadi long dispela buk, kain olsem tok promis bilong God long ol man bai stap laip oltaim, samting i painim ol man i dai pinis, na bilip bilong kirap bek. (Eklisiastis 9:5; Luk 23:43; Jon 5:28, 29; Revelesen 21:3, 4) Ating yu stat pinis long go long ol miting bilong ol Witnes Bilong Jehova na yu bilip olsem ol i bihainim lotu i tru. (Jon 13:35) Na tu, ating yu kirap pinis long pas gut wantaim Jehova, na yu wokim tingting pinis long lotuim em. So ating yu tingting, ‘Mi mas mekim wanem samting nau bilong mekim wok bilong God?’

2. Bilong wanem wanpela man Itiopia i laik kisim baptais?

² Wanpela man bilong Itiopia i bin stap long taim bilong Jisas i gat kain tingting olsem. Bihain long Jisas i kirap bek na go long heven, Filip, em wanpela disaipel bilong Jisas i autim tok long dispela man. Filip i kamapim klia olsem Jisas em i dispela Mesaia. Man Itiopia i pilim tru ol tok em i lainim olsem na wantu em i tok: “Lukim! Wara i stap, wanem samting i pasim mi long kisim baptais?”—Aposel 8:26-36.

3. (a) Jisas i tokim ol disaipel bilong em long mekim wanem? (b) Man i mas kisim baptais olsem wanem?

³ Baibel i kamapim klia olsem sapos yumi laik mekim wok bilong Jehova, yumi mas kisim baptais. Jisas i tokim ol disaipel bilong em olsem: “Kamapim ol disaipel long olgeta lain man, na baptaisim ol.” (Matyu 28:19) Jisas yet i stap gutpela piksa na em i kisim baptais. Ol i no tromoi liklik wara antap long het bilong em, nogat, em i go insait olgeta long wara. (Matyu 3:16) Long nau taim wanpela Kristen i laik kisim baptais, em i mas i go insait olgeta long wara.

4. Baptais bilong yu i kamapim klia wanem samting long ol narapela?

⁴ Taim yu kisim baptais, yu kamapim klia long ol narapela olsem yu laik tru long stap pren bilong God na mekim wok bilong em. (Song 40:7, 8) Olsem na ating yu tingting, ‘Mi mas mekim wanem na bai mi ken kisim baptais?’

YUMI MAS I GAT SAVE NA BILIP

5. (a) Yu mas mekim wanem paslain long yu kisim baptais? (b) Bilong wanem ol miting Kristen i bikpela samting?

⁵ Paslain long yu ken kisim baptais, yu mas kisim save long Jehova na Jisas. Yu stat pinis long mekim olsem long rot bilong stadi long Baibel. (Ritim Jon 17:3.) Tasol dispela tasol i no inap. Baibel i tok yu mas kisim “stretpela save” long laik bilong Jehova. (Kolosi 1:9) Ol miting bilong ol Witnes Bilong Jehova bai helpim yu long pas gut wantaim Jehova. Dispela i as na yu mas go oltaim long ol dispela miting.—Hibru 10:24, 25.

6. Olsem wanem? Yu mas i gat bikpela save long Baibel paslain long yu kisim baptais?

⁶ Tru, i no olsem Jehova i laik yu mas kisim save long olgeta samting i stap long Baibel paslain long yu kisim baptais, nogat. Em i no ting dispela man Itiopia i mas save long olgeta samting paslain long em i kisim baptais. (Aposel 8:30, 31) Na yumi bai wok yet long kisim save long God i go inap oltaim oltaim. (Eklisiastis 3:11) Tasol bilong kisim baptais, yu mas save long ol bikpela tok bilong Baibel na bilip long en.—Hibru 5:12.

