‘Tasol Mi No Givim Bel Long Jehova!’
BOP em manki tasol long taim mama bilong em i kamap wanpela Witnes Bilong Jehova. Inap sampela yia em i go wantaim mama long Haus Kingdom, na long autim tok tu, tasol em i no baptais. Tasol taim em i bikpela em i no bung moa wantaim ol Witnes. Em i kirap mekim nabaut na em i no stap gut. Em i tok em i bilip yet long ol tok bilong Baibel em i bin lainim, tasol dispela i no kirapim em long kam bek gen long oganaisesen bilong Jehova. Olsem wanem na em i no laik mekim olsem?
Na yumi ken tingim Devit tu. Em i bin mekim wok autim tok olsem painia inap sampela yia. Em i no bin klia long sampela tok bilong Baibel, tasol em i ting, bihain dispela save bai kamap ples klia na em i ken save gut long en, olsem na em i wetim Jehova long kamapim save long ol dispela samting. Tasol bihain em i tok em i no amamas long ting olsem, na em i kirap lusim dispela wok bilong em long autim tok, na em i lusim tok i tru. Wanem samting i mekim na em i senisim tingting bilong em?
Sapos wanpela bilong lain bilong yumi i lusim tok i tru yumi bel hevi tru long dispela, na yumi gat bikpela laik long traim helpim em. (2 Korin 12:15; Galesia 5:7) Wanem samting i kirapim man na em i lusim tok i tru? Yumi ken mekim wanem bilong helpim em long kam bek long tok i tru? Sapos yumi yet i gat hap tingting long lusim tok i tru, yumi ken mekim wanem bilong pinisim dispela tingting?
Bel, na Maus Bilong Bel, na Bilip
Ol man i bin lusim tok i tru, i no olsem ol i no bilip moa long tok i tru na ol i lusim, nogat; planti ol i bilip yet. Ol i tok “Mi save, dispela em tok i tru, tasol . . . ” o, “Mi save, dispela lotu tasol i gat tok tru.” Long bel bilong planti, ol i bilip yet olsem ol tok bilong Baibel ol i lainim pinis em i tok tru, tasol ol i no strong moa na ol i no givim bel moa long mekim wok autim tok. Jems i tok: “Sapos man i bilip nating na bilip bilong en i no kamapim gutpela pasin tu, orait bilip bilong dispela man em i olsem i dai pinis.”—Jems 2:26.
Bilip tru i no olsem man i gat save na em i ting wanpela samting i tru. I no wanpela tingting tasol. Bilip em samting bilong bel, long wanem, Baibel i tok: “Long bel yumi save bilip na God i kolim yumi stretpela manmeri.” (Rom 10:10) Olsem Baibel i tok, sapos man i wok long lus, bel bilong em i no stret. Pol i tok: “Ol brata, yupela i mas was gut. Nogut wanpela brata namel long yupela em i gat tingting nogut long bel bilong en na em i lusim bilip na i givim baksait long God i gat laip.”—Hibru 3:12.
Yumi ken tingim wanpela meri, em Dian, na yumi save, em samting bilong bel na man i pundaun. Dian i lusim tok i tru, na taim ol wanlotu Kristen i laik helpim em em i tok: “Mi no inap kam bek long Jehova. Nau mi no givim bel long em!” Dian i save, em i mas laikim tru God Jehova na em i mas givim bel long em na dispela tingting tasol em inap helpim em long stap klostu long Jehova. Dispela wankain tingting yet i bin kirapim em bipo na em i dediket long Jehova. Tasol nau em i no gat dispela tingting, na em i ting sapos em i kam bek, i olsem em i kam bek nating tasol. Olsem wanem na man i lusim dispela pasin long laikim tumas Jehova?
Pol i toktok long man “i gat tingting nogut long bel bilong en na em i lusim bilip.” Dispela samting i ken painim man sapos em i laikim samting Jehova i tambuim o em i sakim samting Jehova i laik bai em i mekim. Bel bilong man inap senis na nau em i givim hap bel tasol long Jehova, na em i pilim olsem pasin bilong em i no stret moa long ai bilong Jehova, olsem na em “i givim baksait” long Jehova. (Lukim Jenesis 3:8-10.) Gutpela sapos em i tanim bel, tasol dispela “tingting nogut long bel bilong en” i kirapim em long lusim Jehova na laik bilong Jehova. Nau em i no gat bilip moa na em i lusim tok i tru.
Na sampela taim maus bilong bel i gat tok long samting em i mekim, tasol em i no laik stretim rong bilong em, olsem na em i kirap long sutim tok long ol brata o givim baksait long tok i tru o mekim pasin birua long ol brata. Sapos em inap giamanim bel bilong em na i tok, bilip bilong em i no stret, nau em i no gat wok moa long bihainim ol lo bilong tok i tru. Kain man olsem “i no laik larim God i stretim pasin bilong ol na bihain bilip bilong ol i bagarap olgeta olsem sip i bruk long rip.”—1 Timoti 1:19.
Na ating i gat sampela as moa na man i lusim tok i tru, tasol em i samting bilong bel na em i mekim olsem. Olsem na i stret Baibel i tokim yumi: “Gutpela tingting bilong stiaim laip bilong yu, em i save kamap long tingting bilong yu, olsem wara i save kamap long hul wara. Olsem na olgeta taim yu mas was gut tru long tingting bilong yu.”—Provep 4:23.
