Gutaim, Gutpela Sindaun, na “Piksa Bilong Wel Abus”
“Na Holi Spirit em i kamap strong long mi, na i karim mi i go long graun i no gat man. Long dispela hap mi lukim wanpela meri em i sindaun antap long retpela wel abus. Dispela wel abus em i gat planti nem i pulap long skin bilong en. Na olgeta dispela nem em i kain kain tok bilas long God. Na wel abus i gat 7-pela het na 10-pela kom.”—REVELESEN 17:3.
1. Bilong wanem yumi mas save long dispela wel abus i gat 7-pela het na 10-pela kom, em Jon i lukim olsem driman?
LONG strong bilong spirit holi aposel Jon i lukim sampela samting olsem driman na em i lukim dispela wel abus nogut. Tasol i no Jon tasol i lukim dispela wel abus. Nogat. Ating yu tu yu bin lukim, o yu bin kaunim tok bilong en long ol nius. Yu luksave long en?
2, 3. Jon i lukim wanem wanem samting long dispela driman?
2 Tru, taim yumi lukim dispela wel abus long nau em i no olsem Jon i bin lukim. Dispela samting Jon i lukim i olsem piksa tasol na i makim samting em bai stap long graun “long de bilong Bikpela.” (Revelesen 1:10) Nau yumi lukim truim bilong dispela samting. Dispela wel abus Jon i lukim i nogut, olsem na yumi save long ai bilong Jehova dispela wel abus em i samting nogut! Long dispela driman, pastaim Jon i lukim ol lain long heven i rausim Seten i kam daun na Seten i “gat bikpela belhat tru,” long wanem “em i save, em i gat sotpela taim tasol.” (Revelesen 12:12) Bihain Jon i lukim wanpela wel abus i gat 7-pela het na 10-pela kom i kamap long “solwara,” olsem ol man i kamapim. Dispela wel abus i makim oganaisesen politik bilong Seten long graun, olsem olgeta gavman bilong graun. (Revelesen 13:2; 17:15; Aisaia 57:20; Luk 4:5, 6) Dispela wel abus i gat strong bilong bosim ol man na i subim ol man long kisim mak bilong en long han sut bilong ol o long pes bilong ol. Dispela samting i makim olsem ol i givim bel long dispela samting na helpim wok bilong en.—Revelesen 13:7, 16, 17.
3 Jon i lukim dispela driman na em i lukim ol man i wokim wanpela piksa bilong dispela wel abus. (Revelesen 13:14, 15) Dispela “piksa” em dispela “wel abus” Jon i stori long en long Revelesen sapta 17. Dispela “piksa bilong wel abus” i gat 7-pela het na 10-pela kom na em i gat bikpela wok insait long ol samting bai kamap long bihain. Olsem na yumi mas save long en. Tasol olsem wanem yumi ken save long en?
“Piksa Bilong Wel Abus” long Nau
4, 5. Ol het bilong dispela wel abus i makim wanem samting?
4 Ensel i givim sampela tok long Jon na long dispela tok yumi inap save dispela “piksa bilong wel abus” i makim wanem samting. Ensel i tok: “Dispela 7-pela het i olsem 7-pela maunten, na meri i sindaun antap long dispela 7-pela maunten. Na dispela 7-pela het i makim 7-pela king. 5-pela ol i bagarap pinis, na wanpela nau i stap, na wanpela i no kamap king yet. Bihain bai em i kamap pinis, orait em i mas i stap liklik taim tasol.” (Revelesen 17:9, 10) Ensel i stori long ol “king” na ol “maunten” na long Baibel dispela tupela samting i save makim ol gavman. Olsem na yumi save 7-pela het bilong dispela wel abus i makim 7-pela gavman. (Jeremaia 51:25) Em wanem 7-pela gavman?
