I Stap na Wok Bilong Jisas
Nem Bilong Jon i Go Daun, Nem Bilong Jisas i Kamap Bikpela
PASOVA bilong yia 30 C.E. i pinis na bihain Jisas wantaim ol disaipel bilong em ol i lusim Jerusalem. Tasol ol i no i go bek long ples bilong ol long Galili. Ol i raun long hap bilong Judia na ol i baptaisim sampela man. Inap wanpela yia pinis Jon Bilong Baptais i bin mekim wankain wok na sampela disaipel i bung yet wantaim em.
Jisas yet em i no baptaisim sampela man, tasol em i tokim ol disaipel long mekim. Baptais ol i givim long ol man i wankain olsem baptais bilong Jon. Dispela baptais i makim olsem ol Juda i tanim bel na ol i hevi long ol rong ol i bin mekim long kontrak bilong Lo God i kamapim. Tasol taim Jisas i kirap bek em i tokim ol disaipel long givim baptais long ol man na dispela baptais i makim narapela samting. Baptais Kristen i makim man i givim bel olgeta long God Jehova, olsem dediket long Em, bilong mekim wok bilong Em.
Long dispela taim Jisas i kirap mekim wok bilong em na maski em i em i no wok wantaim Jon, tasol tupela wantaim i lainim na baptaisim ol man i tanim bel. Tasol ol disaipel bilong Jon i bel nogut long wok bilong Jisas na ol i tokim Jon: “Tisa, . . . dispela man em i givim baptais long ol manmeri, na olgeta ol i go long em.”
Jon i no bel nogut long dispela samting; em i amamas long wok bilong Jisas i kamap gutpela. Em i laik bai ol disaipel bilong em tu i amamas long dispela samting na em i tokim ol: “Yupela yet i harim pinis dispela tok mi mekim bipo, ‘Mi no Krais, tasol God i salim mi na mi kam paslain long em.’ ” Na bihain Jon i mekim gutpela tok piksa, em i tok: “Sapos wanpela man i maritim meri, orait dispela meri em i bilong dispela man em i maritim em. Na poroman bilong dispela man em i sanap na putim [yau], na em i amamas tru long harim tok bilong dispela man i marit. Olsem tasol nau amamas i pulap long bel bilong mi.”
Jon em poroman bilong dispela Man i laik marit, na 6-pela mun bipo em i amamas long tokim ol disaipel bilong em long dispela Man, em Jisas. Sampela bilong ol i bihainim Jisas na ol inap kamap lain bilong em long heven, olsem meri bilong em. Ol Kristen em spirit holi i makim ol ol i insait long dispela lain bilong heven. Jon i laik bai ol dispela disaipel bilong em, ol tu i mas bihainim Jisas, long wanem em i kam bilong redim rot tasol bilong Jisas na bai wok bilong em i ken kamap gutpela. I olsem Jon i tok: “Nem bilong em i mas kamap bikpela, na nem bilong mi i mas i go daun.”
Liklik taim bihain, King Herot i salim ol man i go holim Jon. Herot i kisim Herodias, em meri bilong brata bilong em Filip, na Herodias i stap meri bilong em. Taim Jon i tokaut long ples klia olsem dispela pasin i no stret, Herot i putim Jon long kalabus. Taim Jisas i harim tok olsem Jon i stap long kalabus, em i lusim hap bilong Judia na em wantaim ol disaipel bilong em ol i go long Galili. Jon 3:22–4:3; Aposel 19:4; Matyu 28:19; 2 Korin 11:2; Mak 1:14; 6:17-20.
◆ Taim Jisas i no dai na kirap bek yet na em i tokim ol disaipel long givim baptais long ol man, dispela baptais i makim wanem samting? Olsem wanem long baptais ol i givim long ol man bihain long taim Jisas i kirap bek?
◆ Olsem wanem Jon i helpim ol disaipel bilong em long save i no stret ol i bel nogut long wok bilong Jisas?
◆ Bilong wanem Jon i kalabus?