Redi Bilong Sakim Ol Spirit Nogut

“Yumi pait wantaim olgeta spirit nogut i stap antap.”—EFESAS 6:12.

1. Ol Kristen i gat wanem pait? Dispela pait bai stap inap long wanem taim?

TAIM ol spirit nogut na ol manmeri ol i bosim ol, ol i stap yet, orait bai yumi gat pait na yumi mas wok strong bambai yumi inap sakim ol samting ol i mekim bilong pulim yumi i stap aninit long strong bilong ol. Aposel Pol i tok: “Yupela i mas pasim olgeta klospait God i save givim long yumi, na bai yupela inap long sanap strong na sakim olgeta pasin hait [pasin giaman] bilong Seten. Bilong wanem? … Yumi pait wantaim olgeta spirit nogut i stap antap. Yumi pait wantaim ol hetman, na ol plesman, na ol strongpela het spirit bilong graun ol i save bosim dispela tudak.”—Efesas 6:11, 12.

2. (a) Ol samting Seten i mekim long namba wan man na meri i mekim wanem na yumi gat narapela pait tu? (b) Baibel i tok wanem na yumi save yumi mas redi na pasim olgeta klospait bambai yumi inap winim dispela pait?

² Yumi gat pait long sakim ol spirit nogut na yumi gat pait tu long sakim ol laik nogut bilong skin em rong bilong Adam tupela Iv i kamapim long skin long yumi. Tupela i no sakim Seten na nau sin i stap long skin bilong yumi olgeta. Olsem na Baibel i tok: “Ol tingting bilong man i nogut yet, long taim em i yangpela.” (Jenesis 8:21; Rom 5:12) Aposel Pol yet i mas wok strong bambai em inap bihainim stretpela pasin. Em i tok: “Mi painim pasin olsem i stap long mi: Mi laik mekim gutpela pasin, tasol pasin nogut i save pasim rot bilong mi.” (Rom 7:21-23) Na Baibel i tok: “Bel bilong man i save giaman tru, winim olgeta narapela samting, na em i moa strong long mekim ol samting.” (Jeremaia 17:9, NW) Tru tumas, yumi mas redi bambai yumi inap sakim ol samting ol spirit nogut i mekim bilong pulim yumi long mekim pasin nogut. Yumi mas pasim olgeta klospait God i givim long yumi.

Sakim Pasin Bilong Laikim Tumas Mani Kago

3. (a) Tok Seten i mekim long Iv long pastaim inap lainim yumi olsem wanem? (b) Man i wok long kisim planti samting bilong skin, ating em bai ting olsem wanem?

³ Yumi ken save tru, ol spirit nogut bai wok long kirapim yumi long laikim tumas o1 samting bilong skin. Bai ol i putim planti samting bilong pulim ai bilong yumi na bai yumi ‘aigris’ long en. (1 Jon 2:16) Tingim ol tok Seten i mekim long Iv long pastaim. Em i kirapim Iv long tingim dispela diwai tambu na pikinini bilong en. Em i kirapim pinis tingting bilong Iv na nau Iv “i lukim diwai, na dispela diwai i luk nais tumas na pikinini bilong en i gutpela tru.” Na Iv i mekim wanem? “Meri i kisim pikinini bilong dispela diwai na i kaikai.” (Jenesis 3:6) Ol spirit nogut i mekim wankain pasin long nau bilong pulim ol manmeri. Yumi save laikim ol samting i luk nais na i gutpela tru. God yet i putim dispela laik long skin bilong yumi. Tasol ol spirit nogut i mekim wok long dispela laik bilong kirapim yumi long laikim tumas ol gutpela samting bilong skin. Ating ol i kirapim ol manmeri long ting olsem: ‘Mi mas mekim wok mani bambai mi inap long i stap laip, olsem na mi ken wok long kisim planti samting, na bai mi inap hapim samting bilong mi na givim hap long ol narapela man.’

4. (a) Wanem pasin bilong givim samting long narapela man em i gutpela? Tasol wanem pasin i nogut? (b) Sampela wok boi bilong God long bipo ol i pundaun olsem wanem na yumi mas was gut long dispela samting?

