Askim

◼ Long wanem taim 7-pela ensel i kirap winim biugel bilong ol olsem Kamapim Tok Hait i stori long en?

Kamapim Tok Hait sapta 8 na 9 na 11 i stori long 7-pela ensel i winim 7-pela biugel bilong makim bikpela hevi tru i laik painim sampela manmeri bilong graun. Dispela samting i makim sampela tokaut ol Witnes Bilong Jehova i bin mekim nau long taim bilong pinis na i kolim strafe bilong Jehova, na ol i kirap mekim ol dispela tokaut long wanpela kibung i kamap long Sida Poin, Ohaio, long 1922.

Namba wan ensel i go inap namba 4 ensel i winim biugel bilong ol, na dispela i kamapim long ples klia olsem lain bilong ol misin ol i kolim Kristen (ol i hap bilong “graun” na “solwara”) ol i dai pinis long samting bilong spirit, na ol pris pasto i bihainim ol pasin i no stret, na ol dispela misin i stap tudak long ol samting bilong spirit.​—⁠Kamapim Tok Hait 8⁠:​7-12.

Ol Witnes Bilong Jehova i tokaut long ol dispela samting paslain long 1922. Long 1918 ol i mekim wanpela pablik-tok nem bilong en “Planti Milion Manmeri Nau Ol i Stap Laip Ating Ol i No Ken i Dai,” na long 1920 ol i raitim ol tok bilong dispela pablik-tok long wanpela liklik buk. Dispela tok i stori long ol misin ol i kolim Kristen i no bin mekim gut wok bilong ol, na i tokaut tu long pasin bilong dispela graun i laik pinis. Nius Kirap! (long tok Inglis, bipo ol i kolim The Golden Age) bilong Septemba 29, 1920, i kamapim long ples klia olsem ol misin ol i kolim Kristen ol i olsem wanpela meri pamuk, na ol i giamanim ol manmeri.

Orait bilong wanem buk Revelation Climax (tok Inglis) i tok 4-pela ensel i kirap winim biugel bilong ol long dispela kibung long Sida Poin long 1922? Long wanem, long dispela kibung ol i harim tok long ol i mas “autim tok, autim tok, autim tok long King na long Kingdom,” na dispela i kirapim ol long wok strong long autim tok. Wastaua (tok Inglis) bilong Novemba 1, 1922 i tok: ‘Ol brata i pilim olsem dispela bikpela tok bilong kibung i makim nambawan bikpela wok ol i mas mekim, em wok bilong tokim ol man olsem Bikpela i kam bek pinis, na em i King i winim olgeta narapela king, na kingdom bilong em i kamap pinis.’

Kirap long 1922 ol Witnes Bilong Jehova i bin wok strong long tokaut long ol strafe bilong God, olsem krai bilong dispela 4-pela biugel i makim. Ol i mekim tokaut long dispela 4-pela kibung namel long 1922 na 1925 na ol i raitim ol tok bilong dispela 4-pela tokaut olsem nius. Ol i wokim planti milion na tilim i go long ol man. Long dispela rot ol i kamapim klia pasin nogut bilong ol lotu ol i kolim Kristen, em ol i stap olsem long tudak long ol samting bilong spirit.

Laspela 3-pela krai bilong biugel i makim 3-pela “bikpela hevi tru” bai kamap. (Kamapim Tok Hait 8⁠:13) Dispela 3-pela krai i narapela kain long krai bilong 4-pela biugel bilong pastaim, long wanem ol i makim stret 3-pela samting i mas kamap. Namba 5 biugel i krai na dispela i makim samting i bin kamap long 1919, olsem lain bilong God i lusim “hul.” Krai bilong namba 6 biugel i stori long “ol soldia i sindaun long hos” na i makim bikpela wok bilong autim tok long olgeta hap bilong graun i kirap long 1922. Na namba 7 krai i tokaut long samting bilong Kingdom bilong God taim Kingdom i kamap nupela long 1914.​—⁠Kamapim Tok Hait 9⁠:​1-19; 11⁠:​15-19.

Olgeta dispela samting i givim hevi long Satan na lain bilong em long dispela graun. Long 1919 liklik lain God i makim ol long spirit holi na ol i stap yet long graun, ol i lusim “hul,” olsem ol i kirap mekim wok, na tok bilong ol i givim pen long ol pris pasto bilong ol lotu ol i kolim Kristen na i makim olsem Jehova i sakim pinis ol dispela lotu. Kirap long 1922 na i kam inap long nau, dispela bikpela lain “soldia i sindaun long hos” i olsem ol i bin kilim i dai ol lotu ol i kolim Kristen, long wanem ol i tokim ol man ol dispela lotu i dai pinis long ol samting bilong spirit na ol bai bagarap. Taim Kingdom i kamap long heven long 1914, ol i rausim Satan long heven, na dispela i kamapim bikpela hevi long graun. Klostu nau na dispela Kingdom bai bagarapim “graun,” olsem ol manmeri bilong graun em ol i stap aninit long Satan na i olsem ol i stap strong, na long taim bilong Armagedon em bai bagarapim tu ol man bilong bikhet, em ol i olsem “solwara.”​—⁠Kamapim Tok Hait 11⁠:17–12⁠:12; 21⁠:⁠1.

Long kibung i kamap long Sida Poin long 1922, tok bilong dispela 3-pela “bikpela hevi tru” i kamap ples klia long ai bilong ol man. Long wanem, long dispela taim, lain bilong Jehova i kirapim wanpela bikpela wok bilong autim tok, na ol man inap save lain “grasopa” i lusim pinis “hul,” na ol “soldia i sindaun long hos” i kirap mekim wok bilong ol. Na tok ol i bin harim long kibung long ol i mas autim tok long King na long Kingdom, dispela i stret wantaim krai bilong namba 7 biugel. Wastaua (tok Inglis) bilong Mas 1, 1925 i tok, ol samting i bin kamap long 1914 na 1919 na 1922 i olsem truim bilong ol samting Kamapim Tok Hait sapta 12 i stori long en. Nau ol Witnes Bilong Jehova i save gut long taim bilong Kingdom i mas kamap, na ol i kirap long wok strong long tokaut long dispela samting. Na kirap long 1926 i go inap long 1928, long ol kibung, ol i orait long sampela strongpela tokaut, na ol i bin tilim ol dispela tokaut i go long ol man na dispela i helpim wok bilong ol long autim dispela tok i givim pen long ol man.

Olsem na 7-pela ensel i kirap winim biugel bilong ol long 1922 na dispela wok i kamap strong namel long 1922 na 1928. Na bihain long dispela taim ol Witnes Bilong Jehova i bin wok gut wantaim ol ensel long tokim olgeta man olsem ol misin ol i kolim Kristen ol i dai pinis long ol samting bilong spirit, na ol pris pasto bilong ol i no bihainim gutpela pasin, na klostu nau ol dispela misin wantaim olgeta narapela lain bilong Satan long dispela graun ol bai bagarap olgeta.