Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w90 7/1 p. 8-9
  • Redi Long Karim Hevi

No gat vidio bilong dispela seksen.

Sori, popaia kamap long lodim vidio.

  • Redi Long Karim Hevi
  • Wastaua i Tokaut Long Kingdom Bilong Jehova—1990
  • Wankain Infomesen
  • Em i Redi Long Karim Hevi
    Nambawan Man Tru i Winim Olgeta Narapela Man
  • Redi Long Autim Tok Maski Ol Man i Birua
    Jisas—Em i Rot, Tok i Tru, na Laip
  • Em i Laik Lusim Ol Aposel na Em i Givim Sampela Tok Long Ol
    Nambawan Man Tru i Winim Olgeta Narapela Man
  • “Olgeta Lain Man i Mas Harim Man i Autim Gutnius Pastaim”
    Wastaua i Tokaut Long Kingdom Bilong Jehova—1988
Lukim Moa
Wastaua i Tokaut Long Kingdom Bilong Jehova—1990
w90 7/1 p. 8-9

I Stap na Wok Bilong Jisas

Redi Long Karim Hevi

JISAS i wok long lainim ol disaipel bilong em long pasin bilong autim tok na bihain em i tokim ol, ol i mas lukaut long ol birua. Em i tok: “Harim. Mi salim yupela i go olsem ol sipsip i go namel long ol weldok. . . . Yupela lukaut long ol man. Ol bai i kotim yupela long ol kaunsil bilong ol, na ol bai i wipim yupela insait long ol haus lotu bilong ol. Ol bai i ting long daunim mi, na pulim yupela i go long ol gavman na ol king.”

Maski ol man bai mekim nogut tru long ol disaipel bilong Jisas, Jisas i tok promis long ol olsem: “Taim ol i bringim yupela i go long kot, yupela i no ken pret na ting, ‘Mipela bai i mekim wanem kain tok? Na mipela bai i bekim wanem tok?’ Nogat. Long dispela taim stret God bai i soim yupela long tok yupela i mas autim. Long wanem, i no yupela yet bai i autim tok. Nogat. Spirit bilong Papa bilong yupela, em bai i autim tok long maus bilong yupela.”

Jisas i tok moa olsem: “Man bai i kotim brata bilong en, na tokim ol long kilim dispela brata i dai. Na ol papa bai i mekim wankain pasin long ol pikinini bilong ol. Na ol pikinini bai i birua long papamama bilong ol na tokim ol man long kilim ol i dai.” Na em i tok: “Na olgeta man bai i bel nogut tru long yupela, long wanem, nem bilong mi em i stap long yupela. Tasol ol manmeri i stap strong inap long las de, God bai i kisim bek ol.”

Wok autim tok em i nambawan bikpela wok, olsem na Jisas i tok strong long ol disaipel i mas bihainim gutpela tingting bambai i no gat wanpela samting i ken pasim ol long mekim dispela wok. Em i tok: “Na sapos ol manmeri bilong wanpela taun i mekim nogut long yupela, orait yupela i mas ranawe i go long narapela taun.” Em i tok, “Mi tok tru long yupela, yupela bai i no pinisim wok yet long olgeta taun bilong Israel, na Pikinini Bilong Man bai i kam.”

Tru Jisas i bin givim dispela toksave long ol 12-pela aposel bilong em na em i bin givim tok long ol bilong lainim ol na strongim ol, tasol ol dispela tok em bilong ol manmeri bihain bai ol i autim tok long olgeta hap bilong graun taim em i dai na kirap bek pinis. Yumi inap save long dispela samting, long wanem em i tok, “olgeta man bai i bel nogut tru long yupela,” i no ol Israel tasol, em ol aposel i bin autim tok long ol. Taim ol aposel i mekim liklik raun bilong ol bilong autim tok, ol man i no bin pulim ol i go long ol gavman na ol king. Na tu, long dispela taim famili bilong ol bilipman i no bin kotim ol na tokim kot long kilim ol i dai.

Olsem na taim Jisas i tok, ol disaipel bai i no pinisim yet wok bilong autim tok long olgeta taun bilong Israel na “Pikinini Bilong Man bai i kam,” em i mekim tok profet. Em i tokim yumi olsem lain bilong em i gat wok long autim tok bilong Kingdom i kamap pinis, na bai ol i no pinisim yet dispela wok long olgeta liklik liklik hap bilong graun na King Krais Jisas bai i kam bilong bagarapim ol birua bilong Jehova long Armagedon.

Jisas i lainim ol moa long pasin bilong autim tok na em i tok: “Sumatin i no winim tisa bilong en, na wokboi i no stap antap long bikman bilong en.” Olsem na ol manmeri i bihainim Jisas ol i mas redi long karim hevi olsem Jisas i bin mekim taim em i autim tok bilong Kingdom bilong God; ol i mas save, ol man bai mekim nogut long ol. Tasol Jisas i tok strong olsem: “Yupela i no ken pret long ol man i save kilim i dai bodi, tasol ol i no inap kilim spirit bilong yupela. Nogat. Yupela i mas pret long God tasol. Em inap bagarapim spirit na bodi tu long [Gehenna].”

Jisas i makim gutpela pasin ol i ken bihainim. Em i no pret long ol man i laik kilim em i dai. Em i stap gut long God Jehova, em Man i gat olgeta strong. Tru, Jehova inap bagarapim “spirit” o “laip” bilong yumi (na bai yumi no inap i stap laip long bihain), tasol em inap kirapim bek man i dai pinis na givim laip i stap oltaim long em. Jehova em i Papa bilong pasin sori na pasin marimari!

Bihain Jisas i strongim ol disaipel bilong em long wanpela tok piksa. Dispela tok piksa i kamapim pasin sori bilong Jehova. “Yupela i save, ol man i save baim tupela liklik pisin long wan toea tasol. Na Papa bilong yupela i save lukautim gut ol dispela pisin. Sapos em i no laik, orait i no inap wanpela bilong ol i pundaun long graun. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.”

Jisas i givim wok long ol disaipel bilong autim tok bilong Kingdom na dispela tok bai brukim ol famili, long wanem sampela long famili bai bihainim na sampela bai sakim. Jisas i tok moa olsem: “Yupela i no ken ting mi kam bilong mekim i dai olgeta pait long graun. Mi no kam bilong mekim i dai pait. Nogat, Mi bringim bainat i kam.” Olsem na sapos wanpela tasol long famili i laik bihainim tok i tru bilong Baibel, em i mas strongim bel na em i no ken pret. Jisas i tok: “Man i laikim tumas papa o mama bilong en, na i no laikim mi moa yet, em i no inap i stap pren bilong mi.”

Bilong pinisim ol tok bilong em Jisas i tok, man i kisim ol disaipel bilong em na i mekim gut long ol, i olsem em i kisim Jisas na i mekim gut long em. Na Jisas i tok, “Man i ting, ‘Mi laik helpim disaipel bilong Jisas,’ na em i givim kap kol wara tasol long wanpela bilong ol dispela manmeri nating i stap long lain disaipel bilong mi, orait mi tok tru long yupela, pe bilong dispela man bai i no inap lus.” Matyu 10:16-42.

◆ Jisas i givim wanem toksave long ol disaipel bilong em?

◆ Jisas i givim wanem gutpela tok long ol bilong strongim bel bilong ol?

◆ Bilong wanem ol tok Jisas i mekim em bilong ol Kristen long nau tu?

◆ Olsem wanem disaipel bilong Jisas i no antap long tisa bilong em?

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim