Pasin Bilong Givim Bel Tru i Gat Gutpela Pe
“God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em.”—HIBRU 6:10.
1, 2. Olsem wanem yumi yet i kisim gutpela pe long pasin bilong givim bel tru?
PASIN bilong givim bel tru long ol narapela na helpim ol na yu no tingting long helpim yu yet tasol—dispela kain pasin em i nambawan gutpela pasin yumi ken bihainim. Dispela kain pasin (tok Grik, a·gaʹpe) i save kirapim yumi long mekim bikpela wok moa bilong helpim ol man. God, em Man bilong wokim yumi, em i gat stretpela pasin na pasin bilong sori, olsem na sapos yumi givim bel tru long ol narapela na yumi no tingting long helpim yumi yet tasol, dispela kain pasin i gat gutpela pe. Bilong wanem i olsem?
2 Wanpela samting i mekim na pasin bilong givim bel tru long ol narapela i gat gutpela pe bilong en, em wanpela lo i stap long skin bilong yumi olsem: Sapos yumi bel nogut o belhat long narapela man, dispela inap bagarapim skin bilong yumi na bai yumi gat sik, tasol sapos bel bilong yumi i gutpela long ol, dispela inap helpim skin bilong yumi long i stap gutpela. Olsem na pasin bilong givim bel tru long ol narapela na sori long ol i kain olsem wanpela gutpela marasin bilong helpim skin bilong yumi. Wanpela dokta i save long wok nogut em pasin bilong tingting planti inap mekim long skin bilong man na em i tok: “Sapos man i bihainim dispela tok, olsem: ‘Yu mas sori long narapela man,’ skin bilong dispela man bai stap gutpela.” Tru tumas, “Sapos yu sori long narapela man na yu mekim gut long em, orait long dispela pasin yu mekim gut long yu yet.” (Sindaun 11:17) Na narapela tok bilong Baibel i wankain liklik em olsem: “Man bilong givim samting bilong helpim ol arapela man, em yet bai i kisim planti samting. Sapos yu helpim ol arapela man bai ol i helpim yu tu.”—Sindaun 11:25; lukim tu Luk 6:38.
3. Pasin bilong givim bel tru i gat gutpela pe, long wanem, God i save mekim wanem?
3 Na pasin bilong givim bel tru i gat gutpela pe, long wanem, God i save givim gutpela pe long ol man i save sori long ol narapela man na helpim ol na ol i no tingting long helpim ol yet tasol. Baibel i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Ol Witnes Bilong Jehova i bihainim dispela tok, olsem na ol i save autim gutpela tok bilong Kingdom bilong God long ol man. Ol i save, ‘God em i no man nogut na bai em i lusim tingting long ol gutpela wok ol i bin mekim na ol i givim bel long em.’—Hibru 6:10.
Nambawan Piksa Tru Bilong Yumi
4. Husat i nambawan piksa tru i makim olsem pasin bilong givim bel tru i gat gutpela pe? Olsem wanem em i kamapim klia dispela samting?
4 Husat i nambawan piksa tru i makim olsem pasin bilong givim bel tru i gat gutpela pe? Em God yet! Em i “laikim tumas olgeta manmeri bilong graun, olsem na em i givim dispela wanpela Pikinini long ol.” (Jon 3:16) Taim Jehova i givim dispela Pikinini olsem ofa bambai ol man inap kisim laip i stap oltaim, em i mekim bikpela samting tru bilong helpim ol man na em i kamapim klia olsem em i laikim tumas ol na pilim hevi bilong ol. Dispela samting i kamap klia tu long taim ol Israel i karim pen na hevi long Isip. Long dispela taim “Bikpela tu i bin karim pen na hevi wantaim ol.” (Aisaia 63:9) Na bel bilong em i sori moa yet taim em i lukim Pikinini bilong em i karim pen long diwai na em i singaut strong olsem: “God bilong mi, God bilong mi, bilong wanem yu lusim mi?”—Matyu 27:46.
5. God i laikim tumas ol manmeri na givim Pikinini bilong em long ol olsem ofa na long dispela rot wanem gutpela samting i bin kamap?
