KAMAPIM OL DISAIPEL
LESEN 12
Strongim Bel
Stiatok: “Oil na paura bilong mekim smok i gat gutpela smel i save mekim bel i amamas; olsem tasol gutpela tok kaunsel em gutpela pren i givim bilong helpim yu, dispela i save mekim bel i amamas.”—Prov. 27:9.
Samting Jisas i Mekim
1. Lukim VIDIO, o ritim Mak 10:17-22. Na skelim ol dispela askim:
Jisas i lukim wanem sampela gutpela pasin long dispela yangpela maniman?
Wai na Jisas i mas i gat pasin laikim na strongpela bel taim em i givim tok long dispela man?
Yumi Kisim Wanem Skul Long Jisas?
2. Yumi mas soim pasin laikim taim yumi toktok wantaim sumatin, tasol yumi mas tok stret tu long em long samting em i mas mekim na bai em i ken wok yet long go klostu long God.
Bihainim Pasin Bilong Jisas
3. Helpim sumatin bilong yu long putim ol mak na wok long winim ol dispela mak.
Stori long hap “Mak Yu Laik Winim” i stap long ol wan wan lesen long buk Stap Amamas Oltaim!
Helpim sumatin bilong yu long luksave long ol samting em i mas mekim bilong winim ol mak em i putim long nau na long bihain.
Taim sumatin i winim sampela mak em i putim, tok amamas long em.
4. Painimaut wanem ol samting i pasim sumatin long kamap strong, na helpim em long winim ol dispela hevi.
Askim yu yet:
‘Sapos sumatin bilong mi i no mekim ol samting bilong winim mak bilong kisim baptais, wanem samting i pasim em?’
‘Mi ken mekim wanem bilong helpim em?’
Beten long God i ken helpim yu long strongim bel long tokim em stret long samting em i mas mekim, na mekim long pasin laikim.
5. Stopim stadi sapos sumatin i no mekim sampela senis.
Skelim sapos Baibel sumatin bilong yu i mekim sampela senis o nogat, na askim yu yet:
‘Sumatin bilong mi i save bihainim ol tok em i lainim?’
‘Em i save kam long ol miting bilong kongrigesen na tokim ol narapela long ol tok i tru em i lainim?’
‘Sapos em i bin stadi inap longpela taim pinis, em i gat laik long kamap wanpela Witnes Bilong Jehova?’
Sapos Baibel sumatin i no laik mekim senis:
Tokim em long skelim gut wanem ol samting i pasim em long kamap strong.
Long gutpela pasin stori gut long as na yu no inap stadi moa wantaim em.
Tokim em long wanem ol samting em mas mekim paslain long em bai kirap stadi gen.