Jerusalem—“Samting Bilong Amamas long En”
“Mi wokim nupela heven na nupela graun, na bai ol samting bilong bipo i no ken kamap moa long tingting bilong man, na i no ken kamap tu long bel. Tasol yupela ol manmeri, yupela amamas oltaim long dispela samting mi laik wokim. Bai mi mekim Jerusalem i kamap olsem samting bilong amamas long en, na bai lain bilong en tu i kamap olsem samting bilong amamas long en. Na bai mi amamas long Jerusalem na bai mi amamas long lain bilong mi.”—Aisaia 65:17-19, NW
1. (a) Bilong wanem lain bilong God i mas amamas long tok bilong Aisaia 65:17-19 ? (b) Tasol i gat wanem ol askim long Jerusalem?
EM GUTPELA tok tru Nambawan Bikpela King Jehova i mekim long maus bilong profet Aisaia! Dispela tok i stori long bikpela amamas. Yu laik insait long dispela amamas, a? Tru tumas! Tasol ating yu laik save, wanem dispela Jerusalem yumi mas amamas long en? Ating em biktaun Jerusalem i stap long nau em planti pait bilong lotu na politik i kamap insait long en? Dispela “Jerusalem” inap mekim wok i stret wantaim as bilong nem bilong en, em olsem: “I Gat [o As Bilong] Bel Isi Bilong Tupela Hap”? Na dispela Jerusalem i gat wanem wok long “nupela heven na nupela graun”? Orait, nau yumi ken stori long dispela samting.
Jerusalem Bilong Bipo
2. Olsem wanem long ples Jerusalem long pastaim?
2 Ol i wokim Jerusalem antap long maunten Saion na inap longtaim Jehova i bin mekim gut long dispela ples. Inap 3,900 samting yia bipo king-pris Melkisedek i givim blesing long Ebraham long dispela ples. Em i litimapim nem bilong Jehova na em i tok, Jehova em i “God Antap Tru i bin wokim heven na graun.” (Jenesis 14:18, 19) Tasol bihain dispela taun Selem i kamap wanpela strongpela taun bilong ol Jebus, ol i man bilong lotuim ol spirit nogut.
3. Baibel i tok wanem long Jerusalem paslain long taim bilong Josua, na bihain long dispela taim?
3 Inap 400 yia moa na long Josua sapta 10 Baibel i kolim nem “Jerusalem” long namba wan taim. Josua sapta 10 i stori long King Adonisedek bilong Jerusalem em i singautim fopela king bilong ol lain klostu bilong i go wantaim em na pait wantaim ol Isrel. Tasol Jehova i helpim ol Isrel. San na mun i sanap i stap na ol Isrel i winim ol dispela Kenan. Ol i kilim i dai dispela faipela king. Tasol Baibel i no tok Josua i kisim Jerusalem long dispela taim. Nogat. Baibel i tok: “Tasol ol Juda i no inap rausim ol Jebus long Jerusalem. Olsem na ol Jebus i stap yet wantaim ol Juda long Jerusalem.”—Josua 10:1-27; 15:63; Hetman 1:21.
Jerusalem long Taim Bilong King Devit na King Solomon
4. Long taim bilong Devit na Solomon wanem ol gutpela samting i kamap long Jerusalem?
4 Inap 400 samting yia bihain Devit i kamap king bilong Isrel. Long yia 1070 B.C.E. “Devit i kisim strongpela taun i stap long Saion, em taun bilong Devit,” olsem Jerusalem. Long dispela ples long Maunten Saion em i mekim wok king. Jehova i makim em bilong i stap king. Pikinini man bilong em Solomon em tu em i “sindaun long sia king bilong Jehova.” Long taim bilong King Solomon i gat gutaim na bel isi i stap na Solomon i wokim gutpela haus lotu bilong Jehova long Maunten Moraia long Jerusalem. Dispela haus lotu i kamap olsem ples bilong lotuim Jehova na bilong lainim ol man long tok bilong Em na Lo bilong em.—1 Kronikel 11:5, NW; 29:23, NW; 2 Kronikel 7:12-16.
