“No Save Sem Long Autim Gutnius”

“Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip.”​—⁠Rom 1:⁠16.

1. Ol man i save mekim wanem long taim ol i harim gutpela tok o gutnius? Tasol ol man bilong graun i no bilip ol i ting olsem wanem long gutnius bilong Kingdom bilong God?

SAMPELA tok, em narapela man i harim na em i ting em i gutpela tok, olsem gutnius, tasol long narapela man em i no gutpela tok. Taim wanpela man i bringim gutpela tok i kam, ol man i save amamas long em na ol i putim yau long tok bilong em. Tasol Baibel i tok, ol man bilong graun, em ol i no bilip, ol i no ken amamas long harim gutnius bilong Kingdom bilong God na tok bilong en long God bai kisim bek ol man.​—⁠Lukim 2 Korin 2:​15, 16.

2. Aposel Pol i tok wanem long gutnius em i autim? Olsem wanem na long nau tu dispela tok em i gutnius?

² Aposel Pol i kisim wok bilong autim gutnius. Em i ting olsem wanem long dispela wok em i kisim? Em i tok: “Bel bilong mi i kirap long autim gutnius long yupela ol manmeri bilong Rom tu. Mi no save sem long autim gutnius.” (Rom 1:​15, 16) Dispela gutpela tok Pol i bin autim klostu 2,000 yia bipo, em i gutnius long nau tu. Olsem na yumi save, em i gutnius bilong i stap longtaim. Tru tumas, em i “gutnius bilong i stap oltaim oltaim.”​—⁠Kamapim Tok Hait 14:⁠6.

3, 4. Bilong wanem aposel Pol i tok, em i no save sem long autim gutnius?

³ Bilong wanem aposel Pol i tok em i no save sem long autim gutnius? I gat wanem as na ating bai em i sem long autim? As bilong dispela i olsem: Planti man i no laikim dispela tok, long wanem em i samting bilong wanpela man ol i bin nilim em long diwai na kilim em i dai olsem em i wanpela man nogut. Dispela samting i mekim na ol man i givim baksait long em na ol i ting em i man nating tasol. Inap tripela yia na 6-pela mun dispela man i bin wokabaut long olgeta hap bilong kantri Israel (Palestain) na autim dispela gutnius na ol Juda i bin birua tru long em. Ol bikman bilong lotu Juda i birua moa yet long em. Na nau Pol i autim tok long nem bilong dispela man ol i no laikim, olsem na ol i birua long Pol tu.​—⁠Matyu 9:35; Jon 11:​46-48, 53; Aposel 9:​15, 20, 23.

⁴ I gat dispela pasin birua i stap, olsem na Pol wantaim ol narapela disaipel bilong Krais inap sem long autim dispela gutnius. Na pastaim Pol yet i ting dispela lotu nau em i bihainim em i samting nogut, olsem samting bilong sem long en. Bipo em i bin tok nogut long ol man i bihainim Krais Jisas, na em i bin mekim nogut long ol. (Aposel 26:​9-11) Tasol em i lusim pinis dispela pasin, na nau em yet wantaim ol narapela manmeri i kamap Kristen ol i karim hevi long han bilong ol man i mekim nogut tru long ol.​—⁠Aposel 11:⁠26.

5. Pol i stori olsem wanem long dispela tok em i bin mekim, olsem em i no save sem long autim gutnius?

⁵ Sapos wanpela man i sem long i stap disaipel bilong Krais, em i bihainim tingting bilong ol man. Tasol aposel Pol em i no kain man olsem. Em i no sem long dispela gutnius em i autim, na em i stori long as bilong dispela samting, olsem: “Long wanem, strong bilong God i stap long gutnius, em strong bilong kisim bek olgeta man i bilip.” (Rom 1:16) Strong bilong God em i no samting bilong sem long en sapos em i wok long wanpela disaipel bilong Krais bilong kamapim gutpela laik bilong God, em dispela God i gat biknem tru na Krais Jisas yet i bin lotuim em na litimapim nem bilong em.​—⁠Lukim 1 Korin 1:18; 9:​22, 23.

Ol i Autim Dispela Gutnius long Olgeta Hap Bilong Graun

6, 7. (a) Ol Witnes Bilong Jehova i wok strong long mekim wanem long dispela gutnius? Olsem na wanem samting i kamap? (b) Yumi no pret long autim tok, tasol olsem wanem na sampela taim yumi mas pasim maus? (Lukim liklik hap tok i stap daunbilo long paragraf.)