⁴ Ating sampela witnes bilong Jehova long nau ol i gat planti samting bilong skin, na sapos ol i laik hapim samting bilong ol na givim hap long brata i sot, olsem ol Kristen bilong pastaim i mekim taim ol i bung na mekim kaikai, em i gutpela. (Jut 12) Tasol sapos brata i gat narapela tingting na em i givim samting, em nogut. Olsem: Sapos em i givim presen long wanpela brata i gat wok insait long kongrigesen bambai dispela brata i helpim em long kisim wok insait long kongrigesen, em nogut. Em i mekim pasin i no stret! Na brata i kisim dispela presen, sapos em i helpim dispela brata olsem brata i laik, em i no stret. I olsem em i kisim samting bilong grisim em. Kristen i gat gutpela tingting em i no ken pundaun olsem. Tasol sampela wokboi bilong God long bipo, em ol i gat bikpela wok, ol i bin pundaun olsem.—1 Samyuel 8:1-3; 2 Kronikel 19:6, 7.

5. Sapos man i kirap tingim tumas ol samting bilong skin. Ating wanem samting bai kamap?

⁵ Taim wanpela Kristen i kirap tingim ol samting bilong skin i bikpela samting, maski em i tok i gat wanem wanem as bilong dispela, tasol em inap bagarap. Wanem samting inap kamap? Isi isi bai em i no tingim moa ol samting bilong spirit. Jisas i mekim wanpela tok piksa na em i stori long sampela man ol i bin kisim save long tok i tru bilong God, na em i tok: Ol dispela man “i harim tok, na ol i wokabaut i go, na olkain hevi, na mani samting na olkain amamas bilong dispela graun i karamapim ol. Olsem na kaikai bilong ol em i no kamap bikpela. Nogat. Em i dai.” (Luk 8:14) Kristen i tingim tumas mani kago samting, maski dispela samting i no “karamapim” em, tasol yu ting dispela pasin hait bilong Seten i no wok gut?

6. Kristen i tingim tumas mani kago, pasin bilong em inap mekim wanem long ol wanlotu bilong em?

⁶ Dispela pasin i wok gut. Long wanem ating pasin dispela Kristen i mekim i pundaunim sampela narapela brata sista. Olsem: Sapos ol yangpela long kongrigesen i lukim wanpela Kristen i wok strong long kisim bikpela mani na planti gutpela gutpela samting bilong skin, yu ting dispela samting bai kirapim ol long painim kingdom bilong God pastaim? Yu lukim wanem samting i kamap long dispela rot? Na olsem wanem long ol nupela man? Nau tasol ol i kirap long bihainim tok i tru na ating bai ol i ting mani kago em i gutpela samting bilong helpim ol, na bai ol i wok long kisim ol dispela samting na ol i no wok long kamap strong long spirit, a?

7. (a) Wanpela elda Kristen long Jemani em i bihainim wanem gutpela pasin? (b) Ol manmeri bilong dispela graun ol i skelim man olsem wanem? Tasol ol Kristen i mas ting olsem wanem long kain tingting olsem? (c) Yumi ken bel nogut na toktok planti long ol manmeri i gat ol gutpela samting bilong skin?

⁷ Gutpela sapos yumi tingim pasin bilong wanpela elda Kristen long Jemani. Wanpela brata i save dispela elda i gat planti mani na em i givim askim long em, olsem: ‘Bilong wanem yu save raun long ka i no gat bikpela pe bilong en na yu stap long wanpela haus i no gat bikpela pe bilong en?’ Na dispela elda i bekim tok, olsem: ‘Long wanem sapos mi raun long ka i gat bikpela pe bilong en na mi stap long bikpela haus olsem bilong ol maniman, dispela samting inap pundaunim ol brata sista Kristen bilong mi.’ Tingting bilong em i narapela kain tru long tingting bilong ol manmeri bilong dispela graun! Ol manmeri bilong dispela graun ol i save “bikhet”—ol i laik hambak long ol samting bilong ol! (1 Jon 2:16) Ol i save skelim mani kago samting bilong man na tingim wok bilong em i kamap gutpela o nogat. Tasol kain pasin olsem i no ken kamap insait long kongrigesen Kristen! Yumi mas was gut bambai dispela kain tingting bilong Seten i no ken kam insait long tingting bilong yumi yet o insait long kongrigesen. Sapos yumi givim bel long bihainim pasin bilong God, na yumi tingim ol samting bilong yumi em inap long yumi, bai yumi no bel nogut na toktok planti long ol manmeri em yumi ting ol i gat planti samting tumas.—1 Timoti 6:6-8.

