Olsem Wanem Baptais Inap Kisim Bek Yumi
“Baptais, em i save kisim bek yupela.”−1 PITA 3:21.
1, 2. Man i mas mekim wanem pastaim na bai em i ken kisim baptais?
JEHOVA i kolim stret ol samting ol man i mas mekim bambai em i ken kisim bek ol. Ol i mas kisim stretpela save, na bilip, na hevi long ol rong ol i bin mekim na tanim bel, na ol i mas baut, na dediket long God, na kisim baptais. (Jon 3:16; 17:3; Aposel 3:19; 18:8) Ol man i laik kisim baptais ol i mas tokaut long ai bilong ol man olsem: Long rot bilong ofa bilong Krais ol i hevi long ol rong ol i bin mekim, na ol i tanim bel, na ol i dediket long Jehova. Na ol i mas save, taim ol i dediket na baptais pinis dispela samting i makim ol i Witnes Bilong Jehova.
2 Man i mas mekim olgeta samting bilong baptais, na mekim dispela tokaut tu, olsem autim bilip bilong em, na bai God i ken kisim bek em. (Rom 10:10) Aposel Pita tu i mekim sampela tok i kamapim dispela samting long ples klia. Em i tok: “Baptais, em i save kisim bek yupela.” (1 Pita 3:21) Tasol wanem insait tru bilong dispela tok? Ol narapela tok i stap klostu i makim wanem samting?
Olsem Wanem Baptais i Kisim Bek Yumi
3. Long toktok bilong yu yet kamapim ol tok bilong 1 Pita 3:18-21.
3 Pita i stori long Jisas i kirap bek olsem wanpela spirit na em i autim tok long ol spirit nogut i stap kalabus na em i kolim strafe bai painim ol. Ol dispela spirit nogut i stap kalabus oltaim bilong wetim kot long bikpela de bilong Jehova. Ol i bin sakim tok bilong God na tanim i kamap man na maritim ol meri long taim bilong Noa. Long dispela taim God i wet na “Noa i wokim sip . . . , na liklik lain tasol ol i stap gut long sip, inap long 8-pela manmeri [em Noa, na meri bilong Noa, na 3-pela pikinini man bilong Noa wantaim meri bilong tripela], na ol i no lus long wara.” Na Pita i tok moa, olsem: “Dispela wara em i olsem piksa bilong baptais, em i save kisim bek yupela. Em i no bilong rausim doti bilong skin. Nogat. Em i bilong mekim bel bilong yupela i kamap klin, na yupela inap long singautim God. Bilong mekim olsem, Jisas Krais i kirap bek pinis.”−1 Pita 3:18-21; Jenesis 6:1, 2; 2 Pita 2:4; 2 Korin 7:1.
4. Wanem insait bilong dispela tok bilong Pita, olsem: “Dispela wara em i olsem piksa bilong baptais”?
4 Wanem insait bilong dispela tok bilong Pita olsem “dispela wara em i olsem piksa bilong baptais”? Pita i laik tok olsem: Taim ol man i bagarap long Tait Wara, Noa wantaim lain bilong em i no bagarap, na dispela i olsem piksa bilong baptais em bilip i as bilong en. Noa i bilip na em i wokim sip, na olsem tasol olgeta man i kisim baptais na kamap disaipel bilong Krais na witnes bilong Jehova ol i mas i gat bilip, na bai ol inap sanap strong na sakim ol samting ol manmeri bilong dispela graun na god bilong ol, Seten, i mekim bilong pundaunim ol.−Hibru 11:6, 7; 1 Jon 5:19.
5. Olsem wanem God i kisim bek yumi long rot bilong kirap bek bilong Krais Jisas?
5 Baptais yet i no kisim bek ol man. Na tru yumi mas “rausim doti bilong skin,” tasol dispela samting tasol i no kisim bek yumi. God i kisim bek yumi long rot bilong “Jisas Krais i kirap bek pinis.” Ol man i laik kisim baptais ol i mas bilip olsem i gat wanpela rot tasol bilong God i ken kisim bek ol na ol i ken kisim laip, em olsem: Pikinini Bilong God i dai na givim laip bilong em olsem ofa na em i kirap bek. Na ol i mas bilip olsem Jisas em i Bikpela bilong ol na em i kisim namba bilong skelim ol man long kot, em ol man i stap laip na ol man i dai pinis tu. Pita i tok, Jisas “i go pinis long heven, na i stap long han sut bilong God. Olgeta ensel i gat nem na kain kain strong, ol i stap aninit long em.”−1 Pita 3:22.