7. Stadi bilong yu long Baibel i helpim yu olsem wanem?

⁷ Baibel i tok: “Man i no gat bilip em i no inap mekim God i amamas.” (Hibru 11:6) Olsem na yu mas i gat bilip paslain long yu kisim baptais. Baibel i tok taim sampela manmeri long taun Korin bilong bipo i harim tok ol disaipel bilong Jisas i autim, ol i “bilipim na ol i kisim baptais.” (Aposel 18:8) Na olsem tasol, stadi bilong yu long Baibel i bin helpim yu long bilip long ol tok promis bilong God na long ofa bilong Jisas long kisim bek yumi long sin na dai.—Josua 23:14; Aposel 4:12; 2 Timoti 3:16, 17.

TOKIM OL NARAPELA LONG OL TOK I TRU BILONG BAIBEL

8. Wanem samting bai kirapim yu long tokim ol narapela long ol samting yu lainim?

⁸ Taim yu kisim save moa long Baibel na lukim hau em i helpim yu long laip bilong yu, bilip bilong yu bai kamap strong moa. Yu bai gat laik long tokim ol narapela long ol samting yu lainim. (Jeremaia 20:9; 2 Korin 4:13) Tasol bai yu tokim husat?

9, 10. (a) Ating yu bai laik long tokim husat long ol samting yu lainim? (b) Yu mas mekim wanem sapos yu laik autim tok wantaim kongrigesen?

⁹ Ating yu bai laik long tokim ol famili, ol pren, ol neiba, na ol wanwok bilong yu long ol samting yu lainim. Em gutpela, tasol oltaim mekim long gutpela pasin na pasin laikim. Bihain, bai yu inap kirap long mekim wok autim tok wantaim kongrigesen. Taim yu pilim olsem yu redi long mekim olsem, toktok wantaim Witnes i skulim yu long Baibel olsem yu laik insait long mekim wok autim tok wantaim kongrigesen. Sapos em i ting olsem yu redi na ol samting long sindaun bilong yu i stret wantaim tok bilong Baibel, orait yutupela bai bung wantaim tupela elda bilong kongrigesen.

¹⁰ Wanem samting bai kamap long dispela bung? Ol elda bai toktok wantaim yu bilong luksave sapos yu kliagut na bilip long ol bikpela tok bilong Baibel, na yu bihainim ol tok bilong Baibel long i stap bilong yu, na yu gat laik tru long kamap wanpela Witnes Bilong Jehova. Tingim olsem ol elda i save lukautim olgeta insait long kongrigesen, na yu tu yu wanpela bilong ol, olsem na no ken pret long toktok wantaim ol. (Aposel 20:28; 1 Pita 5:2, 3) Bihain long dispela bung, ol elda bai toksave long yu sapos yu ken kirap autim tok wantaim kongrigesen.

11. Bilong wanem em i bikpela samting long yu mas mekim ol senis paslain long yu autim tok wantaim kongrigesen?

¹¹ Ating ol elda inap tokim yu olsem yu mas mekim sampela senis moa paslain long yu kirap autim tok wantaim kongrigesen. Bilong wanem em i bikpela samting long mekim ol dispela senis? Long wanem taim yumi tokim ol narapela long God, yumi stap olsem mausman bilong Jehova na ol samting yumi mekim long i stap bilong yumi i mas givim ona long em.—1 Korin 6:9, 10; Galesia 5:19-21.

TANIM BEL NA BAUT

12. Bilong wanem olgeta manmeri i mas tanim bel?

¹² Yu mas mekim narapela samting tu paslain long yu kisim baptais. Aposel Pita i tok: “Yupela i mas tanim bel na baut na bai ol sin bilong yupela i tekewe.” (Aposel 3:19, ftn.) Pasin bilong tanim bel i makim wanem samting? Em makim olsem yumi bel hevi tru long ol rong yumi bin mekim. Olsem, sapos yu bin insait long pasin pamuk, orait yu mas tanim bel. Na maski long laip olgeta bilong yu, yu wok strong long mekim ol samting i stret, yu mas tanim bel yet, long wanem, yumi olgeta i gat sin na yumi mas askim God long fogivim yumi.—Rom 3:23; 5:12.