8. (a) Krais Jisas i makim wanem pasin yumi ken bihainim? (b) I stret yumi ken givim wanem ol askim long skin bilong yumi yet?

⁸ Oltaim yumi mas bihainim tingting na pasin bilong Bikpela bilong yumi, Krais Jisas. Krais inap kisim bikpela nem long dispela graun na bikpela mani kago, na em inap kisim gutpela sindaun tru. Tasol em i no wok long kisim ol dispela samting. Sampela taim em i no gat ol samting planti man i ting yumi mas kisim bambai yumi inap long i stap laip. (Matyu 4:8, 9; 8:20) Bilong wanem em i daunim ol laik bilong skin bilong em? Long wanem em i gat stretpela tingting. Em i tingim gut ol samting i nambawan bikpela samting. Em i save yumi mas bihainim laik bilong God, em nambawan bikpela samting winim olgeta narapela samting. (Jon 4:34) Olsem wanem? Long sindaun na wokabaut bilong yumi, yumi bihainim pasin bilong em? Yumi tingim wanem samting i nambawan bikpela samting—kisim gutpela sindaun long nau o kisim laip i stap oltaim long nupela pasin God bai kamapim?—Hibru 12:2, 3; 1 Pita 2:21-24; 3:14.

9. Yumi mas kisim wanem ol klospait bilong spirit bambai yumi inap sakim pasin bilong laikim tumas mani kago samting? Olsem wanem ol dispela klospait inap lukautim yumi?

⁹ Yumi mas pasim olgeta klospait bilong spirit bambai yumi inap sakim ol spirit nogut na ol i no ken pulim yumi long laikim tumas mani kago samting. Yumi mas “pasim STRETPELA PASIN olsem siot kapa i karamapim bros.” Yumi mas mekim pasin i stret long ai bilong God. (Efesas 6:13, 14) Na i stret yumi mas ‘daunim laik bilong yumi yet na bihainim Krais’ long nau, long wanem Jisas i tok: “Sapos wanpela man i kisim olgeta samting bilong graun, tasol laip bilong em yet i lus, bai olgeta samting i helpim em olsem wanem?” (Matyu 16:24-27; lukim tu Matyu 6:33.) Na narapela bikpela samting bilong ol klospait yumi mas kisim, em olsem: Yumi mas “kisim BILIP tu olsem hap plang.” (Efesas 6:16) Yumi mas bilip tru long nupela taim God i laik kamapim, na yumi no ken ting olpela pasin bilong nau inap helpim yumi. Dispela pasin bilong nau bai pinis wantaim olgeta planti samting bilong en.—1 Jon 2:17; Esikiel 7:19.

10. Wanem samting bilong ol dispela klospait i bikpela samting bilong helpim yumi long sakim pasin bilong laikim tumas ol samting bilong skin? Olsem wanem dispela samting inap helpim yumi?

¹⁰ I gat kain kain pasin hait i laik pulim yumi long laikim tumas mani kago samting, olsem na yumi mas “putim hat kapa,” em bikpela samting bilong helpim yumi long sakim dispela pasin. Dispela hat kapa i olsem yumi tingting strong long “GOD I KISIM BEK” yumi. Long narapela pas Pol i raitim, em i tok yumi mas “strong long WETIM GOD I KISIM BEK YUMI, dispela pasin yumi mas putim olsem hat kapa.” (Efesas 6:17; 1 Tesalonaika 5:8) Sapos yumi “wetim God i kisim bek yumi” i olsem yumi wetim gutpela pe God bai givim long yumi na yumi no tingting long kisim gutpela sindaun nau long dispela taim.

