Em Wanpela Wok Yu Mas Mekim?
JEHOVA i putim ol gutpela samting tru long graun bambai yumi ken kisim gutpela sindaun, na long dispela rot em i kamapim klia olsem em i Man bilong givim planti gutpela samting long olgeta man na bai ol i no sot long wanpela samting. Maski Adam tupela Iv i bikhet long em, em i larim ol dispela gutpela samting i stap. Na tu, em i kamapim bikpela sori bilong em taim em i salim Pikinini bilong em i kam long graun bilong kisim bek ol man i bilip long em na bai ol i no ken lus.—Matyu 5:45; Jon 3:16.
Orait, yumi ken mekim wanem bilong kamapim bel bilong yumi olsem yumi pilim tru dispela sori bilong em? Jisas i tok, yumi mas laikim tru Jehova, em God bilong yumi, long bel olgeta na long laip olgeta na long tingting olgeta na long strong olgeta bilong yumi. Bilong mekim olsem, yumi mas lotu long em na stap gut long em na bihainim laik bilong em.—Mak 12:30; 1 Pita 4:2.
Tasol yumi mas mekim wanem na bai yumi bihainim laik bilong God? Olsem wanem? I gat wanpela wok bilong em yumi ken insait long en?
I Mas i Gat Ol Wokman Bilong God
Ol misin i paulim tingting bilong ol man, olsem na ol i no save gut long pasin tru bilong lotu long God na mekim wok bilong em. Tasol Baibel i kamapim klia olsem i gat wanpela lain tasol i lotu tru long God, na i gat “wanpela Bikpela tasol, na wanpela pasin bilong bilip, na wanpela baptais tasol.” Jisas i tok: “Olgeta man i laik lotu tru bai ol i lotu long Papa long strong bilong Holi Spirit na long pasin i tru.” Olsem na Baibel i tok: “Yupela olgeta i mas wanbel long ol toktok yupela i mekim. Yupela i no ken bruk nabaut.”—Efesus 4:3-6; Jon 4:23; 1 Korin 1:10.
Long Iden Satan i gat tok long God i stap bos na i olsem em i tok pasin bilong God long bosim ol samting i no stret, na kirap long dispela taim ol man i paul na i no save long pasin tru bilong lotu long God. (Stat 3:1-6, 13) Satan i birua long God na bilong mekim yet dispela pasin em i kamapim ol tok giaman, na ol man i giaman na tok ol i wokman bilong God ol i autim ol dispela tok. Ol i “senisim pasin bilong ol na i mekim olsem ol wokman bilong stretpela pasin.” Olsem na Baibel i tok: “Ol pren, planti giaman profet i save raun nabaut long graun. Olsem na yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ ”—2 Korin 11:14, 15; 1 Jon 4:1.
Yumi ken amamas God i wokim rot bilong stretim dispela bikpela tok o askim olsem: I stret husat i mas i stap bos? God i salim pinis Pikinini bilong em i kam long graun bilong baim bek ol manmeri, na nau em i givim wok king long dispela Pikinini, em Jisas, long bosim Kingdom bilong Em long heven na Jisas i gat namba bilong bagarapim Satan wantaim ol profet o wokman bilong em. Long dispela rot, laik bilong God bai kamap long graun na ol manmeri i bihainim tok bilong em bai ol i stap gut oltaim.—Daniel 7:13, 14; Hibru 2:9.
Satan i bin haitim ol dispela tok i tru. (2 Korin 4:4) Olsem na yumi mas kamap wokman bilong God na kamapim long ples klia ol tok giaman bilong Satan na autim tok i tru. Jehova i no subim yumi long mekim dispela wok, nogat. Jisas i amamas long mekim dispela wok, na Jehova i laik bai yumi tu i amamas long mekim, long wanem yumi pilim tru ol gutpela pasin bilong em na ol gutpela samting em i bin mekim bilong helpim yumi.—Buk Song 110:3; Hibru 12:1-3.
Wok Kristen
Jisas i “raun long ol taun na ol ples na em i wok long autim gutnius bilong kingdom bilong God.” (Luk 8:1) Na tu, em i lainim ol disaipel bilong em long kamap wokman bilong God olsem em yet na em i salim ol i go long autim tok. (Matyu 10:1-14, 27) Bihain em i tokim ol long mekim dispela wok i go inap long olgeta hap bilong graun.—Matyu 28:19, 20; Aposel 1:8.