5 Ensel i tok, 5-pela ol i bagarap pinis paslain long taim bilong Jon, na wanpela “nau i stap” olsem long taim bilong Jon, na wanpela “i no kamap king yet.” Baibel i stori long 5-pela bikpela gavman i bin kamap long graun, em ol i bin daunim lain bilong God, na ol i bagarap pinis paslain long taim bilong Jon, em olsem: Isip na Asiria na Babilon na Mido-Pesia na Grik. Taim Jon i stap laip yet, bikpela gavman bilong Rom i bosim planti hap bilong graun. Jon i dai pinis na planti handet yia bihain, dispela bikpela gavman bilong Rom i pinis na gavman bilong Englan i kamap olsem senis bilong en. Ol lain bilong dispela gavman long hap bilong Wes ol i kisim indipendens, tasol ol i pas wantaim gavman bilong Englan na wok gut wantaim em na nau bikpela gavman bilong Englan na Amerika i kamap. Dispela gavman em dispela “king” i “no kamap king yet” long taim bilong Jon. Orait, olsem wanem long dispela wel abus Jon i bin lukim na ol 7-pela gavman 7-pela het bilong en i makim? “Em i olsem namba et king. Tasol em i wanlain bilong ol 7-pela king.”—Revelesen 17:11.
6. (a) Ol kom bilong wel abus i makim wanem samting? (b) Olsem wanem ol i “no kamap king yet” long taim bilong Jon?
6 Na dispela wel abus i gat 10-pela kom tu. Ensel i stori long dispela 10-pela kom na i tok: “Na yu lukim pinis 10-pela kom, em ol i makim 10-pela king. Ol i no kamap king yet. Tasol bai ol i kisim strong wantaim dispela wel abus, na bai ol i stap king inap long wanpela aua tasol.” (Revelesen 17:12) Long Baibel, dispela namba 10 i save makim samting bilong graun em inap tru. Olsem na dispela 10-pela kom i makim olgeta gavman long olgeta hap bilong graun ol i helpim dispela wel abus long wok bilong en inap liklik taim (olsem “wanpela aua tasol”) long “de bilong Bikpela.” Namba 7 king i insait long dispela lain wantaim ol gavman bilong nau ol i bin kamap long ol narapela 6-pela ‘het bilong wel abus’ maski dispela 6-pela i no stap moa olsem bikpela gavaman long graun. Ol dispela “king” i no i stap long taim bilong Jon.a Tasol ol i kisim strong na ol i ‘givim biknem na strong olgeta long wel abus.’—Revelesen 17:13.
7, 8. (a) Wel abus Jon i lukim na em i stori long en long Revelesen sapta 17, dispela wel abus i makim wanem samting? (b) Olsem wanem long dispela wel abus na ol het na ol kom?
7 Nau yu save dispela wel abus i makim wanem samting, a? Tru tumas, em dispela “samting nogut tru i save bagarapim ples” em pastaim ol i kolim Lig ov Nesen na nau ol i kolim Yunaitet Nesen. (Matyu 24:15; Danyel 12:11) Olsem wanem dispela oganaisesen i olsem “wanlain” bilong ol narapela 7-pela bikpela gavman i bin kamap long graun? Long wanem ol gavman i kamap pinis long graun ol i kamapim dispela oganaisesen i olsem wanpela wel abus, em dispela namba et king, na bikpela gavman bilong Englan na Amerika i nambawan lain bilong kamapim na helpim dispela oganaisesen.
8 Na olsem ensel i tokim Jon, olgeta “10-pela kom”i ‘givim strong na biknem long dispela wel abus.’ (Revelesen 17:13) Tru tumas, ol gavman em ol 7-pela het na 10-pela kom i makim, ol i mas givim strong long dispela wel abus; sapos nogat bai dispela wel abus i no gat strong. Bilong wanem? Long wanem em i wanpela “piksa” tasol. (Revelesen 13:14) Em i wankain olsem olgeta piksa—em yet i no gat strong. (Aisaia 44:14-17) Em i kisim strong o “laip” long ol man i sambai long en. (Revelesen 13:15) Sampela taim sampela man i givim strong long en ol i bin kirap mekim wanpela wok long rot bilong Yunaitet Nesen, olsem long taim bilong bikpela pait long Korea.
