Stap Klostu Long Jehova
“Beten long olgeta taim.”—ROM 12:12.
1. Wanem laik bilong Jehova long beten? Aposel Pol i stori long beten na em i kirapim yumi long mekim wanem?
JEHOVA em i dispela “God i bin promis long givim yumi ol dispela gutpela samting yumi wet long kisim.” Em i Man bilong “harim beten” na em i save harim beten bilong ol bilipman i save beten askim em long helpim ol bambai ol inap kisim ol samting ol i amamas na wet long kisim. (Rom 15:13; Buk Song 65:2) Na long rot bilong Baibel em i kirapim olgeta wokboi bilong em long kam long em long rot bilong beten long wanem wanem taim ol i laik mekim. Oltaim em i redi i stap—em i laik bai ol i kamapim hevi bilong ol long em. Em i kirapim ol long “beten long olgeta taim” na “beten oltaim.” (Rom 12:12; 1 Tesalonaika 5:17) Em laik bilong Jehova long olgeta Kristen i mas beten long em long olgeta taim; ol i mas kamapim olgeta tingting bilong bel bilong ol long em, na ol i mas mekim long nem bilong Pikinini bilong em, Krais Jisas.—Jon 14:6, 13, 14.
2, 3. (a) Bilong wanem God i tok yumi mas “beten long olgeta taim”? (b) I gat wanem samting na yumi ken save tru, God i laik bai yumi beten long em?
2 Bilong wanem God i kirapim yumi long mekim olsem? Long wanem, i gat planti samting i givim hevi long tingting bilong yumi na i gat planti wok yumi mas mekim, na dispela inap pasim yumi na bai yumi lusim tingting long beten. Na i gat ol hevi i save painim yumi na ol inap daunim yumi, na bai yumi no amamas moa long gutpela samting yumi wetim na yumi lusim pasin bilong beten. Olsem na yumi mas kisim ol tok bilong kirapim tingting bilong yumi na strongim yumi long beten na go klostu tru long dispela Man em i save helpim yumi na mekim isi bel bilong yumi, em God bilong yumi, Jehova.
3 Disaipel Jems i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Tru tumas, God i no stap antap tumas o longwe tumas na bai em i no inap harim beten bilong yumi, maski yumi sinman nating bilong graun. (Aposel 17:27) Na em i no save les long yumi. Em i save tingim gut yumi. Baibel i tok: “Bikpela i save lukautim ol stretpela manmeri, na em i save harim beten bilong ol.”—Buk Song 34:15; 1 Pita 3:12.
4. Yumi ken mekim wanem tok piksa bilong makim pasin bilong Jehova long putim gut yau long beten?
4 Jehova i laik bai yumi beten long em. Yumi ken tok piksa long dispela olsem: Sampela manmeri i bung na toktok wantaim. Yu stap wantaim ol na harim ol tok ol i mekim. Yu stap bilong lukluk tasol. Tasol nau wanpela i tanim lukluk long yu, na em i kolim nem bilong yu, na em i toktok long yu stret. Dispela i pulim tingting bilong yu na yu putim yau stret long tok bilong em. Na olsem tasol God i save tingting oltaim long ol manmeri bilong em, maski ol i stap we. (2 Stori 16:9; Sindaun 15:3) Olsem na em i save harim ol tok yumi mekim. I olsem em i stap klostu long yumi na lukluk long yumi—em i save was long yumi na lukautim yumi na tingim yumi. Tasol taim yumi beten long em na kolim nem bilong em, i olsem yumi pulim tingting bilong em na em i putim yau stret long ol tok yumi mekim. Jehova i gat kain kain strong na em inap save long beten man i mekim insait long bel, maski man i no kolim long maus. God i tok promis long harim beten bilong ol man i bilip tru long em na ol i singaut long nem bilong em na wok long i stap klostu long em.—Buk Song 145:18.
God i Tingim Laik Bilong Em na Helpim Man i Beten Long Em
5. (a) Dispela tok “beten long olgeta taim” i makim wanem samting long beten bilong yumi? (b) God i save harim beten na helpim man olsem wanem?
