Bihainim Pasin Bilong Jisas Long Givim Bel Long God

“As tok bilong pasin bilong [givim bel long] God em i bikpela samting tru. . . . em i olsem, [Jisas] i kamap man tru.”—1 TIMOTI 3:16.

1. (a) Wanem askim i bin kamap na winim 4,000 yia i no gat bekim bilong en? (b) Wanem taim bekim bilong dispela askim i bin kamap? Em i kamap long wanem rot?

I gat wanpela askim i bin kamap na winim 4,000 yia i no gat bekim bilong en. Dispela askim i bin kamap pastaim long taim namba wan man, Adam, em i bikhet long God. Dispela askim em olsem: Olsem wanem ol man inap kamapim klia olsem ol i givim bel long God? Taim Pikinini bilong God i kam long graun, ol man inap save long bekim bilong dispela askim. Long wanem olgeta tingting na tok na wok bilong Jisas i kamapim long ples klia olsem em i givim bel long Jehova. Em i kamapim klia ‘as bilong pasin bilong givim bel long God,’ na em i makim ol pasin ol man i mas bihainim bambai ol inap holimpas pasin bilong givim bel long God.—1 Timoti 3:16.

2. Taim yumi wok strong long givim bel long God, bilong wanem yumi mas tingim gut pasin bilong Jisas?

² Yumi kamap Kristen i dediket na baptais pinis na yumi laik wok strong long givim bel long God, olsem na yumi mas “tingim gut” pasin bilong Jisas. (Hibru 12:3) Bilong wanem yumi mas mekim olsem? I gat tupela as bilong dispela. Namba wan em olsem: Pasin bilong Jisas inap helpim yumi long givim bel long God. Jisas i save gut long Papa bilong em; no gat narapela man i save gut long God olsem Jisas. (Jon 1:18) Na Jisas yet i save bihainim tru ol pasin bilong Jehova, olsem na i stret em i tok: “Man i lukim mi, em i lukim Papa.” (Jon 14:9) Sapos yumi skelim wokabaut bilong Jisas na ol wok em i bin mekim, bai yumi inap pilim tru ol gutpela pasin sori bilong Jehova na dispela bai strongim yumi long givim bel moa yet long dispela Gutpela Man em i bin wokim yumi. Namba tu samting i mas kirapim yumi long bihainim pasin bilong Jisas, em olsem: Pasin bilong Jisas inap helpim yumi long bihainim ol pasin i kamapim klia olsem yumi givim bel long God. Jisas i bihainim tru ol pasin i makim olsem em i givim bel long God. Em i gutpela piksa tru bilong yumi. Olsem na gutpela sapos yumi save olsem wanem yumi ken “kisim Bikpela Jisas Krais,” olsem bihainim ol pasin bilong em.—Rom 13:14.

3. Taim yumi yet yumi stadi long Baibel, yumi mas wok tu long kaunim wanem ol tok bilong en? Bilong wanem yumi mas wok long kaunim ol dispela tok?

³ I gat sampela samting Jisas i bin mekim na sampela tok bilong em ol i no bin raitim long Baibel. (Jon 21:25) Olsem na yumi mas tingim gut ol tok em spirit bilong God i kirapim ol man long raitim long ol wok na tok bilong Jisas. Ol dispela tok i stap long Baibel, olsem na taim yumi yet yumi stadi long Baibel, yumi mas wok long kaunim tu stori bilong Jisas em Matyu na Mak na Luk na Jon i bin raitim. Tasol yumi no ken kaunim nating ol dispela tok; yumi mas tingim gut bambai em inap helpim yumi long wok strong long givim bel long God. Yumi mas wok long kisim save long as bilong ol dispela tok.

Pikinini i Wankain Olsem Papa

4. (a) Wanem samting i makim olsem Jisas em i man bilong sori? (b) Long laik bilong Jisas yet em i kirap mekim wanem bilong helpim ol manmeri?