Olgeta Kristen tru i mas mekim dispela wok na spirit bilong God i kirapim ol long autim tok. Olgeta man i bilip long gutpela tok bilong Kingdom ol i mas autim bilip bilong ol, olsem ol man i bin mekim long de Pentikos long yia 33 C.E.—Aposel 2:1-4, 16-21; Rom 10:9, 13-15.
Tasol planti man i ting ol i no inap mekim dispela wok. Wanpela Witnes Bilong Jehova, nem bilong em Pita, em i tok: “Long kantri Jemani, ol man i sem long toktok wantaim narapela man long samting bilong lotu. Ol i tok, ‘em wok bilong ol pris pasto.’ ” Narapela Witnes, nem bilong em Toni, em i mekim wok misineri inap planti yia, na em i tok, ol manmeri long Inglan i save tokim em olsem: “Tok bilong yu i gutpela, na mi ting ol Witnes Bilong Jehova ol i gutpela man. Tasol sori tru, mi yet mi no inap i go long ol haus na autim tok long ol man.” Ben i lainim wanpela man bilong Naijiria long Baibel na bihain liklik dispela man i tokim em: “Mi no laik bai ol man i lukim mi i go long ol haus na autim tok. Tasol mi inap givim mani long kongrigesen bilong helpim ol man i gat laik long mekim dispela wok.” Tru tumas, planti man i no gat strongpela bilip bilong kirapim ol long mekim dispela wok Kristen.
Tasol wok bilong i go long ol haus na autim tok long ol man em wok bilong olgeta insait long kongrigesen Kristen, maski ol i man o meri, yangpela o lapun. Em i no wok bilong ol elda na ol wokman bilong kongrigesen tasol, em ol i olsem “lida” bilong kongrigesen. Nogat. Em i wok bilong olgeta Kristen. Baibel i tokim olgeta Kristen olsem: “Givim biknem long God, . . . na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en. . . . Yupela i mas bihainim tok bilong ol [lida bilong yupela].”—Hibru 13:15, 17.
Taim Jisas i mekim tok long maunten long ol kain kain man i kam bung em i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.” Long narapela taim Jisas i kamapim klia olsem ol man i bihainim laik bilong God ol i mas autim tok tu long ol man i no bilip. Jisas i autim tok long sampela Samaria na ol disaipel i laik bai em i lusim dispela wok na kisim kaikai, na em i tokim ol: “Kaikai bilong mi, em long bihainim laik bilong God. Em i bin salim mi na mi kam, na mi mas pinisim wok bilong em.”—Matyu 7:21; Jon 4:27-38.
Em Wanpela Wok Yu Mas Mekim Oltaim?
Planti man i moa laik long kisim kaikai bilong skin na mani kago samting, winim ol samting bilong God. Tasol taim Jisas i mekim dispela tok long maunten, em i tokim ol lain i kam harim tok long ol i no ken tingting planti long kisim ol dispela samting bilong skin. Em i tok: “Yupela i mas bungim ol gutpela samting bilong yupela long heven. . . . Yupela i mas wok pastaim long painim kingdom bilong God wantaim stretpela pasin bilong em.”—Matyu 6:20, 33, Nupela Testamen na Ol Sam bilong 1988.
Sapos yumi laik wok pastaim long painim Kingdom bilong God, orait yumi no ken larim ol narapela samting i stap namba wan, winim wok bilong God yumi mas mekim. Tasol i no olsem yumi no ken tingim ol narapela samting, nogat. Olsem: Baibel i strong long yumi no ken lusim ol wok i stret yumi mas mekim bilong helpim famili. Olgeta manmeri i gat dispela wok. Sapos man o meri i no mekim dispela wok, i olsem em i no bihainim pasin Kristen. (1 Timoti 5:8) Tru, yumi mas givim bel long mekim wok autim tok inap long skel bilong yumi, tasol yumi mas lukautim tu ol narapela wok bilong yumi.
Jisas i tok: “Bai ol i autim dispela gutnius bilong kingdom . . . bai olgeta lain manmeri i ken harim, na bihain tasol bai las de i kamap.” (Matyu 24:14) Ol tok i stap klostu long dispela tok profet i makim truim bilong en i mas kamap long taim bilong yumi. Kirap long 1914 i kam inap long nau i gat gutpela tok olsem: Dispela Kingdom i kisim strong pinis long helpim wok bos bilong Jehova na bilong daunim Satan wantaim ol manmeri em i stap bos bilong ol. (Kamapim Tok Hait 11:15-18) Olsem na yumi mas tingting gut. Las de bai kamap, na paslain long dispela yumi mas inapim dispela wok bilong autim tok. Bagarap i laik painim ol lain manmeri, tasol yumi inap helpim planti bilong ol long abrusim dispela.
