Yu Amamas Long Harim Tok Bilong God?

TAIM yumi kaunim Baibel, kwiktaim yumi kisim save olsem ol hevi i painim yumi long nau i wankain olsem ol hevi i bin painim ol manmeri i stap long taim bilong ol aposel. Long dispela taim bipo planti manmeri i bihainim ol pasin nogut na ol i save mekim pasin pamuk na pasin i gat sem na ol i stil na giaman. Ol lain i stap klostu long ol Israel ol i sakim moa yet ol stretpela pasin. Long sampela lain, pasin pamuk em wanpela pasin ol i mekim bilong lotuim god bilong ol. Ol rabisman i stap nogut, na i gat planti hevi long ol wok politik. I kam inap long yia 66 bihain long Krais na nau lain Israel na lain Rom i pait tru. Long dispela taim bipo,olsem long nau, ol man i sot long gutpela tok bilong soim rot long ol.

Ol samting bilong lotu tu long taim bilong yumi i wankain olsem long dispela taim bipo—planti bikpela man bilong lotu Juda ol i man bilong tupela maus, olsem man bilong giaman. (Matyu 23:15; Luk 20:46, 47) Na ol manmeri bilong ol narapela lain ol i gat kain kain tingting long lotu—sampela ol i no bilip tumas, na sampela ol i bihainim ol bilip giaman, na sampela ol i strong tumas long bihainim lotu bilong ol. (Lukim Aposel 14:8-13; 19:27, 28.) Insait long nupela lotu Kristen tu i gat sampela kain hevi olsem i wok long kamap. Long yia 98 samting, aposel Jon i givim toksave long ol Kristen olsem: “Planti man i laik giamanim yumi, ol i raun nabaut long graun.” (2 Jon 7) Yes, long dispela taim bipo tu i gat planti tok giaman bilong lotu ol man i givim long ol narapela man. Tasol i gat rot bilong kisim gutpela tok bilong helpim ol tru.

Sapos Yu Bin Stap long Taim Bilong Jisas Bai Yu Harim Tok Bilong Em?

Jisas em i bin givim gutpela tingting long ol manmeri i stap long dispela taim bipo. Ol tok bilong em i pulim tru tingting bilong ol man, olsem na Baibel i tok: “Ol bikpela lain manmeri ol i kirap nogut tru long skul bilong en.” (Matyu 7:28) Tasol namel long ol dispela bikpela lain manmeri, wan wan man na meri tasol i putim gut yau long ol tok bilong em. Jisas i bin wokim ol mirakel na em i stap olsem gutpela piksa, long wanem em i bihainim tru ol pasin bilong God. Tasol ol hetman i bin kisim gutpela skul, ol tu i sakim tok bilong em. Bilong wanem ol i sakim?

Long wanem ol i gat tingting nogut long em. Sampela i givim baksait long em, long wanem em i bilong Nasaret na ol i ting i no gat wanpela gutpela samting inap kamap long Nasaret. Sampela i sakim em, long wanem em i no bin i go long wanpela skul bilong ol, na ol hetman i no bilip long em. (Jon 1:46; 7:12, 15, 47, 48) Na tu sampela taim Jisas i mekim ol tok ol manmeri i no laik harim. Em i save mekim tok i tru tasol, na planti taim ol Farisi i bel nogut long tok bilong em. (Matyu 15:12-14) Taim em i autim tok inap 3-pela yia na hap pinis, nau ol hetman bilong lotu Juda i kirapim ol man long kilim em i dai. (Luk 23:20-35) Ol i lus tru, long wanem tok bilong Jisas “i save givim laip i stap gut oltaim oltaim”!—Jon 6:68.

Sapos yu bin i stap long Jerusalem long dispela taim bipo, bai yu bihainim pasin bilong ol dispela hetman bilong lotu na pasin bilong ol bikpela lain manmeri? Bai yu pasim bel na tingting bilong yu, o bai yu putim gut yau long ol tok bilong Jisas bambai yu inap kisim gut as bilong ol dispela tok? Sapos yu mekim olsem, bai yu bihainim pasin bilong wanpela meri Jisas i bin bungim taim em i raun, em dispela meri i narapela kain tru.

Wanpela Meri i Harim Tok

Jisas i bin bungim dispela meri taim em i raun long hap bilong Samaria. Em i sindaun klostu long wanpela hul wara bilong kisim malolo, na dispela meri i kam bilong pulimapim wara. Yumi no save long nem bilong dispela meri, tasol Baibel i tok, maski skin bilong Jisas i les, em i lukim olsem rot i op na em i kirap long toktok wantaim dispela meri long samting bilong lotu.—Jon 4:5-15.