⁶ Olsem Pol long bipo, ol Witnes Bilong Jehova long nau tu ol i disaipel bilong Krais Jisas, em Pikinini bilong Jehova em i kisim biknem pinis. Jehova i givim gutpela samting tru long ol dispela Witnes bilong em. Em i givim “dispela gutnius” long ol na ol i mas autim long ol man. (1 Timoti 1:11) Ol Witnes Bilong Jehova i no slek liklik long mekim dispela bikpela wok, na Baibel i tok ol i no ken sem long autim dispela tok. (2 Timoti 1:⁠8) Em bikpela samting tru long yumi no ken pret o surik long autim tok na tokim ol man yumi Witnes Bilong Jehova.a

⁷ Ol Witnes i no pret long autim tok, olsem na ol i bin autim nem bilong God Antap Tru long olgeta hap bilong graun, na ol i bin autim gutnius bilong Kingdom bilong em long olgeta hap. Pikinini bilong God i bin tok, “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap,” na tok bilong em i no inap lus nating. (Matyu 24:14) Long nau ol i autim dispela gutnius bilong Kingdom long planti kantri, winim 210, na dispela wok i no pinis yet. Yumi no sem long autim dispela gutnius, na yumi no pret long ol samting i laik kamap long bihain. Nogat. Yumi save mekim beten wankain olsem bilong ol disaipel bilong Krais Jisas long pastaim. Yumi beten long God na yumi tok: “Yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.”​—⁠Aposel 4:⁠29.

8. Maski ol man long olgeta kantri i birua long ol Witnes, bilong wanem ol Witnes i no ken pret o bel hevi?

⁸ Tru, long olgeta hap bilong graun, ol man i no laikim ol Witnes na ol i birua long ol. Tasol dispela i olsem mak na i truim ol samting Baibel i tok i mas painim ol manmeri ol i lotu tru long dispela God em wanpela tasol em i God tru i gat laip. (Jon 15:​20, 21; 2 Timoti 3:12) Olsem na ol manmeri bilong autim dispela gutnius ol i no save pret o bel hevi; ol i save God i amamas long ol na ol i bilong dispela lain em God Jehova, King bilong heven na graun, i orait long en.

9. Maski olgeta man bilong graun i birua long yumi, bilong wanem yumi no ken tingting planti long dispela samting?

⁹ Yumi no ken lusim tingting olsem God Antap Tru em i sambai long yumi. Olsem na maski olgeta manmeri bilong graun na olgeta kain kain misin na lain politik ol i birua long yumi, yumi no save pret o tingting planti long dispela samting. Olgeta manmeri bilong graun ol i bin birua long dispela wanpela Pikinini bilong God, olsem na yumi no ken sem taim wankain hevi i painim yumi. Em i bin tokim ol aposel bilong em: “Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.”​—⁠Jon 15:​18, 19.

10. Husat ol i bin mekim nogut tru long ol Witnes? Bilong wanem ol Witnes i no sem taim ol dispela lain i mekim nogut long ol?

¹⁰ Olsem na long olgeta hap bilong graun ol Witnes Bilong Jehova i bin karim hevi, tasol ol i sanap strong. Ol i bin karim bikpela hevi tru long ol kantri ol i kolim Kristen. Ol dispela lain ol i kolim Kristen ol i bin mekim nogut tru long ol Witnes Bilong Jehova, tasol dispela samting i no makim olsem ol Witnes i no Kristen. Nogat. Dispela i helpim tok bilong ol, em ol i save tok ol i Kristen tru, na ol i Witnes bilong God na Papa bilong Krais Jisas, em Jehova. Ol i Witnes bilong God, olsem na taim ol man i birua long lotu bilong ol na mekim nogut long ol, ol i no sem long dispela. Aposel Pol i bin tokim ol Kristen bilong pastaim, ol i no ken sem, na i stret ol Witnes Bilong Jehova long nau tu i no ken sem.​—⁠Lukim Filipai 1:​27-29.

Nambawan Gutpela Tok Bilong Autim

11. Yumi kisim nem olsem ol Witnes Bilong Jehova, tasol dispela i makim olsem yumi no stap disaipel moa bilong Krais o olsem wanem?