5 Olsem wanem? God Jehova i bin kisim gutpela pe long dispela pasin bilong em long givim bel tru? Em i kisim. Satan i bin tok, em inap pundaunim olgeta man na bai ol i lusim God, tasol nau God inap bekim dispela tok bilong Satan, long wanem, Jisas i winim olgeta hevi na traim Satan i putim long em na em i stap gut long God! (Sindaun 27:11) Tru tumas, olgeta samting Kingdom bilong God Jehova bai mekim bilong stretim bek nem bilong Em, na kamapim bek Paradais long graun, na givim laip oltaim long planti milion manmeri—olgeta dispela gutpela samting inap kamap, long wanem, God i givim bel tru long ol manmeri bilong graun na em i givim Pikinini bilong em olsem ofa bilong helpim ol, em dispela Pikinini i olsem lewa tru bilong God.
Jisas Em i Gutpela Piksa
6. Jisas i givim bel tru long God na dispela i kirapim Jisas long mekim wanem?
6 Pikinini bilong God, em Krais Jisas, em tu i gutpela piksa bilong makim olsem pasin bilong givim bel tru i gat gutpela pe bilong en. Em i givim bel tru long Papa bilong em i stap long heven na dispela i kirapim em long bihainim laik bilong Papa maski wanem kain hevi o traim i painim em. (Jon 14:31; Filipai 2:5-8) Jisas i givim bel tru long God na em i no lusim dispela pasin liklik, maski sampela taim em i mas beten strong long God bilong helpim em na “em i singaut strong na i krai planti.”—Hibru 5:7.
7. Jisas i givim bel tru long God na long ol man na em i kisim wanem ol gutpela pe?
7 Em nau, Jisas i no tingting long helpim em yet—em i mekim bikpela pasin sori bilong helpim ol narapela. Olsem wanem? Em i kisim gutpela pe long dispela pasin bilong givim bel tru long ol narapela? Em i kisim! Tingim bikpela amamas em i bin kisim long ol gutpela wok em i mekim bilong helpim ol man taim em i mekim wok bilong God long graun inap 3 na hap yia. Em i bin helpim tru ol man long ol samting bilong spirit na bilong skin! Na em i bin kamapim long ples klia olsem man i stap nambawan olgeta em inap tru long i stap gut long God maski wanem wanem traim Satan i putim long em. Long dispela rot tu em i kisim bikpela amamas, long wanem em i kamapim klia olsem Satan em i man bilong giaman. Na tu, Jisas i stap gut long wok bilong God, olsem na em i kisim bikpela pe tru—taim em i kirap bek na em i go antap long heven, em i kisim laip i stap oltaim na em i no ken i dai moa. (Rom 6:9; Filipai 2:9-11; 1 Timoti 6:15, 16; Hibru 1:3, 4) Na tingim ol gutpela wok em bai kisim long Armagedon na long taim em i bosim graun inap 1,000 yia, na Paradais i kamap bek long graun, na planti tausen milion manmeri i kirap bek long matmat! (Luk 23:43) Tru tumas, Jisas i kisim gutpela pe long pasin bilong givim bel tru.
Pol Tu i Gutpela Piksa
8. Pol i givim bel tru long God na long ol narapela man na wanem samting i bin painim em long dispela?
8 Wanpela taim aposel Pita i tokim Jisas: “Lukim. Mipela i bin lusim olgeta samting na bihainim yu. Bai mipela i kisim wanem samting?” Hap tok Jisas i bekim long em i olsem: “Olgeta manmeri i bin ting long nem bilong mi na i lusim haus o brata o susa o papa o mama o pikinini o gaden, bai ol i kisim 100 moa, na bai ol i kisim laip i stap gut oltaim oltaim.” (Matyu 19:27-29) Aposel Pol em i gutpela piksa bilong dispela samting. Em i bin kisim planti blesing, olsem Luk i stori long en long hap bilong Baibel ol i kolim Aposel. Pol i laikim tumas God na ol narapela man, olsem na em i lusim bikpela wok na bikpela nem em i bin holim olsem wanpela Farisi, na em i kirap mekim wok bilong God. Em i karim bikpela hevi—ol man i paitim em, na planti taim klostu em i dai, na planti samting i laik bagarapim em, na sampela taim em i sot long kaikai o wara—em i karim ol dispela hevi, long wanem, em i givim bel tru long God na long wok bilong God.—2 Korin 11:23-27.