6. Man i laik kisim baptais em i mas mekim wanem na bihain em i ken kisim baptais?
6 Na Pita i tok, taim yumi kisim baptais i olsem yumi “singautim God” bambai “bel bilong [yumi] i kamap klin.” Man i laik kisim baptais em i mas hevi long ol rong em i bin mekim na tanim bel bambai ‘bel bilong em i ken kamap klin,’ na em i mas baut na lusim rot nogut, na em i mas mekim beten na tok promis long givim skin bilong em olgeta long God Jehova, olsem dediket long em, long rot bilong Krais Jisas. Taim man i baptais pinis, sapos em i bihainim ol lo bilong God, orait bel bilong em bai stap klinpela na em bai stap gutpela long ai bilong Jehova, olsem na kot bilong Jehova i no ken painim em.
Inapim Mak Bilong Kisim Baptais
7. Olsem wanem long baptais na ol misineri bilong ol lotu ol i kolim Kristen?
7 Taim Jisas i tokim lain bilong em ol i mas i go kamapim ol disaipel na givim baptais long ol, em i no tok ol i mas tromoi liklik wara long ol planti tausen tausen manmeri i no bilip. Nogat. Tasol ol misineri bilong ol lotu ol i kolim Kristen, ol i bin mekim wanem? Long yia 1545 wanpela pris Katolik (em Francis Xavier bilong Sosaiti Bilong Jisas) em i stori long wok em i mekim long hap bilong India na em i tok: “Long hap bilong Travankor . . . insait long sampela mun mi bin givim baptais long planti man na meri na pikinini, winim ten tausen. . . .Mi go long ol liklik ples na mekim ol i kamap Kristen.” Tasol em i no pasin bilong Jisas long ‘mekim ol man i kamap Kristen.’ I gat sampela samting ol manmeri i mas mekim pastaim na bai ol inap long kisim baptais.
8. Ol rait, em sampela man i tok Pol i bin raitim, ol dispela rait i tok wanem long ol man i laik kisim baptais?
8 Sampela manmeri ol i bin i stap bihain liklik long taim bilong ol aposel na ol i tok ol i Kristen, ol tu i tok i gat sampela lo ol manmeri i mas bihainim na bai ol inap long kisim baptais. I gat sampela rait i no bilong Baibel, tasol ol man i kranki na tok Pol i bin raitim, na ol dispela rait i stori long ol manmeri i laik kisim baptais, olsem: ‘Yumi mas skelim pasin na wokabaut bilong ol Sapos ol i no marit, ol i mas save ol i no ken mekim pasin pamuk, ol i mas marit stret. . . . Sapos wanpela pamukmeri i kam bilong kisim baptais, em i mas lusim pasin pamuk bilong em; sapos em i no laik lusim, yumi mas sakim em. Sapos wanpela man bilong wokim ol god giaman em i kam, orait em i mas lusim dispela wok pastaim o yumi mas sakim em. . . . Man i bin mekim ol rong em yumi no ken kolim, . . . o trikman, o marilaman, o man bilong lukluk long ol sta na painim save, o glasman, o man bilong kolim ol tok bilong wokim posin, . . . o man bilong wokim ol samting bilong sakim masalai, o man bilong wokim marila, o man em i tok em inap kolim samting bai kamap long bihain, o man bilong kolim ol samting bai painim man long bihain, o man bilong lukim ol mak long han bilong man na kolim ol samting dispela man i bin mekim long bipo o em bai mekim long bihain . . . , ol dispela kain man yumi mas skelim ol gut pastaim inap longtaim liklik . . . na sapos ol i lusim ol dispela pasin ol i mekim, orait yumi ken givim baptais long ol; tasol sapos ol i no laik lusim, orait yumi mas sakim ol.’
