Yu Inap Sori Moa Yet?

I GAT wanpela liklik samting long solwara (acorn barnacle) em i save pas strong tru long ol ston samting insait long solwara. Olsem wanem em inap pas strong long ol samting olsem? Em i save kamapim wanpela kain bilut (glue) i gat bikpela strong tru bilong pasim ol samting wantaim (strong bilong en i olsem 493 kilogram long wanpela skwea sentimita). Sapos dispela samting i pas pinis long wanpela ston samting na yu laik rausim, yu bai hatwok tru!

Ol Kristen i save long wanpela samting kain olsem em i gat strong bilong pasim ol samting wantaim. Lain bilong Jehova long graun ol i bilong kain kain lain na skin na tok ples, tasol ol i pas gut wantaim. Olsem wanem na ol inap pas gut wantaim olsem? I gat wanpela samting i save pasim ol strong wantaim na dispela samting i gat bikpela strong winim strong bilong bilut bilong dispela liklik samting bilong solwara! Wanem dispela samting? Aposel Pol i tokim yumi. Em i tok: “Pasin bilong sori em i . . . pasim olgeta wantaim.”—Kolosi 3:14.

Tasol i gat sampela pasin ol man i kolim olsem pasin bilong sori o pasin bilong laikim tru samting na ol dispela pasin i no helpim ol man long pas gut wantaim o i stap wanbel. Pasin bilong “laikim tumas kantri,” dispela pasin i as bilong planti bikpela pait i bin kamap. Sampela man i laikim tumas ol yet na ol i tingting nogut long narapela man. Na Baibel i tok: “Pasin bilong laikim tumas mani em i as bilong olgeta pasin nogut.” (1 Timoti 6:10) Long nau yumi stap long taim bilong planti hevi nogut tru na wanpela as bilong ol dispela hevi em olsem: Ol man i “laikim ol yet tasol.”—2 Timoti 3:1, 2.

Orait, wanem kain pasin bilong sori i mekim na ol Kristen i pas gut wantaim na i stap wanbel? Man i gat dispela kain pasin bilong sori, em i no save tingim em yet, em i save tingim ol narapela man na em i laik helpim ol na sori bilong em i save go bikpela.

Wanem As Bilong Dispela Pasin Bilong Sori?

God em i as bilong dispela kain pasin bilong sori. Aposel Jon i tok: “God i save laikim yumi tru.” (1 Jon 4:8) Jehova i kamapim long ples klia sori bilong em—em i save mekim gut long yumi. Olgeta gutpela samting yumi kisim, em God i save givim long yumi. “Olgeta presen i gutpela tru, em olgeta i save kam long heven.” (Jems 1:17) God i save givim ol gutpela samting bilong skin long yumi, na em i save givim planti gutpela samting bilong spirit long ol Kristen i pilim tru gutpela pasin bilong Em.

Krais Jisas i stori long narapela gutpela pasin Jehova i save mekim na dispela i kamapim long ples klia sori bilong em. Jisas i tok: “Em [Jehova] i save mekim san bilong em i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man i no stret tu.” (Matyu 5:45) Jehova i laikim tumas ol manmeri bilong graun, olsem na em i givim ol samting bilong skin long ol, na sori bilong em i moa yet, long wanem Jisas i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16 i God i mekim bikpela pasin sori tru—em i sori moa yet, a?

Jehova i sori long ol man na mekim ol dispela samting bilong helpim ol. Em i mekim dispela kain pasin bilong sori em stretpela lo i as bilong en. Long tok Grik ol i kolim a ga’pe. Jehova i mekim dispela pasin bilong sori long ol Kristen, em i mekim narapela kain pasin bilong sori tu long ol. Taim wanpela man i pilim sori bilong God na em i givim bel long God, God Jehova i save laikim em pren bilong em. Long tok Grik ol dispela kain pasin bilong sori olsem phi li’a. .Jisas i tok: “Pepa em yet i yupela. Long wanem yupela i bin laikim mi.”—Jon 16:27.

Bihainim Pasin Sori Bilong God

Dispela pasin sori i pasim ol Kristen wantaim, em dispela kain gutpela pasin sori bilong Jehova. Olsem aposel Jon i tok: “Yumi save laikim ol brata, long wanem God i bin laikim tru yumi pastaim.” (1 Jon 4:19) Dispela kain pasin bilong sori em wanpela mak bilong ol Kristen tru, na em i wanpela gutpela pasin spirit bilong God i save kamapim long ol man.—Jon 13:34, 35; Galesia 5:22.

