Ripot long Wok Bilong Kingdom
Ol i Autim Tok “Long Olgeta Hap Bilong Graun”
PASLAIN liklik long taim Jisas i dai em i tokim ol disaipel: “Bai ol i autim dispela gutnius bilong Kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” Bihain liklik long taim em i kirap bek, em i tok moa olsem: “Yupela bai i autim tok bilong mi long Jerusalem, na long olgeta hap bilong Judia, na long distrik Samaria, na i go inap long olgeta hap bilong graun.” (Matyu 24:14; Aposel 1:8) Long nau truim bilong ol dispela tok profet i wok long kamap long planti kantri, winim 200, na wanpela bilong ol dispela kantri em kantri Peru, long Saut Amerika.
Winim 32,000 Witnes i autim tok long dispela naispela kantri. Ol i autim tok long “olgeta hap” long kantri bilong ol—long ol bikpela maunten Andis i go antap inap 4,200 na 4,500 mita, na long ples hat bilong bikbus bilong Wara Amason, em ol man i mas raun long bot bilong lukim ol manmeri i stap long dispela hap. Brens-ofis bilong Peru i salim ripot na i tok:
◻ “Long hap bilong bikbus mipela makim 8-pela painia salim bilong raun long tupela liklik bot, olsem pinas (lanchas). Ol dispela liklik bot inap raun long wara i no daun tumas, olsem na ol painia inap autim tok long planti ples long ol han wara, em bipo ol i no inap autim tok long en. Ol brata i mekim wok long ol dispela bot na ol i tilim pinis planti handet tausen nius na buk na Baibel long ol manmeri long olgeta hap bilong ples daun bilong Amason long Peru. Ol i mekim dispela bikpela wok, olsem na 4-pela nupela kongrigesen i kamap, na i gat 5-pela liklik lain pablisa ol i stap longwe long ol kongrigesen, na ol dispela pablisa i save autim tok na mekim ol miting. Mipela i ting, i no longtaim na bai kongrigesen i kamap long ol hap em ol dispela liklik lain pablisa i stap long en.”
◻ Wanpela kampani (Trans-Andean) i wokim wanpela stesen long bikbus bilong pamim wel long ol paip i brukim ol bikpela maunten Andis na i go kamap long nambis long hap wes bilong Peru. Long dispela stesen wanpela taun i kamap. I gat ol man i wok long ol paip bilong wel, olsem na dispela taun i gat tupela ten ba, na taun i kisim nem olsem ples bilong dring spak na painim amamas. Tasol ol painia salim i autim gut tok bilong Kingdom long dispela taun, na planti man i harim tok, olsem na nau i gat 4-pela ba tasol i stap yet long taun! Wasman sekit i bin raun long dispela hap, na taim em i mekim pablik-tok, inap olsem 189 manmeri i kam harim tok. Nau i gat 7-pela pablisa long dispela taun na winim 45 manmeri i save go long olgeta miting. Jehova i wok long blesim wok bilong ol, na ating liklik taim bihain wanpela kongrigesen bai kamap.
◻ Nambawan biktaun bilong Peru em Lima, na i gat 221 kongrigesen i stap long dispela biktaun. Long wanpela kongrigesen long Lima i gat wanpela man i stap em i gat 29 krismas. Em i stori long rot bilong em i bin kisim save long tok i tru. Taim em i gat 13 krismas em i lusim skul na em i go bung wantaim ol raskol na em i kirap long pait na kisim drak na mekim pasin pamuk. Lo bilong gavman i tok, olgeta man i mas insait long ami inap tupela yia na taim dispela man inapim pinis tupela yia bilong em, nau em i kisim sik longlong. Long yia 1983, wanpela sista i gat pasin daun em i autim tok long ol haus na em i bungim dispela man. Em namba wan taim bilong dispela man long harim tok long nupela taim bai kamap, na bai pasin sori na bel isi tasol i stap long en. Em i kirap long stadi long Baibel, na strong bilong Jehova na gutpela pasin sori bilong kongrigesen i helpim em long lusim ol pasin nogut bilong em. Long 1986 em i kisim baptais, na nau em i holim wok olsem wanpela wokman bilong kongrigesen.
Jisas i tok, bai ol i autim gutpela tok bilong Kingdom long “olgeta hap bilong graun,” na tru tumas ol i mekim olsem long Peru na wok bilong ol i kamap gutpela. Ol i helpim planti man bilong dispela kantri, em ol i hangre long kisim save long tok i tru.