¹¹ Ol Witnes Bilong Jehova i no pret long kisim dispela nem i truim tok promis Jehova i bin mekim long lain bilong em long Aisaia 43:​10, em dispela lain Jehova i bin mekim kontrak wantaim ol. Ol i kisim nem olsem ol Witnes Bilong Jehova, tasol i no olsem ol i no bihainim moa Krais Jisas. Jisas em i Lida o Gopas bilong ol. Em i makim pasin ol i mas bihainim. Em yet em i bin autim tok bilong Jehova. Em i nambawan gutpela Witnes bilong Jehova.​—⁠1 Timoti 6:13; Kamapim Tok Hait 1:⁠5.

12. Ol Witnes Bilong Jehova i save autim wanem kain tok long olgeta hap bilong graun? Bilong wanem ol i mekim?

¹² Dispela tok ol Witnes Bilong Jehova i autim em i nambawan gutpela tok bilong autim. Kingdom bilong Krais, em Jehova i putim bilong bosim olgeta man em i bin baim bek ol long rot bilong Pikinini bilong em, dispela Kingdom o gavman em i nambawan gutpela gavman. I no gat narapela gavman inap helpim ol man olsem dispela gavman bai mekim. (Aisaia 9:​6, 7) Ol manmeri bilong graun nau ol i harim dispela gutnius bilong Kingdom ol Witnes i autim long ol, ol inap bilip long dispela Kingdom, na bai ol inap kisim laip i stap oltaim long paradais long graun na kamap gutpela olgeta.

13. Olsem wanem yumi inap save, Kingdom o gavman bilong Krais bai kamap olsem nambawan gutpela gavman? Ol Witnes i no sem long tokim ol man long mekim wanem?

¹³ Long laik bilong em yet, Jisas i bin karim bikpela pen na hevi na em i dai bambai em i ken baim bek ol manmeri ol bai stap aninit long em, olsem na yumi save gavman bilong em bai kamap olsem nambawan gutpela gavman. Mipela i laik tokim olgeta manmeri long graun: Yu mas daun long dispela gavman na stap gut long en. Mipela i no sem long dispela gavman mipela laik kirapim olgeta manmeri long givim bel long en. Maski ol man i birua long mipela, mipela i no surik long autim tok bilong dispela Kingdom. Mipela olgeta wan wan i mekim tok wankain olsem aposel Pol i bin mekim, olsem: “Mi no save sem long autim gutnius.”

14. Olsem Jisas i tok, ol bai autim tok bilong Kingdom i go inap long wanem hap?

¹⁴ Jisas i mekim tok profet na em i tok, ol bai autim dispela gutnius bilong Kingdom long olgeta hap bilong graun, na dispela tok profet i stret long kain gutnius olsem. (Mak 13:10) Jisas i no surik long tokaut olsem ol bai autim tok bilong Kingdom bilong Jehova i go inap long olgeta hap bilong graun. (Aposel 1:⁠8) Jisas i save, ol gutpela disaipel bilong em bai wok strong long i go long olgeta hap i gat man i stap long en, bambai ol inap autim gutnius bilong Kingdom long ol.

15, 16. (a) I stret dispela gutnius i mas i go long wanem ol lain? (b) Maski lain bilong Satan i mekim nogut long ol man bilong autim tok, olsem wanem ol bai inapim wok bilong ol?

¹⁵ Long nau i gat planti tausen milion manmeri ol i stap long olgeta hap bilong graun na long ol bikpela ailan long solwara. Ol Witnes Bilong Jehova i bin wok strong long i go long ol dispela hap bilong autim gutnius. I no gat wanpela hap i longwe tumas. Olgeta hap bilong graun i olsem ples bilong God i putim lek bilong em antap long en. (Aisaia 66:⁠1) I stret dispela gutnius bilong God i laik kisim bek ol man i mas i go long olgeta hap bilong dispela ples em i putim lek long en.

¹⁶ Gutpela tok yumi autim long nau em i save mekim ol man i amamas. Em i gutpela tok bilong wanpela gavman i gat king, em Krais Jisas, na i kamap pinis. Jisas i save, maski lain bilong Satan i mekim nogut moa yet long ol disaipel tru bilong Krais, bai spirit bilong God i givim strong long ol na kirapim ol long karim olgeta dispela hevi na sanap strong bambai ol inap autim ‘gutnius bilong dispela kingdom’ i kamap pinis, na bai ol inap autim long “olgeta hap bilong graun.”​—⁠Matyu 24:⁠14.

