Wok Gut Wantaim Lain Bilong Bosim Yumi Long Nau
“Bikman bai i makim dispela wokboi bilong bosim olgeta samting bilong en.”—LUK 12:44.
1. Long yia 33, Krais i kirap mekim wok king namel long wanem lain? Em i mekim long wanem rot?
LONG de Pentikos long yia 33, Krais Jisas, em Het bilong kongrigesen, em i kirap mekim wok king namel long lain wokboi bilong em, em God i bin makim ol long spirit holi bilong em. Krais i mekim dispela wok olsem wanem? Em i mekim long rot bilong spirit holi na ol ensel na wanpela lain long graun bilong bosim ol Kristen. Dispela samting i kamap olsem aposel Pol i makim, em i tok, God ‘i kisim bek ol manmeri bilong em long strong bilong tudak na putim ol i stap long lain o kingdom bilong Pikinini bilong em, em dispela Pikinini em i save laikim tru.’—Kolosi 1:13-18; Aposel 2:33, 42; 15:2; Galesia 2:1, 2; Kamapim Tok Hait 22:16.
2. Long yia 1914, Krais i kirap mekim wanem bikpela wok king moa?
2 Taim bilong “ol man bilong ol arapela lain” i pinis, orait Jehova i mekim wok king bilong Krais i go bikpela na bai em i no ken bosim dispela liklik lain Kristen tasol. (Luk 21:24) Long yia 1914 God i putim Pikinini bilong em i stap king bilong “olgeta lain manmeri,” na bai em i bosim olgeta manmeri long “olgeta hap bilong graun.”—Buk Song 2:6-8; Kamapim Tok Hait 11:15.
Makim Bilong Bosim “Olgeta Samting Bilong En”
3, 4. (a) Long tok piksa bilong 10-pela wokboi i kisim mani, bikpela man i makim husat? (b) Wanem ol samting bilong Kingdom i bin kamap long yia 1918 na 1919?
3 Bilong helpim yumi long save long dispela wok king bilong Jisas, yumi ken tingim wanpela tok piksa em i mekim long wanpela bikpela man. (Luk 19:11-27) Dispela bikpela man i laik i go long wanpela longwe hap na kisim wok king, na pastaim em i givim sampela mani long ol wokboi bilong em bilong mekim wok long en. Dispela man i makim Krais. Orait, taim em i kam bek em i singautim ol dispela wokboi bipo em i bin givim mani long ol na em i tok: “Mi laik save hamas winmani olgeta wan wan man i bin kisim.” (Luk 19:15) Olsem wanem dispela i bin kamap taim Jisas i kisim pinis wok king?
4 Long 1918 King Krais Jisas i lukim wanpela liklik lain Kristen ol i bin lusim ol misin i gat nem Kristen na ol i wok long lukautim ol samting bilong Bikman bilong ol hia long graun. Jisas i skelim ol, olsem man i save kukim silva long paia na rausim pipia bilong en. Orait bihain, olsem long yia 1919, em i givim sampela wok o namba moa long ol dispela wokboi bilong em. (Malakai 3:1-4; Luk 19:16-19) Em i makim ol “bilong bosim olgeta samting bilong en.”—Luk 12:42-44.
‘Kaikai long Taim Stret’
5, 6. (a) Bosboi bilong Krais i kisim wanem bikpela wok moa? (b) Truim bilong wanem ol tok profet i mas kamap bihain long yia 1914? Olsem wanem lain ‘bosboi’ i insait long truim bilong ol dispela tok profet?
5 King Krais Jisas i mekim wok bilong em na i givim bikpela wok moa long bosboi bilong em long graun. Lain Kristen em God i bin makim ol long spirit holi, ol i mas autim tok bilong God na i stap olsem “maus bilong Krais,” em dispela King nau em i kisim namba pinis bilong bosim olgeta lain manmeri long olgeta hap bilong graun. (2 Korin 5:20; Daniel 7:14) Pastaim dispela lain olgeta i gat wanpela wok tasol—em wok bilong givim kaikai long lain wokboi bilong Krais, em God i bin makim ol long spirit holi. Ol i mas givim “kaikai long ol long taim bikman i makim,” olsem long taim stret. (Luk 12:42) Tasol nau ol i gat wok insait long truim bilong sampela tok profet i mas kamap bihain long taim Kingdom i bin kamap long yia 1914.