5 God i tokim yumi long beten oltaim na ating dispela i makim olsem sampela taim bai em i larim yumi i beten askim em long wanpela samting inap longtaim liklik, na bihain bai yumi lukim ol samting em i mekim bilong helpim yumi na yumi save em i harim beten bilong yumi. Sapos yumi beten askim God long sori long yumi na yumi ting em i mas helpim kwik yumi, tasol i olsem yumi wet longtaim, orait ating bai yumi les na yumi no laik beten moa. Tasol God i no laik bai yumi kisim dispela kain tingting, olsem na em i tokim yumi strong olsem yumi mas beten oltaim. Yumi mas wok strong long beten na kamapim ol hevi bilong yumi long em, na yumi ken bilip tru olsem em bai harim na mekim ol samting bilong helpim tru yumi, na em i no ken mekim tasol ol samting yumi ting em i mas mekim. God Jehova i save tingim laik bilong em na em i helpim yumi. Olsem: Ating samting yumi askim God long en inap nogutim narapela man. Yumi ken tok piksa long dispela olsem: Wanpela papa i gat tupela pikinini man. Namba wan i askim papa long baim wilwil bilong em. Papa i save, sapos em i baim wilwil bilong dispela pikinini, bai narapela pikinini tu i laikim wilwil. Tasol dispela namba 2 pikinini i liklik yet na papa i save, sapos em i gat wilwil ating bagarap inap painim em. Papa i skelim gut ol dispela samting na em i no baim wilwil bilong pikinini long dispela taim. Olsem tasol Papa bilong yumi long heven i save skelim gut taim stret bilong mekim ol samting bambai laik bilong em i ken kamap, na em i mekim ol samting bilong helpim tru yumi yet na ol narapela man.—Buk Song 84:8, 11; lukim tu Habakuk 2:3.
6. Jisas i mekim wanem tok piksa long pasin bilong beten? Sapos yumi no les long beten, dispela bai kamapim klia wanem samting?
6 Yumi mas tingim wanpela tok piksa Jisas i mekim bilong helpim ol disaipel bilong em long save ol i mas “beten long olgeta taim, na ol i no ken les.” Wanpela meri, man bilong em i dai pinis, i askim wanpela jas long helpim em long kot, tasol pastaim dispela jas i no laik helpim em. Olsem na meri i wok long askim askim jas long helpim em na nau dispela man i kirap helpim em. Jisas i tok: “Orait olsem wanem? Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai i no helpim ol, a? Ating em bai i wet wet na i no helpim ol kwik, a? Nogat tru.” (Luk 18:1-7) Sapos yumi no les long beten, dispela i kamapim klia olsem yumi bilip long Jehova, na wetim em i helpim yumi, na yumi laik i go klostu long em long rot bilong beten na putim hevi bilong yumi long han bilong em bambai em i ken helpim yumi.—Hibru 11:6.
Ol Man i Bin i Stap Klostu Long God
7. Olsem wanem yumi ken bihainim pasin bilong Abel long bilip na i stap klostu long Jehova?
7 Baibel i stori long planti beten ol wokboi bilong God i bin mekim. Ol i bin raitim ol dispela stori long Baibel “bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Sapos yumi skelim stori bilong sampela man i bin stap klostu long God long bel na long tingting bilong ol, dispela inap helpim yumi long bilip strong moa long ol samting yumi wetim i stap. Abel i mekim ofa long God na God i laikim. Baibel i no stori long Abel i mekim beten long dispela taim, tasol yumi save em i mas beten askim God long orait long dispela ofa. Long Hibru 11:4, Baibel i tok: “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as . . . God i kolim em stretpela man.” Abel i save long tok promis bilong God long Stat 3:15, tasol sapos yumi tingim ol samting yumi save long en long nau, yumi ken tok Abel i save liklik tasol. Tasol samting Abel i save long en i kirapim em long bilip long God na mekim wok. Olsem tasol long nau sampela nupela man long lain bilong God ol i no gat bikpela save, tasol ol i save beten, na liklik save ol i kisim pinis i kirapim ol long bilip na mekim wok, olsem Abel.
