Ripot long Wok Bilong Kingdom

Jehova i “Mekim i Kamap” Long Fiji

JEHOVA i blesim tru wok bilong ol manmeri i stap gut long wok bilong autim tok bilong Kingdom long ol gutpela ailan bilong Fiji. Nau i gat 1,049 witnes bilong Jehova i stap long ol dispela ailan. Lain bilong ol i go bikpela inap 10 pesen. Ol i bin planim pikinini bilong kaikai na putim wara long en na God i mekim i kamap.a—1 Korin 3:6, 7.

Brens-ofis bilong Sosaiti Was Taua long Fiji i tok, “long nau planti man i laik stadi na lainim tok bilong Baibel.” Wanpela kongrigesen i go autim tok long wanpela liklik ples i stap longwe. Bipo ol manmeri bilong dispela ples i no laik harim tok. Tasol dispela taim hetman bilong ples i tokim olgeta manmeri bilong ples ol i mas i stap long haus na harim tok bilong ol Witnes na bihain ol meri bilong ples i mas givim koldring samting long ol Witnes. Tupela wik bihain wanpela painia i go bek lukim ol dispela manmeri na i gat 28 ol i laik stadi. Nau long olgeta tupela wik tupela wik, ol brata i go long dispela ples bilong helpim ol dispela manmeri. Na olgeta taim ol i go, “sampela man moa ol i laik stadi.”

I gat 68 nupela man i baptais long kibung distrik na wanpela, bipo em i tisa bilong Sande-skul inap 9-pela yia. Lain bilong em ol i man bilong lotu. Tupela Witnes i go long ol haus na autim tok na ol i bungim dispela man. Tupela i tok: ‘Planti taim mipela i go bek lukim dispela man na toktok longtaim wantaim em, na bihain bihain em i kirap long stadi. Em i stadi inap 2-pela mun na nau em i lusim wok bilong em long Sande-skul na em i strong long bihainim tok i tru. Wanpela yia bihain em i kisim baptais. Em i mekim wankain tok olsem Pol i bin mekim, olsem: “Pasin bipo mi mekim taim mi bihainim lotu giaman, em yupela i harim pinis. Bipo mi strong tumas long bihainim olgeta pasin bilong ol tumbuna bilong mi. Tasol nau mi save pinis long tok i tru, na mi amamas long mekim wok bilong Jehova wantaim yupela.”—Lukim Galesia 1:13, 14.

Long yia 1984, long namba wan taim, i gat tupela kibung distrik long Fiji. Tupela ten tu elda long bikples ol i tok ol yet i laik baim rot na i go helpim kibung i laik kamap long narapela liklik ailan. Brens-ofis i stretim rot bilong ol i go na ol i ting 90 brata bilong bikples bai go. Tasol nogat. Inap olsem 115 ol i go long wanpela balus, na 320 i go long wanpela sip ol i sata long en. Kepten bilong balus i lukim gutpela pasin bilong ol Witnes na em i tok: “Mi kirap nogut long pasin bilong ol; ol i save bihainim gut tok. Taim mi tokim ol wanpela liklik samting long balus i bagarap na ol i mas lusim balus, ol i no kros na toktok planti; long pasin isi ol i lusim balus i go daun na wet i stap. Taim ol i kalap gen long balus, ol i amamas na ol i mekim; ol i no gat tok. Mi laik bai olgeta manmeri i raun long balus ol i mas mekim kain gutpela pasin olsem yupela i mekim.”

Ensinia bilong sip ol i sata long en, em i tok: “Mi amamas yupela i pasendia bilong dispela sip. Pasin bilong yupela i narapela kain tru long pasin bilong wanpela lain ol yangpela Kristen em nau tasol sip i bin kisim ol i go long narapela ailan . . . . Yupela i klinpela na yupela i no givim hatwok long mipela.” Na wanpela pasendia long dispela sip i tok: “Mi lukim wanpela gutpela samting i kamap i no bin painim mi bipo . . . mi slip ausait long plua bilong sip na i kol, na nau wanpela sista long lain bilong yupela em i givim matres bilong em long mitupela meri bilong mi. Longtaim pinis mi wok long painim kain gutpela lotu olsem.” Dispela pasendia i go long kibung bambai em i ken kisim sampela save moa long dispela lotu.

Gutpela pasin olgeta dispela brata sista i mekim, em pasin bilong ol Kristen tru. Jisas i tok: “Olgeta gutpela diwai i save karim gutpela kaikai.” (Matyu 7:17) Yumi amamas long lukim Jehova i mekim lain bilong em long Fiji i kamap bikpela. Na yumi save, bihain bai planti moa i harim gutpela tok bilong Kingdom na lukim gutpela pasin bilong lain bilong Jehova na bai ol tu i kirap lotuim Jehova.

[Futnot]