Samting i Stap Hait−Husat Dispela Pamukmeri, em Bikpela Babilon?

OL I BIN kilim i dai wanpela pamukmeri em i bin mekim nogut long planti milion milion manmeri. I dai bilong em i narapela kain, long wanem, wanpela animal i mekim. Dispela animal o wel abus i rausim ol klos bilong em na kaikai mit bilong em, na paia i kukim em olgeta. Tasol husat dispela meri bipo em i bin holim bikpela namba? Olsem wanem na wanpela animal olsem wel abus i bagarapim em? Dispela meri i bin mekim wanem na i stret em i kisim bagarap olsem?a−Revelesen 17:​16, 17.

Dispela i no wanpela stori nating. Em i wanpela samting tru i laik kamap. Yu yet yu mas save long en, long wanem, nogut dispela meri i mekim sampela samting long yu. Sapos yu pas long em bai yu bagarap, tasol sapos yu klia long em yu inap i stap laip. Orait, husat dispela meri?

Ol Pren Bilong Meri

Aposel Jon i stori long dispela meri pamuk, na stori bilong em i stap long Baibel long hap bilong Revelesen. Em i tok: “[Ensel] i karim mi i go long graun i no gat man. Long dispela hap mi lukim wanpela meri em i sindaun antap long retpela wel abus. Dispela wel abus em i gat planti nem i pulap long skin bilong en. Na olgeta dispela nem em i kain kain tok bilas long God. Na wel abus i gat 7-pela het na 10-pela kom. Dispela meri em i putim tupela kain retpela klos, na i gat kain kain bilas gol, na bilas ol i bin wokim long naispela ston wantaim bis i dia tumas. Em i holim kap gol long han bilong en. Na kain kain pasin i sting tru long ai bilong God, na kain kain doti bilong pasin pamuk bilong dispela meri, em olgeta i pulap long dispela kap. Na rait bilong nem bilong en i stap long pes bilong en. Dispela nem i olsem tok hait, na nem yet em i olsem: ‘Bikpela taun Babilon, em mama tru bilong olgeta pamukmeri, na bilong olgeta pasin nogut tru long graun.’ ”−Revelesen 17:​3-5.

Yumi save dispela “Bikpela taun Babilon” em i strongpela meri, long wanem, em i “sindaun antap long bikpela wara.” (Revelesen 17:⁠1) Ensel bilong God i kamapim insait bilong dispela tok bilong Jon na em i tok: “Yu lukim pinis dispela bikpela wara pamukmeri i sindaun antap long en. Em olgeta lain manmeri, na ol bikpela bikpela lain ol i bung i stap, na ol manmeri i gat olgeta kain skin, na olgeta tok ples.” (Revelesen 17:15) Olsem na dispela meri pamuk i save pulim ol man bilong olgeta hap bilong graun. Na em i no wanpela pamukmeri nating−“em mama tru bilong olgeta pamukmeri,” winim tru ol narapela pamukmeri. Em i save bosim ol wok bilong pamuk. Na em i gat sampela bikpela pren tu, em ol man i gat namba.

Ensel i kamapim long ples klia ol dispela pren bilong meri pamuk, em i save laikim ol. Ensel i kamapim olsem wanem? Em i tok: “Ol king bilong graun ol i bin mekim planti pasin pamuk wantaim dispela meri. Na olgeta man bilong graun ol tu i bin mekim pasin pamuk wantaim em, na ol i kamap longlong, olsem man i spak.” (Revelesen 17:⁠2) Dispela grismeri i mas save gut long ol dispela bikman bilong politik, em “ol king bilong graun,” bambai em inap pulim ol! Orait, yumi laik save, husat dispela meri?

Ensel i tok, meri i gat wanpela nem hait, em “Bikpela taun Babilon.” I gat tupela rot na bai yumi ken save dispela meri em i husat. Wanpela rot, em ol dispela pren bilong em. Na narapela rot, em dispela nem bilong em. Dispela tupela rot bai givim wanem save long yumi?

[Futnot]