13. Pasin bilong “baut” i makim wanem samting?

¹³ Olsem wanem? Pasin bilong bel hevi tasol long ol rong yu bin mekim, em tasol inap? Nogat. Pita i tok tu olsem yu mas “baut.” Dispela i makim olsem yu mas sakim ol pasin i no stret em yu save mekim long bipo na kirap mekim ol pasin i stret. Yumi ken tok piksa long dispela olsem, tingim olsem yu wok long ron long rot i go long wanpela ples long fes taim. Taim yu wok long i go yet, yu luksave olsem rot yu bihainim em i no stret. Bai yu mekim wanem? Yu bai stop, baut, na bihainim rot i stret. Olsem tasol taim yu stadi long Baibel, bai yu painimaut olsem sampela pasin bilong yu o samting yu save mekim em yu mas senisim. Yu mas redi long “baut”—olsem mekim ol senis em yu mas mekim—na kirap long mekim samting i stret.

DEDIKET BILONG YU

14. Olsem wanem yu dediket long God?

¹⁴ Narapela bikpela samting yu mas mekim paslain long yu kisim baptais em yu mas dediket long Jehova. Taim yu dediket long Jehova, yu beten na tok promis olsem yu bai lotu long em wanpela tasol na putim laik bilong em i stap bikpela samting long laip bilong yu.—Lo 6:15.

15, 16. Wanem samting i kirapim man long dediket long God?

¹⁵ Taim yu mekim tok promis long mekim wok bilong Jehova wanpela tasol, i olsem yu tok promis long wanpela em yu laikim long yu bai stap wantaim em long laip olgeta bilong yu. Tingim olsem wanpela man i prenim wanpela meri. Taim dispela man i save gut moa long em, em bai laikim dispela meri na i laik maritim em. Tru, dispela em wanpela bikpela disisen, tasol dispela man i redi long mekim olsem, long wanem, em i laikim dispela meri.

¹⁶ Taim yu kisim save long Jehova, yu kirap laikim em na yu bai mekim olgeta samting yu inap mekim bilong mekim wok bilong em. Dispela bai kirapim yu long beten na tok promis long em olsem yu bai mekim wok bilong em. Baibel i tok man i laik bihainim Jisas i mas “givim baksait long ol laik bilong em yet.” (Mak 8:34) Dispela i makim wanem samting? Em i makim olsem pasin bilong bihainim tok bilong Jehova bai stap nambawan samting long laip bilong yu. Samting Jehova i laikim bai stap bikpela samting moa long yu winim ol samting yu laikim na ol mak yu laik winim.—Ritim 1 Pita 4:2.

NO KEN PRET OLSEM YU BAI PUNDAUN

17. Bilong wanem sampela i surik long dediket long Jehova?

¹⁷ Sampela i surik long dediket long Jehova, long wanem, ol i pret olsem ol i no inap truim tok promis bilong ol long mekim wok bilong Jehova. Ol i no laik mekim Jehova i bel hevi, o ating ol i tingting olsem sapos ol i no dediket long em, orait Jehova i no inap kotim ol long ol samting ol i mekim.

18. Wanem samting bai helpim yu long daunim pasin bilong pret olsem yu bai mekim Jehova i bel hevi?

¹⁸ Pasin bilong yu long laikim Jehova bai helpim yu long daunim pasin bilong yu long pret olsem yu bai mekim em i bel hevi. Yu laikim em, olsem na yu bai mekim olgeta samting bilong truim tok promis yu mekim long em. (Eklisiastis 5:4; Kolosi 1:10) Bai yu no pilim olsem i hatwok long mekim laik bilong Jehova. Aposel Jon i tok: “Pasin bilong laikim God i olsem, yumi bihainim ol lo bilong em; na ol lo bilong em i no givim hevi long yumi.”—1 Jon 5:3.

