Tok Bilong God i Gat Laip
Bilong Wanem Mata i Bilip Olsem Ol Man i Dai Pinis Bai Ol i Kirap Bek?
MATA i tokim Jisas: “Bikpela, sapos yu stap hia, bai susa bilong mi em i no i dai.” Jisas i laik mekim gut bel bilong Mata na em i tok: “Bambai susa bilong yu i kirap bek.” Na Mata i tok: “Mi save, bai em i kirap bek long las de, long dispela taim olgeta manmeri bai i kirap bek.”—Jon 11:17-24.
Bilong wanem Mata i bilip tru olsem susa bilong em, Lasaras, bai kirap bek? I gat as tru bilong dispela bilip bilong Mata. Em i save longtaim bipo God i bin givim strong long Ilaija na Ilaisa na tupela i kirapim bek pikinini i dai pinis. (1 King 17:17-24; 2 King 4:32-37) Na Mata i save, bipo wanpela man i dai pinis na ol i tromoi em long hul ol i bin putim Ilaisa long en taim em i dai, na skin bilong dispela man i pundaun antap long ol bun bilong Ilaisa, na man hia i kirap bek. (2 King 13:20, 21) Tasol ol samting Jisas i mekim i strongim tru bilip bilong Mata.
Tupela yia bipo Jisas i bin tok: “Yupela i no ken tingting planti long dispela. Taim i laik kamap na olgeta man i stap long matmat bai ol i harim maus bilong em, na bai ol i lusim matmat na i kam ausait.” (Jon 5:28, 29) Baibel i no stori long Jisas i bin kirapim bek sampela man paslain long taim em i mekim dispela tok. Tasol bihain liklik em i kirapim bek pikinini man bilong wanpela meri wanpis long Nen. Tok bilong dispela samting i go kamap long Judia, olsem na ating Mata i harim! (Luk 7:11-17) Na bihain ating Mata i harim tok long Jisas i kirapim bek pikinini meri bilong Jairas.—Luk 8:40-56.
Tasol Mata i no tingting long Jisas bai kirapim bek susa bilong em long dispela taim. Olsem na em i tok: “Mi save, bai em i kirap bek long las de.” Tasol Jisas i laik bai Mata i save long wok bilong em long kirapim ol man i dai pinis na em i tok: “Kirap bek, em mi yet. Na laip, em mi yet.” Bihain em i go kirapim Lasaras, em Lasaras i dai na i stap long matmat inap fopela de pinis!—Jon 11:24-27, 38-44.
Long nau yumi inap bilip moa yet olsem ol man i dai pinis bai ol i kirap bek, long wanem Krais Jisas yet i kirap bek. Pita i tok: “Dispela Jisas God i kirapim pinis. Mipela olgeta i lukim dispela pinis na mipela i tok.” (Aposel 2:32) Yumi save tru Krais i kirap bek, long wanem bihain em i kamap long ai bilong planti disaipel na ol i lukim em i stap laip. Wanpela taim inap 500 samting ol i lukim em. (1 Korin 15:3-8) Ol disaipel i bilip tru olsem man i dai pinis bai kirap bek, olsem na ol i redi long karim pen na hevi na i dai tu bilong mekim wok bilong God. Olsem wanem long yu? Yu tu yu bilip tru olsem na yu redi long karim pen na hevi na i dai tu bilong mekim wok bilong God?
[Ol Piksa long pes 4, 5]
SAMPELA MANMERI I BIN KIRAP BEK
Ilaija i kirapim em
Ilaisa i kirapim em
“Mi save, bai em i kirap bek . . . long dispela taim olgeta manmeri bai i kirap bek”
Jisas i kirapim ol
Lasaras ‘i kam ausait’