Ol Futnot
1. Luksave Long Bikpela Babilon
Olsem wanem yumi save “Bikpela Babilon” i makim olgeta lotu giaman? (Revelesen 17:5) Yumi ken skelim ol dispela samting:
Em i stap long olgeta hap. Baibel i tok Bikpela Babilon i sindaun antap long “bikpela lain manmeri, na . . . ol kantri.” Em i “gat wanpela kingdom i bosim olgeta king bilong dispela graun.”—Revelesen 17:15, 18.
Em i no wanpela lain politik o wok bisnis. Taim bagarap i painim Bikpela Babilon, “ol king bilong graun” na “ol bisnisman” i no bagarap wantaim em.—Revelesen 18:9, 15.
Em i giaman long bihainim tok bilong God. Baibel i kolim em pamukmeri, long wanem, em i wok bung wantaim ol gavman na bai ol i ken givim mani na ol narapela samting long em. (Revelesen 17:1, 2) Em i save giamanim ol manmeri bilong olgeta lain. Na em i gat asua long dai bilong planti manmeri.—Revelesen 18:23, 24.
2. Mesaia Bai Kam Long Wanem Taim?
Baibel i tok profet olsem 69 wik i mas pinis pastaim na Mesaia bai kam.—Ritim Daniel 9:25.
Dispela 69 wik i kirap long wanem taim? Long yia 455 B.C.E. Long dispela taim, Gavana Nehemia i go kamap long Jerusalem bilong “stretim bek na wokim gen” dispela taun.—Daniel 9:25; Nehemia 2:1, 5-8.
Dispela 69 wik i longpela olsem wanem? Long sampela tok profet bilong Baibel, wanpela de i makim wanpela yia. (Namba 14:34; Esekiel 4:6) Olsem na wanpela wik i makim 7-pela yia. Long dispela tok profet, 69 wik em inap olsem 438 yia (69 wik x 7-pela de).
Dispela 69 wik i pinis long wanem taim? Taim yumi kirap long 455 B.C.E. na kaunim i go 483 yia, yumi bai kamap long yia 29 C.E.a Long dispela yia stret Jisas i kisim baptais na kamap Mesaia!—Luk 3:1, 2, 21, 22.
3. Ol Medikal Tritmen We Ol i Yusim Blut
I gat sampela medikal tritmen we ol dokta i yusim blut bilong sikman yet. Sampela bilong ol i olsem—man i givim blut o ol dokta i kisim blut bilong em paslain long operesen bilong em na putim i stap bilong yusim. Tasol ol dispela kain medikal tritmen i no orait long ol Kristen i kisim.—Lo 15:23.
Tasol i gat sampela medikal tritmen ating em orait long kisim. Kain olsem blut tes, hemodialysis, hemodilution, o ol i yusim masin cell-salvage o masin heart-lung bypass.b Olgeta wan wan Kristen yet i mas wokim disisen long wanem samting ol dokta i ken mekim long blut bilong em long taim bilong operesen, blut tes, o medikal tritmen we ol i mekim sampela samting long blut bilong sikman yet. Wan wan dokta i save bihainim narapela narapela pasin bilong mekim ol dispela samting. So paslain long Kristen i orait long kisim wanpela operesen, blut tes, o medikal tritmen, em i mas painimaut gut wanem wok ol bai mekim long blut bilong em. Skelim ol dispela askim:
Olsem wanem sapos ol i senisim ron bilong blut bilong mi na blut i ron i go ausait long bodi na i stop inap liklik haptaim? Maus bilong bel bilong mi bai orait long mi tingim dispela blut i stap yet olsem hap bilong bodi bilong mi, na i no gat wok long “kapsaitim long graun”?—Lo 12:23, 24.
Olsem wanem sapos long taim dokta i mekim wok long mi em i kisim sampela blut bilong mi na mekim sampela samting long en, na stiaim i go bek insait long bodi bilong mi, o putim long hap we ol i katim mi? Maus bilong bel bilong mi em Baibel i skulim pinis bai i gat tok long dispela, o mi orait long en?
4. Ol Marit i Seperet
Baibel i no orait long pasin bilong seperet na i kamapim klia olsem taim tupela marit i seperet, tupela i no gat rait long maritim gen narapela man o meri. (1 Korin 7:10, 11) Tasol i gat sampela samting inap mekim na sampela Kristen ol i tingting long seperet.
No laik tru long lukautim famili: Man marit i no laik lukautim famili long ol samting bilong skin i go inap long mak we famili i no gat kaikai o mani.—1 Timoti 5:8.
Paitim nogut tru poroman: Man o meri i paitim poroman bilong em i go inap long mak we helt o laip bilong em inap lus.—Galesia 5:19-21.
Stopim tru poroman marit long pas gut wantaim Jehova: Man marit o meri marit i mekim na i hatwok tru long poroman marit bilong em i mekim wok bilong Jehova.—Aposel 5:29.
5. Ol Bikpela De na Ol Bikpela Bung
Ol Kristen i no save insait long ol bikpela de we Jehova i no orait long en. Tasol olgeta wan wan Kristen i mas yusim maus bilong bel bilong ol em Baibel i skulim pinis long skelim wanem samting ol bai mekim long taim bilong ol bikpela de. Skelim sampela bilong ol dispela eksampel.
Sapos wanpela i tok, “Meri Krismas” o “Hepi Nuyia.” Yu ken tok, “Tenkyu.” Sapos em i laik kisim save moa, yu ken stori long em long as na yu no insait long dispela bikpela de.