6 Wanem dispela wok ol i mas mekim? Em dispela wok bilong ‘autim gutnius bilong kingdom,’ na nau ol i mas mekim i go bikpela na bai em i kamap “long olgeta hap bilong graun.” (Matyu 24:14) Na ol i mas autim sampela strongpela tok long kot bilong God bai painim dispela graun em Satan i bosim na ol man i helpim pasin bilong dispela graun. Dispela wok bai seksekim olgeta lain man, na bai ‘ol gutpela samting bilong olgeta kantri,’ olsem ol “arapela sipsip” bilong Krais, ol bai kam insait. (Hagai 2:7; Jon 10:16) Kirap long yia 1935 na i kam inap long nau, “planti manmeri tru” i wok long i kam insait long lain o oganaisesen bilong Jehova long olgeta hap bilong graun. (Kamapim Tok Hait 7:9, 10) Olsem na long olgeta taim ol i mas wok long senisim na stretim sampela lo o pasin bilong oganaisesen na bai ol inap lukautim gut dispela bikpela wok i kamap. Baibel i tok piksa long dispela samting na i tok i olsem ain i senisim ston, na bras i senisim diwai, na silva i senisim ain, na gol i senisim bras. (Aisaia 60:17) Ol dispela samting i bin kamap bihain long yia 1919, na Krais Jisas i bosim dispela wok, na em i putim “olgeta samting bilong en,” olsem olgeta wok bilong Kingdom long graun, long han bilong lain ‘gutpela wokboi’ na Lain Bilong Bosim Ol.
7. I gat wanem sampela wok moa bosboi i mas mekim?
7 Bilong mekim dispela bikpela wok moa Bikman i givim long bosboi bilong em, ol brata i mas mekim bikpela wok moa long raitim na redim planti buk na nius samting. Oltaim ol i mas kamapim ol kaikai bilong spirit long taim stret long rot bilong Wastaua. Na long yia 1919 ol i kirap long wokim narapela nius (nau yumi kolim Kirap!) em bilong kirapim tingting bilong ol manmeri na bilong strongim ol “arapela wokboi.” (Matyu 24:45) Olsem na ol i bin wokim planti planti buk na buklet na nius moa.
Stretim Wok Oltaim
8. Pastaim husat ol i stap olsem Lain Bilong Bosim ol wokboi bilong Jehova? Wanpela Wastaua bilong 1944 i tok wanem?
8 Taim yumi tingim ol samting i bin kamap “long taim bilong las de,” yumi luksave olsem pastaim ol brata bilong Sosaiti Was Taua em ol i gat wok long buk na nius samting, ol i stap olsem Lain Bilong Bosim ol wokboi bilong Jehova. (Daniel 12:4) Wastaua (tok Inglis) bilong Novemba 1, 1944 i kamapim wanpela tok as bilong en i olsem: “Long Nau Sosaiti i Stretim Ol Wok na Bai i Stret Bilong God.” Wastaua i tok: “Dispela lain i gat wok long kamapim ol tok i tru bilong Baibel na raitim long ol buk na nius, ol brata i ting olsem Bikpela i bin makim dispela lain bilong bosim wok na bilong helpim olgeta man ol i laik lotuim God long spirit na long pasin i stret, na bai ol i ken wok gut wantaim long mekim wok bilong Bikpela long autim ol dispela tok i tru long ol narapela man, em ol i laik tumas long save long en wankain olsem man i hangre i laik tumas long kisim kaikai o man i dai long wara i laik tumas long dring wara.”
9. Bihain ol brata i tingim wanem lain i olsem Lain Bilong Bosim wok bilong ol? I gat wanem as na ol i ting olsem?
9 Yumi save, i gat ol lo bilong gavman ol man i mas bihainim sapos ol i laik wokim ol nius o wokim sampela buk bilong Baibel, olsem na ol brata i kirapim Sosaiti Was Taua long provins Pensilvenia, long Amerika, na ol rejistaim long gavman. I gat 7-pela dairekta i bosim dispela Sosaiti bilong wokim ol buk na nius bilong Baibel, na lain bilong Bikpela i tilim long ol man long olgeta hap. Inap planti yia ol brata i tingim dispela 7-pela dairekta bilong Sosaiti Was Taua ol i olsem Lain Bilong Bosim ol wokboi bilong God long graun.