9. Wanem samting moa i helpim yumi long save tru long dispela wel abus?
9 Sampela tok moa ensel i mekim em i helpim yumi long save tru long dispela wel abus. Ensel i tok: “Yu lukim pinis dispela wel abus. Bipo em i stap, na nau em i no i stap. Tasol bihain bai em i lusim dispela hul i no gat as, na em i kam antap, na bai em i lus olgeta.” (Revelesen 17:8) Hap truim bilong dispela tok i kamap pinis. Namba Tu Pait Bilong Olgeta Hap i kolim i dai Lig ov Nesen. Long 1942, taim ol Witnes Bilong Jehova i kisim save long insait bilong dispela tok profet, i olsem dispela wel abus, em Lig ov Nesen, “em i no i stap.”b Tasol long 1945 em i “lusim dispela hul i no gat as, na em i kam antap”; em i kamap olsem Yunaitet Nesen. Tasol yu ting em bai inapim wok bilong en bilong kamapim gutaim na gutpela sindaun long graun? Nogat. Dispela tok profet i tok, bihain “bai em i lus olgeta.”
Meri i Sindaun Antap long Wel Abus
10, 11. (a) Taim Jon i lukim dispela wel abus, husat i sindaun antap long en? (b) Dispela “meri” i mekim wanem long taim bilong yumi na dispela i truim dispela samting Jon i lukim?
10 Na yu lukim narapela samting long dispela wel abus? I gat wanpela “meri” i sindaun antap long en. Dispela “meri” i makim olgeta lotu giaman i bosim ol man long olgeta hap bilong graun. Em i olsem: “Bikpela taun Babilon, em mama tru bilong olgeta pamukmeri, na bilong olgeta pasin nogut tru long graun.” (Revelesen 17:3-5, 15) Olsem wanem? Ol lotu bilong dispela graun i bin “sindaun antap” long dispela tupela oganaisesen na wok long stiaim ol? Tru tumas ol i bin mekim. Na ol lotu ol i kolim ‘Kristen,’ olsem Krisendom, ol i bin mekim moa yet.
11 Olsem: Wanpela niusman bilong Holan (em Pierre van Paassen), em i stori long ol lain bilong ol lotu Talatala bilong Amerika na Englan na Skandenevia, em ol i go long sampela bung bilong Lig ov Nesen, na em i tok, ‘Ol i litimapim tru nem bilong en, olsem ol i lotu long en.’ Long yia 1945, Federal Kaunsil Bilong Ol Sios Bilong Krais long Amerika i tok: “Mipela i tingting strong long helpim ol wok bilong Yunaitet Nesen i bilong stretim ol hevi na bilong helpim ol man.” Long yia 1965, Pop Paul Namba 6 i tok, Yunaitet Nesen i olsem ‘wanpela gutpela wok sori God i mekim bilong. helpim ol man. Yumi lukim tok bilong Gutnius, em samting bilong heven, i kamap long dispela samting bilong graun.’ Tru tumas, ol bikman bilong lotu i mekim na dispela oganaisesen “i gat planti nem i pulap long skin bilong en. Na olgeta dispela nem em i kain kain tok bilas long God.”—Revelesen 17:3; lukim tu Matyu 24:15; Mak 13:14.
Em i No Inap Kamapim Gutaim
12. Ol man i helpim Yunaitet Nesen ol i mekim wanem long Kingdom bilong God?
12 Dispela oganaisesen Yunaitet Nesen em i no stap wanbel wantaim Kingdom bilong God. Ol man i helpim Yunaitet Nesen ol i birua long Kingdom bilong God. Ensel i tokim Jon: “Bai ol i pait wantaim Pikinini Sipsip, na bai Pikinini Sipsip em i winim ol tru. Em i Bikpela bilong olgeta bikpela man, na em i King bilong olgeta king. Na olgeta man i stap wantaim em, na i bihainim singaut bilong em, na em i bin makim ol bilong em yet, na ol i save bihainim tru tok bilong em, bai ol dispela man ol i win wantaim Pikinini Sipsip long dispela pait.” (Revelesen 17:14) Olsem dispela tok profet i makim, ol lain man i bin “pait wantaim Pikinini Sipsip” nau long dispela taim bilong pinis—ol i birua long ol man i autim tok bilong Kingdom bilong em na ol i mekim nogut long ol. Tasol ol i no inap winim Pikinini Sipsip, na ol i no inap winim ol wokboi bilong em long graun, em ol i wok strong yet long autim dispela gutpela tok bilong Kingdom maski ol man i tambuim wok bilong ol o kalabusim ol o kilim ol i dai tu.—Matyu 10:16-18; Jon 16:33; 1 Jon 5:4.