5. Ol Sam i stori olsem wanem long Jerusalem na “nambawan king” bilong en?
5 Planti sam i litimapim nem bilong maunten Saion na taun Jerusalem. Ol pikinini man bilong Kora i wokim song o sam na ol i tok, Saion em i “maunten bilong God” na Jerusalem em i “taun bilong [Em].” “Dispela maunten bilong God, em i gutpela tru na i antap moa. Olgeta manmeri bilong graun ol i laikim tumas maunten Saion. Em i stap long hap bilong not, na em i taun bilong nambawan king [God Jehova].” Devit yet i stori long Jerusalem, olsem: “Orait nau mipela kamap pinis na sanap insait long banis bilong Jerusalem. Ol i bin wokim gen Jerusalem na em i gutpela tumas. Ol lain bilong Isrel i save kam hia bilong tenkyu long Bikpela, olsem bipo em i bin tokim ol.” Baibel i tok, dispela “nambawan king” em i stap long Jerusalem olsem “ples tru” bilong em na em i save lukautim ol manmeri i stap long Jerusalem. “Ol maunten i stap raunim Jerusalem, olsem tasol nau na olgeta taim bihain bai Bikpela i raunim ol manmeri bilong en.”—Sam 48:1, 2; 122:2-4; 135:21; 125:1, 2.
Bagarapim na Kirapim Gen
6. (a) Bihain Jerusalem i kamap olsem piksa na i makim wanem samting? (b) Wanem strafe i painim Jerusalem? Bilong wanem dispela strafe i painim Jerusalem?
6 Olsem na bihain Jerusalem na Maunten Saion i kamap olsem piksa na i makim lain Isrel na ol manmeri bilong Isrel. Tasol kwiktaim, insait long 500 yia samting, dispela lain ol i lusim Jehova na ol i kirap lotuim ol god giaman. Na ol king nogut bilong Jerusalem i kilim i dai planti man i no gat asua. (2 King 24:4) Ol i no bihainim toksave ol profet bilong Jehova i givim long ol, olsem na Nambawan Bikpela King Jehova em i tokaut long strafe bai painim Sedekaia, em laspela king i sindaun long sia king long Jerusalem. Jehova i tok: “Rausim … dispela hat bilong king. … Bai mi bagarapim, bagarapim, bagarapim dispela samting, na wanpela man i no ken kisim inap long taim dispela man i kamap, em man bilong kisim, na bai mi givim long em.” (Esikiel 21:26, 27, NW) Long yia 607 B.C.E. King Nebukatnesa bilong Babilon i bagarapim Jerusalem na haus lotu bilong en, na ol manmeri i no bagarap long pait em i kisim ol i go kalabus long Babilon.
7. (a) Bihain wanem samting i kamap long Jerusalem? Bilong wanem ol man i kirap nogut long dispela samting? (b) Olsem wanem na dispela Jerusalem i narapela kain? Tasol taim ol i wokim gen Jerusalem nau rot i op bilong wanem samting i ken kamap?
7 Tasol ol profet bilong Jehova i tok, bihain bai Jehova i kirapim gen Jerusalem. Na Jeremaia i tok dispela samting bai kamap 70 yia bihain. (Aisaia 44:24-45:7; Jeremaia 25:11, 12; 29:10) Stret long taim, ol samting i kamap olsem Jehova i bin tok long maus bilong profet Aisaia, na ol manmeri i kirap nogut long dispela samting. King Sairas bilong Pesia i daunim ol Babilon, na long yia 537 B.C.E. em i putim tok na ol Juda i bilip long God ol inap i go bek long ples bilong ol, na kirapim gen lotu bilong Jehova long Jerusalem. Olsem Aisaia i tok profet pinis “bikpela lait bilong Jehova, na biknem bilong God bilong yumi” em i kamap gen long hap bilong Juda na Jerusalem. Long dispela taim i no gat king long Jerusalem. Tasol Jehova i mekim gut long dispela ples, long wanem nem bilong Em i stap long en na liklik lain bilong em ol i go bek long dispela ples ol i stap gut long em. Na dispela samting i makim bikpela samting bai kamap long bihain. Ol i wokim gen dispela taun na dispela samting i opim rot bambai Mesaia o Krais i ken i kam olsem ol profet i tok pinis.—Aisaia 35:2, NW; 62:1-7.
Jehova i Lusim Haus Bilong Jerusalem
8. (a) Bilong wanem Jerusalem i no amamas long Mesaia o Krais? (b) Wanem samting i bin painim Jerusalem olsem Jisas i tok pinis? Dispela samting i kamap olsem wanem?
