Yu Ting God i Orait Long Olgeta Bikpela Bung?

Jehova i laik bai yumi stap amamas, na tu, mekim ol bung bilong kisim amamas sampela taim. Tasol yu ting em i orait long olgeta bikpela bung? Long sait bilong ol bikpela bung, olsem wanem yumi ken soim olsem yumi laikim Jehova?

1. Wai na Jehova i no amamas long planti bikpela bung?

Ating yu bai kirap nogut long save olsem planti bilong ol bikpela bung Baibel i no as bilong en, nogat, ol haiden i as bilong en. Na tu, ol lotu giaman i as bilong ol kain bikpela bung olsem. Na wok bilong ol spirit nogut o dispela bilip olsem ol man i gat wanpela spirit i no save dai, i insait tu long ol dispela bung. Sampela bikpela bung i kam long ol bilip tumbuna o dispela bilip giaman olsem gutpela samting bai painim man sapos em i bihainim wanpela kain kastam. (Aisaia 65:11) Jehova i givim tok lukaut long ol man i lotuim em olsem: “Stap longwe . . . , na no ken tatsim samting i no klin.”​—2 Korin 6:17.a

2. Jehova i pilim olsem wanem long ol bikpela bung we i save givim ona long ol man?

Jehova i givim tok lukaut long yumi no ken pundaun long traim bilong “trastim ol man.” (Ritim Jeremaia 17:5.) Sampela bikpela de em ol i mekim bilong givim ona long sampela bikman o ol soldia. Na sampela kantri i save mekim ol bikpela bung bilong tingim indipendens o wanpela bikpela mak bilong kantri, olsem fleg. (1 Jon 5:21) Ol narapela i save mekim ol bikpela bung bilong givim biknem long wanpela politikol pati o wanpela oganaisesen bilong ol man. Jehova i pilim olsem wanem sapos yumi givim biknem long wanpela man o oganaisesen, moa yet sapos dispela man o oganaisesen i kamapim ol tingting we i no stret wantaim laik bilong Em?

3. Wanem ol pasin i save kamap long ol bikpela bung we inap mekim na God i no orait long en?

Baibel i tambuim pasin bilong “dring planti tumas strongpela dring, [na] mekim ol pati i gat planti pairap.” (1 Pita 4:3) Long sampela bung, ol man i no save bosim gut bel na mekim ol kain kain pasin nogut. Bilong stap pren bilong Jehova, yumi mas stap longwe long ol pasin i no klin.

KISIM SAMPELA SAVE MOA

4. Sakim ol bikpela bung we i no givim ona long Jehova

Ritim Efesus 5:10, na stori long ol dispela askim:

• Yumi mas skelim gut wanem ol samting taim yumi makim olsem yumi bai insait long wanpela selebresen o nogat?

• Wanem sampela bikpela bung i save kamap long hap bilong yu?

• Yu ting Jehova i amamas long ol dispela bung?

Olsem, sampela taim yu laik save God i gat wanem tingting long betde selebresen? Baibel i no stori long wanpela man i lotuim Jehova i bin selebretim betde, tasol Baibel i stori long tupela betde selebresen em bilong ol man i no lotuim Em. Ritim Stat 40:20-22 na Matyu 14:6-10. Na stori long ol dispela askim:

• Wanem samting i wankain long dispela tupela betde?

• Long dispela tupela stori bilong Baibel, yu ting Jehova i pilim olsem wanem long ol betde?

Tasol ating yu laik save, ‘Em i bikpela samting long Jehova sapos yu insait long wanpela bung bilong betde o narapela bung em Baibel i no as bilong en?’ Ritim Kisim Bek 32:1-8. Na pilaim VIDIO na stori long ol dispela askim.

VIDIO: Ol Holide na Selebresen Em God i No Laikim (5:07)

• Wai na yumi mas skelim gut wanem ol samting em Jehova i orait long en?

• Hau bai yumi ken mekim olsem?

