Meri i Mas Daun Olsem Wanem Long Man Bilong Em?
TAIM meri Kristen i marit, em i mas senisim sampela pasin bilong em. Taim em i no marit yet, em i bin bihainim laik bilong em yet tasol, na em i no gat man i bosim ol samting em i laik mekim. Tasol nau em i marit, na em i mas askim man bilong em pastaim, em i orait long ol samting meri i laik mekim, o nogat. Tasol ating bipo em yet i save tingting na mekim ol dispela samting. Bilong wanem i olsem?
Long wanem, taim Jehova i bringim namba wan meri i kam long namba wan man, Em i makim man bilong i stap bos o het bilong meri bilong em na ol pikinini tupela bai kamapim bihain. I stret em i mekim olsem, long wanem, taim wanpela lain i wok wantaim, i mas i gat wanpela man bilong go pas long ol na tokim ol long ol samting ol i mas mekim. Na insait long marit, Man bilong wokim yumi em i tok “man em i het bilong meri bilong en.”—Efesus 5:23.
Na Baibel i tok moa long dispela samting, olsem: “Yupela meri, yupela i mas aninit long ol man bilong yupela.” (Efesus 5:22) I gat tupela samting ating em i ken helpim meri long bihainim dispela tok. Namba wan samting em olsem: Em i laik daun long man bilong em o nogat? Na namba tu em olsem: Man bilong em bai mekim wok bos bilong em long wanem kain pasin? Taim tupela marit wantaim i kisim stretpela tingting long dispela samting, dispela i helpim meri marit na man bilong em na ol pikinini tu.
Em i No Ken Mekim Hatpela Pasin
Man i mas mekim wok bos long wanem kain pasin? Em i mas bihainim gutpela pasin bilong Jisas. Baibel i tok: “Man em i het bilong meri bilong en, olsem Krais em i het bilong [kongrigesen]. . . . Yupela man, yupela i mas laikim tumas ol meri bilong yupela, olsem Krais i laikim tumas [kongrigesen].” (Efesus 5:23, 25) Jisas i mekim gutpela wok bos, na dispela samting i helpim kongrigesen. Em i no mekim hatpela pasin. Ol disaipel i no pilim olsem em i putim planti tumas hevi long ol. Nogat. Em i sori long ol na mekim gutpela pasin isi long ol, olsem na ol i daun long em. Em i makim gutpela pasin ol man marit i ken mekim long meri bilong ol!
Tasol sampela man marit, ol i no bihainim gutpela pasin bilong Jisas. God i makim ol bilong i stap bos, tasol ol i tingim laik bilong ol yet tasol na ol i no helpim meri bilong ol. Ol i bosim meri bilong ol long hatpela pasin, na ol i tok meri bilong ol i mas daun tru long ol long olgeta samting, na planti taim ol i no laik bai meri bilong ol i mekim wanpela liklik samting long tingting bilong ol yet. Yumi save, meri bilong kain man olsem planti taim ol i no stap amamas. Na kain man olsem, em tu i no save amamas, long wanem meri bilong em i no inap laikim em tru na daun long em.
God i laik bai meri i tingim wok bos man i mas mekim long famili. Tasol sapos man i laik bai meri bilong em i amamas long i stap daun long em, orait em i mas mekim ol pasin em meri bilong em bai amamas long en, olsem na em i mas mekim ol pasin bilong man i bikpela pinis, na mekim ol gutpela pasin God i laik bai em i mekim bilong i stap bos bilong famili.
Tok Bilong Man i Namba Tu
Tasol man marit i no ken bosim meri bilong em long olgeta samting. Em i wankain liklik long pasin bilong Kristen long daun long gavman. God i tok ol Kristen “i mas i stap aninit long ol gavman.” (Rom 13:1) Tasol yumi mas tingim tu ol samting yumi mas givim long God. Jisas i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Sapos gavman (Sisar) i tok yumi mas mekim wanpela samting, tasol God i tok yumi no ken mekim, orait yumi mas bihainim tok bilong God. Pita i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29.