9. Pol i bihainim pasin bilong givim bel tru na em i kisim wanem gutpela pe?
9 Pol i givim bel tru long Jehova na Jehova i givim gutpela pe long em o olsem wanem? Orait, tingim ol gutpela samting i bin kamap long ol wok Pol i mekim. Em i bin kamapim planti nupela kongrigesen Kristen. Na God i bin givim strong long em bilong wokim planti mirakel! (Aposel 19:11, 12) Na Pol i kisim ol narapela gutpela pe tu—God i bin kamapim sampela tok hait long em long ol driman, na Pol i bin raitim 14 pas nau ol i stap long hap bilong Nupela Testamen long Buk Baibel. Na God i givim bikpela prais tru long Pol, em laip i stap oltaim long heven na em i no ken i dai moa. (1 Korin 15:53, 54; 2 Korin 12:1-7; 2 Timoti 4:7, 8) Tru tumas, Pol i kisim save olsem God i save givim gutpela pe long man i givim bel tru long em.
Pasin Bilong Givim Bel Tru i Gat Gutpela Pe long Nau
10. Wanem sampela samting ating yumi mas lusim bambai yumi inap kamap disaipel bilong Jisas na kamapim bel bilong yumi, em yumi givim bel tru long Jehova?
10 Ol Witnes Bilong Jehova long nau ol tu i bin kisim save olsem pasin bilong givim bel tru i gat gutpela pe. Tasol sapos yumi givim bel tru long Jehova na yumi insait long lain bilong em na yumi kamap disaipel bilong Jisas, ol man inap kilim yumi i dai tu, long wanem yumi holimpas ol lo bilong God. (Lukim Kamapim Tok Hait 2:10.) Olsem na Jisas i tok, yumi mas tingim gut dispela “pe” pastaim. Yumi no mekim olsem bambai yumi ken save, sapos yumi kamap wanpela disaipel bai yumi inap kisim gutpela pe o nogat. Yumi mekim olsem bambai yumi ken redi na bai yumi inap sanap strong long olgeta kain hevi na traim na holimpas wok disaipel, maski yumi mas i dai tu.—Luk 14:28.
11. I gat wanem as na sampela ol i no dediket long God?
11 Long nau planti milion man ol i bilipim tok bilong Baibel ol Witnes Bilong Jehova i autim long ol. Tasol ol i surik long dediket long God na kisim baptais. Ating as bilong dispela i olsem: Ol i no givim bel tru long God olsem ol narapela i mekim. Planti ol i no dediket na baptais, long wanem ol i tingim poroman marit bilong ol, em poroman i no bilip, na ol i laik bai poroman i laikim yet ol. Sampela ol i no go klostu long God long bel na tingting bilong ol, long wanem ol i gat tingting wankain olsem wanpela bisnisman em i bin tokim wanpela Witnes olsem: “Mi laikim sin.” Ol dispela kain man i no pilim bikpela pasin sori God na Krais i bin mekim bilong helpim ol.
12. Dispela nius i bin tok wanem na i kamapim klia gutpela pe bilong kisim dispela save i kirapim yumi long i go klostu long God na givim bel tru long em?
12 Sapos yumi pilim tru bikpela wok God Jehova na Krais Jisas i bin mekim bilong helpim yumi, bai yumi amamas long lusim wanem wanem samting yumi mas lusim bambai yumi ken mekim wok bilong Papa bilong yumi i stap long heven na yumi ken kamap wanpela disaipel bilong Jisas. Kain kain man na meri—sampela i gat bikpela wok mani, na sampela i gat biknem long pilai spot samting—ol i givim bel tru long God na ol i lusim ol dispela wok bilong helpim skin bilong ol yet na ol i kirap mekim wok bilong God, olsem aposel Pol i bin mekim. Ol i no laik kisim wanpela samting olsem senis bilong gutpela pe ol i kisim, em ol i kisim save long God na mekim wok bilong em. Wanpela Wastaua (tok Inglis) bipo i bin stori long dispela samting na i tok: “Sampela taim mipela i bin askim ol brata: Hamas brata i laik kisim wan tausen dola olsem senis bilong save ol i bin kisim long Tok i Tru? No gat wanpela i apim han! Husat i laik kisim ten tausen dola? No gat wanpela! Husat i laik kisim wan milion dola? Husat i laik kisim olgeta samting long dispela graun olsem senis bilong save em i bin kisim long ol pasin bilong God na long ol samting God i tingting long mekim? No gat wanpela man! Olsem na mipela i tokim ol: Ol pren tru, yupela i no bel nogut na pilim olsem yupela i sot long ol samting. Nogat. Yupela i pilim olsem yupela i gat planti samting, long wanem, yupela i save long God, olsem na yupela i no laik kisim wanpela samting olsem senis bilong dispela, na mipela tu i gat wankain tingting.” (Wastaua [tok Inglis] bilong Disemba 15, 1914, pes 377) Tru tumas, taim yumi kisim stretpela save long God na long ol samting em i laik mekim, dispela i pulim yumi long i go klostu long em long bel na long tingting bilong yumi na yumi givim bel tru long em. Dispela pasin bilong givim bel tru i gat gutpela pe.