9. Bilong wanem ol elda bilong kongrigesen i save toktok wantaim man i laik kisim baptais?
9 Ol Witnes Bilong Jehova i no save bihainim ol tok i no bilong Baibel, olsem dispela tok nau yumi kolim, tasol ol elda i save toktok pastaim wantaim ol manmeri i laik kisim baptais. Bilong wanem ol i mekim? Long wanem ol i laik save gut long ol dispela manmeri−tru ol i bilip, na ol i bihainim ol lo God i kolim bilong man i laik baptais, na ol i dediket long God Jehova, o nogat. (Aposel 4:4; 18:8; 2 Tesalonaika 3:2) Ol elda i save toktok wantaim ol long ol askim i stap long buk Lo Bilong Yumi Bilong Mekim Wok Autim Tok. Dispela i helpim ol elda long save man em inapim mak bilong kisim baptais o nogat. Sapos em i no save gut long sampela tok, o em i bihainim yet sampela pasin i no stret long lo bilong God na em i no bin stretim, orait ol elda i laik helpim em long ol samting bilong spirit.
10. Yumi mas pilim tru wanem samting na bai yumi kisim baptais?
10 Sapos yumi pilim tru gutpela pasin God i bin mekim long yumi, olsem em i bin helpim yumi bambai yumi inap save long laik bilong em, orait bai yumi bihainim pasin bilong ol man em Pol i bin autim tok long ol long Antiok, long Esia Maina. Ol Juda i birua long ol, tasol taim ol dispela manmeri “bilong ol arapela lain” i harim tok olsem i gat rot bilong God i ken orait long ol, “ol i amamas long tok bilong Bikpela. Na olgeta manmeri [ol inap] kisim laip i stap gut oltaim oltaim, dispela ol manmeri i bilip.” (Aposel 13:48) Na ol dispela bilipman i kisim baptais.
Baptais Taim Yu Yangpela Yet
11. I stret yangpela i ken dediket long God o nogat? I gat wanem as na yu bekim tok olsem?
11 Ol manmeri ‘ol inap kisim laip i stap gut oltaim oltaim,’ sampela ol i yangpela. Tru, taim mama bilong Samuel na mama bilong Jon Bilong Baptais i no karim yet tupela, ol i bin givim tupela pikinini long God, tasol ol papamama i no inap mekim dediket bilong pikinini bilong ol. (1 Samuel 1:11, 24-28; 2:11, 18, 19; Luk 1:15, 66) Tasol taim papamama i lainim gut pikinini long ol tok bilong Baibel, dispela i bin helpim planti yangpela long kamap strong long spirit na kisim baptais. Wanpela sista i mekim wok misineri em i bin kisim baptais taim em i yangpela yet na em i tok: “Nau mi pilim olsem taim mi bikpela liklik na mi inap save God em i stap, long dispela taim mi bin dediket long em. Bihain mi kisim stretpela save long em na long laik bilong em, na mi laik kisim baptais bambai ol narapela man i ken save mi givim bel pinis long God, olsem dediket long em. Tasol mama i tingting planti, nogut mi no pilim tru dispela samting mi laik mekim, olsem na em i tok, gutpela sapos mi wet pastaim na taim narapela man o meri i laik kisim baptais, orait mi tu mi ken baptais.” Bihain i gat wanpela meri i laik kisim baptais, na dispela sista i stori moa olsem: “Bipo ol i no save skulim ol man i laik kisim baptais, tasol dispela brata em Sosaiti i bin makim bilong lukautim wok autim tok long kongrigesen . . . em i bin toktok gut wantaim mi bambai mi ken save, dispela samting mi laik mekim em i bikpela samting tru na mi mas tingting gut pastaim. Mi amamas long bihainim olgeta tok em i givim long mi, na long wanpela Sande long mun Me long yia 1921 mi wantaim [dispela meri] i kisim baptais.”
12. Brata Russell i ting olsem wanem long manki i dediket?
12 Long yia 1914, C. T. Russell (long dispela taim bipo em i presiden bilong Sosaiti Was Taua) em i kisim wanpela pas. Brata i raitim dispela pas em i laik save, i gutpela em i kirapim pikinini man bilong em long dediket long God o nogat, em pikinini i gat 12-pela krismas. Brata Russell i bekim pas na em i tok: ‘Mi ting yu no ken subim em bai em i dediket long God, tasol gutpela sapos yu helpim em long save, olgeta man i gat tingting na ol i bin kisim save long God na long ol gutpela samting em i laik mekim, i stret ol i mas kisim baptais. I no gat narapela rot. . . . Man i no dediket em i no inap kisim laip i stap oltaim . . . Sapos pikinini man bilong yu i dediket, dispela i no ken nogutim em−em inap helpim em tru. . . . Pikinini i gat 10-pela krismas, ating em inap pilim tru pasin bilong dediket olgeta long God long tingting na tok na pasin bilong em o nogat, em husat i save? Tasol mi yet mi bin dediket long God taim mi gat 12-pela krismas samting.’