8. Olsem wanem yumi ken save tru, Abraham i bin stap klostu long Jehova? Na yumi mas givim wanem askim long skin bilong yumi yet?
8 Narapela gutpela wokboi bilong God em Abraham, “em i stap namba wan tumbuna bilong olgeta man . . . i bilip long God.” (Rom 4:11) Long nau, winim olgeta taim bipo, yumi mas i gat strongpela bilip, na yumi mas bilip na beten olsem Abraham i bin mekim. Long Stat 12:8, Baibel i tok Abraham i wokim wanpela alta na “em i kolim nem bilong Bikpela na i lotu long em.” Abraham i save long nem bilong God, na taim em i beten long God, em i kolim dispela nem. Planti taim em i beten. Em i no les long mekim. Em i lotu long Jehova, “em God i save stap oltaim oltaim.” (Stat 13:4; 21:33) Abraham i save bilip long God na em i singaut long nem bilong Em. Abraham i kisim biknem olsem man bilong bilip. (Hibru 11:17-19) Pasin bilong beten i helpim Abraham long amamas tru na wetim Kingdom. Olsem wanem? Yumi bihainim pasin bilong Abraham na yumi beten oltaim?
9. (a) Olsem wanem ol beten bilong Devit inap helpim tru lain bilong God long nau? (b) Sapos yumi beten olsem Devit i bin makim bambai em inap i stap klostu long Jehova, wanem samting inap kamap?
9 Devit em i nambawan man tru bilong beten oltaim, na ol tok em i raitim long Buk Song i makim ol kain tok yumi ken mekim taim yumi beten. Olsem: Ol wokboi bilong God i ken beten askim God long helpim ol na kisim bek ol (Buk Song 3:7, 8; 60:5), na soim rot long ol (Buk Song 25:4, 5), na lukautim ol (Buk Song 17:8), na tekewe rong bilong ol (Buk Song 25:7, 11, 18), na mekim bel bilong ol i kamap klin (Buk Song 51:10). Taim bel bilong Devit i hevi, em i save beten askim God long ‘givim amamas long bel bilong em.’ (Buk Song 86:4) Yumi tu yumi ken beten askim God long mekim bel bilong yumi i amamas, long wanem, yumi save Jehova i laik bai yumi amamas na wetim ol gutpela samting em i tok pinis long givim long yumi. Devit i stap klostu long Jehova long bel na long tingting bilong em na em i beten na tok olsem: “Mi save wokabaut wantaim yu, na yu save was gut long mi.” (Buk Song 63:8) Olsem wanem? Bai yumi stap klostu long Jehova, olsem Devit i bin mekim? Sapos yumi mekim olsem, bai Jehova i was gut long yumi tu.
10. Wanpela taim Asap i bin kisim wanem tingting kranki? Tasol bihain em i kisim wanem save?
10 Sapos yumi laik i stap klostu long Jehova, yumi no ken mangalim ol samting bilong ol man nogut, em ol i kisim planti samting bilong skin na i olsem ol i no gat hevi. Wanpela taim wanpela man bilong raitim song long Baibel, nem bilong em Asap, em i lukim ol man nogut “i gat planti samting, [na] ol i wok long kisim moa yet,” na em i pilim olsem i no gutpela em i mekim wok bilong Jehova. Tasol em i save, dispela tingting bilong em i kranki na ol man nogut “i wokabaut long rot i wel moa yet.” Em i save em i mas stap klostu long Jehova, no gat gutpela rot i winim dispela. Em i beten long God na tok olsem: “Mi stap wantaim yu oltaim na yu save holim han bilong mi. Tru tumas, ol manmeri i givim baksait long yu bai ol i lus olgeta . . . Tasol mi, mi stap klostu long yu na dispela i gutpela tru. God, Bikpela, yu banis tru bilong mi, na mi laik tokaut long olgeta samting yu bin mekim.” (Buk Song 73:12, 13, 18, 23, 27, 28) Yumi no ken mangalim i stap bilong ol man nogut, em ol i gat planti samting na i olsem ol i no gat hevi, tasol i no gat wanpela gutpela samting ol i ken wetim i kamap. Yumi mas bihainim pasin bilong Asap na stap klostu long Jehova.
