Tok Bilong God i Gat Laip
Yu Tingim Beten i Bikpela Samting?
Tu tausen faiv handet yia bipo, Daraias em i king bilong Midia. Em i makim Danyel i stap nambawan gavman bilong em. Daraias i amamas long wok bilong Danyel, olsem na em i laik givim bikpela namba tru long Danyel. Tasol ol narapela bikpela man i bel nogut long Danyel na ol i painim rot bilong givim hevi long em. Ol i mekim long rot bilong beten. Oltaim Danyel i save beten. Em i tingim beten i bikpela samting. Olsem wanem long yu? Yu tingim beten i bikpela samting?
OL BIRUA bilong Danyel i go long King na tokim em long putim wanpela lo, olsem: “Inap 30 de ol man i no ken beten long wanpela god o wanpela man; ol i mas beten long king tasol. Na sapos wanpela man i kalapim dispela lo, ol i mas tromoi em i go insait long hul bilong ol laion.” King i no save ol dispela man i bel nogut long Danyel, olsem na em i orait long dispela lo. Sapos yu bin i stap long taim bilong Danyel na yu wanpela wokboi bilong Jehova, bai yu lusim pasin bilong beten? Taim Danyel i save king i putim dispela lo o tambu, em i no pret. Em i go beten long God olsem em i save mekim long olgeta taim. Tripela taim long olgeta de em i save beten. Ol birua bilong Danyel i go tokim king Danyel i kalapim lo bilong king. King Daraias i bel hevi. Em i no laik bagarapim Danyel. Tasol em i putim pinis lo. Em i painim rot bilong helpim Danyel bambai ol i no ken tromoi Danyel long hul bilong ol laion. Tasol ol birua i tokim king: ‘King yet i orait long dispela lo na em i no ken senisim.’ Olsem na Daraias i tok na ol i tromoi Danyel long hul bilong ol laion.
Daraias i bel hevi na em i no inap slip. Olsem na long tulait em i kirap na ran i go long hul bilong ol laion. Taim em i kam klostu pinis, em i singaut na em i tok: “O Danyel, yu boi bilong God i gat laip, dispela God yu save lotu oltaim long em, em i bin helpim yu o nogat?” Na Danyel i bekim tok, olsem: “O King, … God bilong mi i salim ensel bilong em i kam pasim maus bilong ol laion na ol i no bagarapim mi.”
King i amamas tru. Em i tokim ol boi bilong em long helpim Danyel long lusim hul. Na em i mekim wanem samting long ol man i laik bagarapim Danyel? Em i tokim ol boi bilong em long holim ol dispela man na tromoi ol i go long hul bilong laion! Ol i pundaun i go na ol laion i holim ol. Bihain King i salim pas long olgeta manmeri long kingdom bilong em na em i tok, ol i mas daun long God bilong Danyel, long wanem dispela God i save wokim ol strongpela wok o mirakel. Tru tumas, Jehova i bin lukautim gut Danyel na ol laion i no bagarapim em.—Danyel 6:1-28.
Olsem wanem? Yu bilip tru long God Jehova olsem Danyel? Yu bilip tru olsem sapos yu stap gut long Jehova, orait, taim em i pinisim pasin nogut bilong nau em bai lukautim yu na yu no ken bagarap? Sapos yu bilip tru olsem, orait, maski ol man i putim wanem wanem lo o tambu, na maski ol i tok long mekim wanem wanem samting long yu, tasol bai yu no pret. Bai yu mekim yet wok bilong Jehova.