Kristen i mas laikim tru Papa bilong em long heven, na em i mas laikim tru ol narapela man. Matyu 22:37-39) God i givim bel long yumi, olsem na yumi mas givim bel “moa yet” long ol brata Kristen bilong yumi. Aposel Pol i tokim ol Kristen long Korin: “Yupela Korin, mipela i tokaut ples klia long yupela. Mipela i givim bel bilong mipela moa yet long yupela. . . . yupela tu i mas givim bel bilong yupela olgeta long mipela.”—2 Korin 6:11-13.

Jehova i save sori moa yet. Olsem wanem yumi ken bihainim dispela pasin bilong em?

Sori “Moa Yet” long Famili

Pol i toksave olsem: Long “las taim” bai ol man i “no save pren long ol wanblut bilong ol yet.” (2 Timoti 3:1-3) Tasol insait long famili Kristen, narapela i mas laikim tru narapela. I mas i gat dispela kain pasin bilong sori ol i kolim a ga’pe—ol i mas bihainim stretpela lo na narapela i sori long narapela. Na i mas i gat dispela kain pasin bilong sori ol i kolim phi li’a—ol i mas pren gut wantaim.—Matyu 10:37; Efesas 5:28; Taitas 2:4.

I hatwok liklik long mekim pasin sori long olgeta taim. Sampela taim kros i kamap long mani. Sampela taim man o meri i bel nogut, long wanem wok mani o ol wantok o spot samting i pulim bikpela hap taim bilong poroman bilong em. O ating meri i pilim olsem man bilong em i save lusim em planti taim na em i no save tingim em o pilim gutpela wok em i mekim bilong helpim em. Planti yangpela manmeri i save bel hevi long wanem ol i ting papamama i no save pilim tingting bilong ol. Ol kain hevi olsem yumi ken stretim olsem wanem?

Olgeta wan wan insait long famili i mas bihainim pasin bilong God na mekim pasin sori “moa yet.” Pol i tok: “Yupela meri, yupela mas i stap aninit long ol man bilong yupela. Dispela pasin em i stret long ai bilong Bikpela. Yupela man, yupela i mas laikim tru ol meri bilong yupela, na yupela i no ken mekim nogut bel bilong ol. Yupela pikinini, yupela i mas bihainim tok bilong papamama bilong yupela long olgeta samting. Bikpela em i laikim pasin olsem. Yupela papa, yupela no ken mekim ol pikinini bilong yupela i kros, nogut ol i lusim bilip.”—Kolosi 3:18-21.

Taim hevi i kamap, sapos yu beten askim God long helpim yu long bihainim pasin sori, dispela inap helpim yu long stretim gut hevi. Na sapos famili i save toktok gut wantaim na bung na toktok wantaim long ol tok bilong Baibel, dispela samting tu inap helpim ol. (Diuteronomi 6:4-9) Planti famili ol i bin toktok wantaim long ol dispela tok long Wastaua ol i kolim “Tok Bilong God i Gat Laip,” na ol tok long Kirap! ol i kolim “Ol Yangpela i Laik Save,” na dispela samting i bin helpim gut ol.

Sori Moa Yet long Kongrigesen

Sapos papamama i no save laikim pikinini o pikinini i no laikim papamama, em samting nogut. Na sapos Kristen i no laikim ol brata Kristen bilong em, dispela tu i samting nogut. Aposel Jon i tok: “Man i lukim brata bilong en na i no save laikim em, dispela man em i no inap laikim God.”—1 Jon 4:20.

Sapos yumi laikim tru ol brata Kristen bilong yumi, bai yumi wetim gutpela samting i kamap long ol. (1 Korin 13:4, 7 ) Ating yumi lukim wanpela brata em i hatwok long stretim sampela pasin bilong em—ating nau em i ‘kamautim samting em i bin planim,’ olsem em i kisim hevi long sampela samting em i bin mekim. (Galesia 6:7) Tasol sapos yumi laikim tru dispela brata bilong yumi, yumi no ken tingting nogut long em. Yumi no ken ting: ‘Mi save pinis em i no gutpela Kristen.’ Tru, ating brata hia i no strong long bilip, tasol yumi mas bihainim pasin isi na pasin marimari bilong Jehova na yumi no ken les kwik long dispela brata. Yumi mas sori long em.—2 Pita 3:9.

Gutpela pasin sori i stap namel long ol wokboi bilong Jehova, dispela i save helpim ol yangpela Kristen long i stap strong long bilip. Taim ol i wok long i go bikpela na ol i gat 13, 14, 15 krismas samting, kain kain hevi na traim i save painim ol. Wanpela yangpela meri Afrika i stori long ol samting i bin helpim em long i stap gut long lotu i tru na em i tok: “Ol tok mi lainim long Baibel i bin helpim mi, tasol samting i helpim tru mi, em olsem: Pasin sori mi lukim namel long ol brata taim mi go long ol miting, na ol i save laikim mi.”