13. Yumi yet yumi mas ting olsem wanem long stadi?
13 Sapos yumi givim bel long God, bai yumi wok strong long kisim save long laik bilong em na bai yumi wok strong long bihainim laik bilong em. (1 Jon 5:3) Bai yumi yet yumi stadi, na beten, na go long ol miting Kristen, na bai yumi tingim ol dispela samting i bikpela samting yumi mas mekim. Yumi mas lusim sampela samting bilong yumi yet, olsem taim na strong na sampela samting moa bilong yumi, bambai yumi inap mekim olgeta dispela wok. Ating yumi mas tingting gut olsem: Bai mi lukim televisen o mi stadi long Baibel? Sapos yumi tingim gut pasin bilong stadi na yumi lusim bikpela hap taim liklik long mekim bambai yumi inap stadi gut, orait, bai yumi kamap strong moa long spirit, na bai yumi inap mekim gutpela wok moa long autim tok, na bai tok bilong ol miting Kristen i helpim yumi moa!—Buk Song 1:1-3.
14. Pasin bilong beten na pas gut wantaim God Jehova i bikpela samting olsem wanem?
14 Olsem wanem? Yumi save amamas long toktok oltaim wantaim Papa bilong yumi i stap long heven, olsem “beten long olgeta taim”? (Rom 12:12) O yumi gat planti wok na yumi no givim bel tumas long mekim dispela gutpela samting? Pasin bilong “beten oltaim” em i gutpela rot tru bilong helpim yumi long pas gut wantaim God Jehova. (1 Tesalonaika 5:17) Na yumi mas pas gut wantaim Jehova bambai yumi inap sanap strong na winim ol traim i painim yumi. Wanem samting i bin helpim Josep long sakim meri bilong Potifar taim meri i laik pulim em? Na bilong wanem Daniel i no bin lusim pasin bilong beten taim lo bilong ol Midia na Persia i tambuim em long beten long Jehova? (Stat 39:7-16; Daniel 6:4-11) Tupela i pas gut wantaim God na dispela samting i helpim tupela long sanap strong na winim traim. Dispela samting inap helpim yumi tu long winim traim!
15. Yumi mas ting olsem wanem long ol miting Kristen? Bilong wanem yumi mas i gat dispela tingting?
15 Orait, olsem wanem long pasin bilong i go long ol 5-pela miting bilong yumi long olgeta wik? Yumi tingim gut dispela samting? O sapos skin bilong yumi i les, o yumi gat liklik sik, o liklik ren i kam daun, yumi lusim dispela wok bilong yumi long bung wantaim ol brata? (Hibru 10:24, 25) Wanpela man long Amerika em i gat wok long ol masin na em i save kisim bikpela pe, tasol planti taim wok bilong em i pasim em na em i no inap i go long ol miting Kristen. Olsem na em i lusim dispela wok na em i kisim narapela wok i no gat bikpela pe olsem, bambai em inap i go long olgeta miting long olgeta taim. Long ol miting yumi inap toktok wantaim ol brata na strongim bel bilong ol, na bai bilip bilong narapela i helpim bilip bilong narapela. (Rom 1:11, 12) Long olgeta dispela samting, sapos “man i planim planti, em bai i kisim planti,” a? (2 Korin 9:6) Tru tumas, sapos yumi mekim ol dispela samting bilong kamapim bel bilong yumi olsem yumi givim bel tru long God, dispela i olsem gutpela pe yumi kisim.