Poroman marit bilong yu i no wanpela Witnes Bilong Jehova i singautim yu long go kaikai wantaim ol wanblut long bung bilong wanpela bikpela de. Sapos maus bilong bel bilong yu i orait long yu go, yu ken toksave paslain long poroman bilong yu olsem sapos ol pasin bilong ol haiden i insait long dispela kaikai, orait yu no inap kaikai.
Bos bilong yu i givim yu bonus long taim bilong wanpela bikpela de. Bai yu sakim bonus? Ating i no olsem. Olsem wanem? Em i tingim wanpela bikpela de na givim bonus, o em i givim bonus bilong soim tenkyu bilong em long gutpela wok yu mekim?
Wanpela i givim yu presen long taim bilong wanpela bikpela de. Man i givim presen inap tok olsem: “Mi save olsem yu no save selebretim ol bikpela de, tasol mi laik givim yu dispela.” Ating em i mekim gutpela pasin. O ating i gat as na yu ting em i laik traim bilip bilong yu o em laik yu insait long dispela bung bilong bikpela de? Taim yu skelim dispela pinis, yu yet i ken wokim disisen olsem yu bai kisim presen o nogat. Long olgeta disisen yumi wokim, yumi laik maus bilong bel bilong yumi i no gat tok na yumi laik stap gut long Jehova.—Aposel 23:1.
6. Ol Sik We i Save Kalap Long Narapela
Yumi laikim ol narapela, olsem na yumi was gut na bai yumi no ken givim sik long ol narapela. Sapos yumi gat sik we inap kalap long ol narapela, o i gat as na yumi ting yumi inap givim sik long ol narapela, yumi bai was gut. Yumi mekim olsem bikos Baibel i tok: “Yu mas laikim ol arapela man olsem yu laikim yu yet.”—Rom 13:8-10.
Olsem wanem man i gat sik we inap kalap long ol narapela i ken soim dispela kain pasin laikim? Em i no ken mekim ol samting olsem holimpasim o kis long ol narapela. Em i no ken bel hevi sapos sampela i pilim olsem ol i no inap singautim em i kam long haus bilong ol bikos ol i laik banisim famili bilong ol long sik. Na paslain long em i kisim baptais, em i mas toksave long kodineta bilong lain elda long sik bilong em bambai ol i ken stretim rot long hau em i ken kisim baptais na bai dispela i lukautim ol narapela tu i kisim baptais. Sapos pasin man i mekim bipo inap mekim na em i gat kain sik inap kalap long narapela, ating i gutpela em yet i ken tingting long kisim blut tes paslain long em i kirap prenim wanpela man o meri. Taim yu mekim olsem, yu soim olsem ‘yu no tingim laik bilong yu yet tasol, nogat, yu tingim tu laik bilong ol arapela.’—Filipai 2:4.
7. Ol Samting Bilong Bisnis na Kot
Yumi inap abrusim planti hevi sapos yumi raitim kontrak long ol samting bilong mani na wok bisnis—maski yumi mekim kontrak wantaim narapela Kristen. (Jeremaia 32:9-12) Tasol sampela taim i gat sampela liklik hevi inap kamap namel long tupela Kristen long sait bilong mani o ol narapela samting. Ol i mas stretim dispela hevi hariap na mekim long pasin isi, na tupela yet i mas stretim dispela hevi namel long ol yet.
Tasol olsem wanem yumi ken stretim ol bikpela hevi olsem wanpela i paulim mani o krungutim gutnem bilong narapela? (Ritim Matyu 18:15-17.) Jisas i kolim 3-pela rot yumi ken bihainim:
Traim long stretim hevi namel long yutupela yet.—Lukim ves 15.
Sapos yutupela i no stretim, orait askim wanpela o tupela strongpela Kristen long kongrigesen i ken go wantaim yu.—Lukim ves 16.
Sapos dispela tu i no stretim hevi, orait nau yu ken go lukim ol elda.—Lukim ves 17.
Long ol hevi i kamap, yumi no ken kisim brata bilong yumi i go long kot bikos dispela inap bagarapim nem bilong Jehova na kongrigesen. (1 Korin 6:1-8) Tasol i gat sampela hevi ating em ol i mas stretim long kot, olsem: divos, kot long makim husat bai kisim pikinini, kot long makim hamas mani man o meri bai givim long poroman marit bilong em taim ol i divos, kisim kompensesen bilong insurens, o taim bisnis i bagarap, o long strongim pepa i makim husat bai kisim mani kago bilong man i dai. Taim Kristen i stretim ol kain hevi olsem long rot bilong kot long pasin isi em i no brukim lo bilong Baibel.
Sapos em wanpela bikpela rong—olsem reip, mekim pasin sem long pikinini, paitim narapela, stilim bikpela mani samting, o kilim man i dai—na Kristen i ripotim dispela rong long ol polis, em i no brukim lo bilong Baibel.
a Kirap long 455 B.C.E. i go inap long 1 B.C.E. em 454 yia. Kirap long 1 B.C.E. na i go inap long 1 C.E. em wanpela yia (i no gat yia siro). Na kirap long 1 C.E. i go inap long 29 C.E. em 28 yia. Taim yumi bungim 454 plas 1 plas 28, bai yumi kisim 483 yia.
b Bilong kisim sampela save moa long ol dispela medikal tritmen, lukim “Askim” long Wastaua, Oktoba 15, 2000.