Jehova—Em i Hatpela God o God Bilong Pasin Sori?

WANPELA man bilong Japan i tok: “God bilong Baibel em i hatpela God.” Dispela man i save long Baibel na em i toktok wantaim wanpela misineri.

Em i tok moa olsem: “God i bagarapim ol man long Tait Wara, na kukim ol man Long Sodom na Gomora long paia, na em i salim ol Isrel i go pinisim ol Kenan. Em i hatpela God. Em i mekim nogut long ol man. Dispela God em i narapela kain olgeta long God bilong Nupela Testamen. Jisas i lainim ol man long wanpela God bilong pasin isi na pasin sori.”

Tru, planti man i ting God bilong “Olpela Testamen” em i hatpela God bilong pait. Na sampela ol i tingting planti long God bilong “Nupela Testamen” tu. Yumi no laik lotuim wanpela God i gat narapela narapela kain pasin, a?

“Olgeta Pasin Bilong Em i Stret”

Tasol yumi ol man nating bilong graun, yumi no ken sutim tok long God na tok pasin bilong em i no stret, a? Taim papa i salim pikinini i go lukim dokta bilong wokim tit na dokta i givim pen long pikinini, ating pastaim pikinini i no save gut bilong wanem papa i mekim olsem. Na yumi tu, ating pastaim yumi no save gut long olgeta samting God i mekim. Man bilong raitim sam em i tok: “Yupela i no ken tingting lus long [Jehova], em wanpela tasol i God tru. Em wanpela tasol i bin wokim yumi, olsem na yumi bilong em yet.”—Sam 100:3.

Olsem na sapos yumi kirap kwik na tok God i save mekim nogut long ol man, orait yumi no bihainim gutpela tingting. God Jehova i tok: “Tingting bilong yupela i no olsem tingting bilong mi, na pasin na wok bilong yupela i no olsem pasin na wok bilong mi. Olsem heven i antap na i winim graun, olsem tasol pasin na wok bilong mi i antap na i winim pasin na wok bilong yupela, na tingting bilong mi i antap na i winim tingting bilong yupela.” (Aisaia 55:8, 9, NW) Na Baibel i tok klia olsem: “Olgeta pasin bilong em i stret. . . . em i no save mekim pasin i no stret; pasin bilong em i stret tasol.” (Diuteronomi 32: 4, NW) Orait nau yumi ken skelim sampela samting i bin kamap na i stret God i bin givim strafe long ol man.

Tait Wara

Paslain long taim bilong Tait, “Yawe i lukim pasin bilong ol man long olgeta hap i nogut tru. Ol i tingting tasol long ol samting nogut.”(Jenesis 6:5) Yes, God Jehova “i lukluk long graun na em i lukim pasin bilong olgeta man i nogut tru. Wokabaut bilong man i sting tasol.” (Jenesis 6:12) Ating sampela man bai tok God i mas larim tasol ol dispela man na em i no ken bagarapim ol—em i mas larim ol i mekim laik bilong ol. Tasol i gat sampela stretpela man i stap. Sapos God i larim ol man nogut i bagarapim ol dispela stretpela man na bai i no gat stretpela pasin moa long graun, yu ting em i stret? Sapos God i mekim olsem em i no mekim pasin sori—em i mekim hatpela pasin. Olsem na God i stretim rot bambai tait wara i bagarapim ol dispela man i bagarapim graun.

Hatpela God bai bagarapim olgeta man na olgeta animal. Tasol God Jehova i no mekim olsem. Em i lukautim sampela man na ol i no bagarap. Na hatpela God i no ken toksave pastaim long bagarap i laik painim ol. Tasol God Jehova i toksave pastaim. Inap 40 o 50 yia paslain long tait em i salim Noa “em i man bilong tokaut long stretpela pasin” i go autim tok long ol. (2 Pita 2:5) Ol man inap harim tok na kisim laip o sakim tok na bagarap. Laik bilong ol.

Sodom na Gomora

Tupela ensel i go long Sodom na kwiktaim ol man bilong Sodom i kamapim long ples klia pasin nogut bilong ol—ol i man bilong mekim pasin sem. Olgeta man bilong Sodom i kam banisim haus bilong Lot, “ol yangpela wantaim ol lapun. Ol i singaut long Lot olsem, ‘We stap dispela tupela man i kam na i stap wantaim yu long nait? Salim tupela i kam ausait. Bai mipela i goapim tupela.”’ (Genesis 19:4, 5 ) Ol dispela man i ‘pilai nogut wantaim ol arapela man.’—Jut 7; lukim tu Rom 1:26, 27.