⁴ Tingim dispela pasin bilong Jisas: Em i man bilong sori. Bel bilong em i save sori tru long ol man. Lukim tok bilong Mak 10:1, 10, 13, 17, 35. Dispela tok i kamapim klia olsem olgeta kain kain man na meri, ol lapun wantaim ol yangpela na ol pikinini, ol i no pret long i go klostu long em. Sampela taim em i save holim ol pikinini long han bilong em. (Mak 9:36; 10:16) Olsem wanem na ol manmeri, ol pikinini tu, i no pret liklik long i go klostu long em? Long wanem ol i save, em i sori long ol na em i laik helpim ol. (Mak 1:40, 41) Olsem na planti taim em yet i kirap i go helpim ol manmeri; em i no wetim ol i kam long em. Baibel i stori long wanpela meri wanpis bilong Nain em pikinini man bilong em i dai pinis na ol i karim bodi bilong pikinini i go bilong planim em. Baibel i tok, taim Jisas i lukim dispela meri, em i “go klostu” na em i kirapim bek pikinini bilong em, na Baibel i no stori liklik olsem wanpela man i bin singautim em i go mekim olsem. (Luk 7:13-15) Na wanpela taim em i oraitim wanpela meri bun bilong baksait bilong em i krungut, na em i oraitim wanpela man skin bilong em i solap nogut, tasol ol i no bin singautim em long mekim olsem.—Luk 13:11-13; 14:1-4.

5. Ol dispela stori long wok Jisas i mekim i lainim yumi long wanem ol pasin bilong Jehova?

⁵ Taim yu kaunim ol kain stori olsem long pasin bilong Jisas, askim skin bilong yu yet, olsem: ‘Jisas i bihainim tru pasin bilong Papa bilong em, olsem na ol dispela stori i lainim mi long wanem ol gutpela pasin bilong Jehova?’ Ol dispela stori i mas strongim bel bilong yumi na yumi ken bilip tru olsem Jehova em i God bilong sori na em i sori tru long yumi ol manmeri. Oltaim em i tingim yumi ol manmeri bilong graun na dispela i kirapim em long mekim ol samting bilong helpim yumi. Long laik bilong em yet em i mekim; no gat wanpela man i subim em long mekim. No gat wanpela man i bin subim em long salim Pikinini bilong em i kam “givim laip bilong em bilong baim bek planti manmeri.” (Matyu 20:28; Jon 3:16) Jehova i save wok long painim rot bambai em i ken “laikim tumas” ol manmeri i givim bel long em na bel bilong ol i kirapim ol long mekim wok bilong em. (Lo 10:15) Olsem Baibel i tok: “Oltaim [Jehova] i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”—2 Stori 16:9.

6. Taim yumi tingim gut ol gutpela pasin sori bilong Jehova olsem Jisas i piksa bilong en, dispela i save kirapim yumi long mekim wanem?

⁶ Sapos yu tingim gut dispela pasin sori na pasin marimari bilong Jehova, dispela bai kirapim bel bilong yu na bai yu pilim tru ol gutpela pasin sori bilong em i pulim ol manmeri long givim bel long em. Na dispela bai pulim yu i go klostu moa long em. Bel bilong yu bai kirapim yu long i go klostu long em long olgeta taim long rot bilong beten, maski wanem kain samting i painim yu. Bai yu no pret long i go klostu long em na toktok wantaim em. (Buk Song 65:2) Dispela bai strongim yu long givim bel moa yet long em.

7. Taim yu tingim gutpela pasin sori bilong Jehova, nau yu mas givim wanem askim long skin bilong yu yet? Bilong wanem yu mas mekim olsem?