Mekim Moa Yet Dispela Wok
Planti Witnes Bilong Jehova i save lusim 10-pela aua samting long olgeta mun long autim gutpela tok bilong Kingdom. Planti tausen, olsem ol painia haptaim, i save lusim tupela aua samting long olgeta wan wan de long autim tok. Na sampela moa i mekim wok painia oltaim na painia salim long olgeta taim. Ol i pilim olsem dispela wok em i bikpela wok ol i mas hariap long mekim long nau, na ol i laik insait moa yet long en, na bai dispela wok em inap pinis taim las de i no yet, em taim bilong olgeta hevi bilong dispela graun i mas pinis.
Olsem wanem? Yu wanpela Witnes Bilong Jehova na yu save autim tok? Sapos olsem, orait, wok strong long mekim moa yet dispela wok. Wok long mekim gutpela moa wok bilong autim tok na lainim ol man, na bai yu inap mekim bikpela wok moa. Sapos yu inap mekim wok painia, gutpela yu mekim. Sapos i gat sampela samting tru i pasim yu long mekim, orait, kirapim ol narapela long mekim, em ol inap mekim dispela wok.
Sapos yu no dediket yet long Jehova olsem wanpela Witnes Bilong Jehova, nogut yu tok dispela wok bilong autim tok i no bilong yu. Nogat. Wanpela ensinia, nem bilong em Pita, em i no laik tru long meri bilong em i autim tok bilong Kingdom long ol narapela. Em i save tok olsem: “Mi no inap tru larim meri bilong mi i autim tok long ol man long ol haus.” Tasol inap planti yia liklik em i lukim meri bilong em i stap strong long ol tok i tru bilong Baibel, olsem na bihain em tu i kirap long stadi long Baibel. Na nau em i dediket na baptais na kamap wokman bilong autim tok bilong Kingdom wankain olsem meri bilong em.
Olsem na yu no ken pasim yu yet long mekim dispela gutpela wok Jehova i givim long yumi. Mipela i laik strongim yu long stadi long Baibel na bung wantaim ol Kristen tru long ol miting bilong ol. Dispela bai helpim yu long senisim wokabaut bilong yu na bai yu inap bihainim stretpela pasin bilong God na wok long strongim bilip bilong yu long ol samting God i laik mekim. Sapos yu mekim olsem, bai God i orait long yu tu i kamap wokman bilong em. Na bai yu inap insait long gutpela wok Jisas i givim long yumi olsem: “Yupela i mas i go mekim olgeta lain manmeri i kamap disaipel bilong mi. . . . lainim ol long bihainim olgeta tok mi bin givim long yupela.”—Matyu 28:19, 20.
Tru tumas, i gat wanpela wok yu inap insait long en, na yu mas hariap na insait long en—yu no ken lusim taim.
[Blok long pes 25]
Wanpela nes i gat famili bilong lukautim, em i tok: “Mi save lusim wanpela aua samting long olgeta de long kam long haus sik bilong mekim wok, olsem na mi ting mi no inap mekim wok painia haptaim. Tasol mi stretim gut rot bambai mi inap autim tok long moningtaim tru paslain long mi kam long wok, na long taim bilong belo samting, na long ol de mi no wok. Taim mun i pinis mi amamas nogut tru, long wanem mi bin lusim 117 aua long autim tok long ol man! Mi bin tilim 263 magasin, na 22 sabskripsen bilong ol magasin na mi kirapim 3-pela Baibel-stadi.”
[Blok long pes 27]
Maikel i gat 7-pela pikinini, na em i holim bikpela wok long wanpela hai-skul long Naijiria. Em i wanpela elda tu long kongrigesen. Tingting bilong em i wankain long planti tausen Witnes. Em i tok:
“Mi tingim wok bilong autim tok i olsem wok tru bilong mi na olgeta taim mi tingim wanpela tok bilong Pol olsem: ‘Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap.’ Mi wantaim meri bilong mi i save ‘planim kaikai’ taim mipela i autim tok long ol man long haus long ol gutpela tok. Mipela i givim ‘wara’ taim mipela i go bek lukim ol man bambai mipela i ken lainim ol long tok bilong Baibel, olsem Jisas i tokim mipela long mekim. Pasin bilong stadi Baibel wantaim ol man long olgeta wik i bin helpim planti man, na sampela famili olgeta, long kisim save long tok i tru.”