13. Inap olsem 94 yia bipo Wastaua i bin givim wanem tok long ol yangpela?
13 Wastaua (tok Inglis) bilong Julai 1, 1894 i tok: ‘WAS TAUA i salim gude long yupela olgeta gutpela pikinini na yangpela manmeri, em yupela i givim bel long God, na long olgeta taim yupela i wok long bihainim Jisas. Mipela i save long sampela pikinini ol i liklik yet, tasol ol i laikim tumas Jisas, na ol i no sem long litimapim nem bilong em long ai bilong ol narapela pikinini, em ol i no laikim Jisas na ol i no wok long mekim pasin em i laikim; ol dispela pikinini i stap gut long God na taim ol i autim gutpela tok bilong kingdom long ol wanskul, maski ol wanskul i lap nogut long ol na tingim ol i narapela kain, tasol ol i no pret. Na mipela amamas tu long ol yangpela manmeri, em ol i bin sakim pasin bilong dispela graun na ol i no laik kisim biknem na amamas bilong graun, na ol dispela yangpela i stap gut tru namel long ol narapela manmeri i bin dediket long Bikpela. Sampela helpim bilong mipela long ofis, na planti gutpela painia, ol i yangpela yet.’ Maski yu yangpela yet, gutpela sapos yu tingting long dediket long God Jehova na yu toktok wantaim papamama long dispela samting, a?
Wok Bilong Papamama
14. Ol yangpela i dediket long Jehova, dispela i helpim ol olsem wanem?
14 Sapos papamama i skulim gut ol pikinini na stiaim ol i go na ol i kisim baptais, dispela inap helpim tru ol pikinini. (Efesas 6:4) Ol i tingim ol samting bilong God na dispela samting inap helpim ol bambai pasin bilong graun i no ken pundaunim ol. (1 Jon 2:15-17) Ol inap abrusim ol hevi i save painim ol man i “wok long pasin bilong olpela bel.” (Galesia 6:7, 8) Papamama i bin lainim ol dispela pikinini long bihainim pasin bilong God, olsem na ol i save bihainim ol gutpela pasin em spirit bilong kamapim long ol man. (Galesia 5:22, 23) Ol i dediket long God, olsem na ol i pas gut wantaim em, olsem pren bilong em. Na ol i lain pinis long “bilip strong long [Jehova],” olsem na gutpela save na tingting bilong God i stiaim tingting bilong ol na bosim wokabaut bilong ol. Dispela samting i mekim na ol i stap belgut oltaim na sindaun bilong ol i kamap gutpela.−Provep 3:5, 6, 13, 17.
15. Ol papamama Kristen i ken mekim wanem bilong stiaim gut ol pikinini?
15 Sapos yangpela man o meri i dediket long Jehova, dispela inap helpim tru em, olsem na ol papamama Kristen i mas wok strong long stiaim gut ol pikinini. Ol yangpela long nau ol i ken lain long ol tok bilong Baibel taim ol i liklik yet, olsem Timoti i bin mekim, na bai ol i ‘holim strong dispela tok ol i bin kisim na bilipim pinis.’ (2 Timoti 3:14, 15) Ol papamama Kristen yet i mas bihainim gutpela pasin na i stap pren bilong God, na bai ol inap givim gutpela save na tingting long ol pikinini bilong ol. Sapos ol i skulim gut ol pikinini bai wok bilong ol i no lus nating.−Provep 22:6.