11. Moses i mekim wanem na yumi ken save, em i pasim “hat kapa,” olsem em i wetim God i kisim bek em?

¹¹ Moses i pasim dispela “hat kapa” em i wetim God i kisim bek em. Em i go bikpela long haus bilong king bilong Isip, tasol em i “no laik bihainim pasin bilong sin na painim amamas bilong sotpela taim tasol” long haus bilong king. Na em i no tingting long kisim “olgeta mani na bilas samting bilong Isip.” Bilong wanem? Long wanem “em i ting long dispela gutpela pe bambai God i givim em.” Moses i tingim gut ol samting Jehova i bin tok promis long en. Oltaim em i tingim. I no olsem Moses i harim o kaunim tasol sampela tok i stori long Jehova. Nogat. Baibel i tok: “Moses i olsem i lukim God, olsem na em i stap strong.” (Hibru 11:24-27) Moses i bilip tru olsem Jehova em i stap na em bai truim ol tok promis bilong em. Sapos yumi laik sanap strong na sakim ol samting Seten i mekim bilong pundaunim yumi, yumi tu yumi mas bilip tru long dispela samting yumi wet long kisim, em laip i stap oltaim.

Sakim Pasin Pamuk

12. Ol spirit nogut i bin kamapim wanem samting na ol i pundaunim planti Kristen?

¹² Olsem yumi stori pinis, wanpela bikpela samting ol spirit nogut i mekim na ol i pundaunim planti Kristen, em olsem: Ol i pulim ol long mekim pasin pamuk samting. God yet i putim laik long skin bilong yumi na yumi gat laik long marit. Tasol ol spirit nogut i paulim dispela gutpela laik na pulim ol manmeri long mekim maritpasin, tasol ol i no marit. Long olgeta hap long nau ol spirit nogut i bin kamapim planti samting bilong pulim ol manmeri long mekim pasin pamuk. Yumi mas pasim wanem kain klospait na bai yumi inap sakim dispela samting ol spirit nogut i mekim bilong pundaunim yumi?

13. Josep i mekim wanem na yumi save, em i “pasim stretpela pasin olsem siot kapa”?

¹³ Yumi mas “pasim stretpela pasin olsem siot kapa i karamapim bros.” Em bikpela samting. Yumi mas tingting strong oltaim long mekim pasin Jehova i tok em i stret. (1 Korin 6:18) Josep i pasim dispela kain klospait. Meri bilong Potifa i aigris long Josep na long olgeta de em i save tokim Josep: “Yu kam slip wantaim mi” Tasol Josep i tok: “Olsem wanem bai mi mekim dispela pasin nogut? Sapos mi mekim olsem bai mi mekim sin long ai bilong God.” (Jenesis 39:7-12) Bel bilong yumi ‘i save giaman’ na em inap kirap long mekim pasin pamuk, tasol yumi mas bihainim pasin bilong Josep. Yumi mas tingim ol samting inap kamap sapos yumi mekim dispela pasin i no stret.—Jeremaia 17:9.

14. Yumi mas tingim wanem samting na dispela inap helpim yumi na bai yumi klia long pasin pamuk?

¹⁴ Pastaim yumi mas tingim ol samting inap kamap long God sapos yumi brukim lo bilong Em. Seten i sutim tok long God Jehova na em i tok, em inap traim ol man na bai ol i lusim God, ol i no ken i stap gut long Em. Olsem na Jehova i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Provep 27:11) Orait, yu tingim: Yu laik brukim lo bilong God na mekim Seten i amamas na God i bel hevi? (Sam 78:38-41) Sapos yu laikim tumas Jehova, bai yu no mekim dispela pasin nogut, a? Na yu mas bihainim gutpela tingting. Jehova tasol inap givim laip i stap oltaim long yu. Olsem na sapos yu bihainim gutpela tingting bai yu no brukim lo bilong Em, a? Bai yu bihainim laik bilong Em.—1 Jon 5:3; Rom 6:23.

