I Stap na Wok Bilong Jisas

Jisas i Kisim Baptais

JON i kirap long autim tok na 6-pela mun bihain Jisas i kam long em long Wara Jodan. Long dispela taim Jisas i gat 30 krismas. Bilong wanem Jisas i kam long Jon? Ating em i kam lukim Jon bilong toktok nating wantaim em? O ating Jisas i laik save long wok bilong Jon na em i kam? Nogat. Jisas i kam tokim Jon long givim baptais long em.

Tasol Jon i laik pasim em. Em i tok: “Mobeta mi kisim baptais long yu. Olsem wanem na yu kam long mi?” Jon i save, kasen-brata bilong em, Jisas, em i Pikinini bilong God. Taim Maria i gat bel long Jisas em i go lukim mama bilong Jon. Long dispela taim Jon i stap yet long bel bilong mama na em i amamas na em i kalap. Ating bihain mama bilong Jon, em Elisabet, em i bin tokim Jon long dispela samting i bin kamap. Na ating em i bin tokim Jon tu long ol ensel i bin kamap long ol wasman bilong sipsip taim Maria i karim Jisas.

Olsem na Jon i save gut long Jisas. Na em i save, baptais em i givim long ol man em i no bilong Jisas. Long wanem Jon i baptaisim ol man bilong makim ol i tanim bel pinis, tasol Jisas i no gat sin na i no gat wok long em i mas tanim bel. Jon i strong long em i no ken givim baptais long Jisas, tasol Jisas i tok: “Maski, nau yu mekim olsem mi tok. Em i gutpela long yumi inapim olgeta stretpela pasin.”

Bilong wanem i stret Jisas i mas kisim baptais? Baptais bilong Jisas i no makim em i tanim bel; nogat; taim Jisas i kisim baptais, dispela i makim olsem em i givim skin bilong em long God bilong mekim laik bilong God. Jisas i bin mekim wok kamda, tasol nau em i mas kirap mekim dispela wok God i bin salim em bilong mekim. Olsem wanem? Yu ting Jon i save narapela kain samting bai kamap taim em i givim baptais long Jisas?

Bihain Jon i tok: “Dispela em i bin salim mi na mi kam bilong baptaisim ol manmeri long wara, em i tokim mi, Yu lukim Holi Spirit i kam daun na i stap long wanpela man, orait em dispela man i save baptaisim ol manmeri long Holi Spirit.”’ Olsem na Jon i save, spirit holi bai kam daun long wanpela man em i givim baptais long em. Orait, taim Jisas i lukim wara i kam antap na Jon i lukim Holi Spirit em i olsem wanpela pisin i kam daun long Jisas, ating Jon i no kirap nogut.

Tasol narapela samting tu i kamap taim Jisas i kisim baptais. Heven i op na wanpela maus i singaut na i tok: “Dispela em i Pikinini bilong mi. Mi laikim em tumas. Bel Bilong mi em i gutpela long em.” Em maus bilong husat? Yu ting em maus bilong Jisas? Nogat! Em maus bilong God. Tru tumas, Jisas em i Pikinini bilong God; em i no God olsem sampela man i save tok. Matyu 3:13-17; Luk 3:21-23; 1:34-36, 44; 2:10-14; Jon 1:32-34; Hibru 10:5-9.

◆ Olsem wanem yumi save Jon i save gut long Jisas?

◆ Jisas i no bin mekim wanpela rong, orait bilong wanem em i kisim baptais?

◆ Jon i save long wanem samting na taim spirit holi i kam daun long Jisas ating Jon i no kirap nogut?