11. Olsem wanem Daniel i olsem gutpela piksa long pasin bilong i stap klostu long Jehova? Olsem wanem yumi ken bihainim pasin bilong em?
11 Daniel i save beten oltaim. Em i wok strong long beten, maski king i tambuim dispela na i tok long tromoi ol man long hul bilong laion sapos ol i sakim dispela tambu. Tasol Jehova i helpim Daniel—em i “salim ensel bilong en i kam na i pasim maus bilong ol laion.” (Daniel 6:7-10, 22, 27) Daniel i save beten long olgeta taim na long dispela as em i kisim bikpela blesing. Olsem wanem? Yumi tu yumi save beten oltaim, maski ol man i birua long wok bilong yumi long autim tok bilong Kingdom?
Jisas, Em Piksa Bilong Yumi
12. (a) Taim Jisas i kirap long mekim wok bilong em long graun, em i makim wanem gutpela pasin long beten? Olsem wanem dispela inap helpim yumi long nau? (b) Beten Jisas i lainim ol disaipel long en i kamapim klia wanem samting long beten?
12 Taim Jisas i kirap mekim wok bilong em long graun na i go inap long em i dai, em i save beten. Taim em i baptais, em i beten na dispela i makim gutpela pasin ol manmeri long nau i ken bihainim taim ol i kisim baptais long wara. (Luk 3:21, 22) Baptais i makim olsem ol i bin tok promis long mekim wok bilong God, olsem na ol i ken beten askim God long helpim ol long truim dispela tok promis. Na Jisas i bin helpim ol narapela long i go klostu long Jehova long rot bilong beten. Wanpela taim Jisas i beten long wanpela hap, na bihain wanpela disaipel i tokim em olsem: “Bikpela, yu skulim mipela long mekim [beten].” Nau Jisas i kolim wanpela beten i makim gut ol beten yumi ken mekim. Taim Jisas i kolim dispela beten, ol samting em i kolim pastaim i makim olsem yumi mas tingim nem na laik bilong God i nambawan bikpela samting. (Luk 11:1-4) Olsem na taim yumi mekim beten, yumi mas tingting gut, nogut yumi lusim ol samting i nambawan bikpela samting. (Filipai 1:9, 10) Tru, sampela taim i gat sampela bikpela samting bilong yumi yet o wanpela bikpela hevi yumi laik askim God long en. Ol Kristen i ken bihainim pasin bilong Jisas na i go klostu long God long rot bilong beten na askim em long helpim ol long mekim sampela wok ol i kisim, o long helpim ol long sanap strong long traim o long samting i laik bagarapim ol. (Matyu 26:36-44) Yumi ken beten askim God long helpim yumi yet long olgeta hevi na olgeta kain kain samting i save painim yumi.
13. Olsem wanem Jisas i makim olsem i bikpela samting yumi mas beten bilong helpim ol narapela?
13 Gutpela pasin bilong Jisas i kamapim klia olsem i bikpela samting yumi mas beten bilong helpim ol narapela man. Jisas i save ol man bai bel nogut long ol disaipel bilong em na mekim nogut long ol, olsem ol man i bin mekim long em yet. (Jon 15:18-20; 1 Pita 5:9) Olsem na em i beten askim God long “lukautim ol, na man nogut i no ken bagarapim ol.” (Jon 17:9, 11, 15, 20) Na Jisas i save bikpela traim bai painim Pita, olsem na em i tokim Pita: “Mi beten pinis bilong helpim yu, bai bilip bilong yu i no ken pundaun.” (Luk 22:32) I gutpela tru sapos yumi tu i beten oltaim bilong helpim ol brata, olsem bai yumi tingim ol narapela man na yumi no tingim yumi yet tasol na ol hevi bilong yumi tasol!—Filipai 2:4; Kolosi 1:9, 10.