Sapos man bilong wanpela meri Kristen em i no gat wankain tingting olsem bilong em long ol lo Kristen na em i no save bihainim dispela lo, dispela meri i mas daun yet long man bilong em. Em i no ken bikhet long lo bilong God i tok meri i mas daun long man bilong em, tasol em i mas mekim pasin sori long man bilong em na tingim em, na long dispela rot em i ken traim kirapim man long tingim em. Sapos em i mekim ol gutpela pasin olsem, ating dispela pasin bilong em bai kirapim man bilong em long senisim pasin bilong em; em inap helpim man long kam insait long tok i tru. (1 Pita 3:1, 2) Sapos man bilong em i tokim em long mekim wanpela samting lo bilong God i tambuim, em i mas bihainim tok bilong God, long wanem God i namba wan Bos bilong em. Olsem: Sapos man bilong em i laik bai em i mekim sampela pasin nogut i gat sem, olsem man i givim em long narapela man inap liklik taim na man i kisim meri bilong dispela narapela man, em i no ken bihainim dispela tok bilong man bilong em. (1 Korin 6:9, 10) Em i mas bihainim maus bilong bel na daun long man bilong em, tasol em i mas daun long God pastaim, em bikpela samting.
Long taim bilong King Devit, Abigel i marit long Nabal, em wanpela man i no save tingim God. Nabal i bin mekim hatpela pasin long Devit. Devit wantaim lain bilong em i bin lukautim planti tausen ol sipsip na meme bilong Nabal, tasol taim Devit i singaut long liklik kaikai, Nabal i no laik givim kaikai long Devit.
Bihain Abigel i harim tok olsem man bilong em i no laik helpim Devit liklik, na long dispela as bikpela hevi i laik painim lain bilong em, olsem na Abigel i kisim sampela kaikai i go long Devit. “Kwiktaim em i bungim 200 bret na tupela skin meme ol i bin pulimapim wain long en, na 5-pela sipsip i kuk pinis na 20 kilogram wit ol i bin kukim long paia na 100 mekpas pikinini wain ol i bin mekim drai na 200 mekpas pikinini fik ol i bin mekim drai, na em i putim olgeta dispela kaikai long sampela donki. . . . Tasol em i no tokim man bilong en long dispela samting em i mekim.”—1 Samuel 25:18, 19.
Olsem wanem? Yu ting Abigel i mekim rong, long wanem em i mekim wanpela samting man bilong em i no laik mekim? Nogat. Tru em i mas daun long man bilong em, tasol em i no ken bihainim hatpela pasin bilong man bilong em, long wanem hatpela pasin bilong Nabal i mekim na inap olgeta lain bilong em i kisim bagarap long dispela. Devit i tokim Abigel olsem: “God, Bikpela bilong yumi Israel, i bin salim yu i kam nau, na yu bungim mi. Olsem na mi amamas na litimapim nem bilong en. Mi tenkyu long God long gutpela tingting na tok bilong yu, na em i ken mekim gut tru long yu.” (1 Samuel 25:32, 33) Na ol meri Kristen long nau tu, ol i no ken bikhet long man bilong ol, tasol sapos man bilong ol i bihainim pasin i no stret long Kristen, orait ol i no ken bihainim dispela pasin bilong man bilong ol.
Pol i tokim ol Efesus: “[Kongrigesen] i stap aninit long Krais. Olsem tasol yupela meri tu, oltaim yupela i mas aninit long ol man bilong yupela.” (Efesus 5:24) Pol i tok meri marit i mas “oltaim” aninit long man bilong ol. Tasol dispela i no makim olsem em i mas daun long man bilong em long olgeta samting. Pol i tok ‘meri i mas daun long man bilong em, olsem kongrigesen i daun long Krais,’ na dispela samting i helpim yumi long save gut long tok bilong Pol. Olgeta samting Krais i laik bai kongrigesen i mekim em i gutpela tasol, na i stret wantaim laik bilong God. Olsem na i no hatwok long kongrigesen i stap amamas na daun long em long olgeta taim. Na sapos wanpela man Kristen i wok strong long bihainim lek bilong Jisas na mekim gutpela wok bos, meri bilong em bai amamas long daun long em na bihainim tok bilong em long olgeta taim. Em i save man bilong em i tingim em, na em i save man bilong em i no inap tokim em long mekim wanpela samting em God i no orait long en.