Pasin Bilong Givim Bel Tru na Wok Bilong Yumi long Autim Tok
16. Sapos yumi givim bel tru long God na long ol man na dispela i kirapim yumi long autim tok long kain kain taim na rot, wanem gutpela samting inap kamap?
16 Yumi lain bilong Jehova yumi givim bel tru long God na long ol narapela man na dispela i kirapim yumi long autim tok bilong Kingdom na mekim dispela wok long kain kain taim na ples. Ating yumi pret liklik long autim tok long ol man long kain kain taim na ples, tasol sapos yumi givim bel tru long God na long ol man bai yumi no inap pasim maus. Tru tumas, pasin bilong givim bel tru bai kirapim yumi long tingim ol gutpela rot bilong kirapim toktok wantaim man na stiaim tok i go long samting bilong Kingdom. Olsem: Wanpela elda Kristen i kalap long balus na ol i givim sia long em klostu long wanpela pris Katolik. Kwiktaim elda i kirap givim sampela askim long pris, em ol askim i no ken skrapim bel bilong pris. Dispela i kirapim tingting bilong pris na em i laik harim tok, na taim em i laik lusim balus i go daun em i kisim tupela buk bilong yumi long dispela elda. Em nau, gutpela samting tru i kamap long wok bilong autim tok long kain kain taim na ples!
17, 18. Sapos yumi givim bel tru, dispela bai kirapim yumi long mekim wanem long wok bilong autim tok?
17 Pasin bilong givim bel tru i kirapim yumi long go oltaim long haus bilong ol man na autim tok, na mekim ol narapela wok bilong autim tok. Sapos yumi wok strong long toktok wantaim ol man long ol tok bilong Baibel, dispela bai helpim yumi long litimapim nem bilong God Jehova, na bai yumi inap helpim ol manmeri i kain olsem sipsip long bihainim rot bilong kisim laip i stap oltaim. (Lukim Matyu 7:13, 14.) Na sapos yumi go long haus bilong ol man, tasol ol i no laik toktok wantaim yumi long Baibel, wok bilong yumi i no lus nating, long wanem, ol i lukim yumi i mekim dispela wok na dispela tu i litimapim nem bilong God. Na wok bilong autim tok i helpim yumi yet, long wanem, taim yumi autim ol tok i tru bilong Baibel long ol narapela man, dispela i strongim bilip bilong yumi yet. Tru, yumi mas i gat pasin daun bambai yumi inap i go long haus bilong ol man na ‘mekim olgeta wok bilong helpim gutnius bilong Jisas i kamap strong, na helpim ol narapela man long bilip long en.’ (1 Korin 9:19-23) Tasol yumi givim bel long God na long ol narapela man, olsem na long pasin daun yumi wok strong na yumi kisim gutpela pe—yumi kisim planti blesing.—Sindaun 10:22.
18 Na pasin bilong givim bel tru i kirapim ol wokboi bilong Jehova long i go bek lukim ol man i laik save long tok i tru bilong Baibel. Taim yumi go mekim Baibel-stadi wantaim man long olgeta wik inap planti planti mun, yumi save lusim bikpela hap taim na strong na mani samting bilong yumi long mekim na dispela i kamapim bel bilong yumi, em yumi givim bel tru long God na long ol man. (Mak 12:28-31) Na taim yumi lukim wanpela Baibel-stadi bilong yumi i kamap strong na em i kisim baptais, na ating em i kirap mekim wok painia, yumi save tru olsem pasin bilong givim bel i gat gutpela pe bilong en!—Lukim 2 Korin 3:1-3.
19. Sapos yu givim bel tru long God na long ol man, bai yu gat wanem tingting long mekim wok bilong God oltaim, olsem mekim wok painia?
19 Sapos yumi givim bel tru long God na long ol man na yumi no tingting long helpim yumi yet tasol, bai yumi amamas long lusim sampela samting bilong givim gutpela sindaun long yumi bambai yumi ken mekim wok bilong God oltaim, olsem mekim wok painia, sapos yumi inap long mekim. Planti tausen tausen Witnes i bin bihainim pasin olsem bilong kamapim bel bilong ol, olsem ol i givim bel tru long God na long ol narapela man, na long dispela rot ol i bin kisim gutpela pe tru. Sapos yu inap mekim wok bilong God oltaim, olsem mekim wok painia samting, tasol yu no mekim, yu lus long planti blesing.—Lukim Mak 10:29, 30.