8 Ol i wokim gen Jerusalem na 500 samting yia bihain Mesaia o Krais i kam long ol Juda long Jerusalem. Dispela samting i kamap long taim stret olsem Jehova i makim pinis, olsem long yia 33 C.E., na i truim tok profet i stap long Danyel sapta 9 ves 24-27. Tasol yu ting Jerusalem i amamas long em? Nogat. Long wanem ol i i wetim wanpela hetman politik bilong dispela graun i kirap helpim ol. Ol i lusim pinis tok bilong Jehova, na ol bikpela bos bilong ol i mekim bikpela rong tru i no inap tekewe—ol i kilim i dai dispela Pikinini bilong God yet! Tripela de paslain long taim ol i nilim Jisas long pos na em i karim bikpela pen, em i tokim ol dispela manmeri: “Jerusalem, Jerusalem, yu save kilim ol profet i dai, na yu save tromoi ston bilong kilim ol wokman God i bin salim i kam long yu! Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing, tasol yupela i no laik. Yupela harim, nau ples bilong yupela bai i stap nating.” (Matyu 23:37, 38) Olsem na long yia 33 C.E. Jehova i sakim Jerusalem bilong graun. Na long yia 70 C.E. ol ami bilong Rom i bagarapim Jerusalem wantaim lain bilong en na haus lotu bilong en; ol i bagarapim ol buk i gat nem bilong ol tumbuna bilong ol Juda long en na ol narapela buk bilong ol Juda.
9. Ating Jerusalem bilong graun i bin truim as bilong nem bilong en?
9 Olsem wanem? Bihain Jehova i mekim gut long dispela Jerusalem ol i bin wokim gen? Nogat. Inap 1,900 yia pinis hevi i bin painim Jerusalem. Na long nau tu Jerusalem i bruk bruk long ol narapela narapela lotu. No gat “bel isi” long dispela taun, na bikpela lait bilong Jehova i no i stap long en. Jehova i no mekim sampela wok moa long Jerusalem bilong graun.
I Makim Wanpela Lain Bilong Nau Ol i Lusim Jehova
10. (a) Jerusalem i lusim Jehova em i makim gut wanem samting? (b) Ating tok bilong Matyu 7:20 i stret olsem wanem long dispela “Jerusalem” bilong nau?
10 Tupela taim dispela Jerusalem bilong bipo i lusim Jehova na Jehova i givim strafe long en, pastaim long han bilong ol Babilon na bihain long han bilong ol Rom. Dispela Jerusalem i makim gut wanpela lain bilong nau, ol tu i bin lusim Jehova, em ol misin bilong Krisendom, olsem ol misin ol i kolim ‘Kristen.’ Ol hetman bilong Jerusalem long bipo ol i tok ol i save bihainim Lo bilong Jehova, olsem ol pris pasto bilong Krisendom long nau i tok ol i lotuim God bilong Baibel na autim tok bilong em. Tasol Jisas i tok, “Yupela i ken save long ol profet giaman long pasin bilong ol yet.” (Matyu 7:20) Orait, Krisendom long nau i bin mekim wanem kain “pasin”? Yu ting ol i bin mekim gutpela pasin na bai ‘I Gat As Bilong Bel Isi’? Nogat tru. Long hap bilong Krisendom tupela pait nogut i bin kirap, em pait bilong olgeta hap. Na ol pris pasto i bin givim blesing long ol manmeri i insait long dispela tupela pait. Tru tumas, tok profet Jehova i mekim long Jerusalem taim Jerusalem i lusim em pinis, dispela tok i stret tru long ol hetman bilong ol lotu bilong Krisendom long nau. Jehova i tok: ‘Blut bilong ol man i no gat rong em i stap long laplap bilong yupela.’—Jeremaia 2:34.