15. Ol manmeri i pundaun na mekim pasin pamuk, ol i no tingim wanem samting?

¹⁵ Ol Kristen i pundaun ol i olsem aipas. Ol i kain olsem wokboi bilong Ilaisa long bipo. Ilaisa i beten askim God long helpim wokboi bilong em. Yu tingim? Ilaisa i tok olsem: “O Jehova, plis, opim ai bilong em bambai em i lukluk.” Na nau dispela wokboi i lukim “ol hos na wilka bilong pait i pulap long dispela ples maunten na i banisim Ilaisa olgeta.” (2 King 6:15-17, NW) Ai bilong yu i op? Yu lukim Jehova na Krais na ol ensel ol i was long yumi? (Sam 11:4; 34:7; Hibru 1:14; Matyu 18:10) Yumi stap olsem long ai bilong olgeta, ol ensel na ol man wantaim. (Lukim 1 Korin 4:9.) Sapos yumi kisim dispela tingting i stret wantaim tok bilong Baibel na yumi save, God na Krais na ol ensel long heven ol i was long yumi na ol i lukim olgeta samting yumi mekim, bai yumi no mekim pasin pamuk, a?

16. I gat wanem samting moa na sapos yumi tingim, dispela bai helpim yumi na bai yumi klia long pasin pamuk?

¹⁶ Na yu tingim: Sapos yu mekim pasin pamuk, dispela bai mekim wanem long kongrigesen Kristen. Ating ol man ausait bai ting Ol Witnes Bilong Jehova i wankain tasol olsem ol narapela manmeri bilong dispela graun, na bai ol i no laik harim tok yumi autim long ol em inap givim laip long ol. (2 Pita 2:2) Na tingim tu bikpela hevi dispela pasin nogut bai kamapim long famili bilong yu. (Provep 10:1) Na sapos yu marit, yu mas askim skin bilong yu yet olsem: ‘Olsem wanem bai mi mekim dispela pasin na mekim nogut long poroman bilong mi? Mi wanem kain man (o meri)?’ Taim yumi tingim olgeta dispela samting yumi save, man o meri i mekim pasin pamuk em i tingim skin bilong em yet tasol na em i mekim pasin longlong tru, a?

17, 18. (a) Oltaim Pol i gat pait long mekim wanem? Olsem wanem em inap winim dispela pait? (b) Bilong pasim olgeta klospait yumi mas mekim wanem samting moa? Na taim yumi mekim yumi mas mekim wanem wantaim?

¹⁷ Tru i hatwok long yumi sanap strong na sakim olgeta pasin nogut. Long olgeta taim Pol i gat pait long daunim ol laik nogut bilong bel bipo i bin kalabusim em. Em i tok: “Mi save paitim tru bodi bilong mi na mekim em i bihainim laik bilong mi. Nogut mi autim gutnius long sampela man na bihain mi yet mi lus.” (1 Korin 9:27; Taitas 3:3) Taim skin bilong Pol i laik mekim pasin i no stret, Pol i “paitim tru,” em i subim skin bilong em long mekim pasin i stret. Yu tu yu mas mekim olsem bambai yu inap winim dispela pait na sakim ol laik nogut bilong skin.

¹⁸ Bilong kisim olgeta klospait yu mas beten tu. Oltaim yu mas beten askim God long helpim yu. (Efesas 6:18) Tasol nogut yu beten askim God long helpim yu long klia long pasin pamuk samting na bihain gen yu kaunim ol buk o lukim ol piksa wokabaut i kamapim dispela samting, o driman nating long wanpela meri (o man), o yu aigris o tok gris long wanpela meri (o man). Yu mas mekim wok i stret wantaim beten!

Sakim Pasin Bilong Bihainim Tingting Bilong Yu Yet

19. (a) Oltaim Jehova i bin mekim wanem bilong soim rot long lain bilong Em? (b) Sampela man i tok wanem na yumi save, ol i laik bihainim tingting bilong ol yet?