10, 11. Wanem senis i kamap long yia 1944? Wastaua i tok wanem long dispela samting?
10 Ol dispela 7-pela dairekta ol i strongpela Kristen na ol i stap gut long God. Tasol ol i holim wok long wanpela Sosaiti ol i bin kamapim long lo bilong gavman, na ol i no laik bai ol brata i ting olsem ol i kisim wok olsem Lain Bilong Bosim Ol Witnes, long wanem ol memba bilong Sosaiti Was Taua i vot na makim ol bilong bosim dispela Sosaiti. Na tu, lo bilong gavman i tok, ol man i bin givim mani long Sosaiti, ol tasol i ken kamap memba na vot. Olsem na ol i laik senisim dispela pasin. Sosaiti Was Taua bilong Pensilvenia i save miting long olgeta yia, na taim ol i miting long Oktoba 2, 1944, ol i senisim sampela lo bilong dispela Sosaiti bambai ol man i givim mani long Sosaiti i no ol tasol i ken kamap memba. Nau ol i ken kisim sampela gutpela wokman bilong Jehova bilong i stap memba bilong dispela Sosaiti, na planti memba em ol brata i wok oltaim long namba wan ofis bilong Sosaiti long Bruklin, long Nu Yok, na long ol brens-ofis bilong Sosaiti long ol narapela hap.
11 Ol i stretim gut dispela wok na Wastaua bilong Novemba 1, 1944 i stori long dispela samting olsem: “I no stret sapos mani, olsem mani ol i givim, i as bilong makim ol man bilong i stap olsem lain bilong bosim ol witnes bilong Jehova long graun. . . . Spirit holi, em dispela strong i kam long God Jehova long rot bilong Krais Jisas, dispela yet i as bilong stiaim na kamapim dispela samting.”
Lain Dairekta i Narapela
12. I gat wanem samting na yumi ken save, Jehova i orait long ol dispela senis Lain Bilong Bosim Ol Witnes i bin kamapim?
12 Bihain long dispela senis, wok bilong ol Witnes long autim tok i kamap strong, olsem na yumi ken save, Jehova i orait long ol dispela senis, na nau yumi ken save gut long Lain Bilong Bosim Ol Witnes long nau. (Sindaun 10:22) Long yia 1944 i gat 130,000 Witnes tasol i stap, tasol long 1970 i gat 1,483,430 i stap! Tasol i gat sampela senis moa i mas kamap bilong stretim gut wok.
13. (a) Olsem wanem long Lain Bilong Bosim Ol Witnes Inap long yia 1971? (b) Wanem samting i bin kamap taim Sosaiti i bung long yia 1971?
13 Inap long yia 1971 Lain Bilong Bosim Ol Witnes i wankain olsem dispela 7-pela dairekta bilong Sosaiti Was Taua bilong Pensilvenia. Presiden bilong Sosaiti yet i mekim bikpela wok long bosim wok bilong ol brens-ofis long olgeta hap. Sosaiti i save miting long olgeta yia, na taim ol i miting long Oktoba 1, 1971 i gat sampela bikpela tok i kamap long bikpela senis ol i laik mekim. Presiden bilong Sosaiti i mekim wanpela bikpela tok, nem bilong en: “Stretim Ples Holi,” na namba tu presiden i toktok long “Lain Bilong Bosim Wok i Narapela na Sosaiti i Narapela.” Wanem samting bilong tupela lain hia i narapela narapela?
14. Wanem samting bilong Sosaiti na Lain Bilong Bosim Ol Witnes i narapela narapela?
14 Olsem yumi stori pinis, Sosaiti Was Taua bilong Pensilvenia i gat lain dairekta inap 7-pela, na ol memba bilong Sosaiti i no ken winim 500. Planti memba ol i no bilong dispela lain Kristen em God i bin makim ol long spirit holi. Long olgeta 3-pela 3-pela yia ol dispela memba i vot na makim 7-pela man Kristen, em ol i givim bel long God, na bai ol i holim wok dairekta. Lo bilong gavman i as bilong dispela Sosaiti, na namba wan ofis bilong en i mas i stap long wanpela kantri tasol, na sapos Sisar olsem Gavman i laik, em inap pinisim. (Mak 12:17) Tasol Lain Bilong Bosim Ol Witnes i no samting bilong gavman. Lo bilong gavman i no as bilong en. Ol brata i no vot na makim ol bilong holim dispela wok. Nogat. God Jehova wantaim Krais Jisas i stiaim dispela samting na makim ol long rot bilong spirit holi. (Lukim Aposel 20:28.) Olsem na ol yet o namba wan ofis bilong ol i no bilong i stap long wanpela kantri tasol olsem dispela Sosaiti; nogat.