Ol i No Sem long Krais Jisas na Jehova

17. (a) Ol man i lotu tru long God ol i no sem long wanem samting? (b) Jisas i kolim wanem lo long Mak 8:38? Yumi tingim dispela lo na yumi save long wanem samting?

¹⁷ God Antap Tru i no sem long kolim wanpela nem long em yet, em Jehova. Olsem na ol gutpela man bilong lotuim em ol i no ken sem long dispela nem. Ol man i lotu tru long em ol i amamas long holim dispela nem; ol i no sem long dispela nem i stap long ol na ol man i ken save ol i lain bilong lotuim em wanpela tasol, na ol i lain bilong bihainim tok bilong em. Jisas i stori long ol samting ol man i mekim long em yet na em i kolim wanpela lo long dispela long Mak 8:38. Em i tok: “Ol manmeri bilong dispela taim ol i save givim baksait long God na mekim ol kain kain pasin nogut. Na sapos wanpela man bilong ol em i no sem long mi na long tok bilong mi, orait bihain, taim Pikinini Bilong Man i stap long bikpela lait bilong Papa bilong en na em i kam wantaim ol ensel bilong God, em bai i sem long dispela man tu.” Olsem tasol, sapos wanpela man long nau em i sem long God na Papa bilong Bikpela bilong yumi, em Krais Jisas, orait i stret bai Jehova i sem long dispela man. Na sapos wanpela man o ensel i no stap gut long God Jehova, orait bai dispela man o ensel i no inap i stap laip long heven o long graun, em ol hap God i bosim.​—⁠Luk 9:⁠26.

18 (a) Tok bilong Jisas long Matyu 10:​32, 33, bilong wanem yumi mas putim gut long bel na tingting bilong yumi? (b) Wanem samting i save painim ol lain i pret long ol man na ol i tok, ol i no bilong lain bilong Jisas na Jehova? (Lukim liklik hap tok i stap daunbilo long paragraf.)

¹⁸ I gat wanpela tok bilong Jisas em yumi mas putim gut long bel na long tingting bilong yumi, em dispela tok hia: “Man i save tokim ol manmeri olsem em i stap lain bilong mi, mi tu bai mi tokim Papa bilong mi long heven olsem dispela man em i bilong mi. Tasol man i tokim ol manmeri olsem em i no man bilong lain bilong mi, mi tu bai mi tokim Papa bilong mi long heven olsem dispela man em i no bilong mi.” (Matyu 10:​32, 33; Luk 12:​8, 9) Na olsem tasol, sapos wanpela man i tok, em i no stap long lain bilong God na Papa bilong Krais Jisas, orait bai God i tok, dispela man em i no bilong Em. Dispela man em i no inap i stap long dispela lain em Krais Jisas i namba wan Pikinini bilong en. Dispela man bai bagarap long taim God i makim pinis.b

19, 20. (a) Ol man i bin beten askim Jehova long mekim nem bilong em i kamap holi, olsem wanem bai ol i no ken sem long wanpela samting? (b) Ol man i no pret long autim tok bilong Kingdom, ol i bin inapim wanem wok? Wanem samting i bin helpim ol?

¹⁹ Bai God i mekim ol samting olsem Jisas i bin lainim ol disaipel long beten askim God long en, olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.” (Matyu 6:​9, 10) Taim dispela samting i kamap, bai ol disaipel i laikim tumas Jisas ol i no ken sem long wanpela samting. Ol milion manmeri nau ol i stap laip, em ol i no ken i dai, na ol tausen milion manmeri, em Jisas bai kirapim bek ol long matmat long taim em i bosim Kingdom bilong 1,000 yia, olgeta wantaim bai litimapim nem bilong Jehova na mekim i stap holi. Bai ol inap i stap oltaim long paradais long graun.

²⁰ Ol dispela manmeri i no pret long autim gutnius bilong Kingdom bilong God, olsem na ol i no ken sem. Maski ol man long olgeta hap i birua long ol, ol inapim wok bilong autim tok long olgeta hap bilong graun, long wanem strong bilong antap i helpim ol​—⁠ol ensel long heven i helpim ol. Olsem na ol Witnes Bilong Jehova i save “pret long [God] na litimapim nem bilong em.”​—⁠Kamapim Tok Hait 14:​6, 7.