16. Ol tok na pasin bilong yu i mas helpim ol pikinini bilong yu bambai ol i ken save long wanem samting?
16 Pasin bilong yu na ol tok yu lainim ol pikinini long en, dispela i mas helpim ol pikinini bilong yu bambai ol i ken save gut olsem oganaisesen bilong Jehova i narapela na oganaisesen bilong Seten i narapela. Ol i mas save, ol i no ken insait liklik long ol samting bilong dispela graun, na ol i mas givim baksait long ol pasin hait i gat sem, na ol i mas klia long ol amamas bilong dispela graun i no bihainim pasin bilong God, na ol i no ken tingting long kisim biknem long dispela graun, o poroman wantaim ol manmeri bilong dispela graun. (1 Korin 15:33; 2 Korin 4:2) Tingting bilong yu long ol amamas bilong dispela graun na long ol manmeri bilong dispela graun, na ol tok na pasin bilong yu i mas helpim ol pikinini long save, ol dispela amamas i no amamas tru, na ol dispela manmeri i giamanim bel bilong ol yet na ol i no gat gutpela save na tingting olsem bilong ol Witnes Bilong Jehova. Yu mas stori gut wantaim ol long olsem wanem Jehova i bin stiaim yu long rot bilong spirit holi, na em i bin helpim yu bai yu no bihainim rot nogut na kisim hevi, na em i bin strongim bel bilong yu long taim nogut na long taim yu bel hevi. Sapos yu larim ol pikinini bilong yu i bihainim pasin bilong dispela graun, em pasin bikhet na pasin bilong laikim biknem na laikim tumas amamas na pasin longlong, yu no ken ting bai ol pikinini bilong yu i kamap bilipman. Nogat. Taim pasin bilong dispela graun i no kalabusim yet ol pikinini bilong yu, was gut long ol bambai ol tingting nogut na pasin nogut bilong dispela graun i no ken paulim ol. Helpim ol bai ol i givim bel olgeta long Jehova na laikim tumas em na wetim em.
Taim Yu Baptais Pinis
17. (a) Olsem wanem na sampela Kristen i baptais pinis, bihain ol i slek long spirit? (b) Yumi mas ting olsem wanem long dediket bilong yumi?
17 Man i laik kisim baptais, maski em i yangpela o em i lapun, tasol em i laik i stap gut long Jehova taim em i baptais pinis. Olsem na bilong wanem sampela Kristen i slek long spirit taim ol i baptais pinis? I gat kain kain samting inap mekim, tasol i gat wanpela bikpela samting i as bilong dispela hevi, em olsem: Ol i no bin save gut long as bilong dispela pasin bilong dediket. Taim yumi dediket, yumi no dediket long wanpela wok. Sapos olsem bai yumi wok strong long mekim dispela wok, tasol bai yumi no kamap wanpela man bilong God. Yumi no dediket long wanpela wok; yumi dediket long wanpela Man−em God Jehova. Yumi mas tingim gut dispela samting. Taim yumi dediket, nogut yumi mekim nating tasol, long wanem yumi ting em wanpela samting yumi mas mekim bambai yumi ken kirap mekim wok. Yumi mas tingim dediket i bikpela samting, long wanem taim yumi dediket long God nau yumi kamap pren bilong em, na oltaim yumi mas wok strong bambai yumi ken pas gut wantaim em na stap gutpela long ai bilong em, na bai yumi no bagarapim dispela gutpela pasin pren. Krais Jisas i stap gutpela piksa bilong yumi long dispela samting. Wanpela tok profet i kamapim tingting bilong Jisas taim em i givim em yet long Jehova, em i tok: “Mi kam pinis, . . . God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”−Sam 40:6-8; Hibru 10:5-10.
18. Olsem wanem lo bilong God i stap long “bel” bilong Jisas?
18 Olsem wanem lo bilong Jehova i stap insait long “bel” bilong Jisas? Jisas i bin tokim wanpela saveman bilong lo, God bilong yumi, em Jehova, em wanpela tasol em i Bikpela na i no gat narapela. Jisas i kamapim long ples klia olsem Jehova em i Nambawan Bikpela. Na bihain Jisas i kamapim as bilong lo bilong God, em olsem: Yumi mas givim bel olgeta na tingting olgeta na strong olgeta long Jehova, na yumi mas laikim narapela man olsem yumi save laikim yumi yet. (Mak 12:28-34) Olsem na Jisas inap tok olsem: ‘Mi laik tumas long bihainim laik bilong God.’ Maski bikpela hevi na traim na pen i painim em, tasol em inap i stap gut long God, long wanem em i no tingting tasol olsem dispela em i gutpela wok em i mas mekim; nogat; em i tingim gut God Jehova em i Papa bilong em na em i laikim tumas Em. Sapos yumi tu yumi daun long Jehova, long wanem em i Nambawan Bikpela, na yumi laikim em tumas na pas gut wantaim em, orait bai yumi inap truim ol tok promis yumi mekim taim yumi dediket na kisim baptais.