⁷ Tasol dispela pasin bilong givim bel long God i no olsem long bel yu pilim tasol olsem yu mas lotuim God. Yu tingim? Wanpela man i gat save long ol tok bilong Baibel (em R. Lenski) em i tok, pasin bilong givim bel long God i olsem “yumi givim bel na tingting olgeta long lotuim God, na dispela i kirapim yumi long mekim ol gutpela pasin.” Olsem na taim yu tingim gutpela pasin sori bilong Jehova, olsem Jisas i makim, nau yu mas askim skin bilong yu yet olsem: Olsem wanem mi ken bihainim moa yet dispela pasin bilong Jehova? Ol manmeri i pret long i kam toktok wantaim mi o nogat?’ Sapos yu wanpela papa o mama, yu mas mekim gutpela pasin bambai ol pikinini i no pret long i kam toktok wantaim yu. Na sapos yu wanpela elda bilong kongrigesen, yu mas mekim gutpela pasin bambai ol brata sista i no pret long i kam toktok wantaim yu. Orait, yu mas mekim wanem kain gutpela pasin na bai ol manmeri i no pret long i kam toktok wantaim yu? Yu mas mekim gutpela pasin sori. Yu mas laikim tru ol narapela man, na tingim ol gut na yu mas laik tru long helpim ol. Sapos yu tingim tru ol narapela man na yu redi long givim taim na strong bilong yu bilong helpim ol, bai ol i pilim tru dispela samting na dispela bai pulim ol i kam long yu.

8. (a) Taim yu kaunim ol stori bilong Jisas long Baibel, yu mas tingim wanem samting? (b) Ol tok bilong Baibel ol i makim long liklik tok daunbilo i lainim yumi long wanem ol pasin bilong Jehova?

⁸ Olsem na taim yu kaunim ol stori bilong Baibel long ol tok na wok bilong Jisas, yu mas tingim ol dispela stori inap lainim yu long ol pasin tru bilong Jehova.a Na taim yu save long ol dispela gutpela pasin bilong em, olsem Jisas i makim, dispela bai kirapim yu long wok strong moa long bihainim ol dispela pasin, na long dispela rot bai yu kamapim long ples klia olsem yu givim bel long God.

Ol Pasin Yu Mas Mekim long Famili Bilong Givim Bel long God

9, 10. (a) Klostu tru long taim Jisas i laik i dai, em i mekim wanem na dispela i kamapim long ples klia olsem em i sori long mama bilong em, Maria, na em i tingim gut em? (b) Ating i gat wanem as na em i no tokim wanpela brata wanblut bilong em long lukautim Maria, em i tokim aposel Jon long mekim?

⁹ Wokabaut bilong Jisas na ol wok em i mekim i kamapim klia planti gutpela pasin yumi mas bihainim bilong makim olsem yumi givim bel long God. Tingim gutpela pasin bilong Jisas olsem Jon 19:25-27 i stori long en: “Mama bilong Jisas wantaim susa bilong en na Maria, em meri bilong Klopas, na Maria bilong taun Makdala, ol dispela meri i sanap i stap klostu long diwai [pos] bilong Jisas. Jisas i lukim mama bilong en wantaim dispela disaipel em i laikim tumas [Jon], tupela i sanap klostu. Na Jisas i tokim mama olsem, ‘Meri, dispela man em i pikinini bilong yu. Na em i tokim dispela disaipel olsem, ‘Dispela meri em i mama bilong yu.’ Na stat long dispela taim dispela disaipel i kisim Maria i go long haus bilong en na lukautim em.”

¹⁰ Olaman! Jisas i sori tru long mama bilong em, Maria, olsem na maski klostu tru em i laik i dai, em i tingim rot bilong lukautim mama (long wanem ating man bilong Maria i dai pinis na Maria i stap wanpis). Olsem na em i tokim Jon, em dispela disaipel em i laikim tumas, long lukautim mama. Tasol bilong wanem em i no tokim wanpela brata wanblut bilong em long lukautim mama bilong ol? Long wanem em i no tingting tasol long helpim Maria long ol samting bilong skin, em i ting ting moa yet long ol samting bilong spirit. Aposel Jon (ating em i kasen-brata bilong Jisas) em i kamapim bel bilong em pinis olsem em i bilip, tasol i no gat wanpela samting i makim olsem long dispela taim ol brata wanblut bilong Jisas i bilip.—Matyu 12:46-50; Jon 7:5.

11. (a) Olsem Pol i tok, Kristen i ken mekim wanem long famili bilong em na bai em i givim bel long God? (b) Bilong wanem Kristen tru i save stretim rot bilong lukautim lapun papamama?

