Gutpela Pasin i Givim Biknem Long Tok Bilong God

Ol bos bilong wanpela kampani long Karakas, long Veneswela, i salim pas i go long ol elda na wokman bilong wanpela kongrigesen bilong ol Witnes Bilong Jehova i stap klostu. Insait long pas ol i tok olsem: “Mipela bin kaunim ripot bilong sampela kampani i tok long gutpela wok lain bilong lotu bilong yupela i mekim, olsem ol i save mekim gut wok bilong ol na ol i no save stil o giaman. Long dispela as tasol mipela salim dispela pas long yupela. Mipela i sot long wokman, olsem na mipela laikim tupela man long mekim wok olsem: Wanpela bilong mekim wok draiva, na wanpela bilong bosim bakstua. Mipela bai amamas tru sapos yupela inap tokim mipela long wanpela long kongrigesen bilong yupela o bilong narapela kongrigesen i stap klostu em inap long mekim dispela wok. Mipela i no laik kisim wanpela man i no Witnes bilong wok wantaim mipela. Sapos i no gat wanpela bilong kisim dispela wok, plis tokim mipela. Mipela bai wetim toksave bilong yupela pastaim na bai mipela ken givim dispela wok long wanpela man.”

Wanpela elda i lukim dispela pas aninit long dua bilong Haus Kingdom, na bihain em i go lukim papa bilong dispela kampani. Inap 15 yia papa bilong kampani i save kisim ol Witnes Bilong Jehova long mekim wok, na no gat wanpela bikpela hevi i bin kamap. Em i tok: “Ol i no save les, ol i man bilong wok, ol i no save giaman na ol i mekim gut wok bilong ol.” Em i tok moa: “Yupela i no save larim man i mekim bikpela rong i stap insait long kongrigesen; yupela i save rausim ol long kongrigesen. Dispela i kamapim long ples klia olsem kongrigesen i no laik helpim pasin nogut bilong ol kain man olsem.”

Gutpela pasin olsem i givim biknem long tok bilong God yumi save autim. (Taitus 2⁠:10) Ol Witnes i laik tru long bihainim gut ol lo long Baibel na dispela i kirapim ol long mekim gutpela pasin.