Hau bai yumi save sapos God i no orait long wanpela bikpela bung?

• Olsem wanem? Ol bilip giaman i as bilong dispela bung? Bilong painimaut, skelim dispela bung i kirap olsem wanem?

• Dispela bung i givim ona long wanpela man, o oganaisesen, o wanpela bikpela mak bilong kantri, olsem fleg? Yumi givim ona long Jehova wanpela tasol winim olgeta man na trastim em long stretim olgeta hevi bilong ol man.

• Yu ting ol kastam na pasin ol i bihainim i pait wantaim ol tok bilong Baibel? Yumi mas bihainim klinpela pasin long olgeta taim.

5. Helpim ol narapela long rispektim ol bilip bilong yu

VIDIO: Long Gutpela Pasin Eksplenim Ol Bilip Bilong Yu (2:01)

Ritim Matyu 7:12, na stori long ol dispela askim:

• Olsem dispela ves i soim, yu ting yu mas tokim famili bilong yu i no wanbilip olsem ol i no ken insait long ol selebresen bilong ol bikpela de?

• Yu ken mekim wanem bilong tokim famili bilong yu i no wanbilip, olsem maski yu no selebretim ol dispela bung wantaim ol, yu laikim na tingim ol?

6. Jehova i laik bai yumi stap amamas

Jehova i laik bai yumi mekim ol samting bilong amamas wantaim ol famili na pren bilong yumi. Ritim Eklisiastis 8:15, na stori long dispela askim:

• Olsem wanem dispela ves i soim olsem Jehova i laik bai yumi stap amamas?

Jehova i laik bai lain bilong em i mekim ol samting wantaim bilong kisim amamas. Pilaim VIDIO na lukim hau dispela samting i kamap ples klia long intenesenel kibung bilong mipela.

VIDIO: Lukautim Gut Ol Lain i Kam Long Ol Kibung Intenesenel (5:40)

Ritim Galesia 6:10, na stori long ol dispela askim:

• Yu ting yumi mas insait long ol bikpela bung long “mekim gutpela pasin” long ol narapela?

• Wanem pasin bai mekim yu amamas moa​—taim yu mas givim samting bikos em taim bilong bikpela bung, o taim yu givim samting long laik bilong yu yet?

• Planti Witnes i save oganaisim ol samting bilong amamas wantaim ol pikinini bilong ol, na sampela taim ol i givim ol presen long ol pikinini taim ol i no tingim. Sapos yu gat ol pikinini, wanem sampela spesel samting yu ken mekim bilong ol?

OL BIKPELA POIN

Jehova i laik bai yumi bung wantaim ol famili na ol pren na amamas wantaim. Tasol em i laik bai yumi sakim ol bikpela bung we em i no orait long en.

Riviu

• Yumi ken tingim wanem ol askim taim yumi skelim sapos Jehova i orait long wanpela bung o nogat?

• Hau bai yumi ken helpim famili na ol pren bilong yumi long kliagut olsem yumi bai insait long wanpela bung o nogat?

• Hau yu save olsem Jehova i laik bai yumi stap amamas na mekim ol samting wantaim?

MEKIM WOK PAINIMAUT

Skelim sampela bikpela de em ol Kristen i no save insait long en.

“Wai na Ol Witnes Bilong Jehova i No Save Selebretim Sampela Bikpela De?” (Atikol long websait)

Kisim save long 4-pela risen na mipela i save olsem God i no orait long betde selebresen.

“Wai na Ol Witnes Bilong Jehova i No Save Selebretim Betde?” (Atikol long websait)

Lukim hau ol pikinini husat i laikim Jehova i amamasim em long taim bilong ol bikpela de.

Yu Dia Tumas Long Jehova (11:35)

Planti milion Kristen i mekim disisen olsem ol i no inap selebretim Krismas. Ol i pilim olsem wanem long disisen bilong ol?

“Ol i Painim Samting i Gutpela Moa Winim Krismas” (Wastaua, Disemba 1, 2012)