14. Olsem wanem yumi save Jisas i bin stap klostu tru long Jehova taim em i kirap mekim wok bilong em long graun na i go inap long taim em i dai? Olsem wanem yumi ken bihainim pasin bilong em?
14 Taim Jisas i mekim wok bilong em long graun, oltaim em i save beten. Long dispela rot em i stap klostu tru long Jehova. (Hibru 5:7-10) Long Aposel 2:25-28, Pita i kolim tok bilong Buk Song 16:8 bilong makim Krais Jisas. Em i tok: “Bipo Devit tu i bin tok olsem long em, ‘Mi lukim Bikpela i stap klostu tru long mi oltaim. Em i stap klostu na i givim strong long mi, olsem na i no gat wanpela samting i ken mekim mi i pret na guria.’ ” Yumi tu i ken mekim olsem. Yumi ken beten askim God long i stap klostu long yumi, na maski yumi no inap lukim em, yumi ken tingting long em oltaim na dispela bai kamapim klia olsem yumi bilip tru long em. (Lukim Buk Song 110:5; Aisaia 41:10, 13.) Long dispela rot bai yumi abrusim kain kain hevi, long wanem, Jehova bai sambai long yumi na yumi no ken pret na guria.
15. (a) Yumi no ken les long beten long wanem samting? (b) Yumi mas tenkyu long God na was gut long wanem samting?
15 Long olgeta taim yumi mas tenkyu long Jehova long olgeta gutpela pasin em i mekim bilong helpim yumi. Tru tumas, yumi mas tenkyu long em, long wanem, em i “mekim gut” long yumi—em i givim Pikinini bilong em tu olsem ofa bilong tekewe ol rong bilong yumi. (2 Korin 9:14, 15; Mak 10:45; Jon 3:16; Rom 8:32; 1 Jon 4:9, 10) Long nem bilong Jisas, “oltaim [yumi] mas givim tenkyu long God Papa long olgeta samting.” (Efesus 5:19, 20; Kolosi 4:2; 1 Tesalonaika 5:18) Yumi mas was gut, nogut yumi tingting tumas long ol samting yumi no gat na ol hevi bilong yumi, na yumi no laik tenkyu long God long ol samting yumi kisim pinis.
Putim Hevi Bilong Yumi Long Jehova
16. Taim yumi tingting planti long wanpela hevi i painim yumi, yumi mas mekim wanem?
16 Sapos yumi beten oltaim, dispela bai kamapim klia olsem yumi givim bel tru long God. Taim yumi beten askim God long helpim yumi, dispela i mekim gut bel bilong yumi, maski em i no helpim yet yumi. Sapos i gat wanpela hevi yumi tingting planti long en, yumi ken i stap klostu long Jehova sapos yumi bihainim dispela tok, olsem: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Buk Song 55:22) Taim yumi putim olgeta hevi bilong yumi long God, olsem olgeta samting yumi tingting planti long en o bel hevi long en o pret long en samting, na yumi bilip tru long God, dispela i mekim bel bilong yumi i stap isi. Yumi kisim dispela “bel isi God i save givim yumi.”—Filipai 4:4, 7; Buk Song 68:19; Mak 11:24; 1 Pita 5:7.
17. Olsem wanem yumi ken kisim bel isi God i save givim long yumi?
17 Yu ting yumi inap kisim dispela bel isi bilong God wantu tasol? Tru, ating kwiktaim bai bel bilong yumi i stap isi liklik, tasol yumi mas tingim tu ol tok Jisas i mekim taim em i tok yumi mas beten askim God long givim spirit holi long yumi. Em i tok: “Yupela i mas [wok long beten] na askim God long givim ol samting long yupela, na em bai i givim long yupela. Yupela i mas wok long painim samting, na bai yupela i lukim. Yupela i mas [wok long] paitim dua, na God bai i opim long yupela.” (Luk 11:9-13) Sapos yumi tingting planti long sampela samting, spirit holi em rot bilong mekim isi bel na tingting bilong yumi. Olsem na yumi mas wok long askim God long givim bel isi long yumi na wok long askim em long helpim yumi long ol hevi bilong yumi. Yumi no ken les long mekim. Sapos yumi wok strong long beten oltaim, yumi ken save bai yumi kisim dispela bel isi yumi laik kisim.
