Rot Bilong Kisim Ol Pren Tru

WANPELA man bilong Amerika (Emerson) em i bin raitim tok olsem: ‘Sapos yu laik kisim wanpela gutpela pren, orait yu yet yu mas mekim gutpela pasin pren.’ Tru tumas, tupela wantaim i mas mekim sampela gutpela pasin bambai tupela i ken kamap pren tru; tupela wantaim i mas bihainim pasin bilong givim samting long narapela man. Ol man i save tingim ol yet tasol na ol man i save bihainim laik bilong ol yet tasol, ol i hatwok long kisim ol gutpela pren, olsem ol pren tru. Tasol ol inap mekim, na bihain bai yumi stori long rot bilong mekim.

Pasin bilong laikim tru narapela man, dispela i as bilong pasin bilong i stap pren tru wantaim. Man i mekim pasin sori, dispela i pulim ol narapela man long laikim em na i go klostu long em. Tasol sampela man i hatwok long kisim ol gutpela pren. Yumi mas mekim wanem na bai yumi inap kisim ol gutpela pren, olsem ol pren tru?

Wanpela man (Dale Carnegie) i tok, “Yu mas putim gut yau. Yu mas kirapim ol narapela man long stori long ol yet.” Taim ol man i go long wanpela pati samting na ol i bungim ol man ol i no save long ol, husat ol i kisim kwik ol pren? I no ol man bilong toktok; nogat; em ol man i kirapim ol narapela man long stori na ol i putim gut yau long tok bilong ol. Taim yu bungim wanpela man bipo yu no save long em, sapos yu tingim gut nem bilong em na sampela samting bilong em, dispela bai helpim yu long kamap gutpela pren bilong em.

Tupela man i raitim wanpela Buk (Fundamentals of Interpersonal Communication, bilong Kim Giffin na Bobby R. Patton) na tupela i stori long rot bilong pren gut wantaim na tupela i tok, bilong pren gut wantaim narapela man, yu mas kamapim olgeta tingting bilong yu long em na givim bel tru long em. Tupela i tok, ‘Sapos yu laik kamap gutpela pren bilong wanpela man o meri, yu mas save long sampela pasin samting bilong em, em yu laikim tru. . . Yu no ken haitim tingting bilong yu long em . . . Yu no ken giamanim em o grisim em.’

Ol pren tru i no save giaman; narapela i tingim gut narapela. Narapela i no putim hevi long narapela o ting em i mas pren wantaim em wanpela tasol. Narapela i save gut long narapela, olsem na narapela inap pilim tingting bilong narapela na mekim pasin sori long em. Tupela i wok long pren gut wantaim na nau narapela i no pret long kamapim olgeta tingting bilong em long narapela. Tupela i kamap pren tru na tupela i poroman tru wantaim. Tasol sampela pren tru ol i no kamap poroman tru. Jisas em i man bilong mekim gutpela pasin pren long ol narapela manmeri na em i gat planti pren, tasol em i poroman tru wantaim wan wan tasol.​—⁠Mak 9:​1-10; Luk 8:⁠51.

Buk Bilong Pasin Bilong Pren Gut Wantaim

Baibel em i nambawan buk bilong stori long pasin bilong pren gut wantaim. Baibel i tok: “Ol gutpela pren i save laikim yumi long olgeta taim. Tasol ol brata i save sambai long helpim yumi long taim bilong hevi.” (Provep 17:17) Ol pren tru i save sori tru long yumi na ol i redi long helpim yumi long taim hevi i painim yumi. I gat gutpela stori bilong dispela samting i bin kamap long Isrel long bipo.

I gat bikpela hangre long Isrel, olsem na wanpela man bilong Juda i go sindaun long kantri Moap. Em i go wantaim meri bilong em, Neomi, na tupela pikinini man bilong em. Tasol dispela man i dai, na bihain tupela pikinini man bilong em i maritim tupela meri bilong Moap, em Rut na Opa. Orait, bihain dispela tupela man i dai, na tripela meri tasol i stap. Neomi i tingting long i go bek long Juda na tupela tambu bilong em i go wantaim em. Tasol long rot, Neomi i tokim dispela tupela yangpela meri ol i mas i go bek na i stap wantaim lain bilong ol na tupela i ken marit gen. Opa i go bek, tasol Rut i no laik lusim Neomi. Bilong wanem em i no laik lusim Neomi? Em i tambu pikinini bilong Neomi, tasol i no dispela samting tasol i kirapim em long bihainim Neomi i go. Nogat. Em i pren tru bilong Neomi. Em i sori long dispela lapun meri i stap wanpis, olsem na em i no laik lusim em.​—⁠Rut 1:​1-17.