¹¹ Orait, dispela pasin Jisas i mekim, olsem wanem dispela i makim olsem em i givim bel long God? Aposel Pol i kamapim as bilong dispela, em i tok: “Sapos man bilong wanpela meri i dai pinis, na meri i stap wanpis tru, orait yu mas mekim gutpela pasin long em. Tasol sapos dispela meri i gat ol pikinini bilong em yet o ol tumbuna pikinini, orait yu mas helpim ol long save gut olsem, namba wan wok bilong ol long ai bilong God em wok bilong lukautim gut dispela mama bilong ol. Long dispela pasin ol i ken bekim olgeta hatwok bipo papamama bilong ol i bin mekim bilong helpim ol. God i laikim tumas dispela kain pasin.” (1 Timoti 5:3, 4) Sapos ol pikinini i tingim gut papamama bilong ol na lukautim ol long ol samting bilong skin taim ol i mas mekim olsem, orait olsem Pol i tok, i olsem ol i givim bel long God. Olsem wanem i olsem ol i givim bel long God? Long wanem God Jehova yet em i As bilong famili na em i tok ol pikinini i mas tingim gut papamama bilong ol na bihainim tok bilong ol. (Efesus 3:14, 15; 6:1-3) Olsem na Kristen tru i save, taim em i mekim dispela wok bilong lukautim papamama, na em i man bilong lotu tru long God na bihainim ol lo bilong em.—Lukim tu Kolosi 3:20.

12. Yu mas mekim wanem long lapun papamama na bai yu givim bel long God? Wanem samting i mas kirapim yu long mekim olsem?

¹² Orait, yu mas mekim wanem long famili bilong makim olsem yu givim bel long God? Wanpela samting yu mas mekim, em olsem: Yu mas stretim rot bilong lukautim lapun papamama long ol samting bilong spirit na bilong skin, olsem Jisas i bin mekim. Sapos yu no ken mekim olsem, orait yu kamapim long ples klia olsem yu no givim bel long God. (Lukim 2 Timoti 3:2, 3, 5.) Kristen i dediket pinis, em i save lukautim papamama taim ol i sot long samting. I no olsem em i laik mekim gutpela pasin o em i mas lukautim ol na em i mekim. Nogat. Em i laikim tumas ol na em i lukautim ol, na em i save Jehova i laikim tumas kain pasin olsem. Olsem na taim em i lukautim gut lapun papamama, dispela i makim olsem em i givim bel long God.b

13. Papa Kristen i mas mekim wanem long meri pikinini bilong em na bai em i givim bel long God?

¹³ Tasol i gat narapela gutpela pasin yumi mas mekim insait long famili bilong makim olsem yumi givim bel long God. Olsem: Papa Kristen em i gat wok long lukautim meri pikinini long ol samting bilong skin na bilong spirit, na bilong helpim ol bambai bel bilong ol i stap isi na ol i stap amamas. Olsem na em i save givim haus na kaikai samting long ol, tasol em i stretim rot tu bilong stadi wantaim ol na lainim ol long ol tok bilong Baibel. Na em i makim taim long olgeta wik bilong autim tok wantaim ol. Na em i save ol i mas i gat taim bilong malolo na bilong painim gutpela amamas tu. Olsem na em i save bihainim gutpela tingting na em i tingim famili i bikpela samting, na em i no larim ol wok bilong kongrigesen i pasim em long mekim ol wok bilong em bilong lukautim gut famili. (1 Timoti 3:5, 12) Wanem samting i kirapim em long mekim ol dispela wok? I no olsem em i pilim olsem em i mas mekim. Nogat. Em i mekim, long wanem em i laikim tumas famili bilong em. Em i save, long ai bilong Jehova em i gat bikpela wok long lukautim famili. Olsem na taim em i mekim gut ol wok bilong em bilong helpim meri bilong em na ol pikinini bilong em, orait em i bihainim pasin bilong givim bel long God.

