I Stap na Wok Bilong Jisas

Bilong Wanem Jisas i Kam Long Graun

WASTAUA bilong Oktoba i stori long bikpela wok Jisas i mekim long wanpela san taim em i stap wantaim fopela disaipel bilong em long Kapaneam. Pastaim em i go long haus lotu na em i oraitim man i gat spirit nogut i stap long em, na bihain em i go long haus bilong Pita na oraitim sik bilong mama bilong meri bilong Pita, na long apinun ol lain bilong Kapaneam i bringim ol sikman i kam long em na em i oraitim ol. Em i no inap lusim ol arapela man na stap em wanpela tasol.

Long tumora, long moningtaim tru, em i kirap na em i lusim haus i go ausait, em wanpela tasol. Em i go long ples i no gat man bambai em inap beten long Papa bilong em. Tasol kwiktaim Pita wantaim sampela man moa ol i wok long painim em.

Ol i painim em pinis na ol i tokim em, “Olgeta manmeri ol i laik painim yu.” Ol manmeri bilong Kapaneam i laik bai Jisas i stap wantaim ol. Ol i pilim tru ol samting em i bin mekim bilong helpim ol. Tasol yu ting Jisas i kam long graun bilong wokim tasol ol mirakel na oraitim sik bilong ol man? Em i tok wanem?

Em i tok: “Maski, yumi go long sampela arapela ples klostu. Mi laik autim tok long ol tu. Bilong dispela tasol mi kam.” Ol man i laik pasim em, bai em i no ken lusim ol na i go, tasol em i tokim ol: “Mi mas telimautim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.”

Yes, nambawan wok bilong Jisas em bilong autim tok bilong Kingdom bilong God, em dispela Kingdom bai stretim bek nem bilong Papa bilong em na stretim olgeta hevi bilong ol man. Tasol bilong kamapim long ples klia olsem God i bin salim em i kam, em i wokim sampela mirakel na oraitim sik bilong sampela man. Sampela handet yia bipo, Moses i bin mekim wankain pasin; em i wokim sampela mirakel bambai ol man i ken save em i wokman bilong God.

Jisas i lusim Kapaneam na em i go autim tok long ol narapela taun, na fopela disaipel i go wantaim em, em Pita wantaim brata bilong em Andru, na Jon wantaim brata bilong em Jems. Wanpela wik paslain tasol Jisas i bin singautim ol i go raun wantaim em. Yu tingim?

Jisas i raun autim tok wantaim dispela fopela disaipel long hap bilong Galili na wok bilong em i kamap gutpela tru! Stori bilong wok bilong em i go long olgeta hap bilong Siria tu. Planti bikpela lain manmeri bilong Galili na Judia na bilong Jodan long hap i go, ol i bihainim Jisas na ol disaipel bilong em. Mak 1:35-39; Luk 4:42, 43; Matyu 4:23-25; Eksodas 4:1-9, 30, 31.

◆ Jisas i mekim bikpela wok inap wanpela san long Kapaneam, na tumora long moningtaim, wanem samting i kamap?

◆ Bilong wanem God i salim Jisas i kam long graun? Ol mirakel em i wokim i bilong mekim wanem?

◆ Taim Jisas i go raun autim tok long hap bilong Galili, husat i go wantaim em? Ol man i harim tok bilong Jisas o olsem wanem?