11. Krisendom i bin mekim wanem na i truim tok bilong Jisas long Matyu 24:11, 12 na Mak 7:6-8?
11 Kain kain pasin nogut i kamap long hap bilong Krisendom long nau, olsem pasin pamuk na pasin sem, na katim marit, na famili i bruk, na mekim nabaut long drak, na stil na kilim man i dai na olgeta narapela kain pasin nogut tu. Lotu bilong Krisendom i no gat strong bilong pasim pasin nogut na dispela pasin i kamap bikpela. (Matyu 24:11, 12) Tok bilong Jisas i stret tru long ol hetman bilong lotu bilong en! Em i tok: “Profet Aisaia em i makim tru yupela man bilong giaman. Em i bin raitim tok olsem: ‘Dispela lain man ol i save litimapim nem bilong mi long maus bilong ol, tasol bel bilong ol em i stap longwe tumas long mi. Ol i save autim lo bilong man tasol na i tok, “Dispela em i tok bilong God.” Olsem na ol i lotu nating long mi.’ Yupela i lusim pinis lo bilong God, na yupela i holim strong pasin bilong man tasol.” Ol misin bilong Krisendom long nau ol i wankain long Jerusalem bilong bipo em i lusim Jehova. God bai “bekim hevi” long ol dispela misin wantaim ol narapela “birua bilong Krais” taim Bikpela Krais Jisas i kamap ples klia bilong bekim pe nogut long ol manmeri i no bihainim tok.—Mak 7:6-8; 1 Jon 2:18, 19; 2 Tesalonaika 1:6-9.
Kingdom i Kamap Bek
12. Luk 21:24 i tok long wanem taim bilong ‘krungutim’?
12 Tasol taim Jisas i stap long graun, em i tok: “Lek bilong ol man bilong ol arapela lain bai i krungutim Jerusalem, inap [long taim bilong ol] i pinis.” (Luk 21:24) Olsem na ating em i tok God bai kirap mekim wok gen long Jerusalem bilong graun? Nogat. Tru, long yia 607 B.C.E. lek bilong ol Babilon i krungutim Jerusalem na bihain, inap liklik taim ol i kirapim gen Jerusalem, tasol i no gat wanpela king bilong lain bilong Devit em i sindaun gen long sia king long Jerusalem. Na long taim bilong ol aposel, lek bilong ol Rom i krungutim Jerusalem na ol Juda i laik bosim ples bilong ol yet ol i no laikim tru ol Rom. Tasol inap long nau i no gat wanpela kingdom God i bosim i kirap gen long Jerusalem. Nogat tru. Na bihain tu bai i no gat.
13. (a) Luk 21:7-11, 24-26 i kolim wanem ol samting i mas kamap long pinis bilong taim bilong “ol man bilong ol arapela lain”? (b) Ol samting i bin kamap kirap long yia 1914 i truim wanem samting?
13 Tasol nau taim bilong “ol man bilong ol arapela lain” i pinis! Tok profet bilong Jisas long Luk sapta 21 i makim olsem. Nau yumi lukim ol samting i kamap long graun olsem Jisas i tok profet long en long Luk sapta 21, a? Em i tok, ‘Narapela lain bai kirapim pait long narapela lain, bai i gat guria na sik na hangre, na bai ol lain man i pret long ol samting i laik kamap long graun.’ Tru tumas ol dispela samting i bin kamap kirap long yia 1914 na i kam inap long nau i makim ‘taim bilong ol man bilong ol arapela lain’ i pinis! (Luk 21:7-11, 24-26) Olsem na 35 yia paslain long yia 1914 lain bilong Jehova i kirap na tokaut long dispela yia 1914 em i bikpela yia. Ol i save long dispela taim bilong “7-pela yia” Danyel sapta 4 i tok profet long en, olsem na ol i save taim bilong “ol man bilong ol arapela lain” em i mas pinis long yia 1914! Na bai God i kirapim kingdom bilong em.
14. Olsem wanem na tok bilong Luk 21:24 i no makim Jerusalem bilong graun?
14 Olsem na long yia 1914 “ol man bilong ol arapela lain” i pinis long krungutim Jerusalem. Tasol em wanem “Jerusalem”? I no dispela Jerusalem Jenaral Allenby bilong Englan i kisim long yia 1917 na ol Englan i bosim i go inap long taim ripablik bilong Isrel i kamap long yia 1948. Nogat. Orait, Jisas i tok long wanem “Jerusalem”?
15.Olsem wanem yumi save, ‘tumbuna pikinini bilong Devit’ i mas kamap king long “Jerusalem” long 1914 C.E.?
15 Jehova i bin kamapim wanpela kingdom bilong em long Jerusalem na makim Devit i stap king bilong en. Na Jehova tok promis long Devit olsem: “Mi promis pinis wanpela taim tasol na mi kolim nem holi bilong mi yet bilong strongim dispela tok, … Mi tok olsem: Mi no ken tok giaman long Devit. Ol lain tumbuna bilong en i no inap pinis, bai ol i stap oltaim. Na ol lain bilong en bai i bosim ol manmeri longtaim tru inap olsem san i stap. Bai ol i stap olsem oltaim, olsem mun i stap long skai, na i soim ol manmeri tok bilong mi i tru olgeta.” (Sam 89:35-37) Taim bilong “ol man bilong ol arapela lain” i pinis long yia 1914 na ‘tumbuna pikinini’ bilong Devit i mas kirap mekim wok king long “Jerusalem” o Saion. Tasol em i no mekim long Jerusalem bilong graun!
