Ripot Long Wok Bilong Kingdom

Ol i Stap Long Katmandu na Ol i Kisim Bilip

LONG 1980, wanpela meri bilong wokim ol piksa, em i stap long Britani, long Frans, na em i laik kisim save long tok i tru. Em i toktok wantaim sampela manmeri bilong lotu Pentikos, na em i wok long kisim save tu long ol lotu haiden bilong hap bilong Is​—⁠tasol em i no kisim save long tok i tru. Bihain em i toktok wantaim wanpela Witnes Bilong Jehova inap sampela taim, tasol i no longtaim na em i no toktok moa wantaim em. Em i bungim wanpela man, em tu i save wokim ol piksa, na em i go sindaun wantaim dispela man na tupela i wok wantaim.

Tupela i no marit, tasol bihain liklik tupela i go lukim ples Nepal. Ol i laikim tru dispela naispela ples i stap isi. Tasol ol i no laikim wanpela pasin bilong ples, em ol as ples i bruk long narapela narapela lain na i tambu long ol i poroman wantaim. Tupela i bilong hap bilong Wes na long ai bilong ol, dispela pasin i no stret.

Taim tupela i go bek long Frans, dispela meri i tokim poroman bilong em em i laik bai tupela i stadi na kisim save long ol tok bilong Baibel, na em i kirap nogut, long wanem poroman bilong em i orait long dispela samting. Tupela i go painim dispela Witnes em meri i bin toktok wantaim em inap olsem tupela yia bipo. Pastaim ol i mekim wok long Baibel tasol, tasol bihain tupela i orait long mekim wok long buk Tok i Tru i Bringim Man long Laip Oltaim na bihain moa ol i mekim wok long buk Yu Inap i Stap Oltaim long Paradais long Graun. Tupela i no stadi inap wanpela yia yet na ol i lusim pasin bilong kisim drak.

Ol i go lukim Nepal gen inap tupela mun na ol i go bek long Frans na stadi gen. Ol i lusim pasin bilong smok na pasin bilong i go long ol ba na disko, na ol i kirap long i go long ol miting bilong ol Witnes Bilong Jehova. Tasol taim ol i stadi pinis long ol tok bilong buk Stap Oltaim, ol i tok ol i no laik stadi moa.

Ol i go long Nepal gen, na ol i stap long wanpela liklik haus long as bilong ol maunten Himalea. Wanpela taim, wanpela lapun man i bilas gut em i kam paitim dua long haus bilong ol. Meri tasol i stap long haus, na em i ting dispela man i kam bilong baim sampela piksa bilong tupela. Tasol em i kirap nogut, long wanem, dispela man em i wanpela Witnes, na Witnes i bin stadi wantaim tupela long Frans i bin tokim em i kam lukim ol. I no longtaim na poroman bilong dispela meri i kam bek long haus, na tripela i toktok wantaim inap tupela aua.

Sampela de bihain, tupela i go long wanpela miting bilong ol Witnes Bilong Jehova long Katmandu, na ol i amamas long lukim ol manmeri long dispela miting ol i mekim gut skin na bilas gut. Na ol i lukim olsem narapela i laikim tru narapela na ol i stap amamas, wankain olsem ol Witnes ol i bin lukim long Frans. Na ol i lukim ol Nepal long dispela miting ol i stap wanbel, maski ol i bilong narapela narapela lain bilong ples, olsem lain maniman o lain rabisman. Nau ol i save, dispela lain em lain tru bilong Jehova.

Wanpela mun bihain ol i go bek long Frans, na wantu ol i kirap stadi gen na ol i go long ol miting. Tupela i rejistaim marit bilong tupela, na ol i kirap mekim wok autim tok, na bihain tupela i kisim baptais. Nau dispela man i stap wanpela wokman bilong kongrigesen, na planti taim meri bilong em i save mekim wok painia haptaim. Tru tumas, spirit bilong Jehova i save helpim ol man i gat gutpela bel bambai ol inap kisim save na lotuim Em.​—⁠Kamapim Tok Hait 7⁠:​15-17.

[Blok/Mep long pes 9]

Nepal

Hamas Manmeri- 17,712,221

Hamas Pablisa long 1990 - 63

Wanpela Pablisa long Hamas Man - 281,146

Hamas Painia - 10

Hamas Kongrigesen - 1

Hamas Baibel stadi - 107

Hamas i Kam long Memorial - 220

[Mep]

(Bilong save ol dispela rait i stap we long pes, lukim buk o magasin)

NEPAL

INDIA

[Piksa long pes 9]

Ples maket long Katmandu, long Nepal