15. Wastaua bilong Disemba 15, 1971, i tok wanem long oganaisesen? Na olsem wanem long Lain Bilong Bosim Ol Witnes long nau?
15 Wastaua (tok Inglis) bilong Disemba 15, 1971 i stori long dispela gutpela senis, na i tok: “Ol witnes Kristen bilong Jehova i save na ol i tokaut olsem oganaisesen bilong ol i no wanpela lotu em wanpela man tasol i bosim; nogat. Ol i gat lain bilong bosim ol, em sampela Kristen God i bin makim ol long spirit holi.” Dispela Lain Bilong Bosim ‘gutpela wokboi,’ em ol Kristen God i bin makim ol long spirit holi, dispela Lain i bosim tu ol planti milion poroman bilong ol, em ol arapela sipsip, na isi isi ol senis i bin kamap bambai dispela Lain Bilong Bosim Ol em inap lukautim gut wok bilong en.
16. Ol samting bilong Krais long graun, olsem wanem dispela i go bikpela bihain long yia 1971? Kolim sampela samting bilong Krais em i bin putim long han bilong hap lain bilong ‘gutpela wokboi’ ol i olsem Lain Bilong Bosim yumi.
16 “Olgeta samting” bilong King Krais Jisas hia long graun em i bin wok long kamap bikpela. Long yia 1971 i gat 1,600,000 Witnes i stap, tasol long 1989 i gat klostu olsem 3,700,000! Yumi lukim olsem, na yumi save Jehova i bin blesim wok bilong ol. (Aisaia 60:22) Lain bilong ol i kamap planti, olsem na ol i mas skruim ol haus bilong namba wan ofis i go bikpela, na long ol brens-ofis tu, na ol i mas bihainim ol nupela pasin bilong wokim ol buk samting bambai ol i ken wokim planti hariap hariap. Na ol i bin wokim planti Haus Kingdom na Haus Kibung long olgeta hap. Lain Bilong Bosim Ol Witnes i lukautim ol dispela wok, tasol ol i wok yet long bosim gut wok bilong autim tok, na wokim ol buk samting bilong helpim ol man long kisim save long Baibel, na ol i gat wok long makim ol wasman long ol brens-ofis na long ol distrik na ol sekit na ol kongrigesen. Ol dispela wok bilong Kingdom em ol samting Krais i bin putim long han bilong ‘gutpela wokboi’ bilong lukautim, na Lain Bilong Bosim Ol Witnes i olsem maus bilong ol.
17. I gat wanem ol gutpela senis long Lain Bilong Bosim Ol Witnes i bin kamap long yia 1971 na 1974 na 1976?
17 Long taim bilong ol Krisiten bilong pastaim ol aposel i olsem lain bilong bosim wok bilong ol, na ol i skruim sampela moa i go long dispela lain. Olsem na long taim bilong skelim askim bilong ol Kristen long katim skin, lain bilong skelim dispela samting em “ol aposel na ol hetman” tu bilong kongrigesen long Jerusalem. (Aposel 15:1, 2) Long nau tu ol i bin skruim sampela moa long Lain Bilong Bosim Ol Witnes, long wanem, wok i go bikpela. Ol i bin mekim olsem long yia 1971 na long yia 1974 tu. Ol i laik mekim gut wok bilong ol, olsem na ol i wokim 5-pela komiti long lain bilong ol na ol dispela komiti i kirap mekim wok long Janueri 1, 1976. Ol wan wan komiti i gat 3-pela i go inap 6-pela memba bilong en, na olgeta wan wan memba i gat wankain strong taim komiti i laik toktok long sampela samting. Olgeta komiti i gat siaman bilong en, na siaman i senis long olgeta yia. Olgeta wan wan long Lain Bilong Bosim Ol Witnes i save insait long wanpela o tupela komiti. Olgeta wan wan komiti i lukautim wanpela hap wok stret bilong olgeta samting bilong Krais hia long graun. Na i gat namba 6 komiti, ol i kolim Komiti Bilong Ol Siaman, na lain bilong dispela komiti i senis long olgeta yia. Sapos i gat sampela bikpela tok o hevi i kamap, em wok bilong dispela komiti long stretim.