14. Mama Kristen i ken mekim wanem insait long famili na bai em i kamapim long ples klia olsem em i givim bel long God?

¹⁴ Mama Kristen tu i gat wok long bihainim pasin bilong givim bel long God insait long famili. Em i ken mekim olsem wanem? Baibel i tok, meri i mas “aninit” long man bilong em. (Efesus 5:22, 33) Maski man bilong em i no bilip, em i mas “aninit” long em. (1 Pita 3:1) Sapos meri Kristen i bihainim tok bilong man bilong em taim man i stretim pinis tok long samting famili i mas mekim na dispela i stret wantaim lo bilong God, orait meri i kamapim long ples klia olsem em i aninit long man bilong em. (Aposel 5:29) Na wanem samting i kirapim em long bihainim dispela pasin, olsem i stap aninit long man bilong em? Em i laikim tumas man bilong em na em i mekim, na bikpela samting em olsem: Em i save dispela pasin “em i stret long ai bilong Bikpela,” em pasin God yet i kamapim insait long famili. (Kolosi 3:18) Olsem na taim em i daun long man bilong em long laik bilong em yet, dispela i kamapim long ples klia olsem em i givim bel long God.

“Em Dispela Wok Tasol Mi Kam Bilong Mekim”

15. Jisas i mekim wanem bikpela samting tru na dispela i makim olsem em i givim bel long God?

¹⁵ Wanpela bikpela samting Jisas i mekim na dispela i kamapim long ples klia olsem em i givim bel long God, em olsem: Em i “autim gutnius bilong kingdom bilong God.” (Luk 4:43) Jisas i kisim baptais long Wara Jordan long yia 29, na bihain inap 3-pela yia hap, em i wok strong tru long mekim dispela nambawan bikpela wok. Em i tok: “Em dispela wok tasol mi kam bilong mekim.” (Mak 1:38; Jon 18:37) Tasol taim em i mekim dispela wok, olsem wanem dispela i makim olsem em i givim bel long God?

16, 17. (a) Wanem samting i kirapim Jisas long wok strong tru long autim tok na lainim ol man? (b) Ol wok Jisas i mekim bilong autim tok na lainim ol man, olsem wanem dispela i kamapim long ples klia olsem em i givim bel long God?

¹⁶ Pasin bilong givim bel long God em i olsem: Man i bihainim ol pasin God i laikim, long wanem em i laikim tumas God na em i pilim tru ol gutpela pasin bilong God. Yu tingim? Orait, wanem samting i kirapim Jisas na long ol laspela yia bilong em long graun em i mekim bikpela wok bilong autim tok na lainim ol man? Yu ting em i pilim olsem em i mas mekim dispela wok na dispela tasol i kirapim em long wok strong long mekim? Tru, em i save sori tru long ol manmeri. (Matyu 9:35, 36) Na em i save God i bin givim spirit holi long em bilong makim em long mekim dispela wok. (Luk 4:16-21) Tasol i gat wanpela bikpela laik tru long bel bilong Jisas na dispela i kirapim em long mekim dispela wok.

¹⁷ Long laspela apinun paslain long Jisas i dai, em i tok stret long ol aposel bilong em, olsem: “Mi laikim tru Papa.” (Jon 14:31) Em i laikim tru Papa, long wanem em i save gut long ol gutpela pasin bilong em. (Luk 10:22) Jisas i pilim tru ol dispela gutpela pasin bilong Papa bilong em na dispela i kirapim bel bilong em na em i amamas long bihainim laik bilong Papa bilong em. (Buk Song 40:8) Dispela i olsem “kaikai” bilong em—i olsem samting tru bilong helpim em long i stap laip na i swit long em. (Jon 4:34) Em i stap gutpela piksa tru bilong pasin bilong ‘painim Kingdom pastaim.’ Em i no ting olsem laik bilong em yet i namba wan samting. (Matyu 6:33) Olsem na dispela wok em i mekim na em i wok strong long mekim, i no dispela samting i makim olsem em i givim bel long God. Nogat. Bikpela laik long bel i kirapim em long mekim dispela wok, olsem em i laikim tru Papa bilong em, dispela samting i makim olsem em i givim bel long God.

18. Sapos yumi mekim sampela wok bilong autim tok, olsem wanem na ating dispela i no makim olsem yumi givim bel long God?

