Hau Yu Ken Luksave Long Ol Kristen Tru

Planti bilion manmeri i tok ol i Kristen. Tasol ol i no gat wankain ol bilip, na ol i no bihainim wankain ol lo. So hau yu ken luksave long ol Kristen tru?

1. Husat i Kristen Tru?

Ol Kristen ol i disaipel, o ol man i save bihainim Jisas Krais. (Ritim Aposel 11:26.) Long wanem rot ol i soim olsem ol i disaipel bilong Jisas? Jisas i tok: “Sapos yupela i holimpas tok bilong mi, orait yupela i disaipel tru bilong mi.” (Jon 8:31) Ol Kristen tru i mas bihainim tok bilong Jisas. Oltaim Jisas i save skulim ol man long tok Baibel i mekim, na ol man i bihainim em ol tu i save bihainim wankain pasin.—Ritim Luk 24:27.

2. Long wanem rot ol Kristen tru i save soim pasin laikim?

Jisas i tokim ol disaipel bilong em: “Laikim narapela narapela olsem mi bin laikim yupela.” (Jon 15:12) Long wanem rot Jisas i soim olsem em i laikim ol disaipel bilong em? Em i lusim haptaim long stap wantaim ol, strongim ol, na helpim ol. Na tu, em i givim laip bilong em long helpim ol. (1 Jon 3:16) Olsem tasol ol Kristen tru i no toktok tasol long pasin laikim, nogat. Ol i soim pasin laikim long toktok na long pasin ol i mekim long narapela narapela.

3. Ol Kristen tru i save mekim wanem wok?

Jisas i givim wok long ol disaipel bilong em. “Em i salim ol i go bilong autim tok bilong Kingdom Bilong God.” (Luk 9:2) Ol Kristen long pastaim i save autim tok, i no long ol ples lotu bilong ol tasol, nogat; ol i autim tok tu long ol pablik ples na long ol haus bilong ol manmeri. (Ritim Aposel 5:42; 17:17.) Olsem tasol ol Kristen tru long nau i autim tok i tru bilong Baibel long olgeta hap we ol i bungim ol man. Ol i laikim ol manmeri, olsem na ol i amamas long yusim taim na strong bilong ol long autim gutnius bilong Baibel na mekim isi bel bilong ol man, na helpim ol long wetim gutpela samting i kamap bihain.—Mak 12:31.

KISIM SAMPELA SAVE MOA

4. Ol i wok long painim tok i tru bilong Baibel

I no olgeta man i tok ol i Kristen ol i tingim tok i tru bilong Baibel i bikpela samting. Pilaim VIDIO, na stori long dispela askim.

VIDIO: Hau Ol Bilip Giaman i Bagarapim Lotu Kristen (5:11)

• Olsem wanem sampela lotu em ol i tok ol i Kristen, ol i no skulim ol manmeri long tok Jisas i skulim ol man long en?

Jisas i skulim ol man long tok i tru i stap long Baibel. Ritim Jon 18:37, na stori long dispela askim:

• Olsem Jisas i tok, olsem wanem yumi ken luksave long ol Kristen em ol “i stap long sait bilong tok i tru”?

5. Ol i autim tok i tru bilong Baibel

Paslain long Jisas i go long heven, em i givim wanpela wok long ol disaipel bilong em, na dispela wok i stap i kam inap long nau. Ritim Matyu 28:19, 20 na Aposel 1:8, na stori long dispela askim:

• Ol bai autim tok i go inap long wanem hap?

6. Ol i wok strong long bihainim tok ol i autim

Wanem samting i helpim wanpela man nem bilong em Tom long luksave olsem em i painim pinis lotu Kristen tru? Pilaim VIDIO, na stori long ol dispela askim.

VIDIO: Mi Givap Long Lotu (5:20)

• Long vidio, wanem samting i mekim na Tom i givap long ol lotu?

• Wanem samting i mekim na em i bilip olsem em i painim pinis tok i tru?

Pasin man i mekim i bikpela samting moa winim toktok em i mekim. Ritim Matyu 7:21, na stori long dispela askim:

• Long Jisas wanem samting i bikpela samting moa—ol samting yumi tok yumi bilip long en, o pasin yumi mekim?

7. Ol i laikim narapela narapela

Olsem wanem? Ol Kristen tru i redi long lusim laip bilong ol bilong helpim ol wanbilip bilong ol? Pilaim VIDIO, na stori long ol dispela askim.

VIDIO: Em i Redi Long Dai (2:55)

• Long vidio, wanem samting i kirapim Lloyd long redi long dai bilong helpim Brata Johansson?

• Yu ting pasin em i mekim i soim olsem em i wanpela Kristen tru?

• Ol disaipel bilong Jisas (em ol Kristen tru), ol i save mekim wanem kain pasin long ol man bilong narapela skin, o kantri?

• Long taim bilong woa, ol Kristen bai mekim wanem bilong soim pasin laikim?

OL BIKPELA POIN

Ol Kristen tru i bihainim ol tok bilong Baibel, soim pasin laikim, na autim tok i tru bilong Baibel long ol man.

Riviu

• Wanem samting i as bilong ol bilip bilong ol Kristen tru?

• Wanem pasin i mak bilong ol Kristen tru?

• Wanem wok ol Kristen tru i save mekim?

MEKIM WOK PAINIMAUT

Kisim save long wanpela lain husat i wok strong long bihainim pasin bilong Jisas Krais na ol tok em i skulim ol man long en.

Ol Witnes Bilong Jehova—Mipela i Husat? (1:13)

Lukim wanem samting i stiaim wanpela meri em bipo em i wanpela sister bilong Misin Katolik long bung wantaim wanpela “bikpela lain brata long olgeta hap bilong graun.”

“Ol i Yusim Baibel Long Bekim Olgeta Askim bilong Mi!” (Wastaua, Epril 1, 2014)

Kisim save long olsem wanem ol Kristen tru i soim pasin laikim long ol wanbilip bilong ol long taim bilong ol disasta.

Helpim Ol Brata Bilong Yumi Long Taim Bilong Disasta—Hap Bilong En (3:57)

Skelim hau ol Kristen bilong pastaim na ol Kristen tru long nau i bihainim pasin em Jisas i tok i mak bilong ol disaipel bilong em.

“Wanem Sampela Mak Bilong Ol Kristen Tru?” (Wastaua, Mas 1, 2012)