Gutpela Samting Bilong Wetim i Daunim Bel Hevi!
WANPELA buk (Webster’s Ninth New Collegiate Dictionary) i tok taim man i bel hevi, em i pilim olsem ‘em i no gat wanpela gutpela samting bilong wetim.’ Olsem na sapos yumi laik daunim bel hevi, yumi mas i gat gutpela samting bilong wetim i kamap bihain!
Sapos man i no gat ples slip na em i mas slip long rot, bai em i bel hevi. Tasol sapos em inap wetim gutpela samting bai painim em, dispela bai helpim em long daunim bel hevi bilong em. Na ol man i gat sik bilong bel hevi, sapos ol inap wetim gutpela samting, dispela bai helpim ol long stap strong na karim hevi bilong ol. Tasol dispela samting ol i wetim i mas i gat as bilong en!
As Bilong Samting Ol i Wetim
Tingim Sara, meri bilong Abraham. Em i winim pinis 89 krismas na em i no karim wanpela pikinini. Tasol taim man bilong em i gat 99 krismas, Jehova i kolim gen wanpela tok promis em i bin mekim planti yia bipo—Abraham bai i gat wanpela pikinini. Abraham i save dispela tok promis i gat as bilong en. Na tingim bikpela amamas i bin painim Sara taim em i karim Aisak. (Stat 12:2, 3; 17:1-4, 19; 21:2) Abraham i bilip long God, na bilip bilong em i no lus nating, olsem aposel Pol i tok: “God i bin promis long mekim ol dispela samting, na Abraham i ting long dispela promis na em i no tubel . . . Bilip bilong en i strongim em.”—Rom 4:20.
Pol i raitim pas long ol Juda i bin kamap Kristen, na em i tok i gat tupela as na ol inap bilip long tok promis bilong God long em bai kisim bek ol man long rot bilong Jisas. Em i kolim promis God i bin mekim long Abraham na tok tru antap bilong God, na em i tok: “God i mekim promis long em bai i mekim gut tru long yumi . . . na em i tok tru antap bilong strongim tok bilong em yet. Olsem na nau i gat tupela tok i stap, em promis bilong God na dispela tok tru antap em i bin mekim. Tupela i no inap senis, na long dispela tupela tok God i no inap tru long giaman. Olsem na . . . yumi ken tingim dispela promis bilong God na yumi ken strongim tru bel bilong yumi long wet long kisim ol dispela samting.” (Hibru 6:16-18) Tru tumas, ol tok promis bilong God bai kamap tru—ol i no inap popaia liklik.
“Gutpela” na “Strongpela” Bilip
Olsem na Pol i tok, bilip bilong ol Kristen long ol samting ol i wetim i “gutpela” na “strongpela.” (Hibru 6:19) Pol i save long as bilong ol samting em i wetim. Em i tok: “Dispela [bilip] i go insait olgeta long Rum Tambu Tru, baksait long bikpela laplap.” Wanem insait bilong dispela tok? Pol i stori long haus lotu long Jerusalem long bipo. Namel long Rum Tambu Tru na Rum Tambu i gat wanpela bikpela laplap i hangamap i stap. (Kisim Bek 26:31, 33; Matyu 27:51) Dispela haus lotu long Jerusalem i bin bagarap longtaim pinis. Orait dispela Rum Tambu Tru i makim wanem samting long nau?
Em i makim heven stret, em ples God i stap king long en! Pol i kamapim klia dispela samting taim em i stori long Jisas i kirap bek na i go long heven. Em i tok: “Krais i no bin i go insait long haus lotu ol man i wokim long han [haus lotu long Jerusalem] na em i piksa tasol bilong haus lotu tru bilong God. Nogat. Em i go insait long heven stret. Na nau em stap klostu tru long God, na em i wok long helpim yumi.” (Hibru 9:24) Ol samting yumi ol Kristen i wetim i helpim yumi long daunim bel hevi. Wanpela samting i bin kamap long heven na dispela i as bilong bilip bilong yumi long ol gutpela samting yumi wetim. God i makim Krais Jisas, na em i givim laip bilong em bilong baim bek yumi, na nau em i sanap long ai bilong God bilong helpim yumi. Dispela samting em i as bilong bilip bilong yumi. (1 Jon 2:1, 2) Planti taim dispela nius i tokaut olsem God i bin makim Jisas bilong mekim wok king long Kingdom, na em i kirap mekim dispela wok long yia 1914. Klostu nau na bai dispela Kingdom i pinisim olgeta samting i save mekim man i stap bel hevi.
Samting Yumi Wetim i Olsem “Anka Bilong Laip Bilong Yumi”
Ol man Pol i raitim pas i go long ol, ol i bilip olsem ol inap kisim laip long rot bilong Jisas. Bilong helpim ol na bai ol i ken save bilip bilong ol i gat as bilong en, Pol i tok: “Samting God i tokim yumi long wetim, dispela i stap olsem gutpela strongpela anka bilong laip bilong yumi.”—Hibru 6:19.
Ol man bilong raun long sip, olsem Pol, ol i save gut long wok bilong anka. Ol anka bilong bipo ol i wankain liklik long ol anka bilong nau, na planti taim ol i bin wokim long hap ain i gat tupela sap bilong en bambai em inap pas strong long as bilong solwara. Taim Pol i go long Rom long yia 58, sip em i stap long en i laik i go pas long ples i gat ston. Ol i kam moa, na ol boskrus i “tromoi 4-pela anka long stan bilong sip.” Ol dispela anka i pas gut, olsem na sip i no bagarap.—Aposel 27:29, 39, 40, 44.
