Lotu Kristen i Go Long Planti Hap

Ol aposel i bihainim tok bilong Jisas long autim gutnius long olgeta hap bilong graun. Long 47 C.E., ol brata long Antiok i salim Pol na Barnabas long mekim raun bilong autim tok. Tupela i givim bel tru long autim tok, ol i raun long olgeta hap bilong Esia Maina, olsem Derbe, Listra, na Aikoniam.

Pol na Barnabas i autim tok long olgeta man, maski ol i maniman o rabisman, yangpela o lapun. Planti man i kisim tok i tru bilong Krais. Taim Pol na Barnabas i autim tok long Sergius Paulus, gavana bilong Saiprus, wanpela posinman i laik stopim ol. Pol i tokim posinman: ‘Jehova i pait long yu.’ Wantu, posinman i no inap lukluk. Gavana Paulus i lukim dispela na i kamap bilipman.

Pol na Barnabas i autim tok long olgeta hap, long ol haus, maket, rot, na ol sinagog. Taim ol i oraitim wanpela man em lek nogut, ol man i lukim dispela mirakel i ting tupela i god na ol i laik lotuim tupela. Tasol Pol na Barnabas i stopim ol, na tok: ‘Lotuim God tasol! Mitupela i man tasol.’ Bihain sampela Juda i kam na kirapim bikpela lain man long birua long Pol. Ol i tromoi ston long em, pulim em i go ausait long taun, na lusim em na bai em i dai. Tasol Pol i stap laip yet! Kwiktaim, ol brata i kam helpim em na kisim em i go bek long taun. Na bihain, Pol i go bek long Antiok.

Long 49 C.E., Pol i mekim narapela raun bilong em. Bihain long em i go lukim ol brata long Esia Maina, em i autim gutnius i go olgeta long Yurop. Em i go long Atens, Efesus, Filipai, Tesalonaika, na ol narapela ples. Sailas, Luk, na wanpela yangpela man nem bilong em Timoti i go wantaim Pol long dispela raun. Ol i wok wantaim long kirapim ol kongrigesen na helpim ol long kamap strong. Inap wan na hap yia, Pol i stap long Korin na strongim ol brata. Em i autim tok, skulim ol man, na raitim ol pas long planti kongrigesen. Na tu, em i wok olsem man bilong samapim haus sel. Bihain, Pol i go bek long Antiok.

Bihain, long 52 C.E., Pol i mekim namba 3 raun, kirap long Esia Maina. Em i go inap long hap not long Filipai na bihain em i go daun long Korin. Pol i stap sampela yia long Efesus, em i skulim, oraitim ol man, na helpim kongrigesen. Na tu, long olgeta de em i go long haus bung bilong skul na autim tok. Planti manmeri i harim tok na senisim pasin bilong ol. Bihain long Pol i autim gutnius long planti kantri, em i go long Jerusalem.