Ol i No Sem long Pret long God na Litimapim Nem Bilong Em

21. Ol Witnes Bilong Jehova i no bin sem long mekim wanem? Na wanem samting i bin kamap?

²¹ Ol Witnes Bilong Jehova i pret long God na litimapim nem bilong em, na ol i no sem liklik long dispela samting ol i mekim. Ol i save kolim nem bilong em yet, em Jehova. Olsem na ol i bin kisim ol gutpela gutpela blesing. God Antap Tru em i truim ol tok promis bilong em na givim ol dispela blesing long ol. Dispela samting i litimapim tru nem bilong em, em wanpela tasol em i God tru i gat laip na em i King bilong heven na graun!

22. Olsem wanem na klostu nau bai ol man i kirap mekim nogut tru long ol Witnes Bilong Jehova? Tasol ol Witnes bai amamas long wanem samting?

²² Klostu nau bai ol gavman bilong graun i kirap na birua long ol misin i bosim ol man, na bai ol i pinisim ol olgeta​—⁠ol misin ol i kolim Kristen tu. (Kamapim Tok Hait 17:​16, 17) Olsem na bikpela hevi bai painim ol Witnes Bilong Jehova long han bilong ol lain bilong graun. God i stap oltaim em i mas helpim ol Witnes. Sapos nogat, bai ol i no inap winim dispela hevi. Tasol em bai helpim ol, na bai ol i amamas long lukim bagarap i painim olgeta man i birua long lotu Kristen na long Jehova. Dispela God ol Witnes i save lotuim em na ol i no lusim em liklik, em yet bai pinisim ol dispela birua. Long dispela taim ol Witnes i no ken sem olsem ol dispela birua bilong wok king bilong God, em pasin nogut bilong ol i kamap ples klia. Bai ol Witnes i amamas tru long mekim singsing long Jehova na tok: Oltaim oltaim yu stap God, long bipo na long bihain tu.”​—⁠Buk Song 90:⁠2.

23. Olsem wanem na i no gat wanpela samting ol Witnes Bilong Jehova i mas sem long en? Olsem na wanem gutpela samting bai painim ol?

²³ Ol bai amamas long God, em i Papa bilong Krais Jisas na long rot bilong Jisas em i bin baim bek ol manmeri bambai ol inap i stap oltaim na i stap gutpela olgeta na i stap amamas long paradais long graun. Long rot bilong Krais Jisas, Jehova i bin kamapim long ples klia olsem em i strongpela God tru! Long gutpela pasin tru Jehova i bin kamapim long ples klia olsem em i Man bilong bihainim gutpela tingting na mekim gutpela wok long bikpela strong bilong em; em i no mekim wok nogut long dispela strong bilong em. Nogat tru! Olsem na yumi no ken sem long wanpela samting em yet o Pikinini bilong em, Krais Jisas, i bin mekim. Yumi no sem long autim dispela gutnius i kamapim bikpela strong bilong God Jehova em i save mekim wok long en long rot bilong Krais Jisas. Klostu long taim ol i bin kilim i dai Krais Jisas, Krais i bin tok: “Bel bilong yupela i ken i stap strong. Mi winim pinis strong bilong dispela graun.” (Jon 16:33) Olsem na yumi mas strongim bel na bihainim pasin bilong aposel Pol​—⁠yumi no ken sem long autim gutnius. Sapos yumi mekim olsem, bai God I Gat Olgeta Strong em i no ken sem long yumi.

[Ol Futnot]

Sampela Askim Bilong Kamapim Gen Ol Bikpela Tok

◻ Olsem aposel Pol, yumi tu i mas i gat wanem tingting long wok bilong autim gutnius? Bilong wanem yumi mas i gat kain tingting olsem long en?

◻ Dispela tok ol Witnes Bilong Jehova i autim, olsem wanem em i nambawan gutpela tok?

◻ Jisas i mekim wanem toksave long man i sem long em taim em i kam bek wantaim bikpela strong bilong Kingdom?

◻ Wanem samting i painim ol man i tok, ol i no bilong lain bilong Jisas na Jehova?

◻ Ol manmeri bilong autim gutnius ol i bin inapim wanem wok na ol i no sem long wok ol i bin mekim? Olsem wanem ol inap mekim?