Krais Jisas em i het o bos bilong man, na em i tokim lain bilong em long narapela i mas laikim tru narapela. Olsem na sapos man marit i bihainim gutpela pasin bilong Jisas, meri bilong em bai laikim tru em na daun long em. (Jon 13:34) Man marit i gat sin na em i save popaia long sampela taim, tasol sapos em i bihainim pasin bilong Jisas long mekim wok bos bilong em, i no hatwok long meri bilong em i amamas long i stap daun long em na larim man i stap bos. (1 Korin 11:3) Sapos meri marit i wok long kisim gutpela pasin Kristen, olsem pasin bilong tingim narapela man na pasin sori, bai i no hatwok long em i daun long man bilong em.
Pasin Daun na Gutpela Pasin
Ol man na meri marit ol i olsem brata sista Kristen insait long kongrigesen, na long ai bilong Jehova ol i wankain tasol. (Lukim Galesia 3:28.) Tasol God i makim ol man long lukautim kongrigesen. Na ol meri i gat gutpela bel ol i tingim dispela samting na ol i daun long ol brata insait long kongrigesen. Ol strongpela brata long kongrigesen ol i save ol i gat bikpela wok tru insait long kongrigesen, na ol i mas was gut, nogut ol i daunim ol manmeri God i bin putim long han bilong ol.—1 Pita 5:2, 3.
Sapos kain pasin olsem i stap insait long kongrigesen, i no gat as na man marit i ken mekim hatpela pasin long meri bilong em, olsem sista spirit bilong em, a? Na i no gat as na meri i ken tingting long daunim man na mekim wok bos insait long famili, a? Ol i mas bihainim tok bilong Pita, em Pita i stori long pasin olgeta long kongrigesen i mas bihainim, em i tok: “Yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet.” (1 Pita 3:8) Na Pol i tok: “Yupela i mas kisim olkain pasin olsem: Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”—Kolosi 3:12, 13.
Olgeta insait long kongrigesen i mas wok long kisim dispela kain tingting. Na man na meri marit i mas wok moa yet long bihainim. Man marit i ken kamapim gutpela pasin isi bilong em na putim yau taim meri bilong em i kamapim tingting bilong em long wanpela samting. Taim man i laik tingim ol samting famili i mas mekim, em i mas harim tingting bilong meri bilong em pastaim. Ol meri Kristen ol i gat tingting tu. Ol inap givim sampela gutpela tok long man bilong ol, olsem Sara i bin mekim long man bilong em, Abraham. (Stat 21:12) Tasol meri Kristen i no ken strong tumas long man bilong em. Em tu i mas kamapim pasin isi na pasin daun, na bihainim tok bilong man bilong em na wanbel wantaim man long samting man i tingting pinis long mekim, maski sampela taim tingting bilong em i narapela kain long tingting bilong man bilong em.
Sapos man marit i gat gutpela pasin, olsem em i save harim tingting bilong meri bilong em, orait meri bai amamas long toktok wantaim em, kain olsem ol brata sista i save amamas long toktok wantaim wanpela elda i gat gutpela pasin na i save harim gut tingting bilong narapela man. Na meri marit bai mekim gutpela pasin long man bilong em na sori long em na daun long em, long wanem em i save man bilong em i wok strong long mekim gutpela wok bos bilong em, maski em i gat sin na ol hevi bilong graun i laik daunim em. Taim man na meri marit wantaim i wok long bihainim ol dispela gutpela pasin, bai narapela i no hatwok long harim tok na daun long narapela. Tasol dispela samting bai helpim tupela long i stap amamas na bel isi wantaim.