I gat planti samting inap kirapim dispela meri long sakim Jisas. Em i bilong narapela lotu—lotu bilong ol Samaria i narapela kain long lotu bilong ol Juda. Na tu ol Juda i save mekim pasin antap na ol i ting ol i winim ol Samaria, olsem na ol i no save bung wantaim ol Samaria. Na ol man bilong lain Juda ol i no save toktok wantaim meri ol i no save long em. (Jon 4:9, 27) Na tu, dispela meri bilong Samaria i save mekim pasin pamuk na ating em i no laik bai Jisas i sutim tok long em long pasin em i mekim o kamapim rong bilong em long ples klia.—Jon 4:18.

Tasol taim Jisas i kirap long toktok wantaim em, em i harim. Jisas i mekim ol gutpela tok long pasin isi bilong kirapim tingting bilong dispela meri, na meri i bekim tok na givim sampela gutpela askim long em. Tupela i toktok wantaim na nau meri i kamapim tok long wanpela hevi i stap namel long ol Juda na ol Samaria, em ol i no wanbel long lotu. Jisas i bekim tok long em long gutpela pasin na em i tok stret long em olsem: “Yupela Samaria i save lotu long samting yupela i no save long en. Tasol mipela Juda i save lotu long samting mipela i save long en.” (Jon 4 19-22) Tasol meri i no kros long dispela tok. Em i no pasim bel na tingting bilong em na sakim dispela tok; em i amamas long harim ol narapela tok Jisas i laik mekim.

Olsem na Jisas i tokaut long wanpela bikpela samting, em i tok: “Tasol taim i laik kamap, na nau i kamap pinis, na olgeta man i laik lotu tru bai ol i lotu long Papa long strong bilong Holi Spirit na long pasin i tru. Na Papa i laikim tumas bai ol kain man olsem i mas lotu long em. God em i Spirit. Na ol man i lotu long em, ol i mas lotu long strong bilong Holi Spirit na long pasin i tru.” Jon 4:23, 24) Bihain dispela meri i kamapim long ples klia olsem em i pilim tru ol gutpela tok bilong Jisas, long wanem meri i go tokim ol wanples bilong em long ol dispela tok. Na ol tu i laik harim tok bilong Jisas bambai ol i ken kisim sampela save moa.—Jon 4:39-42.

Orait, dispela inap lainim yumi long wanem samting? Olsem: Sapos yumi stap namel long ol manmeri i save tingting nogut long ol manmeri bilong narapela skin o lain o lotu na wanpela man bilong narapela skin o lain o lotu i kam na em i laik toktok wantaim yumi, orait bai yumi mekim wanem? Sapos ol tok em i mekim inap kamapim long ples klia olsem tingting bilong yumi i kranki, bai yumi pasim yau na yumi no laik toktok wantaim em? O yumi wankain olsem dispela meri bilong Samaria na yumi laik harim tok bilong em?

Sapos Yu Bin Stap long Taim Bilong Pol Bai Yu Harim Tok Bilong Em?

Aposel Pol tu i bin givim gutpela tingting long ol man long taim bilong em. Pastaim Pol yet i bin pasim bel na tingting bilong em na em i no laik harim tok; em i kamapim dispela rong bilong em na em i tok: “Tru, bipo mi bin tok bilas long nem bilong [Jisas], na mi birua long em na mi bin tok nogut long em. Tasol em i save, mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.” (1 Timoti 1:13) Tasol bihain em i bilip long Krais Jisas na em i lusim ol dispela tingting kranki bilong em. Dispela i makim olsem tok i tru bilong Baibel ‘i gat strong bilong brukim ol strongpela banis’ insait long bel bilong man, olsem ol samting inap nogutim em.—2 Korin 10:4.

Taim Pol i kamap Kristen pinis, nau em i wok strong long autim ol tok em i kisim save pinis long en na em i no pret long mekim. Na taim em i sutim tok em i bungim sampela man ol i mekim wankain pasin olsem em i bin mekim long pastaim—ol i pasim bel na tingting bilong ol na ol i no laik harim tok. Tasol sampela i harim. Taim Pol i go long Beria, long hap bilong not long kantri Grik, em i bungim sampela manmeri ol i gat gutpela bel na ol i harim gut ol tok em i givim long ol. Ol i makim gutpela pasin yumi ken bihainim. Taim ol i harim ol tok Pol i autim, ol i pilim olsem dispela tok i tru, olsem na ol i “laikim tru.” Tasol ol i no bilipim nating tok bilong em; ol i skelim pastaim bambai ol i ken save, dispela tok i stret o nogat. Baibel i tok, “long olgeta de ol i save ritim na skelim tok i stap long buk bilong God, bilong ol i ken save, tok bilong Pol em i tru, o nogat.” (Aposel 17:11) Ol i laikim ol tok ol i harim, tasol ol i skelim gut wantaim tok bilong Baibel pastaim na nau ol i bilipim.

