Nogut Yu Abrusim Rot Bilong Kisim Save Long Tok i Tru
WANPELA helikopta i bagarap na i pundaun long bikpela bus long hap bilong Amason. Planti pasendia i pret na ol i no tingting tumas long kisim save long dispela ples ol i pundaun long en. Tasol wanpela pasendia i stap isi na lukim gut dispela ples! Em i man bilong save long ol ston bilong graun na em i lukim dispela ples helikopta i pundaun long en em i no gat planti diwai i stap long en. Em i gat rot bilong kisim save long dispela ples na em i no abrusim dispela rot. Em i lukim gut ol ston samting long dispela ples na kwiktaim em i kisim save olsem insait long graun i gat bikpela ain na gol samting i stap. Na tru tumas, bihain ol man i kisim bikpela ain na bras na gol long dispela hap!
Planti man, taim rot i op long ol Bilong kisim save long wanpela samting o bilong mekim wanpela samting, ol i no tingting gut na ol i abrusim dispela rot. Tingim Pontias Pailat, em namba wan gavman long taim bilong ol aposel. Rot i op long em bilong kisim save long tok i tru. Ol hetman bilong lotu Juda i putim nambawan gutpela tisa bilong tok i tru long han bilong em, em Jisas Krais. Olaman! Pailat inap givim planti askim long em na kisim bikpela save long ol tok i tru! Na ating Pailat i laik kisim dispela save, long wanem taim ol i kisim Jisas i kam long em na ol i sutim tok long Jisas na tok Jisas em i bin tok em i “king bilong ol Juda,” Pailat i givim wanpela askim long Jisas, em i tok: “Yu king bilong ol Juda, a?”
Jisas i bekim tok olsem: “Kingdom bilong mi em i no bilong dispela graun. ․․․ Mama bilong mi i karim mi na mi kam long graun bilong dispela tasol: Mi gat wok long autim tok tru. Olgeta man i bihainim tok tru, ol i save harim tok Bilong mi.” Em nau—rot i op long Pailat bilong kisim save long tok i tru. Wokabaut bilong dispela man i sanap long pes Bilong em i bin kamapim long ples klia olsem ol tok promis bilong God i tru; dispela man em inap givim gutpela save tru long Pailat, winim olgeta narapela man. Tasol Pailat i mekim wanem? Em i tok: “Tok tru em i wanem samting?” Em i tok olsem na wantu “em i go ausait gen long ol Juda.”—Jon 18:33-38.
Pailat abrusim rot bilong kisim save long tok i tru. Na planti manmeri long nau ol tu i popaia olsem. Dispela nius nau yu kaunim, em Wastaua, ol i wokim dispela nius bilong givim save long ol man long tok i tru. Tasol planti ol i no laik kaunim dispela nius. Na sampela ol i kaunim na ol i laikim ol tok bilong en na em tasol. Ating ol dispela man i kain olsem Pailat—ol i abrusim rot bilong kisim save long tok i tru, a?