Ol Narapela Gutpela Pe
20. Olsem wanem pasin bilong givim bel tru i helpim yumi long lusim tingting long rong narapela man i mekim long yumi?
20 Narapela gutpela pe yumi kisim long pasin bilong givim bel tru em olsem: Dispela pasin i helpim yumi long lusim tingting long rong narapela man i mekim long yumi. Tru tumas, man i givim bel tru long ol narapela man em i “no save tingim rong ol i mekim long em.” Yes, “pasin bilong laikim tru ol arapela, em i save karamapim planti sin.” (1 Korin 13:5; 1 Pita 4:8) Sapos yu lusim rong narapela man i mekim long yu, bai yu kisim gutpela pe! Dispela bai mekim gut bel bilong yu yet na bel bilong dispela man. Na bikpela samting tru em olsem: Yumi mas lusim rong bilong narapela man pastaim, na nau Jehova i ken lusim rong bilong yumi.—Matyu 6:12; 18:23-35.
21. Olsem wanem pasin bilong givim bel tru i helpim yumi long daun long ol narapela?
21 Na tu, sapos yumi givim bel tru long ol narapela, dispela bai helpim yumi long daun long ol. Sapos yumi givim bel tru long Jehova, bai yumi stap aninit long strongpela han bilong em. (1 Pita 5:6) Na sapos yumi givim bel tru long em, dispela bai kirapim yumi long i stap aninit long dispela lain em i bin givim wok long ol olsem “wokboi i gat gutpela tingting, na i save mekim gut wok bilong en.” Na bai yumi aninit long ol elda insait long kongrigesen. Dispela pasin bai givim gutpela pe long yumi, long wanem, sapos yumi no mekim olsem, dispela bai “i no helpim” yumi. (Matyu 24:45-47; Hibru 13:17) Na insait long famili tu yumi mas bihainim dispela lo bilong daun long narapela. Dispela pasin i gat gutpela pe bilong en—em i save kamapim amamas insait long famili, na helpim famili long pas gut wantaim na i stap wanbel, na yumi save amamas, long wanem, yumi save yumi mekim pasin God i laikim.—Efesus 5:22; 6:1-3.
22. Yumi mas mekim wanem na bai yumi inap i stap amamas tru?
22 Tru tumas, nambawan gutpela pasin yumi mas wok long bihainim, em pasin bilong givim bel long ol narapela na helpim ol na yumi no tingting long helpim yumi yet tasol. Stretpela lo i as bilong dispela kain pasin bilong givim bel long ol narapela (tok Grik, a·gaʹpe). Sapos yumi givim bel tru long God na long ol man, dispela pasin i gat gutpela pe bilong en. Olsem na sapos yumi laik i stap amamas tru, yumi mas wok strong moa long kisim dispela pasin na bihainim, na bai yumi litimapim nem bilong God bilong yumi, em Jehova, em i laikim tumas yumi.
Bai Yu Bekim Wanem Tok?
◻ Long wanem ol rot God Jehova i bin kamapim klia olsem em i givim bel tru long ol man?
◻ Olsem wanem Krais Jisas i bin kamapim klia olsem em i givim bel tru long God na long ol man?
◻ Pol i bin mekim wanem na em i stap olsem gutpela piksa bilong pasin bilong givim bel tru long God na long ol man?
◻ Ol Witnes Bilong Jehova i mekim wanem na ol i kamapim bel bilong ol, olsem ol i givim bel tru long God na long ol man?
◻ I gat wanem as na yu ting pasin bilong givim bel tru i gat gutpela pe?
[Piksa long pes 24]
Jehova i laikim tumas ol manmeri na dispela i kirapim em long givim Pikinini bilong em bambai yumi ken kisim laip i stap oltaim. Yu pilim dispela pasin bilong givim bel tru?
[Piksa long pes 26]
Sapos yumi givim bel tru long Jehova, dispela bai kirapim yumi long “beten long olgeta taim”