“Skelim Gut Olgeta Tok”

Long taim bilong yumi, ol Witnes Bilong Jehova i save lusim bikpela hap taim long autim gutnius bilong Kingdom long ol manmeri i stap klostu long ol, em ol i gat kain kain lotu. Ol dispela manmeri i mekim wanem long ol Witnes? Planti ol i amamas long ol na ol i harim tok. Tasol sampela i no laik harim tok, na sampela i save kros tru long dispela pasin bilong ol Witnes long i go long haus bilong ol man.

Sori tru, ol dispela manmeri i lus long gutpela samting, long wanem ol Witnes i laik autim gutpela tok long ol, em Baibel i kolim olsem “gutnius.” (Matyu 24:14) Na ol Witnes i laik kirapim ol manmeri long bihainim tingting bilong aposel Pol, em i tok: “Yupela i mas skelim gut olgeta tok na pasin. Na yupela i mas holimpas ol gutpela pasin.” (1 Tesalonaika 5:21) Maski man i gat strongpela tingting bilong em yet long lotu, tasol gutpela sapos em i bihainim pasin bilong ol Beria na meri bilong Samaria na em i amamas long harim tok; nogut em i pasim bel o tingting bilong em. Gutpela sapos em i amamas long toktok wantaim narapela man long samting bilong God.

Bilong Wanem Yumi No Ken Pasim Bel na Tingting?

Gutpela tru, long olgeta yia planti handet tausen manmeri i save mekim olsem. Planti ol i lain olsem ol gutpela save na tingting i stap long Baibel em inap helpim ol, na ol i kirap senisim tru pasin bilong ol. Sampela bipo ol i kain olsem Janet, inap planti yia em i save kisim ol drak na dring planti tumas, na bihain dispela i kirapim em long mekim traim long kilim i dai skin bilong em. Tasol nau Janet i stap amamas na em i wanpela Kristen. Em i bin stadi na lainim ol tok bilong Baibel na dispela i helpim em long kisim strong inap long em i bihainim gutpela tok bilong Pol, em Pol i tok: “Yumi mas rausim olgeta pasin doti bilong bodi na bilong spirit.”—2 Korin 7:1.

Wanpela man, nem bilong em Vernon, bipo em i save dring oltaim na i olsem pasin bilong dring i kalabusim em, na marit bilong em i laik bagarap. Tasol em i kirap bihainim gutpela tok bilong Baibel na dispela i helpim em long lusim dispela pasin nogut na pas gut gen wantaim meri bilong em. (1 Korin 6:11) Wanpela meri, nem bilong em Debra, bipo em i save tingting nogut long ol manmeri bilong narapela skin. Tasol em i stadi na lainim ol tok bilong Baibel na em i bung wantaim ol Kristen tru na dispela i helpim em long stretim tingting bilong em. (Aposel 10:34, 35) Na wanpela yangpela meri pamuk long Holan, em i senisim tru pasin bilong em. Wanem samting i kirapim em long mekim olsem? Ol Witnes Bilong Jehova i stadi wantaim em na lainim em long ol tok bilong Baibel. Kwiktaim em i kisim baptais na nau em i save bihainim stretpela pasin Kristen na em i lukautim gut ol pikinini bilong em.

Planti taim kain gutpela samting olsem i save painim ol manmeri i harim tok bilong Baibel na ol i bihainim. Ol tok bilong Baibel i kirapim ol long senisim tru pasin bilong ol na long dispela rot sindaun bilong ol i kamap gutpela. Pastaim ol i no ting olsem sindaun bilong ol inap kamap gutpela olsem. Na bikpela samting em olsem: Ol i kamap gutpela long ai bilong God na ol inap beten long em na tok, “Papa bilong mipela, yu stap long heven.” (Matyu 6:9) Na ol inap bilip olsem gutpela samting bai painim ol long bihain, olsem Jisas i tok: “Na laip bilong i stap gut oltaim, em i olsem: Ol man i kisim dispela laip ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3.

Em dispela kain gutpela tok ol Witnes Bilong Jehova i laik toktok wantaim ol man long en taim ol i mekim wok bilong God na ol i go long haus bilong ol manmeri i stap klostu long ol. Ating i no longtaim na bai ol i kam lukim yu gen. Olsem wanem? Bai yu pasim bel na tingting bilong yu? O bai yu amamas long harim tok bilong ol?

[Piksa long pes 7]

Maski Jisas em i bilong narapela lain, meri bilong Samaria i no larim dispela samting i pasim em long harim tok bilong Jisas. Yu save mekim kain gutpela pasin olsem?