Wok Gut Wantaim Lain Bilong Bosim Yumi
18. Lain Bilong Bosim Ol Witnes i wok olsem wanem? Kolim wanpela samting yumi ken mekim bilong makim olsem yumi wok gut wantaim dispela lain.
18 Ol dispela komiti bilong Lain Bilong Bosim Ol Witnes ol i save miting long olgeta wik na ol i toktok long ol bikpela samting, na taim ol i beten pinis ol i pasim tok long samting ol i mas mekim, na ol i save toktok tu long wok bilong bihain. Aposel sapta 15 i stori long lain bilong bosim wok bilong ol Kristen long bipo, na ol i bin bung bilong stretim wanpela bikpela askim i bin kamap, na long nau tu i wankain. Sapos sampela bikpela askim samting i kamap, olgeta bilong Lain Bilong Bosim Ol Witnes ol i save stretim ol dispela samting taim ol i bung long olgeta wik. Sapos i gat planti bikpela tok bilong stretim, ol i save bung sampela taim moa. Long dispela taim nau i gat 12-pela insait long dispela lain, na ol i save lukim ol tok bilong Baibel na ol i beten bambai Jehova i ken stiaim tingting bilong ol na helpim ol long mekim gut wok bilong ol. Wanpela samting yumi ken mekim bilong makim olsem yumi laik wok gut wantaim dispela lain, em olsem: Yumi ken tingim ol long taim yumi beten long olgeta de.—Rom 12:12.
19. Ol tok bilong Lain Bilong Bosim Ol Witnes i save kam long ol kongrigesen long wanem rot?
19 Olsem wanem Lain Bilong Bosim Ol Witnes i salim tok i go long ol kongrigesen? Taim spirit bilong God i helpim lain bilong bosim ol Kristen bilong pastaim na ol i pasim tok pinis long samting ol Kristen i mas mekim, ol i bin salim pas i go long ol kongrigesen na tokim ol long ol dispela samting ol i mas mekim. (Aposel 15:22-29) Tasol lain bilong bosim ol Kristen long nau ol i givim tok long ol kongrigesen long rot bilong ol buk na nius samting.
20. (a) I gat wanem narapela gutpela senis i kamap long oganaisesen long yia 1976? (b) Ol Komiti Bilong Brens i mekim wanem na ol i wok gut wantaim Lain Bilong Bosim Ol Witnes?
20 Bihain long Februeri 1, 1976 Lain Bilong Bosim Ol Witnes ol i makim sampela brata long ol brens-ofis bilong Sosaiti Was Taua na bai ol i ken holim wok olsem Komiti Bilong Brens. Ol dispela brata i stap olsem maus bilong Lain Bilong Bosim Ol Witnes long kantri o ol kantri brens-ofis bilong ol i lukautim, olsem na ol i mas i stap gutpela Kristen na i stap gut long God. Yumi tingim dispela samting na yumi tingim ol man i bin helpim Moses long mekim wok jas na stretim ol hevi, em ol man ol inap tru long mekim wok, na ol i save stap aninit long God, na ol Israel inap bilip long ol. (Kisim Bek 18:17-26) Ol brata long Komiti Bilong Brens i kisim tok i kam long rot bilong ol buk na nius bilong Sosaiti na long Wok Kingdom, na long ol pas, em sampela i toktok long sampela hevi samting i kamap long dispela hap. Ol Komiti Bilong Brens i save tokim Lain Bilong Bosim Ol Witnes long ol wok bilong ol Witnes long ol dispela kantri em brens-ofis i lukautim wok long en, na ol i tokim dispela lain tu long sampela hevi sapos i gat sampela i kamap long dispela hap. Lain Bilong Bosim Ol Witnes i kisim ol dispela ripot long olgeta hap bilong graun, na nau ol i ken save, wanem kain samting ol i mas raitim long ol buk na nius bilong Sosaiti.