Orait, yu mas mekim wanem na bilip bilong yu bai stap olsem wanpela anka, na taim hevi bilong mani o sik o narapela hevi i painim yu, bilip bilong yu bai stap strong? Yu mas save tru olsem ol tok bilong Baibel i gat as bilong en. “Yupela i mas skelim gut olgeta tok na pasin.” (1 Tesalonaika 5:21) Olsem: Taim ol Witnes Bilong Jehova i laik toktok wantaim yu, putim yau long tok bilong ol. Sapos wan wan taim tasol ol i kam long hap bilong yu, go painim ol long Haus Kingdom i stap klostu long yu. Ol i no ken strong long yu mas kam insait long lain bilong ol, tasol bai ol i helpim yu long kisim save long tok bilong Baibel, no gat pe. Ol bai makim taim na ples i stret long yu bilong stadi wantaim yu.
Taim yu stadi wantaim ol, bai yu save “God i save mekim gut tru long ol man i wok long painim em.” (Hibru 11:6) Bai yu kisim save olsem klostu nau bai Kingdom bilong God long han bilong Krais Jisas bai pinisim olgeta samting i save mekim man i stap bel hevi long nau. Taim Kingdom i bosim dispela graun, graun bai kamap ples paradais gen, na God bai givim laip oltaim long ol man i laikim tumas em. (Buk Song 37:29; Kamapim Tok Hait 21:4) Em wanpela gutpela samting tru bilong wetim i kamap long bihain!
Kaunim gut Baibel na bai yu ken save dispela gutpela samting yu inap wetim i gat as tru bilong en. Nau yu mas wok long go klostu long God, na kamap pren tru bilong em, olsem Abraham. (Jems 2:23) Jehova em i Man bilong “harim beten,” olsem na yu mas tokim em long olgeta hevi bilong yu na dispela samting bai helpim yu long daunim bel hevi bilong yu. Ating bai spirit bilong God i helpim yu long stretim ol samting i wok long givim hevi long yu.—Buk Song 55:22; 65:2; 1 Jon 5:14, 15.
“Holimpas”!
Pol i tok ol disaipel i mas “skelim gut olgeta tok na pasin,” na ol i “mas holimpas ol gutpela pasin.” (1 Tesalonaika 5:21) Wanpela rot bilong mekim olsem, em yu mas poromanim ol man i holimpas wankain bilip. King Solomon i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Yu no ken tingting nogut long man bilong narapela lain, na tu, yu no ken sem long yu yet, nogut ol dispela samting i pasim yu long painim ol gutpela poroman. Namel long lain bilong Jehova i gat sampela man, em bipo ol i no gat gutpela samting bilong wetim. Tasol ol i bin kisim save long tok bilong Baibel, na ol i amamas long bung wantaim ol wanbilip bilong ol, na dispela i helpim ol long i stap klostu moa long Jehova, na nau bilip bilong ol i gat strongpela as bilong en. Dispela samting inap daunim bel hevi bilong man.
Yumi ken tingim Anmari. Man bilong em i mekim nogut tru long em na em i pilim olsem em i no gat rot na em i bel hevi tru. Em i tok: “Mi tingting pinis long kilim i dai skin bilong mi yet, tasol pastaim mi beten long God. Mi tokim em olsem, ‘Bilong wanem yu no helpim mi? Mi bilip long yu inap longpela taim pinis, tasol yu no helpim mi.’ Mi beten pinis na mi pilim olsem i no gat as bilong i stap bilong mi, olsem na gutpela mi dai. Nau mi harim wanpela man i paitim dua bilong haus. Mi tingting olsem mi no ken opim dua long em na bai em i lusim haus bilong mi na i go.
“Tasol nogat. Em i wok long paitim yet dua, na mi tingting planti. Mi rausim aiwara long ai bilong mi, na mi go lukim husat i sanap i stap. Mi laik lusim em hariap na kam kilim i dai skin bilong mi. Tasol samting i no kamap olsem mi bin tingting long en, na mi tenkyu tru long Jehova. Mi opim dua, na mi lukim tupela meri i sanap i stap. Tingting bilong mi i paul liklik, na mi no klia long tok bilong ol. Ol i givim wanpela buk long mi i stori olsem i gat as bilong i stap bilong yumi. Em gutpela buk tru na mi pilim olsem i gutpela sapos mi stap laip.” Tupela i pasim tok long stadi Baibel wantaim em long olgeta wik. Anmari i lain long kamap pren bilong God, na nau i gat as bilong i stap bilong em. Nau em i wok long helpim ol narapela man long bilip na wetim God i helpim ol.
Ating sampela taim yu wok long painim rot bilong daunim bel hevi, na yu no save long ol samting yu mas mekim. Tasol sapos sampela taim yu bin beten olsem, “Kingdom bilong yu i mas i kam,” orait yu bin beten long Kingdom bilong God i mas kamap, na dispela Kingdom yet bai pinisim olgeta samting i save mekim na ol man i stap bel hevi tru. (Matyu 6:10) Taim yu yet yu stadi na kisim save long tok bilong Baibel, na taim yu poroman wantaim ol narapela man i bilip long ol samting Kingdom bai mekim, dispela bai helpim yu long bilip strong long Kingdom bilong God bai kam na kamapim bek Paradais long graun. (1 Timoti 6:12, 19) Holim strong dispela gutpela samting long tingting bilong yu na em bai helpim yu long daunim bel hevi bilong yu. Tru tumas, “sapos yumi wetim God i helpim yumi, orait yumi no save wet nating.”—Rom 5:5.
[Piksa long pes 7]
Taim yumi kisim save long tok bilong Baibel, nau yumi save i gat gutpela samting bilong wetim, olsem “anka bilong laip bilong yumi”