Yes, sapos kongrigesen i sori moa yet long olgeta insait long kongrigesen, dispela bai helpim ol long pas gut wantaim. Tasol Jehova i no save sori long ol Kristen tasol. Nogat. Em i save sori long olgeta manmeri. Orait, olsem wanem yumi ken bihainim dispela pasin bilong Em?

Sori long Ol Man Yumi No Save long Ol

Jisas i makim wanpela bikpela samting yumi ken mekim bilong kamapim bel bilong yumi, yumi sori long ol man yumi no save long ol. Em i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol Witnes Bilong Jehova i save autim dispela gutpela tok long ol man ol i no save liklik long ol na dispela samting i kamapim bel bilong ol, ol i sori long ol narapela man.

Ol Kristen i save sori long ol narapela man na dispela samting i kirapim ol long mekim ol narapela samting tu bilong helpim ol. Olsem man bilong Sameria long tok piksa bilong Jisas, olsem tasol ol tu i save mekim gutpela pasin bilong helpim ol narapela man. Ol i wok long “mekim gutpela pasin long olgeta man,” na planti taim gutpela samting tru i save kamap long dispela samting ol i mekim. (Galesia 6:10; Luk 10:29-37) Olsem: Wanpela yangpela meri long Alaska em i wok long autim tok. Em i stap longwe (inap 260 kilomita ) long papamama bilong em. Em i bungim wanpela famili ol i nogat mani na ka bilong ol i bagarap. Taim papa bilong dispela yangpela meri i harim tok long hevi bilong dispela famili, em i kalap long ka na draiv i go 520 kilomita bilong helpim ol. Dispela samting em i mekim i opim rot na em inap tokim dispela famili long ol gutpela samting Jehova i laik mekim na long Kingdom bilong em. Dispela man wantaim meri bilong em i kirap long stadi na lainim tok bilong Baibel na ol i dediket long Jehova na kisim baptais. Nau ol i amamas long autim dispela gutpela tok long ol narapela man.—Aposel 20:35.

Yu Inap Sori long Ol Birua?

Ol Kristen i save sori long ol man ol i no save long ol na ol i save sori tu long ol birua. Jisas i tok: “Yupela i mas laikim birua bilong yupela, na yupela mas beten bai God i helpim ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. Em i save mekim san bilong em i kam antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man i no stret tu.”—Matyu 5:44, 45.

Olsem wanem? Yumi inap sori long ol man i mekim nogut long yumi? Long taim bilong Namba Wan Pait Bilong Olgeta Hap, long Jemani, lain bilong Hitler ol i mekim nogut tru long ol Witnes Bilong Jehova. Ol i paitim ol na subim ol long mekim bikpela wok na ol i givim liklik kaikai tasol long ol. Ol Witnes i karim bikpela hevi long han bilong ol dispela man. Tru ol i no inap laikim ol dispela birua olsem pren bilong ol (phi li’a) Tasol ol i bin bihainim stretpela lo na sori (a^.ga’pe) long ol dispela man. Jehova i save mekim dispela kain pasin bilong sori long olgeta man na ol Witnes i bihainim pasin bilong em. Olsem na taim ol Witnes i gat rot, ol i save autim tok bilong laip long ol dispela man i mekim nogut long ol. Na bihain sampela bilong ol dispela birua i kamap Kristen.

Ol man i mekim nogut long ol wokboi bilong God, tasol planti ol i no gat save na ol i mekim olsem. Sol i bin mekim olsem na bihain em i kamap aposel Pol. (Galesia 1:13, 14) Sapos yumi save Seten i giamanim ol dispela man na ol i mekim dispela pasin nogut, dispela save inap helpim yumi long sori moa long ol.—2 Korin 4:4.

Jehova, em i God bilong pasin sori, em i save amamas long givim gutpela pe long ol manmeri i mekim pasin sori moa yet long famili na insait long kongrigesen na long ol man ol i no save long ol na long ol birua tu. Dispela kain pasin bilong sori i save pasim famili wantaim na pasim kongrigesen wantaim, olsem bilut bilong dispela liklik samting bilong solwara i pasim em strong long ston. Pasin bilong sori i pulim ol narapela man i kam long lain Kristen bambai ol i ken pas gut wantaim olsem ol. Olsem na yumi mas pilim sori bilong God na mekim pasin sori moa yet, a? Tru tumas, yumi mas mekim olsem! Yumi mas “mekim dispela pasin i kamap moa yet.”—1 Tesalonaika 4:9, 10.