21. Olsem wanem ol i makim ol wasman bilong raun long mekim wok? Ol dispela wasman i gat wanem ol wok?
21 Spirit holi i stiaim tingting bilong ol Komiti Bilong Brens, na ol i tingim sampela strongpela brata bilong kamap wasman bilong ol sekit na distrik. Ol i tokim Lain Bilong Bosim Ol Witnes long dispela ol brata, na dispela lain yet i makim ol bilong holim dispela wok. Ol dispela wasman i save raun na strongim ol sekit na ol kongrigesen long ol samting bilong spirit na helpim ol long bihainim tok bilong Lain Bilong Bosim Ol Witnes. (Lukim Aposel 16:4; Rom 1:11, 12.) Ol dispela wasman bilong raun i save salim ripot bilong ol long brens-ofis bilong ol. Spirit holi na ol tok bilong Baibel i helpim ol dispela wasman wantaim ol elda bilong kongrigesen long tingim sampela brata ol inap kamap wokman o elda, na ol i tokim brens-ofis long ol dispela brata, na Lain Bilong Bosim Ol Witnes o sampela brata dispela lain i bin givim namba long ol, ol i makim ol dispela brata bilong holim wok.—Filipai 1:1; Taitus 1:5; lukim 1 Timoti 3:1-13; 4:14.
22. (a) Olsem wanem ol elda bilong ol kongrigesen i wok gut wantaim Lain Bilong Bosim Ol Witnes? (b) I gat wanem samting na yumi save, Jehova i blesim dispela pasin?
22 Na ol lain elda i save ‘was gut long pasin bilong ol yet, na long olgeta sipsip long kongrigesen, em spirit holi i makim ol i stap wasman bilong ol.’ (Aposel 20:28) Ol dispela elda o wasman i givim bel long bihainim ol tok ol i kisim long God Jehova na Krais Jisas na i kam long ol long rot bilong lain ‘gutpela wokboi’ na Lain Bilong Bosim ol. Yumi save Jehova i blesim dispela pasin, long wanem, ‘ol kongrigesen i wok long kamap strong moa long bilip, na lain bilong ol i go bikpela moa long olgeta de.’—Aposel 16:5.
23. Yumi mas tingim wok bilong Lain Bilong Bosim Ol Witnes na dispela i mas strongim yumi long mekim wanem?
23 Long rot bilong Lain Bilong Bosim Ol Witnes, God Jehova wantaim Krais Jisas i wok long helpim lain bilong em. Em gutpela samting tru! (Buk Song 94:14) Na dispela samting i helpim ol wan wan tu. (Buk Song 145:14) Dispela samting i mas strongim yumi long wok wantaim dispela lain em God i bin kamapim long nau, olsem yumi pasim tok pinis long bel long mekim. Yumi mas wok gut wantaim ol oltaim, i go inap long taim “olgeta [man] long graun bai i save tru long [Jehova],” na “dispela save bai inapim olgeta hap graun olsem solwara i inapim mak bilong en olgeta.”—Aisaia 11:9.
Sampela Bikpela Tok Bilong Tingim
◻ Long yia 1919 lain “bosboi” i kisim wanem bikpela wok moa?
◻ Inap planti yia ol brata i tingim husat ol i olsem Lain Bilong Bosim Ol Witnes?
◻ I gat wanem ol senis i bin kamap long pasin bilong pasin bilong makim ol brata bilong Lain Bilong Bosim Ol Witnes?
◻ Wanem sampela samting bilong Krais long graun em i bin putim long han bilong lain ‘gutpela wokboi’ na hap lain bilong ol i bosim yumi?
◻ Yumi mas mekim wanem na bai yumi wok gut wantaim Lain Bilong Bosim Ol Witnes?
[Ol Piksa long pes 18 na 19]
Lain Bilong Bosim Ol Witnes Bilong Jehova i stap long namba wan ofis long Bruklin, Nu Yok, na ol i lukautim wok bilong ol Witnes bilong wokim ol buk na nius na autim tok long 93 brens bilong Sosaiti Was Taua
Jemani
Japan
Saut Afrika
Brasil