18. Sapos yumi no save long samting yumi mas beten long en, Jehova i save helpim yumi olsem wanem?
18 Tasol olsem wanem sapos yumi no save wanem samting yumi mas askim God long en? Planti taim yumi tingting planti na krai long bel, tasol yumi no tokaut long Jehova, long wanem, yumi no save gut long as bilong dispela samting i painim yumi, o yumi no save yumi mas beten long wanem samting. Long kain taim olsem, spirit holi inap helpim yumi. Pol i tok: “Yumi no save yumi mas [beten] long wanem samting. Yumi save krai long bel tasol, na yumi no inap long tokaut. Na long dispela pasin Holi Spirit yet i save [beten] bilong helpim yumi.” (Rom 8:26) Dispela samting i kamap olsem wanem? Long Baibel i gat ol tok profet na beten i stret long samting i painim yumi. Spirit holi i bin kamapim ol dispela tok. God i larim ol dispela tok profet na beten i helpim yumi, i olsem yumi yet i mekim ol dispela tok na em i tingim na helpim yumi, long wanem, em i save bai yumi mekim kain tok olsem sapos yumi save ol dispela tok i stret bilong helpim yumi.
Beten na Wetim God—Dispela Tupela Pasin Bai Stap Oltaim
19. Olsem wanem na pasin bilong beten na pasin bilong wetim God, dispela tupela pasin bai stap oltaim?
19 Pasin bilong beten long Papa bilong yumi long heven, dispela pasin bai stap oltaim. Long nupela taim tu bai yumi beten tenkyu long God long dispela gutpela taim na ol blesing bilong en. (Aisaia 65:24; Kamapim Tok Hait 21:5) Na oltaim bai yumi amamas na wetim God—long olgeta taim bai i gat sampela samting yumi mas wetim God i mekim. (Lukim 1 Korin 13:13.) Jehova yet i makim hap taim bilong em i ken malolo long wokim ol samting long graun. Yumi no inap save wanem ol nupela samting em bai kamapim long taim dispela malolo bilong em i pinis. (Stat 2:2, 3) Inap long olgeta taim bihain bai em i mekim ol gutpela samting long lain bilong em, na bai ol i kirap nogut long en. Na bai ol i bihainim laik bilong em na ol gutpela samting tru bai painim ol.
20. Yumi mas tingting strong long mekim wanem? Bilong wanem yumi mas mekim olsem?
20 Em nau, i gat ol dispela gutpela samting yumi wetim, olsem na yumi olgeta i mas beten oltaim na long dispela rot bai yumi stap klostu long Jehova. Na yumi no ken les long tenkyu long Papa bilong yumi long heven long olgeta blesing yumi kisim. Bihain bai yumi amamas long kisim olgeta gutpela samting yumi wet long en, na bai yumi kisim moa yet, winim ol samting yumi ting bai yumi kisim, long wanem, “olgeta samting yumi save askim God long mekim, ol i no inap tru long mak bilong strong bilong en,” na “i winim tru tingting bilong yumi.” (Efesus 3:20) Olsem na inap long olgeta taim bihain yumi mas litimapim nem bilong Jehova, em God bilong yumi, na givim biknem long em, na tenkyu long em, em i Man bilong “harim beten”!
Bai Yu Bekim Wanem Tok?
◻ Bilong wanem yumi mas beten oltaim na yumi no ken les long mekim?
◻ Beten bilong ol man i stap paslain long taim bilong ol Kristen i lainim yumi long wanem samting?
◻ Pasin bilong Jisas i lainim yumi long wanem samting long pasin bilong beten?
◻ Olsem wanem yumi ken putim ol hevi bilong yumi long Jehova? Na dispela bai helpim yumi olsem wanem?
[Piksa long pes 17]
Daniel i no les long beten, maski ol i tok long tromoi em long hul bilong ol laion