Ating Long Nau Ol Man i Lusim Stretpela Pasin?

BIPO ol man i save bihainim stretpela pasin, tasol olsem wanem long nau? Ating sampela man i ting, yumi no ken bihainim stretpela pasin, long wanem, em i no ken helpim yumi. Nau yumi ken stori long sampela pasin i no stret em planti man i mekim, na wanem kain pasin i no stret ol i save mekim, na wanem kain hevi dispela i save kamapim.

Long Wes Jemani planti man i giaman na ol i no givim stret mani takis long gavman, olsem na gavman i lus inap 10 milion kina, long olgeta yia, na long Swiden ol wan wan man i sotim takis ol i mas tromoi inap K720 long olgeta yia. Long Amerika planti man i pasim hap mani takis ol i mas givim long gavman, olsem na long olgeta yia gavman i sot inap K100 bilion. Sapos ol man i bekim stret ol dispela mani em bai helpim gavman long stretim bikpela dinau bilong gavman. Na sampela man i kirapim bisnis na ol i no stretim wantaim gavman long wanem, ol i save ol i mas baim gavman, olsem na gavman i lus inap K10 bilion long olgeta yia. Na ol man long Amerika i save stilim planti samting long ol stua inap K4 bilion long olgeta yia, olsem na ol stua i mas apim pe bilong ol samting. Na taim ol man i toktok long telefon long man i stop longwe, ol i makim pe bilong dispela i go long narapela man na bai dispela narapela man i mas baim. Mani i lus long dispela pasin em inap olsem K1 milion long olgeta yia.

Long Kanada planti man i les na i no wok stret long ples wok na bikpela hap taim i lus nating. Ol bos o kampani bilong ol i lus inap K15 bilion long dispela pasin nogut bilong ol wokman bilong ol. Na planti man i save stilim mani na kago long ples wok bilong ol, na paulim mani bilong kampani, na giamanim insurens, na kisim bek mani i no stret long kisim bek, na kukim haus. Na long Amerika, taim ol man i stop long ples wok planti ol i no givim bel long mekim wok, na long olgeta yia ol bos bilong ol i lus inap K170 bilion long dispela pasin les bilong ol wokman bilong ol.

Sampela bikpela kampani i save paulim gavman. Gavman i save baim ol samting long ol dispela kampani na kampani i singaut long bikpela pe tumas long ol dispela samting. Olsem: 12 toea spana, em K9,606; na 67 toea transista, em K814; na 17 toea kap plastik bilong putim long lek bilong sia, em K1,118. Wanpela bikpela man bilong gavman bilong Amerika em i tok, gavman i lus inap planti bilion kina long dispela pasin giaman bilong ol kampani.

Na sampela bikman tu i no bihainim gutpela pasin. Ol i save giaman, na ol narapela man i harim, na nau ol i no strong moa long bihainim stretpela pasin. Sampela bikman i save tok giaman, na paulim tok, na haitim sampela tok, na ol i abrusim wok bilong ol long stretim ol samting−na sampela i kilim i dai narapela bikman i resis long kisim wok bilong ol na ol i putim asua i go long narapela man.

Olsem wanem? Stretpela pasin i pinis? Yumi bihainim stretpela pasin long wanem Baibel i tok, na em tasol na yumi bihainim? Tok i kam bihain bai helpim yu na yu ken save long bekim bilong ol dispela askim.