13. Bilong wanem Yunaitet Nesen i no inap kamapim gutaim tru long graun?
13 Tru tumas, Yunaitet Nesen i no inap kamapim gutaim long graun. Dispela “meri” i sindaun antap long en, em Bikpela Babilon, em i meri nogut tru bilong kamapim pait long graun, na em i bin “kilim i dai ol manmeri bilong God na ol man i bilip long Jisas na i autim nem bilong em. Na mi lukim dispela meri em i dringim blut bilong ol na i kamap longlong.” (Revelesen 17:6) Ol pait bilong ol lain i helpim dispela oganaisesen ol i bin kapsaitim blut bilong planti man. (Matyu 24:6, 7) Na bos bilong ol, em Seten, dispela “bikpela snek,” em i no man bilong kamapim gutaim. (Revelesen 12:9, 17; 13:2) Ol man i no inap sindaun gut wantaim na kilim gutpela sindaun taim ol dispela samting i stap yet. Ol dispela samting i mas pinis pastaim.
Bilong Kamapim Gutaim
14. (a) Long driman bilong Jon, wanem samting i painim dispela “meri” i sindaun antap long wel abus? (b) Olsem wanem ol samting i kamap olsem dispela tok profet i makim?
14 Namba wan samting em bai pinis em olgeta lotu giaman. Dispela samting bai kamap long narapela kain rot, olsem: “Na dispela 10-pela kom yu lukim pinis, dispela olgeta wantaim dispela wel abus ol bai i birua long pamukmeri. Bai ol i bagarapim em tru na tekewe olgeta klos samting bilong en. Na bai ol i kaikai mit bilong bodi bilong en, na kukim em olgeta long paia.” Taim dispela samting i kamap bai olgeta man i kirap nogut! (Revelesen 17:16; 18:9-19) Ol “kom” i save tingim lain bilong ol yet tasol na ol i gat nem insait long Yunaitet Nesen, ol bai bagarapim dispela “pamukmeri.” Dispela i wankain olsem ol samting Jisas i tok bai kamap taim dispela “samting nogut tru” i bagarapim “Jerusalem”! (Mak 13:14-20; Luk 21:20) Tru, ol lain bilong dispela graun bai bagarapim dispela “pamukmeri,” em Krisendom tu i hap bilong en, tasol ol i mekim wok bilong God—ol i givim strafe bilong God long dispela “pamukmeri.” Na wanem samting bai kamap? Bai “ol man i no inap lukim em moa”—olgeta lotu giaman bai pinis olgeta.—Revelesen 17:1; 18:21.
15, 16. (a) “Bikpela hevi tru” em wanem samting? (b) Wanem samting bai kamap long taim bilong dispela “bikpela hevi tru”? (c) Ol bai mekim wanem long Seten bambai em i no ken pasim moa rot bilong kamapim gutaim long graun?
15 Jisas i tok taim Krisendom i bagarap bai taim bilong “bikpela hevi tru” i kirap. “Long taim graun i nupela yet inap nau, kain hevi olsem i no bin kamap bipo. Na bihain tu bai i no gat hevi olsem.” (Matyu 24:15, 21) Dispela “bikpela hevi tru” i go yet na bai Kingdom bilong God i pinisim olgeta gavman na olgeta wok bisnis bilong oganaisesen bilong Seten. (Danyel 2:44) Long dispela driman nau Jon i lukim King i kirap mekim dispela wok. Jon i tok: “Na mi lukim heven i op, na wanpela waitpela hos i stap. Man i sindaun long en, nem bilong en i olsem: ‘Man i lukautim gut wok bilong en,’ na ‘Man i save mekim pasin tru tasol.’ Sapos em i skelim manmeri long kot, na sapos em i kirapim pait, orait em i save bihainim stretpela pasin tasol na i mekim.” Olgeta gavman bilong graun wantaim “piksa bilong wel abus” ol i pait wantaim em. Na wanem samting i kamap? Ol man i bagarapim gutaim ol i bagarap!—Revelesen 19:11, 19-21.