19. Bilong wanem yu no ken pret long dediket long Jehova?

¹⁹ I no olsem yu mas gutpela olgeta na bai yu ken dediket long Jehova. Nogat. Em i no save tokim yumi long mekim samting yumi no inap mekim. (Song 103:14) Em bai helpim yu long mekim samting i stret. (Aisaia 41:10) Trastim Jehova long bel olgeta bilong yu na “em bai mekim ol rot bilong yu i kamap stret.”—Provep 3: 5, 6.

TOKAUT LONG AI BILONG OL MAN OLSEM YU DEDIKET PINIS

20. Taim yu dediket pinis long God, yu mas mekim wanem narapela samting?

²⁰ Olsem wanem? Yu ting yu redi long dediket long Jehova? Taim yu dediket pinis long Jehova, yu redi nau long mekim narapela samting. Yu mas kisim baptais.

21, 22. Olsem wanem yu inap ‘tokaut long ai bilong ol manmeri’ long bilip bilong yu?

²¹ Toksave long kodineta bilong lain elda long kongrigesen bilong yu olsem yu dediket pinis long Jehova na yu laik kisim baptais. Em bai stretim rot long sampela elda bai skelim wantaim yu ol bikpela tok bilong Baibel. Sapos ol i ting yu redi, ol bai tokim yu long yu ken kisim baptais long neks kibung bilong ol Witnes Bilong Jehova. Long kibung, bai i gat wanpela tok i stori long mining bilong baptais. Brata i mekim dispela tok bai tokim ol man i laik kisim baptais long bekim tupela askim. Taim yu bekim ol dispela askim, yu “tokaut . . . long ai bilong ol manmeri” long bilip bilong yu.—Rom 10:10.

²² Orait yu bai kisim baptais. Yu bai go insait olgeta long wara. Baptais i kamapim long ples klia olsem yu dediket pinis long Jehova na nau yu wanpela Witnes Bilong Jehova.

MINING BILONG BAPTAIS BILONG YU

23. Wanem mining bilong dispela tok baptais “long nem bilong Papa na bilong Pikinini na bilong holi spirit”?

²³ Jisas i tok ol disaipel bilong em bai kisim baptais “long nem bilong Papa na bilong Pikinini na bilong holi spirit.” (Ritim Matyu 28:19.) Wanem mining bilong dispela tok? Em makim olsem yu luksave long namba bilong Jehova na wok bilong Jisas insait long ol samting God i tingting pinis long mekim, na tu, olsem wanem God i yusim holi spirit bilong em long kamapim laik bilong em.—Song 83:18; Matyu 28:18; Galesia 5:22, 23; 2 Pita 1:21.

24, 25. (a) Baptais i makim wanem samting? (b) Bai yumi stori long wanem samting long laspela sapta?

²⁴ Baptais i makim wanpela bikpela samting tru. Taim yu go insait olgeta long wara, dispela i makim olsem yu dai pinis long olpela pasin bilong yu o lusim pinis olpela pasin bilong yu. Taim yu kam antap long wara, dispela i makim olsem yu bai statim nupela laip, em bilong mekim laik bilong God. Dispela i soim olsem kirap long nau na i go, yu bai mekim laik bilong Jehova. Tingim olsem yu no dediket long wanpela man, wanpela oganaisesen, o wanpela wok. Yu dediketim laip bilong yu long Jehova.

²⁵ Dediket bilong yu bai helpim yu long pas gut wantaim God. (Song 25:14) Dispela i no makim olsem God bai kisim bek man, long wanem, em i baptais, nogat. Aposel Pol i tok: “Yupela i mas wok long mekim olgeta samting yupela inap long mekim bambai God i ken kisim bek yupela, na yupela i mas mekim wantaim pret na guria.” (Filipai 2:12) Baptais em i kirap tasol bilong ol samting yu mas mekim. Tasol olsem wanem yu inap stap klostu long Jehova? Laspela sapta bilong dispela buk bai bekim dispela askim.