Bilong Wanem Planti Man i Toktok Long Amagedon?
“AMAGEDON”—wanem insait bilong dispela tok i stap long Baibel? Long 1985 sampela Wastaua bai stori long Amagedon. Olgeta dispela Wastaua bai i gat piksa bilong dispela samting long karamap bilong en. Mipela laik bai ol dispela tok bilong Baibel i ken helpim yu long save AMAGEDON em wanem samting tru na bai yu no tingting planti long en.
“Mi tingim tok bilong ol profet long Olpela Testamen na ol mak ol i kolim bilong Amagedon, na mi ting olsem: Ating yumi ol man bilong nau bai lukim ol dispela samting i kamap.”—Ronald W. Reagan, em presiden bilong Amerika, em i tok olsem long Oktoba 18, 1983.
“Ol samting Revelesen i stori long en, em i no sampela tok piksa tasol bilong Baibel; nogat; ol dispela samting i kamap tru long nau. I no gat wanpela taim bipo na olgeta lain man inap bagarap.”—Javier Perez de Cuellar, em seketeri-janeral bilong Yunaitet Nesen, em i tok olsem long Jun 8, 1982.
“AMAGEDON”—Long olgeta hap long nau ol man i toktok long “Amagedon.” Ol bikpela man bilong lotu na gavman na ami na saiens na bisnis ol i kolim dispela tok olsem em i makim samting nogut. Dispela tok i stap long nem bilong 15 buk ol i bin wokim long Amerika long 1983. Planti narapela buk tu i stori long Amagedon na planti milion man i baim ol dispela buk.
Planti man long nau ol i toktok long Amagedon na ating yu kirap nogut long dispela samting, long wanem em i wanpela tok bilong Baibel. Dispela tok i kamap wanpela taim tasol long Baibel. (Revelesen 16:16) Ol man bilong lotu ol i save kolim dispela tok “Amagedon,” tasol namel long yia 1800 na 1899 sampela man moa ol i kirap kolim dispela tok na ol i no toktok long samting bilong lotu o samting bilong Baibel. Na long yia 1900 samting, ol man i kirap kolim dispela tok bilong makim ‘bikpela pait tru i kilim i dai planti man’ o ‘laspela pait.’
Kirap long dispela taim na i kam inap long nau kain kain man, olsem ol dokta na loya na tisa samting, ol i bin kolim dispela tok, na ol i gat narapela narapela tingting long ol samting dispela tok i makim. Long 1912 Theodore Roosevelt i laik holim yet wok presiden bilong Amerika na em i sanap long eleksen. Em i kolim dispela tok Amagedon bilong makim samting bilong politik. Em i hambak na em i tok: ‘Bel bilong mipela i no pret na ai bilong mipela i no tudak liklik. Mipela i kamap pinis long Amagedon na mipela i mekim pait bilong Bikpela.’ Tasol Roosevelt i lus long dispela pait politik. Em i lus long eleksen.
Long nau planti man i pret, nogut bikpela pait i kirap na ol man i tromoi ol bom nogut bilong nuklia na bagarapim olgeta man na meri na pikinini long graun, o graun i kamap olsem ples ais long wanem ol i pairapim ol dispela bom, o bikpela pait i kirap long hap bilong Midel-Is, o olgeta wok bisnis i bagarap na mani i no gat strong moa. Ol man i tingting planti long ol dispela samting na ol i save kolim dispela tok Amagedon. Olsem na long nau ol man i kolim dispela nem Amagedon long kain kain samting, olsem:
◆ Ol Japan i wokim wanpela piksa wokabaut i makim gutpela samting na samting nogut i pait i go inap long pinis na ol i kolim olsem “Amagedon long Kisijoji.”
◆ Ol man i wetim wanpela kain sta i kamap gen long 1986, ol i kolim Haley’s Comet, na wanpela nius (Frankfurter Neue Presse) i tok, ating dispela samting i olsem ‘wanpela mak bilong Amagedon’ long ol man i save bilip long ol masalai samting.
Tasol olgeta dispela samting i no Amagedon tru. Long nau yumi harim nek bilong narapela lain ol i tokaut long Amagedon—dispela lain ol i bikpela lain inap olsem 2 milion 600 tausen samting manmeri na ol i wok strong long tokim ol man long Amagedon long nau. Yu bin harim dispela tok? Sapos yu putim gut yau na harim bai yu inap save Amagedon em i wanem samting tru.