16 Na bai i gat wanpela samting tasol i stap na i pasim rot bilong kamapim gutaim long graun—em Seten yet. Jon i stori long ol samting bai painim Seten, em i tok: “Na mi lukim wanpela ensel i lusim heven na i kam daun. Long han bilong en i holim ki bilong hul i no gat as. Na em i holim bikpela sen tu. Em i holimpas dispela bikpela snek, em snek bilong bipo tru. Em ‘Man I Save Kotim Olgeta Man.’ Em Seten. Na ensel i pasim em long sen inap long 1,000 yia.”—Revelesen 20:1-3.
Yumi Yet Yumi Mas Tingim Wanem Rot Yumi Laik Bihainim
17. Ol man i laik lukim gutaim tru i kamap, nau ol i mas mekim wanem?
17 Ol bikpela bikpela senis bai kamap! Bai ol oganaisesen na ol gavman i pinis, tasol olsem wanem long ol man wan wan? Em samting bilong ol yet. Ol yet i mas tingim wanem rot ol i laik bihainim. God i mekim pasin sori na em i tok, taim “bikpela hevi tru” i no kamap yet “olgeta lain man i mas harim man i autim gutnius pastaim.” (Mak 13:10) Ol man i laikim tumas gutaim ol i mas “lusim” Bikpela Babilon. (Revelesen 18:4) Ol man i stap long Krisendom ol i mas “ranawe i go long maunten.” (Luk 21:21) Ol man i bihainim lo bilong Kingdom bilong God ol i no ken kisim ‘mak bilong wel abus.’ (Revelesen 14:9-12; Jon 17:15, 16) Ol dispela man i gat stretpela bel ol i bikpela lain na ol bai abrusim bagarap long taim bilong bikpela hevi tru. (Revelesen 7:9-14) I gat rot bilong olgeta man i ken abrusim bagarap taim olgeta wok bilong Seten i pinis, tasol ol yet i mas tingim—ol i laik bihainim dispela rot o nogat.—Provep 2:21, 22.
18, 19. (a) Orait, yumi ken tok wanem long taim bilong “bikpela hevi tru” i mas kirap? (b) Ol Kristen i mekim wanem nau na ol i redi long taim bilong “bikpela hevi tru”?
18 Orait, wanem taim bai ol dispela bikpela samting i kamap? Olgeta lain man i harim ol man i autim dispela “gutnius” long nau. Na dispela “samting nogut tru” i kamap i stap. (Matyu 24:14-16) Na dispela “piksa bilong wel abus” i lusim hul i kam antap pinis na nau bai em i “lus olgeta.” (Revelesen 17:8) Ol samting i kamap olsem “mak” i soim yumi Jisas i kamap king long yia 1914 na em i stap king inap 71 yia pinis. (Matyu 24:3) Jisas i tok: “Olsem tasol, bihain yupela i lukim dispela olgeta samting i kamap, orait yupela i ken save, em i kam klostu pinis, na i stap long dua. Mi tok tru long yupela: Ol manmeri bilong dispela taim ol i no i dai pinis yet, na bai dispela olgeta samting i kamap.” (Matyu 24:33, 34) Olsem na yumi ken tok, taim bilong “bikpela hevi tru” i klostu pinis. Tasol yumi ken kolim wanem de stret o yia stret bai em i kirap? Nogat. Yumi no ken mekim olsem nau long dispela taim.
19 Aposel Pol i tok: “Bai ol i tok, ‘Em gutaim nau, yumi stap gut.’ Long dispela taim tasol samting bilong bagarapim ol bai i kamap kwiktaim long ol, olsem pen i save kamap long meri i laik karim pikinini. Na ol i no inap abrusim dispela samting.” (1 Tesalonaika 5:3) Olsem na taim dispela “bikpela hevi tru” i kirap bai olgeta man i kirap nogut! Tasol ol Kristen i no ken kirap nogut. Ol i save dispela “bikpela hevi tru” i laik kamap na ol i save bihainim tok bilong Jisas, em i tok: “Oltaim oltaim yupela i mas was i stap. Na yupela i mas beten oltaim long God i givim strong long yupela. Olsem na bai yupela i abrusim olgeta dispela samting i laik kamap, na bai yupela i sanap long ai bilong Pikinini Bilong Man.”—Luk 21:36.
