I Stap na Wok Bilong Jisas
Kisim Wit Long Sabat
LIKLIK taim na Jisas wantaim ol disaipel bilong em i lusim Jerusalem na i go bek long Galili. Long wanpela Sabat ol i wokabaut namel long gaden wit na ol disaipel i hangre, na ol i kisim pikinini bilong wit na ol i kaikai. Ol Farisi i lukim dispela samting.
Ol bikpela man bilong lotu long Jerusalem i bin painim rot bilong kilim i dai Jisas, long wanem ol i tok em i brukim lo bilong Sabat. Na nau ol Farisi i sutim tok long ol disaipel bilong Jisas na ol i tok: “Lukim, dispela pasin ol disaipel bilong yu i mekim, em i tambu long sabat.”
Ol disaipel i bin kisim sampela pikinini bilong wit na rabim long han bilong klinim bambai ol i ken kaikai, tasol ol Farisi i tok dispela i olsem ol i bungim wit long gaden na klinim. Ol i putim lo bilong ol yet bilong makim wanem samting i olsem wok tru na i tambu long Sabat, na long dispela rot ol i putim hevi long ol man. Tasol Jehova i laik bai Sabat em i de bilong amamas na bilong strongim man long spirit. Olsem na Jisas i kolim sampela stori long Baibel na bai yumi ken save, taim Jehova i bin kamapim lo bilong Sabat em i no tingting long putim strongpela lo tumas na givim bikpela hevi long ol man, olsem ol Farisi i mekim.
Jisas i tok, taim Devit wantaim lain bilong em ol i hangre, ol i go long haus bilong God na kaikai bret i stap long pes bilong God. Tru, dispela bret ol i kaikai em i olpela na ol pris i rausim pinis long pes bilong God na putim nupela i stap, tasol dispela bret i tambu na ol pris tasol i save kaikai. Tasol long dispela taim God i no kros long Devit wantaim lain bilong em.
Na Jisas i stori moa olsem: “Ating yupela i no bin ritim tu dispela tok i stap long buk bilong lo, na i gat tok long ol pris i gat wok long tempel? Long sabat ol i save kalapim lo bilong sabat, tasol ol i no gat rong.” Tru tumas, long de Sabat tu ol pris i save kilim i dai ol animal na mekim ol narapela wok long tempel bilong redim ol ofa. Jisas i tok: “Orait mi tokim yupela: Samting i stap hia, em i winim tempel.”
Jisas i tok strong long ol Farisi na em i tok: “Tasol, sapos yupela i bin save gut insait bilong dispela tok, ‘Mi no laikim ofa, mi laikim marimari,’ orait bai yupela i no putim hevi long ol man i no gat rong.” Na bihain em i tok: “Pikinini Bilong Man em i bosim sabat.” Wanem insait bilong dispela tok bilong Jisas?
Jisas i tingim taim em bai stap king long Kingdom na bosim graun inap 1,000 yia na bai gutaim i stap. Inap 6,000 yia ol man i bin wok kalabus aninit long Seten na pasin pait i pulap long graun. Tasol taim Krais i bosim graun, long dispela bikpela de sabat bilong 1,000 yia bai i gat malolo; bai ol man i no karim moa pen na hevi. Matyu 12:1-8; Levitikas 24:5-9; 1 Samuel 21:1-6; Nambas 28:9; Hosea 6:6.
◆ Ol Farisi i sutim wanem tok long ol disaipel bilong Jisas? Na Jisas i bekim wanem tok?
◆ Ol Farisi i popaia olsem wanem na Jisas i kamapim dispela?
◆ Olsem wanem Jisas “em i bosim sabat”?