God “i save lukim tru bel bilong man” na em i save ol dispela man i no ken tanim bel. Olsem na i stret em i mas pinisim ol. (Rom 8:27) I no gat 10-pela stretpela man long Sodom! (Jenesis 18:32) Pasin bilong Sodom inap bagarapim stretpela man Lot wantaim meri pikinini bilong em. Olsem na taim God i bagarapim ol man nogut bilong Sodom na helpim Lot wantaim tupela pikinini meri bilong em, God i mekim pasin sori!—Jenesis 19:12-26.

Pinisim Ol Kenan

Jehova i tok promis long Ebraham olsem lain tumbuna pikinini bilong em bai ol i kisim ples Kenan. Em i no tok long kilim i dai ol Kenan long taim bilong Ebraham. Nogat. Bilong wanem? Long wanem “lain Amo ol i no mekim planti pasin nogut yet.” Jehova i tok olsem. (Jenesis 15:16) Samting olsem 430 yia bihain pasin nogut bilong dispela lain i kamap moa yet na Moses i tok: “God bilong yupela Jehova em i rausim ol dispela lain man [ol Kenan] na ol i klia long yupela, long wanem, ol i save mekim pasin nogut tru.”—Diuteronomi 9:5, NW.

Wanpela buk (Archaeology and the Old Testament) i tok: “stori nating bilong ol tumbuna bilong lain Kenan i stori long ol god bilong ol i mekim pasin nogut tru bilong bagarapim man na bel i kirap na mekim nabaut . . . ol manmeri i lotuim ol dispela god ol i bihainim ol dispela pasin nogut bilong ol god bilong ol na ol i mekim pasin nogut tru—ol i save mekim pasin pamuk na ol i tok em i hap wok lotu bilong ol na ol i save kilim i dai ol pikinini olsem ofa na lotuim snek . . . pasin na lotu bilong ol i nogut tru—ol i no gat sem moa.” Tasol ol Gibion na ol manmeri bilong 3-pela narapela taun long ples Kenan ol i no bagarap. (Josua 9:17, 18) Hatpela God i no ken larim sampela man i stap, a?

God i Gat Narapela Narapela Kain Pasin o Nogat?

Tasol sampela man i strong long tok God bilong “Olpela Testamen”i senisim pasin na long “Nupela Testamen” Jisas i lainim ol man long pasin sori tasol. Sampela man i tok olsem.—Matyu 5:39, 44, 45.

Tasol Jehova i bagarapim Jerusalem long 70 C.E. olsem Jisas i tok profet pinis. (Matyu 23:37, 38; 24:2) Na em i givim strafe long ol wan wan man nogut, olsem Ananaias na Safaira na Herot na ol i dai. God i no senisim pasin bilong em. (Aposel 5:1-11; 12:21-23; Malakai 3:6) Na Jisas i no lainim ol man long nupela samting taim em i lainim ol long pasin bilong sori. Nogat. Bipo yet Lo bilong Moses i tok: “Yu mas sori long narapela man olsem yu save sori long yu yet.” (Levitikas 19:18, NW) Tasol Jisas i lainim ol man long narapela kain pasin bilong sori, i winim dispela. Man i gat dispela kain pasin bilong sori, em i no save tingim skin bilong em yet na em i redi long i dai tu bilong helpim ol narapela man. (Jon 13:34) Na Jisas i bin mekim strongpela tok long ol bikman bilong lotu long taim bilong em, em ol i man bilong tupela maus—em i kamapim long ples klia pasin nogut bilong ol. Kaunim Matyu sapta 23 na bai yu save long ol dispela strongpela tok Jisas i bin mekim long ol.

Stori bilong Baibel long ol dispela samting God i bin mekim i kamapim long ples klia olsem God em i no hatpela God, em i God bilong pasin sori—em i laikim tumas ol manmeri na em i no senisim pasin bilong em. Dispela samting i kirapim yumi na yumi laik kisim sampela save moa long God Jehova na long ol gutpela pasin sori bilong em. Tok i kamap bihain long dispela bai helpim yu long kisim dispela save.

[Piksa long pes 3]

Jehova i kamapim Bikpela Tait Wara, na bagarapim Sodom na Gomora, na pinisim ol Kenan—em i mekim pasin i stret?