20. Long dispela taim nau bilong wanem ol Kristen i no ken kolim wanem taim stret bikpela hevi tru bai kirap?
20 Tasol ol Kristen i no ken kolim taim stret bilong dispela “bikpela hevi tru” i mas kirap. Nogat. Jehova i no bin kamapim “dispela de na dispela aua” long ol. (Mak 13:32; Matyu 24:42) Olsem na taim Yunaitet Nesen i makim yia 1986 i olsem “Intenesenel Yia Bilong Gutaim,” ol Kristen i save tingim dispela samting. Tasol ol i no ken tokaut pastaim olsem dispela samting i truim tok bilong Pol long 1 Tesalonaika 5:3. Nogat. Tasol ol i tenkyu long Jehova, long wanem em i helpim ol na nau ol i save dispela “piksa bilong wel abus,” olsem dispela “samting nogut tru i save bagarapim ples,” em i wanem samting. Ol i gat wankain tingting long dispela oganaisesen olsem Jehova—ol i save dispela oganaisesen i no inap kamapim gutaim tru long graun.
21. (a) Ol Kristen i kisim wanem kain bel isi long nau? (b) Ol i wetim wanem gutpela samting i kamap long bihain?
21 O1 manmeri i “was i stap” ol i stap aninit long Kingdom bilong God; ol i bihainim lo bilong en na ol i stap bel isi long nau. Jehova, dispela “God i save givim bel isi long yumi,” em i stap wantaim ol na em i givim dispela bel isi long ol em i “winim olgeta save.” (Filipai 4:7, 9) Ol i save i no longtaim tumas na bai gutpela taim i kamap long graun olsem profet Aisaia i bin tok long en: “Stretpela pasin i as bilong i stap bel isi; long rot bilong stretpela pasin ol man bai kisim gutpela sindaun na bel isi inap long taim bihain bihain. Lain bilong mi i mas i stap long ples bilong bel isi, na ol i ken malolo long ples i no gat samting bilong bagarapim sindaun bilong ol, na ol i no ken pret.” (Aisaia 32:16-18, NW) Bai olgeta man i stap long graun i gat gutpela sindaun na bai ol i stap bel isi. (Aisaia 11:9) Gutaim tru bai kamap long graun, long wanem God Jehova yet i as bilong en.
[Ol futnot]
a Planti gavman nau ol i insait long Yunaitet Nesen, ol i no i stap long taim bilong aposel Jon. Olsem na i stret yumi ken tok, long taim bilong Jon ol i “no kamap king yet.” Tasol sampela ol i bin i stap bipo, olsem Isip. Tasol long ol dispela kantri tu, ol gavman bilong nau i no wankain olsem long bipo na tok bilong ensel i stret, olsem: Ol gavman nau ol i stap ol i “no kamap king yet” long taim bilong Jon.
b Taim Namba Tu Pait Bilong Olgeta Hap i kamap strong, presiden bilong Sosaiti Was Taua i mekim wanpela tok long 20 Septemba 1942 long wanpela kibung bilong ol Witnes Bilong Jehova. Nem bilong dispela tok i olsem: “Gutaim—Em Bai Stap o Em Bai Pinis?” Em i stori long Revelesen sapta 17 na em i tok, Namba Tu Pait i no ken bringim ol man i go kamap long Amagedon olsem planti man i ting. Nogat. Pastaim dispela ‘wel abus,’ olsem dispela oganaisesen bilong kamapim gutaim, em i mas lusim hul i kam antap na em i mas kisim strong wantaim ol narapela gavman bilong bosim graun inap “wanpela aua tasol.”
Yu Tingim?
◻ Wanem sampela pasin bilong dispela wel abus bilong Revelesen sapta 17?
◻ Dispela wel abus i makim wanem samting?
◻ Olsem wanem na dispela samting, em wel abus i makim, em i no inap kamapim gutaim tru long graun?
◻ Olsem wanem Kingdom bilong God bai helpim ol man long i stap bel isi na kisim gutpela sindaun?
◻ Sapos ol man i save long dispela samting, olsem wanem dispela inap helpim ol?
[Rait long pes 17]
Pop Paul Namba 6 i tok, Yunaitet Nesen i olsem ‘wanpela gutpela wok sori God i mekim bilong helpim ol man’
[Piksa long pes 19]
Ol man i laikim tumas gutaim ol i mas “lusim” Bikpela Babilon