I Stap na Wok Bilong Jisas
I Go long Jerusalem
NUPELA yia bilong ol Juda i kirap na em taim bilong Josep wantaim famili bilong em na ol wantok na wanblut ol i go long Jerusalem bilong lukim bikpela de holi ol i kolim Pasova. Ol i save mekim olsem long olgeta yia. Jerusalem i stap longwe inap 105 kilomita. Ol i amamas na ol i go. Long dispela taim Jisas i gat 12-pela krismas, na em i tingim moa yet dispela bikpela de holi.
Long Jisas na famili bilong em Pasova i no bilong wanpela de tasol. Ol i save stap long Jerusalem long ol 7-pela de bilong Bret I No Gat Yis tu. Ol i save tingim olgeta dispela de holi i olsem de bilong Pasova. Olsem na taim ol i lusim ples bilong Nasaret na i go long Jerusalem na i go bek gen long ples, em inap olsem tupela wik samting. Tasol long dispela taim Jisas i mekim wanpela samting na ol i stap sampela de moa, winim tupela wik.
Dispela samting i kamap taim i lusim Jerusalem na wokabaut i go bek long ples. Josep tupela Maria i ting Jisas i wokabaut wantaim ol narapela manmeri, em ol wanlain na ol pren bilong ol. Tasol nogat. Ol i wokabaut wanpela de olgeta na long nait, taim ol i laik slip, ol i no lukim Jisas. Olsem na tupela i wok long painim em namel long ol manmeri i wokabaut wantaim ol. Tupela i painim painim em, nogat. Olsem na tupela i go bek gen long Jerusalem bilong painim em.
Inap wanpela de olgeta ol i wok long painim em, tasol nogat. Long namba tu de tu ol i painim painim em, nogat. Tasol long namba tri de ol i go insait long tempel na ol i lukim Jisas i sindaun i stap namel long ol tisa bilong lotu Juda. Em i wok long harim tok bilong ol na givim askim long ol tu.
Maria i tok: ‘Pikinini, bilong wanem yu mekim olsem long mipela? Bel bilong mi tupela papa bilong yu i hevi tumas na mitupela i wok long painim yu.’
Jisas i kirap nogut, long wanem em i ting ol i mas save em i stap we. Em i tok, ‘Bilong wanem yupela i wok long painim mi? Ating yupela i no save mi mas i stap long haus bilong Papa bilong mi?’
Em i ting papamama i mas save long dispela samting. Tasol Jisas i go bek long Nasaret wantaim papamama bilong em na oltaim em i bihainim tok bilong tupela. Jisas i wok long kamap bikpela, na save bilong em i kamap gutpela tru. Na God na ol man i laikim em tumas. Tru tumas, kirap long taim Jisas i liklik yet na i go inap long taim em i bikpela pinis, em i makim gutpela pasin yumi ken bihainim. Em i tingim gut ol samting bilong spirit na em i daun long papamama bilong em. Luk 2:40-52; 22:7.
◆ Long olgeta yia, long namba wan mun, Jisas i save go we wantaim famili bilong em? Ol i save lusim hamas de bilong i go na i kam bek?
◆ Taim Jisas i gat 12-pela krismas na ol i go long Jerusalem, wanem samting i kamap?
◆ Jisas i makim wanem gutpela pasin ol yangpela i ken bihainim long nau?