Jisas i Makim Sol

Sol i wanpela sitisen bilong Rom na em bon long Tarsus. Em i wanpela Farisi na saveman long Lo Bilong Ol Juda, na em i heitim ol Kristen. Em i save pulim ol Kristen man na meri long ol haus bilong ol i kam ausait, na tromoi ol long kalabus. Na tu, em i bin sanap na lukluk taim bikpela lain i belhat na stonim disaipel Stiven inap em i dai.

Sol i arestim ol Kristen long Jerusalem, tasol dispela i no inapim laik bilong em, nogat. Em i askim hetpris long salim em i go long taun Damaskus na bai em i ken painim ol Kristen na mekim nogut long ol. Taim Sol i go klostu long taun, wanpela strongpela lait i sut i kam raunim em na em i pundaun long graun. Em i harim nek i tok: ‘Sol, bilong wanem yu wok long mekim nogut long mi?’ Sol i askim: ‘Yu husat?’ Nek i tok: ‘Mi Jisas. Go long Damaskus, na yu bai kisim save long samting yu mas mekim.’ Wantu, Sol i no inap lukluk, na wanpela man i holim han bilong em na kisim em i go insait long taun.

Long Damaskus, i gat wanpela gutpela Kristen nem bilong em Ananaias. Long visen, Jisas i tokim em: ‘Go long haus bilong Judas, long strit ol i kolim Stretpela Rot, na painim Sol.’ Ananaias i tok: ‘Bikpela, mi save long olgeta samting long dispela man! Em i wok long putim ol disaipel bilong yu long kalabus!’ Tasol Jisas i tok: ‘Go long em. Mi bin makim Sol long autim gutnius long planti lain man.’

So Ananaias i painim Sol na tokim em: ‘Sol, brata bilong mi, Jisas i salim mi i kam long opim ai bilong yu.’ Wantu, Sol inap lukluk gen. Em i kisim save long Jisas na kamap disaipel bilong em. Na Sol i kisim baptais olsem wanpela Kristen, na i kirap autim tok long ol sinagog, wantaim ol wanwok Kristen bilong em. Yu inap piksaim hau ol Juda i kirap nogut long lukim Sol i skulim ol manmeri long Jisas? Ol i tok: ‘Ating em seim man tasol i bin mekim nogut long ol disaipel bilong Jisas?’

Inap tripela yia, Sol i autim tok long ol manmeri long Damaskus. Ol Juda i heitim Sol na mekim plen long kilim em i dai. Tasol ol brata i kisim save long dispela plen nogut na helpim Sol long ranawe. Ol i putim em long wanpela basket na slekim em i go daun long wanpela hul long banis bilong taun.

Taim Sol i go long Jerusalem, em i traim long bung wantaim ol brata. Tasol ol i pret long em. Bihain wanpela disaipel nem bilong em Barnabas, i kisim Sol i go long ol aposel na tokim ol olsem Sol i senisim tru pasin bilong em. Sol i kirap long givim bel tru long autim gutnius wantaim kongrigesen long Jerusalem. Bihain, ol i kolim em Pol.