Rut i sori tru long Neomi, na mekim gutpela pasin long em, na stap gut long em. Ol dispela pasin i gutpela as bilong kamap pren tru wantaim. Na i gat narapela samting tu na Rut i kamap pren tru bilong Neomi.

Wanpela Pasin Bilong Stap Pren Wantaim Em i Gutpela Moa

Taim Neomi i tokim Rut long i go bek, Rut i tok: “Yu no ken tokim mi long lusim yu . . . Olgeta ples yu go long en, mi tu bai mi go . . . . Lain bilong yu bai i kamap lain bilong mi tu. Na God bilong yu bai i kamap God bilong mi tu.” (Rut 1:16) Bipo Rut em i wanpela haidenmeri, tasol Neomi i bin helpim em long kisim save long God tru, Jehova, na Rut i laikim tumas Jehova. Tupela wantaim i bilip long Jehova na dispela i pasim tupela wantaim na mekim tupela i kamap pren tru. Na Jehova i blesim tupela​—⁠Rut i maritim Boas, wanpela maniman i gat graun long Juda, na Rut i karim wanpela pikinini man em i kamap olsem pikinini bilong Neomi. Nem bilong dispela pikinini em Obet, na bihain Obet i kamap tumbuna papa bilong King Devit.​—⁠Rut 4:​13-22; Matyu 1:​5, 6.

Sapos man i bilip long God, dispela inap helpim em long i stap gutpela pren moa. Olsem wanem i olsem? Orait, tingim Rut tupela Neomi. Tupela wantaim i lotuim God Jehova, em i “as bilong marimari na sori,” na em i “no save belhat kwik.” Em i save “laikim tru olgeta manmeri” na em i save truim olgeta tok promis bilong em. (Eksodas 34:⁠6) “God i save laikim yumi tru” na sapos yumi lotu long em long spirit na long pasin i tru, bai yumi laikim Em moa yet na bai yumi sori tru long ol narapela man. (1 Jon 4:8; Jon 4:24) Olsem na pasin bilong yumi i senis. Yumi save tingim ol narapela man na yumi laik helpim ol; yumi sori long ol man bilong olgeta lain na olgeta kain skin, em ol i gat pasin daun na ol i karim hevi. Ol man bipo ol i save tingim ol yet tasol, ol i senisim pasin bilong ol na nau ol i kirap tingim ol narapela manmeri. Ol man bipo ol i bihainim laik bilong ol yet tasol, nau ol i sori long ol narapela man na ol i laik helpim ol. Taim yumi bilip long God yumi save kirap long bihainim ol gutpela pasin em spirit bilong God i kamapim, olsem “pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim, na pasin bilong isi isi, na daunim laik bilong olpela bel.”​—⁠Galesia 5:​22, 23.

Ol dispela pasin i helpim yumi long bihainim pasin bilong lusim tingting long ol liklik pasin kranki na popaia bilong ol narapela man, i no “7-pela taim” tasol; nogat; “inap 70 taims 7-pela taim.” (Matyu 18:​21, 22) Planti man i no bihainim dispela pasin na dispela samting i bagarapim pasin bilong pren gut wantaim ol narapela man. Tasol Jisas i tok yumi mas lusim tingting long ol rong narapela man i mekim long yumi, na Jisas yet i save bihainim dispela pasin. Planti taim em i lusim rong bilong ol disaipel bilong em, em ol i gat sin na ol i save popaia. Pita i givim baksait tru long Krais Jisas, tasol Jisas i lusim tingting long dispela rong bilong em.​—⁠Matyu 26:​69-75.

Taim yumi wok long bihainim ol dispela pasin em spirit bilong God i kamapim, yumi kisim planti pren moa. Na nau yumi save, yumi insait long wanpela lain i stap long olgeta hap bilong graun em ol i stap pren tru wantaim! Na yumi lukim ol dispela pren bilong yumi i gat gutpela lo ol i save bihainim. Wanpela nupela man i kirap long lotuim Jehova nem bilong em Braian (Brian), em i tok, ol pren bilong em long bipo i kirapim em long dring, na em i no lukautim gut meri pikinini bilong em. Tasol nau em i givim bel tru long lukautim meri pikinini. Em i stori long ol nupela pren em i kisim insait long lain bilong Jehova, em ol i wanbilip bilong em, na em i tok: “Sapos mi gat hevi mi save mi ken telefon long wanpela; ol i amamas long helpim mi.”

