Jisas i Givim Kaikai Long Planti Tausen

Paslain liklik long Pasova bilong yia 32 C.E., ol aposel i kam bek long raun bilong ol long autim tok. Ol i taiet, so Jisas i kisim ol long bot na i go long Betsaida we ol i ken malolo. Tasol taim bot i kam klostu long nambis, Jisas i lukim planti tausen manmeri i bihainim ol i kam long dispela hap. Maski Jisas i laik stap em yet wantaim ol aposel bilong em, em i welkamim ol. Em i oraitim ol sikman na kirap long skulim ol. Long de olgeta, Jisas i skulim ol long Kingdom Bilong God. Taim apinun i kamap, ol aposel i kam long em na tok: ‘Ating ol manmeri i hangre. Salim ol i go so ol i ken painim samting bilong kaikai.’

Jisas i tok: ‘No ken salim ol i go. Givim ol kaikai.’ Ol aposel i tok: ‘Yu laik bai mipela i go baim bret bilong ol?’ Filip, em wanpela bilong ol aposel, i tok: ‘Maski yumi gat planti mani, yumi no inap baim bret inap long dispela bikpela lain manmeri.’

Jisas i tok: ‘Hamas kaikai i stap?’ Andru i tok: ‘I gat 5-pela bret na 2-pela liklik pis. Tasol dispela i no inap.’ Jisas i tok: ‘Kisim bret na pis i kam long mi.’ Em i tokim ol manmeri long sindaun long gras long ol grup bilong 50 na 100. Jisas i kisim ol bret na pis, lukluk i go long heven, na beten. Na bihain em i givim kaikai long ol aposel, na ol i tilim long ol manmeri. Dispela 5,000 man, meri, na pikinini, olgeta i kaikai i go inap ol i pulap. Bihain long kaikai, ol aposel i bungim ol hap kaikai i stap yet, na bai ol i no ken westim kaikai. Ol i pulapim long 12-pela basket! Em narakain mirakel tru, a?

Ol manmeri i kirap nogut tru, olsem na ol i laik mekim Jisas i kamap king bilong ol. Tasol Jisas i save olsem em i no taim Jehova i makim long em i kamap king. So em i salim dispela bikpela lain manmeri i go na em i tokim ol aposel bilong em long go long narapela sait bilong Raunwara Galili. Ol i kalap long bot bilong ol, na Jisas yet i go antap long maunten. Wai? Bikos em i laikim haptaim long beten long Papa bilong em. Maski em i bisi, Jisas i save painim taim long beten.