¹⁸ Orait, yumi mas mekim wanem na bai yumi inap bihainim dispela pasin em Jisas i “soim”gut long yumi? (1 Pita 2:21) Olgeta manmeri i bihainim singaut bilong Jisas long ‘kam bihainim em,’ olgeta i kisim wok long God bilong autim gutpela tok bilong Kingdom na kamapim ol disaipel. (Luk 18:22; Matyu 24:14; 28:19, 20) Olsem na sapos yumi mekim sampela wok bilong autim tok bilong Kingdom, ating i olsem yumi wok strong long givim bel long God? Ating nogat. Sapos yumi mekim nating dispela wok bilong amamasim tasol sampela insait long famili o bilong amamasim ol narapela, orait i no olsem yumi givim laip o bel bilong yumi long God. Nogat.—2 Pita 3:11.

19. (a) Wanem namba wan samting i mas kirapim yumi long autim tok? (b) Sapos yumi givim bel tru long God na dispela i kirapim yumi long mekim wok bilong em, orait wanem gutpela samting bai kamap?

¹⁹ Olsem Jisas, yumi tu yumi mas i gat bikpela laik long bel na dispela i mas kirapim yumi long mekim dispela wok. Jisas i tok: “Yupela i mas laikim [God] tru long bel bilong yupela [olgeta laik na tingting tru bilong bel] na long spirit bilong yupela [laip na skin bilong yu olgeta] na long tingting bilong yupela [olgeta save bilong yu] na long strong bilong yupela.” Na wanpela saveman bilong lo i gat gutpela tingting em i skruim hap tok moa long dispela tok, olsem: “Dispela pasin em i winim olgeta ofa ol i save kukim olgeta long paia, na i winim olgeta kain ofa.” (Mak 12:30, 33, 34) Olsem na wok yumi mekim em bikpela samting, tasol samting i kirapim yumi long mekim dispela wok,dispela tu i bikpela samting. Yumi mas laikim tumas God long bel olgeta na long tingting olgeta na long skin olgeta na long strong olgeta na i stap olsem nambawan samting i kirapim yumi long mekim wok bilong God. Sapos yumi givim bel tru long God, orait bai yumi laik tru long mekim wok bilong em inap tru long skel bilong yumi. (2 Timoti 2:15) Sapos yumi laikim tumas God na dispela i kirapim yumi long mekim wok bilong em, orait bai yumi no skelim wok bilong yumi wantaim wok bilong ol narapela na sutim tok long ol. Nogat.—Galesia 6:4.

20. Pasin bilong Jisas long wok strong long givim bel long God, olsem wanem dispela pasin bilong em inap helpim tru yumi?

²⁰ Yumi mas tenkyu long God Jehova long wanem em i kamapim pinis as bilong pasin bilong givim bel long Em! Sapos yumi skelim gut ol wok na tok bilong Jisas na yumi wok long bihainim pasin bilong em, dispela bai helpim yumi long kisim pasin bilong givim bel long God na kamapim moa yet dispela pasin. Sapos yumi kamap Kristen i dediket na baptais pinis na yumi bihainim pasin bilong Jisas long wok strong long givim bel long God, bai Jehova i givim planti blesing long yumi.—1 Timoti 4:7, 8.

[Ol Futnot]

Yu Tingim?

◻ Taim yumi wok strong long givim bel long God, bilong wanem yumi mas bihainim pasin bilong Jisas?

◻ Gutpela pasin sori bilong Jisas i lainim yumi long wanem pasin bilong Jehova?

◻ Yumi mas mekim wanem long famili na bai yumi kamapim long ples klia olsem yumi givim bel long God?

◻ Wanem samting i mas kirapim yumi long autim tok na bai dispela wok yumi mekim i kamapim long ples klia olsem yumi givim bel long God?

[Piksa long pes 21]

Papa Kristen i gat wok long lukautim meri pikinini long ol samting bilong skin na spirit, na long helpim ol long i stap bel isi na amamas.

[Piksa long pes 23]

“Sapos man bilong wanpela meri i dai pinis, na meri . . . i gat ol pikinini bilong em yet o ol tumbuna pikinini, orait . . . ol i ken bekim olgeta hatwok bipo papamama bilong ol i bin mekim bilong helpim ol.”