16. (a) Olsem na kirap long yia 1914 Mesaia o Krais i bin mekim wok king we? (b) I gat wanem samting na yumi ken save, Krais i kirap pinis long mekim wok king?
16 Em i kamap king long dispela Jerusalem o Saion Jehova i tok long en long Sam 2 ves 6. Jehova i tok: “Mi yet mi makim pinis wanpela man bilong i stap king, na mi putim em i stap long Saion, em i maunten holi bilong mi.” Na Devit i stori long dispela taun long Sam 110:1, 2. Em i tok profet long Bikpela Krais Jisas na em i tok: “[Jehova] i tokim Bikpela bilong mi olsem, ‘Yu sindaun long han sut bilong mi inap mi putim ol birua bilong yu i stap aninit long yu.’ Bikpela i stap long Saion, na bai em i mekim yu bosim planti ples, na em i tok, ‘Yu bosim ol birua bilong yu.’” Yes, Mesaia King Krais Jisas em i sindaun long sia king long Maunten Saion o Jerusalem bilong heven, na em i bosim ol birua. Em i rausim nambawan birua Seten long heven i kam daun long graun na Seten i save em i no gat bikpela hap taim moa. Olsem na em i kirapim ol lain man “long mekim pasin bilong bikhet” olsem Sam 2 ves 1 i tok.—Revelesen 12:7-12.
17. Olsem wanem yumi save, liklik taim tasol na bai “pasin bilong bikhet” bilong ol lain man i pinis?
17 Tasol yu ting Nambawan Bikpela King Jehova bai larim ol dispela lain i “bikhet” oltaim na sakim Kingdom bilong em i stap long han bilong Pikinini bilong em? Yu mas tingim dispela samting, olsem: Ol man i sutim tok long ol Kristen bilong pastaim na ol i tok, ol dispela Kristen ‘i pulapim Jerusalem long tok bilong ol’; ol Kristen i wok strong long i go long ol haus na toksave long ol man na bihain strafe bilong Jehova i painim Jerusalem bilong bipo. (Aposel 5:28, 41, 42; 4:16) Olsem tasol long nau, Ol Witnes Bilong Jehova i bin wok strong long olgeta hap bilong Krisendom na toksave long ol man long de bilong bekim pe nogut.
18. Bilong wanem yumi bilip na wetim ol samting i kamap olsem ‘bipo yet God i ting long mekim’?
18 Ol i mekim bikpela wok tru long autim dispela tok long olgeta hap bilong graun na yu ting Jehova i no ken mekim wok bilong em long Amagedon? Yu ting Jehova i no ken “bagarapim ol man i bin bagarapim graun”?Nogat tru! Ol manmeri i bilip tru long ol tok promis bilong God ol i wetim God i mekim dispela samting “bipo yet [em] i ting long mekim.” (Revelesen 11:18; Efesas 3:10-12) Long rot bilong kingdom bilong Krais, em nau Krais i stap king long “Jerusalem” bilong heven, bai Jehova, em “nambawan king ,” i stretim bek nem bilong em. Na bai em i helpim ol manmeri i kamap gutpela olgeta na i stap oltaim long paradais long graun, na long dispela rot bai em i makim olsem “em i God bilong yumi oltaim ol Tasol taim bilong taim,” na em “i no wokim [dispela graun] bilong i stap nating.”—Sam 48:14; Aisa 45:18, 22-24; 46:9-11; 55:11; Jeremaia 25:31.
Yu bai tok wanem bilong bekim ol dispela askim:
□ Wanem insait bilong nem “Jerusalem”?
□ Dispela taun i bin mekim pasin i stret wantaim dispela nem?
□ I gat wanem lain long nau ol i mekim pasin wankain olsem Jerusalem bilong bipo i mekim, em ol i lusim God?
□ Luk 21:24-26 i makim wanem samting i mas kamap long pinis bilong taim bilong “ol man bilong ol arapela lain”?
□ Ol i pinis long ‘krungutim’ wanem “Jerusalem”?