¹⁹ Taim yumi lainim tok bilong Baibel yumi kisim save olsem: Oltaim Jehova i bin putim ol lo na makim sampela man bilong soim rot long lain bilong em na stiaim tingting bilong ol. Long taim bilong ol Kristen bilong pastaim i gat wanpela lain tasol ol i lain bilong Jehova, em lain Kristen, na i olsem tasol long nau. I gat wanpela lain tasol ol i lain bilong Jehova na Jehova i bosim ol. (Efesas 4:4, 5; Matyu 24:45-47) Tasol sampela man i tok: ‘Sampela taim lain o ogenaisesen bilong Jehova ol i bin stretim tingting bilong ol long sampela samting, olsem na yumi olgeta wan wan i ken tingim wanem samting yumi laik bilip long en.’ Ol i laik bihainim tingting bilong ol yet. Olsem wanem na dispela pasin i nogut?

20. (a) Man i bihainim tingting bilong em yet, dispela i soim wanem samting? (b) Wanem samting inap helpim yumi na bai yumi no ting save bilong yumi i winim save bilong lain bilong Jehova? (c) Gutpela sapos yumi bihainim wanem pasin bilong ol Kristen bilong pastaim?

²⁰ Long wanem man i bihainim tingting bilong em yet, dispela i soim olsem em i gat pasin bilong hambak. Na Baibel i tok: “Pasin bilong hambak na litimapim nem bilong yu yet bai i mekim yu pundaun na bagarap.” (Provep 16:18) Sapos yumi ting olsem save bilong yumi i winim save bilong lain bilong Jehova, yumi mas givim askim long skin bilong yumi, olsem: ‘Yumi kisim we save long tok i tru bilong Baibel? Sapos lain o ogenaisesen bilong Jehova i no bin soim rot long yumi bai yumi kisim save long tok i tru? Na sapos lain bilong God i no soim rot long yumi, yu ting yumi inap bihainim gutpela rot?’ Nogat!—Lukim Aposel 15:2, 28, 29; 16:4, 5.

21. (a) Wanem samting tasol inap helpim yumi long winim dispela pait? (b) Oltaim yumi mas tingim wanem samting? Olsem na nau yumi mas mekim wanem?

²¹ Ol strongpela spirit nogut i pait wantaim yumi, olsem na long strong bilong yumi yet yumi no inap winim pait. Tasol God i sambai long yumi na ogenaisesen bilong Em i helpim yumi—olgeta brata sista bilong yumi long olgeta hap—olsem na yumi no inap lus long pait. (Sam 118:6-12; 1 Pita 5:9) Tasol oltaim yumi mas tingim dispela pait na was gut. Yumi gat pait bilong spirit na long taim bilong pait yumi no ken malolo. Nau em i no taim bilong malolo; em i no taim bilong painim amamas tasol. Nau em i taim bilong lain na wok strong na was gut na daunim ol laik bilong yumi yet. Ol birua i pundaunim pinis sampela long lain bilong yumi. Nogut yumi tu yumi pundaun! Sapos long olgeta taim yumi “pasim olgeta klospait God i save givim long yumi,” na yumi “sanap strong na sakim olgeta pasin hait bilong Seten,” bai yumi winim pait na yumi no ken pundaun.—Efesas 6:11, 12.

Yu Inap Bekim Ol Dispela Askim?

□ Taim wanpela Kristen i kirap tingim tumas ol samting bilong skin, dispela inap kamapim wanem wanem ol hevi long dispela man yet na long ol narapela brata sista long kongrigesen?

□ Wanem samting inap helpim yumi long sakim pasin bilong laikim tumas mani kago na ol samting bilong skin?

□ Wanem samting inap helpim yumi na bai yumi no pundaun na mekim pasin pamuk?

□ Man i bihainim tingting bilong em yet, dispela i soim wanem samting? Wanem samting inap helpim yumi long klia long dispela pasin?

[Piksa long pes 24]

Sapos Kristen i hambak long ol samting bilong em, dispela inap mekim wanem long ol narapela long kongrigesen?