Bipo Alan i gat sampela pren, em ol i save toktok long ol ka na ol meri tasol. Tasol taim Alan i kirap lotuim Jehova na em i kisim planti nupela pren, em ol i laikim tumas Jehova, nau Alan i les long ol kain tok ol pren bilong em long bipo ol i stori long en. Ol nupela pren bilong Alan i tingim tru Alan na mekim gutpela pasin sori long em na em i pilim tru.

Ol Gutpela Pren Tru Bilong Yumi

Ol dispela manmeri na planti milion moa long olgeta hap bilong graun ol i stap olsem wanpela bikpela famili i no insait liklik long ol wok politik; maski ol i bilong kain kain lain na skin, tasol ol i pas gut wantaim olsem ol brata brata tru, wankain olsem ol Kristen bilong pastaim. (3 Jon 14) Ol i lotu tru long God Jehova na dispela samting i pasim ol wantaim, wankain olsem Rut na Neomi long bipo. Olgeta i bihainim pasin daun na ol i pilim tru olsem Jehova na Krais Jisas i nambawan gutpela pren bilong ol.

Ating yu kirap nogut long dispela tok na yu ting: ‘Nogut yumi hambak​—⁠olsem wanem yumi ol man nating bilong graun inap kamap pren bilong God I Gat Olgeta Strong na pren bilong Pikinini bilong em?’ Baibel i tok: “Ebraham em i bilip long God, na . . . [God] i kolim Ebraham olsem: ‘Pren bilong mi.’ “God i marimari tru long Ebraham. Tasol Baibel i tok: “God i save sakim ol man bilong bikhet, tasol em i save marimari long ol man i daunim bel bilong ol yet.”​—⁠Jems 2:23; 4:⁠6.

Ating sampela man i pilim olsem ol i sinman na ol i no inap kamap pren bilong God. Tasol Jems i tok moa olsem: “Yupela i mas i go klostu tru long God, na bai em i kam klostu tru long yupela. Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela. Yupela i mas daunim yupela yet long ai bilong Bikpela. Sapos yupela i mekim olsem, orait bai Bikpela i litimapim yupela.”​—⁠Jems 4:​8, 10.

Jisas i tok: “Sapos yupela i mekim olsem mi tokim yupela, orait yupela i pren bilong mi.” Na em i tok tupela bikpela lo i winim olgeta narapela lo i olsem: ‘Yumi mas laikim tumas God Jehova long bel olgeta na long laip olgeta na long tingting olgeta bilong yumi, na yumi mas laikim ol narapela man olsem yumi laikim yumi yet.’ (Jon 15:14; Matyu 22:​37-40) Sapos yumi mekim olsem bai yumi gat planti gutpela pren, olsem ol pren tru bilong yumi. Na bai yumi inap kisim narapela blesing tu​—⁠taim olgeta samting nogut i pinis long graun na Kingdom bilong God i bosim, bai yumi inap kisim laip i stap oltaim long dispela graun. (Matyu 6:​9, 10) Olsem Jisas i tok: “Tok bilong [Jehova] em i save kamapim laip i stap gut oltaim oltaim.”​—⁠Jon 12:⁠50.

Yu bai orait long ol Witnes Bilong Jehova i helpim yu? Ol Witnes i save pren gut wantaim ol man na ol i laik i kam lukim yu na toktok wantaim yu long dispela bikpela tok, no gat pe. Ol inap helpim yu long kisim planti gutpela pren, olsem ol pren tru.

[Blok long pes 6]

Sampela Tok bilong Rot long Kisim Ol Pren Tru

Skelim gut ol man yu laik poroman wantaim ol.

Tingim gut ol narapela man na putim gut yau long tok bilong ol.

Mekim sampela samting wantaim​—⁠dispela pasin i strongim pasin bilong pren gut wantaim.

Kamapim tingting bilong yu; no ken haitim; no ken giaman.

Taim hevi i painim narapela man, sori long em na helpim em.

Taim wanpela pren bilong yu i popaia o bagarapim bel bilong yu, lusim tingting long rong bilong em​—⁠“inap 70 taims 7-pela taim.”​—⁠Matyu 18:⁠22.

Taim wanpela man i toknogutim pren bilong yu o sutim tok nating long em, sambai long em na tokaut olsem dispela i no stret.

Sapos ol pren bilong yu ol tu i lotuim Jehova, dispela bai strongim tru pasin pren i stap namel long yupela.

[Piksa long pes 7]

Rut i no laik lusim Neomi, long wanem tupela i wanbilip na long dispela as tupela i stap pren tru wantaim. Yu gat pren tru olsem?