Man Inap Kam Bek
Sapos tingting nogut i bin pulim yumi na yumi lusim bilip, i hatwok long yumi tokaut olsem. Tasol dispela i namba wan samting yumi mas mekim na bai yumi inap kam bek long Jehova. Yumi ken tingim Stiv, em wanpela painia long Englan, na yumi ken save long dispela.
Stiv i no lusim tok i tru olgeta, tasol em i kamap slek na bel i no kirapim em long mekim wok. Taim em i autim tok long ol narapela man em i pilim olsem em i tok nating tasol na i olsem em i no bilip tumas long en, na taim em i stap wantaim ol brata sista bilong spirit em i no amamas na em i pilim olsem em i no wankain olsem ol.
Tasol gutpela tru, bihain Stiv i pilim olsem em yet i asua. Em i tok: “Mi no lusim ol brata na bai mi ken go long wanpela hap na kisim sampela gutpela tingting bilong mi yet, nogat.” (Lukim Rom 7:18.) Stiv i save em i mas skelim bel bilong em na rausim ol laik na tingting i save pulim em long lusim tok i tru. Em i kirap mekim ol samting inap helpim em long laikim gen God na long strongim bilip bilong em long ol tok bilong Baibel. Nau Stiv i stap amamas long mekim wok misineri.
Ol Narapela i Ken Helpim Yu
Sampela i kisim stretpela tingting olsem Stiv, tasol sampela, nogat; ol i lusim tok i tru, o i laik lusim. Sapos ol i no tingim ol samting bilong spirit ol bai pundaun olgeta, olsem na ol narapela Kristen i mas helpim ol. (Rom 15:1; Galesia 6:1) Yumi ken helpim ol olsem wanem?
Sapos yumi tokim ol tasol long kam bek, dispela i no inap. Yumi mas save, na ol tu i mas save, wanem samting i pasim ol. Sapos man i no strong moa, o em i lusim wok autim tok, yumi mas traim strongim bel bilong em. Ating yumi ken tok stret long em, na ating yumi ken kamapim sampela tok bilong Baibel long em, olsem 1 Timoti 1:19, na Hibru 3:12, na Jeremaia 17:9, 10, na ating dispela bai helpim em long skelim ol laik o tingting i stap long bel bilong em na bai em i ken save, wanem samting i mekim “na em i lusim bilip na i givim baksait long God i gat laip.”
Sapos yumi inap save, wanem samting i bin pundaunim em, orait, nau yumi ken save yumi ken helpim em olsem wanem. Sapos klok o narapela hap bilong bel bilong man i gat sik, dokta i mas katim em na bai em i ken orait, tasol em bai kisim pen long dispela. Na i olsem long rong i stap long bel bilong man, olsem laik nogut, o pasin bikhet, o kain samting olsem, man i mas mekim dai dispela pastaim na bai em i ken kamap strong gen. Strongpela Kristen i ken beten wantaim em, o Kristen i ken stadi wantaim em sapos ol elda i ting olsem. Long dispela rot tasol na yumi ken kirapim gen bel bilong man na bai em i ken laikim gen Jehova.—Provep 2:1-5.
Dian i bin mekim olsem. Em i toktok wantaim sampela strongpela Kristen, na ol i helpim em bambai em i ken save long samting em i mas mekim na bai em i ken givim bel gen long Jehova. Em i save em i mas kam klostu gen long Jehova long bel na tingting bilong em, olsem na em i harim tok bilong ol dispela brata. Em i stadi long Baibel inap wanpela yia, na nau em wantaim man bilong em i kirap gen long autim tok na litimapim nem bilong Jehova.
Sapos man i laikim tumas Jehova em i mas bihainim tok bilong Jehova, na long pasin sori Jehova bai helpim em. Olsem na yumi mas wok long kirapim man i slek na bai em i ken laikim gen Jehova olsem long bipo. (Sam 34:8) Pastaim em i mas wok long daunim ol laik na tingting nogut long bel. (Provep 23:26; 1 Pita 2:1-3) Na taim em i winim dispela, bel bai kirapim em long autim gutpela tok long ol narapela man. Olsem na taim em inap kamap pablisa gen yumi mas helpim em long autim tok, long wanem, “long bel yumi save bilip na God i kolim yumi stretpela manmeri. Na long maus yumi save autim bilip bilong yumi na God i kisim bek yumi.”—Rom 10:10.
Sapos man i pilim olsem em i no gat laik moa long Jehova, ating em bai hatwok long stretim bek bel bilong em na bai em i ken bihainim gen pasin bilong man bilong God. Tasol Stiv i bin mekim, na Dian tu—ol i stretim bek bel bilong ol. Spirit bilong Jehova, na tok bilong Baibel, na oganaisesen bilong Jehova, ol dispela samting inap helpim man long stretim bek bel bilong em. Yumi laik tumas bai ol dispela man i bin slek ol i ken amamas gen long lotuim Jehova na mekim wok holi bilong em olsem ol narapela em ol i save givim bel olgeta long Jehova.—Mak 12:30; 1 Korin 13:8; 3 Jon 1-4.
“Yupela i mas laikim [Jehova], Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela na long strong bilong yupela.”—Mak 12:30.