19. Sapos yumi pas tru wantaim Jehova, orait bai yumi mekim wanem?
19 Tasol sapos yumi pas tru wantaim Jehova, bai yumi mekim wok bilong em. Taim yumi mekim wok bilong autim tok bilong Kingdom, yumi kamapim bel bilong yumi, olsem yumi givim bel tru long Jehova. Brata Grant Suiter, bipo em i bilong Lain Bilong Bosim Ol Witnes, tasol nau em i dai pinis, em i bin tok: “Bipo mi harim [wanpela wasman sekit] i stori long wok bilong Jehova, em wanpela gutpela wok yumi mas mekim, nau mi pilim tru olsem mi mas mekim dispela wok, na mi laik tru long mekim. Olsem na mi dediket long Jehova, na long dispela taim sampela moa long famili bilong mi ol tu i dediket. Long Oktoba 10, long yia 1926, long San Hose, long Kalifonia, mipela olgeta i kisim baptais long wara bilong makim olsem mipela i dediket pinis. . . . Mipela baptais pinis na nau papa bilong mi i tokim elda i lukautim baptais, olsem: ‘Yupela i save raun tilim ol buk na nius long ol man, a? Orait, nau mipela tu i laik mekim dispela wok.’ Olsem na mipela famili i kirap long autim tok.” Long nau, sapos man inapim ol mak bilong mekim wok autim tok, em i save kirap mekim dispela wok taim em i no kisim baptais yet.
Baptais Inap Kisim Bek Yumi
20, 21. (a) Yumi ol wokboi bilong Jehova, olsem wanem yumi kisim “mak”? (b) Wanem dispela “mak”? Sapos yumi kisim dispela “mak,” orait olsem wanem long yumi long bihain?
20 Ol wok yumi mekim inap kamapim long ples klia olsem “yumi bilong [Jehova] tasol.” Tru tumas, yumi mas dediket long Em na kamap wokboi bilong em na stap gut long wok bilong em bambai em i ken kisim bek yumi! (Rom 6:20-23; 14:7, 8) Bipo ol i save putim mak long pes bilong ol wokboi. Nau liklik hap lain bilong Jisas, em lain remnan, ol i mekim wok olsem ‘man i pasim klos linen’ na ol i ‘putim mak’ long ol manmeri ol bai abrusim bagarap long pinis bilong dispela taim nau. Ol poroman bilong lain remnan, em ol “arapela sipsip,” ol i helpim ol long mekim dispela wok. (Esikiel 9:1-7; Jon 10:16) Wanem dispela “mak” yumi kisim? Em olgeta samting i kamapim long ples klia olsem yumi dediket long Jehova na yumi disaipel bilong Krais i baptais pinis na yumi kisim pasin olsem bilong Krais.
21 “Taim bilong pinis” i laik pinis nau, olsem na i bikpela samting tru yumi mas kisim dispela “mak” na holimpas. (Danyel 12:4, NW ) Yumi mas ‘stap strong i go inap long pinis,’ olsem inap long yumi dai o las de i kamap, na bai God i ken kisim bek yumi. (Matyu 24:13) Yumi mas i stap gut long wok bilong Jehova olsem witnes bilong em, na long dispela rot tasol bai baptais inap long kisim bek yumi.
Sampela Askim Bilong Kamapim Gen Ol Bikpela Tok
◻ Yumi mas mekim wanem na bai God i kisim bek yumi?
◻ Bilong wanem ol elda i save toktok wantaim ol man i laik kisim baptais?
◻ Ol papamama i ken mekim wanem na bai ol i stiaim gut pikinini long ol samting bilong spirit na em i kisim baptais?
◻ Yumi save dediket long wanpela wok o olsem wanem?
◻ Olsem wanem baptais inap kisim bek yumi?
[Piksa long pes 18]
Noa wantaim lain bilong em i stap insait long sip na ol i no bagarap na olsem wanem dispela i piksa bilong baptais?
[Piksa long pes 20]
Olsem wanem dediket na baptais inap helpim ol yangpela?