Fes King Bilong Israel

Jehova i givim ol hetman long ol Israel bilong i stap lida bilong ol, tasol ol i laikim king. Ol i tokim Samuel: ‘Olgeta kantri i stap klostu long mipela i gat ol king. Mipela i laikim wanpela king tu.’ Samuel i ting askim bilong ol i no stret so em i beten long Jehova long dispela. Jehova i tokim em: ‘Ol manmeri i no les long yu. Ol i les long mi. Tokim ol olsem ol i ken i gat king, tasol dispela king bai kisim planti samting long ol.’ Maski i olsem, ol manmeri i tok: ‘Mipela i no wari. Mipela i laikim wanpela king!’

Jehova i tokim Samuel, wanpela man nem bilong em Sol bai kamap fes king. Taim Sol i go visitim Samuel long Rama, Samuel i anointim Sol olsem king taim em i kapsaitim oil long het bilong em.

Bihain Samuel i singautim ol Israel i kam bung na em i soim ol nupela king bilong ol. Tasol ol i no inap lukim Sol. Yu save wai? Bikos em i hait namel long ol kago. Taim ol i painim Sol, ol i bringim em i kam aut na sanapim em namel long ol manmeri. Sol i longpela man winim ol arapela manmeri, na em i luk nais tru. Samuel i tok: ‘Lukim dispela man Jehova i makim.’ Ol manmeri i singaut bikmaus: ‘King i ken stap longtaim!’

Pastaim, King Sol i harim tok Samuel i givim long em na em i bihainim tok bilong Jehova. Tasol bihain em i senis. Olsem: Em i no wok bilong king long mekim ol sakrifais. Wanpela taim, Samuel i tokim Sol long wetim em, tasol Samuel i no kam hariap. Olsem na Sol yet i mekim sakrifais. Samuel i mekim wanem? Em i tokim Sol: ‘Yu bin sakim tok bilong Jehova.’ Yu ting Sol i kisim skul long popaia bilong em?

Bihain, taim Sol i go pait long ol Amalek, Samuel i tokim Sol long kilim olgeta i dai. Tasol Sol i no kilim King Agak. Jehova i tokim Samuel: ‘Sol i lusim mi, na em i no bihainim tok bilong mi.’ Samuel i bel hevi tru, na em i tokim Sol: ‘Yu no bihainim moa tok bilong Jehova, olsem na em bai makim narapela king.’ Taim Samuel i tanim na i laik go, Sol i holim arere bilong longpela siot bilong em na siot i bruk. Na Samuel i tokim Sol: ‘Jehova i rausim yu long wok king bilong yu.’ Jehova bai givim wok king long man husat i laikim em na bihainim tok.